১ পিতর 3 - Chakma Bibleনেক্ আর মোগত্যে উপদেজ্ 1 সেবাবোত্যে তুমি যিগুনে মোক্, তুমি পত্তিজনে নেগর্ অধীনতা মানি লঅ, যেন তারা ভিদিরে কেঅ কেঅ গোজেনর্ কধানি বিশ্বেজ্ ন-গুরিলেয়ো তমা চালচলন্ খ্রীষ্ট ইন্দি তারারে টানে। ইয়েনত্ তমার এক্কান কধায়ো কুয়ো ন-পড়িবো, 2 কিত্যে তারা নিজেই তমার পবিত্র জিংকানিগানি আর গোজেন উগুরে ভোক্তিগানি দেগিবাক্। 3 নানান্ বাবোত্যে চুল্ সুদো, গয়নাগাটি বা দোল্ দোল্ কাবড় এবাবোত্যে বারেদি সাজ্-পোজাক্কোই নিজোরে সাজেবাত্যে কামত্ ন-রাগেয়ো, 4 বরং যিবের্ দোল্ জিনিচ্সান ভস্ত ওই ন-যেবঅ সে নরম আর শান্ত- খাচ্চ্যদ্তোই তমা মনানিরে সাজঅ। গোজেনর্ চোগেদি সিয়েনই বেশ্ দামী। 5 পুরোণি কালর্ যে গোজেন-ভক্ত মিলেগুনে গোজেন উগুরে আজা রাগেদাক্ তারা নিজোর্ নিজোর্ নেগ অধীনোত্ থেইনে এবাবোত্যে গুরি নিজোরে সাজেদাক্; 6 যেন্ সারা অব্রাহামর বাধ্য এলঅ আর তারে প্রভু বিলিনে ডাগিদো। তুমি যুনি কনঅ বাবদে দরানরে নিজো উগুরে কাম গুরিবাত্যে ন-দিইনে যিয়েন গম সিয়েনই গরঅ সেক্কে ইয়েনই প্রমাণ অবদে যে, তুমি সারার্ যগাজ্জ্যে পুয়ো-ছা। 7 ঠিগ সেবাবোত্যে গুরি তুমি যিগুনে নেক্, তুমি বুদ্ধি বিবেচনা গুরিনে মোগো সমারে বজত্তি গরঅ। তারা তমার দুর্বল সমাজ্জ্যে, আর তারায়ো তমা সমারে গোজেনর্ দোয়্যের্ দান ইজেবে জিংকানি পেবাক্। সেনত্যে তারারে সর্মান গরঅ যেন তমার তবনাগানি লবাদোস্যে ন অয়। দুঘোত্ ভুগোনা পৌইদ্যেনে 8 শেজদি কং, তমার বেক্কুনো মনানি যেন একবাবোত্যে অয়। তুমি একজন আরেকজনর্ দুঘে দুঘ্ পঅ, ভেইয়ো ধোক্ক্যেন কোচ্পানার মনভাব রাগঅ আর দোয়্যেলু আহ্ চিদে অ। 9 অন্যেয়র্ বদলে কার উগুরে অন্যেয় ন-গোজ্জ্য বা কেঅ গেইল্ দিলে তারে ফিরেইনে গেইল্ ন-দুয়ো, বরং তারাত্যে বর্ মাখ্য; কিয়া আশিদ্বাদ পেবাত্যে গোজেনে তমারে ডাক্ক্যে। 10 পবিত্র বোইবোত্ লেগা আঘে, যে সুগী জিংকানি কাদেবার্ চায় আর সুদিন চেবার্ আজা গরে, ভান্ন্যেই কধাত্তুন্ তা জিলানরে, ছলনার্ কধাত্তুন্ তা ঠুদ্তোরে তে সামোলোক্। 11 ভান্ন্যেই কামত্তুন্ তে দূরোত্ থোক্, আর গম কাম গোরোক্; সুগ-শান্দিত্যে আওজি ওইনে তে তার্ পিজেদিগান ন-ছাড়োক্। 12 যিগুনে ন্যায়র্ পধেদি চলন্ তারা উগুরে প্রভুর চোগ আঘে, তারার্ তবনাগানি শুনিবাত্যে তা কানান্ পাদি আঘে; মাত্তর্ যিগুনে ভান্ন্যেই কাম গরন্, প্রভু তারার্ বিরুদ্ধে যায়। 13 গম কাম গুরিবাত্যে যুনি তমার্ আওজ্ থায় সালে কন্না তমারে ক্ষতি গুরিবো? 14 গোজেনর্ আওজ্ মজিম চলিবাত্যে যেইনে যুনি তমাত্তুন্ দুগ্অ ভুগো পড়ে সালে তুমি বর্ পেইয়্যে। যিগুনে তমারে দুঘ্ দুয়োন তারারে তুই ন-দোরেচ্ বা দুঘোত্ ওলোজোলো ন-ওচ্, 15 বরং খ্রীষ্টরে তমা মন ভিদিরে প্রভু ইজেবে জাগা দুয়ো। তমার্ আজা-ভরসা পৌইদ্যেনে যুনি কেঅ পুযোর্ গরন্ সালে তারে জোব্ দিবাত্যে নিত্য যুক্কোল্ থেয়ো, মাত্তর্ ইয়েনর্ জোব্পান্ চিদে আর ভোক্তি গুরিনে দুয়ো। 16 তমা বিবেক্ সাব্ রাগঅ, যেন খ্রীষ্টর মানুচ্ ইজেবে তমার্ গম্ চালচলনত্ যিগুনে বদ্নাঙ্ গরন্ তারা তমারে নিন্দে গোজ্জ্যন বিলিনে লাজান্। 17 ভান্ন্যেই কাম গুরিনে দুঘ্ পানাত্তুন্ বরং গোজেনর্ আওজে গম্ কাম গুরিনে দুঘ্ পানা বোউত গম। 18-19 খ্রীষ্টয়ো পাপত্যে একবার মোজ্জ্যে। গোজেন ইধু আমারে নেযেবাত্যে সে নিদ্দুজি মানুচ্চো পাপীগুনোত্যে, অত্তাৎ আমাত্যে মোজ্জ্যে। কিয়্যেদি তারে মারে ফেলা ওইয়্যে, মাত্তর্ আত্মায় তারে জেদা গরা ওইয়্যে আর তে বন্দী আত্মাগুনো ইধু যেইনে ফগদাং গোজ্জ্যে। 20 ভালোক্ দিন আগে নোহর সেই জাহাজ্চান বানেবার সময়োত্ গোজেনে যেক্কে ধৈয্য ধুরিনে বাজ্জেই রোইয়্যে সেক্কে যিগুনে অবাধ্য ওইয়োন এ আত্মাগুন তারার্। সেই জাহাজত্ উদিনে বানা কয়েক্জন, অত্তাৎ বানা আস্টোজন সেই পানিগানত্তুন্ বাচ্চ্যন্। 21 ইয়েন অলঅ বাপ্তিষ্মর এক্কান ফটু যিয়েন ইক্কিনে তমারে উদ্ধর গরে। বাপ্তিষ্মগানে যে তমা কিয়্যেগানত্তুন্ পের্গা দূর্ গরে সিয়েন নয়; গোজেন ইধু ইয়েন এক্কান সাব্ বিবেগর্ ইংগিত। যীশু খ্রীষ্টর মরণত্তুন্ জেদা ওইনে উদোনার্ মাধ্যমে তমারে উদ্ধোর্ গরা অয়। 22 যীশু স্বর্গত্ যেয়্যে আর ইক্কিনে গোজেনর্ ডেন্ ধাগেদি আঘে, আর স্বর্গদূত্তুনে, খেমতার্ অধিকারীগুনে আর শাসনগুরিয়্যেগুনে তা অধীনত্ আঘন্। |
Copyright © 2021 Bangladesh Bible Society
Bangladesh Bible Society