১ পিতর 4 - Chakma Bible

গোজেনত্যে জিংকানি কাদানা

¹ সেনত্যে খ্রীষ্ট কিয়্যেদি দুঘ্ সোজ্জ্য গোজ্জ্যে বিলিনে তুমিয়ো নিজো মনভিদিরে সেই একই মনভাব গরঅ, কিয়া কিয়্যেদি যে দুঘ্ ভোগ্ গোজ্জ্যে তে পাপর্ অভ্যেচ্চান ছাড়ি দিয়্যে।

² সিয়েনত্যে এই জগদর্ বাগি জিংকানিগান তে আর জগদর্ কামনা-বাসনা ঈল্ মারেইনে ন-কাদায়, বরং গোজেনর্ আওজ্‌ পালেইনে কাদায়।

³ যিগুনে গোজেনরে ন-জানন্ তারা ধোক্ক্যেন তুমিয়ো আগে পর্‌‌পাগোল্যে ওইনে, ভান্ন্যেই কামনা-বাসনালোই থেইনে, মাত্তল্ গুরিনে, হৈ-হল্লা গুরি মদ খেইনে আর হানা-দানা গুরি আর জঘন্য মুত্তি-পূজো গুরিনে বোউত্ সময় কাদেয়ো।

⁴ মাত্তর্ ইক্কিনে সেই মানুচ্চুনে দেগিনে আমক্ অন্ যে, তুমি তারার্ সেই জঘন্য কজবরলত্ আর ন-মিযোর্, আর সেনত্যে তারা তমা বিরুদ্ধে নিন্দের্ কধা কন্।

⁵ মাত্তর্ যিবে জেদা আর মরা বেক্কুনোর্ বিচের্ গুরিবাত্যে যুক্কোল্ ওই আঘে তাইধু তারার্ ইজেব দিয়্যে পড়িবো।

⁶ মরাগুনো ইধু দঅ সেনত্যে খ্রীষ্ট পৌইদ্যেনে গম হবর্ ফগদাং গরা ওইয়্যে, যেন কিয়্যেগান ইন্দিত্তুন্ মান্‌জ্য ধোক্ক্যেন বিচের অলেয়ো আত্মায় তারা গোজেন ধোক্ক্যেন জেদা থেই পারন।

⁷ ইক্কিনে বেক্কানির্ থুমো সময় ওইয়্যেগি। সেনত্যে তমা মনানি থির্ গরঅ আর নিজোরে দোঙেই রাগঅ যেন তবনা গুরি পারঅ।

⁸ আর বেগত্তুন্ দাঙর্ কধাগান অলঅ, তুমি একজন আরেকজনরে যদবদে কোচ্‌পেইয়ো, কিয়া কোচ্‌পানাগানে ভালক্কানি পাপরে ঢাগি রাগায়।

⁹ কনঅ বাবোত্যে কাঙেলেত্যে ন-পেইনে তুমি একজন আরেকজনরে গর্বা ইজেবে মানি লঅ।

¹⁰ গোজেনর্ নানান্ বাবোত্যে দোয়্যে পেইনে যে মানুচ্চো বিশ্বেজ্ গুরিনে সিয়েন কামত্ লাগেয়্যে, সেবাবোত্যে মানুচ্ ইজেবে তুমি গোজেনত্তুন্ যেধোক্ক্যেন দান পেইয়ো সিয়েন একজন আরেকজনর্ সেবা গুরিবাত্যে বেবহার গরঅ।

¹¹ যুনি কেঅ ফগদাং গরে সালে তে এবাবোত্যে গুরি ফগদাং গোরোক যেন তে গোজেনর্ নিজোর্ মুয়ো কধা কর্। যুনি কেঅ সেবা গরে সালে তে গোজেনর্ দিয়্যে বল্লোই সেবা গোরোক্, যেন যীশু খ্রীষ্টর্ মাধ্যমে বেক্কানিত্ গোজেনর্ বাঈনী পায়। বাঈনী আর খেমতা উমরত্যে তার্। আমেন।

খ্রীষ্টান ইজেবে দুঘ্ পানা

¹² পরাণর্ সমাজ্যেগুন, তমার যে ইক্কিনে নানান্-পোরোক্ষ্যের্ মাধ্যমে যা পরের্ সিয়েন্দোই দিস্‌কাউলু অবার নয়, তমা উগুরে অামক্ কিজু এক্কান অর্।

¹³ সিয়েনত্তুন্ বরং তুমি যে খ্রীষ্টর্ দুঘ্ ভুগোনার ভাগ লর্ সিয়েন্দোই হুজি অ, যেন তার্ মহিমাগান যেক্কে ফগদাং অবঅ সেক্কে তুমি হুজি অ।

¹⁴ তুমি যুনি খ্রীষ্টত্যে অগমান্‌অ অ সালে তুমি বর্‌পেইয়্যে, কিয়া গোজেনর্ মহিমাবলা আত্মাগান তমা উগুরে আঘে।

¹⁵ তমা ভিদিরে কেঅ খুনী, চুর্, অন্যেয় গুরিয়্যে ওইনে বা অন্যেয় গুরিনে অন্য পৌইদ্যেনে আঢ্ দিইনে দুঘোত্ ন-পোড়োক্।

¹⁶ মাত্তর্ খ্রীষ্টান ইজেবে যুনি কেঅ দুঘোত্ ভুগোন্ সালে তে ন-লাজোক্, বরং তার সে নাঙান্ আঘে বিলিনে তে গোজেনর্ বাঈনী গোরোক্।

¹⁷ বিচের আরাম্ভ অবার সময় ওইয়্যে আর সিয়েন গোজেন পরিবারর্ মানুচ্চুনোত্তুন্ ধুরি আরাম্ভ গরা অবঅ। আর যুনি সেই বিচেরান আমাত্তুন্ ধুরি আরাম্ভ গরা অয় সালে যিগুনে গোজেনর্ দিয়্যে গম হবরান মানি ন-লন্ তারার অবস্থা কি অবঅ?

¹⁸ পবিত্র বোইবোত্ আঘে, গোজেন-ভক্ত মানুচ্চুনোর্ উদ্ধোর্ পানা যুনি এদক্ আগাত্যে অয়, সালে যিগুনে পাপী আর গোজেন উগুরে ভোক্তি নেই, তারার্ অবস্থা কি অবঅ?

¹⁹ সালে গোজেনর্ আওজে যিগুনে দুঘ্ পাদন, তারা তারার্ বিশ্বেজ্‌বলা গোজেন আঢত্ নিজোরে তুলি দেদোক্ আর গম কাম গোরোদোক্।