১ পিতর 2 - Chakma Bible

¹ ইয়েনত্যে অন্যগুনোরে ক্ষতি গুরিবার নানান্ বাবোত্যে আওজ্‌, নানান্ বাবোত্যে ছলনা, ভন্ডামি, ইংসে আর নানান্ বাবোত্যে বদ্‌নাঙর্ কধাবাত্তা তমা মন ভিদিরেত্তুন্ নিগিলেই দুয়ো।

² এই ইক্কিনে জোর্মেয়্যেদে চিগোন্ গুরো ধোক্ক্যেন তমার্ আধ্যাত্মিকভাবে বাড়িবাত্যে খাটি দুধ পেবাত্যে তুমি ভারী আওজি অ, যেন সিয়েন্দোই বাড়দে বাড়দে তুমি পুরোপুরি উদ্ধোরর্ ইন্দি উজেই যেই পারঅ।

³ প্রভুর দোয়্যের্ সুয়োদ্‌তান্ দঅ তুমি পেয়ো।

জেদা পাত্তর্

^4-5 এমন এক্কো জেদা পাত্তর্ আঘে যিবেরে গোজেনে বেঈ লোইয়্যে আর যিবে তা চোগেদি অমকদ মংগা, মাত্তর্ মান্‌জ্যে তারে এলাফেলা গোজ্জ্যন্। খ্রীষ্ট অলঅ সেই পাত্তর্‌বো; তুমি তাইধু এচ্চ্য বিলিনে জেদা পাত্তর ধোক্ক্যেন গুরি তমারে দিইনেয়ো গোজেনর্ থেবার ঘরান্ বানা অর্। সেনত্যে ধর্মগুরু ইজেবে গোজেনত্যে তমারে ফারগ্ গরা ওইয়্যে, যেন তুমি এমন্‌ আত্মিক উৎসর্বয়ানি গরঅ যিয়েনি যীশু খ্রীষ্টর্ দিইনে গোজেনর্ মানি লোইয়্যে অয়।

⁶ পবিত্র বোইবোত্ লেগা আঘে, চঅ, এক্কো ভারী মংগা পাত্তর্ মুই বেঈ লোইয়োং; আর সিবে সিয়োনর কণাবোর্ গড়াগান পাত্তর্ ইজেবে থিদেবর্ গোজ্জ্যং। যে তা উগুরে বিশ্বেজ্ গরে তে কনঅ বাবদে আশা ন-আরেব।

⁷ ইয়েনত্যে তুমি বিশ্বেজ্ গোজ্জ্য বিলিনে তমা ইধু সেই পাত্তর্‌বো ভারী মংগা; মাত্তর্ যিগুনে বিশ্বেজ্ ন-গরন্ তারাত্যে পবিত্র বোইবোর্ এ কধাগান খাদে, রাজমিস্ত্রিগুনে যে পাত্তর্‌বো বাদ্ দি দুয়োন, সিবেই বেক্কুনোত্তুন্ দরকারী পাত্তর্ ওই উদিলো।

⁸ আরঅ বোইবোর্ এ কধাগান্অ খাদে, সিবে এমন্‌ পাত্তর্ যিবেত্ মান্‌জ্যে উজোত্ হান্, আর যিবেত্ মান্‌জ্যর্ উজোত্ হেবার কারন অবঅ। মান্‌জ্যে গোজেনর্ কধানি অমান্য গরন্ বিলিনে উজোত্ হান্ আর ইয়েনত্যে তারা ঠিগ্ ওইনে আঘন্।

গোজেনর্ মানুচ্‌ ইজেবে জিংকানি কাদঅ

⁹ মাত্তর্ তুমি দঅ “বেঈ লোইয়্যে বংশ ওইয়ো; তমারে দিইনে বানা ওইয়্যেদে ধর্মগুরুগুনোর্ রেজ্যগান; তুমি গোজেনর্ নাঙে ফারগ্ গোজ্জ্যে জাদ্ আর তার্ নিজোর্ মানুচ্ ওইয়ো;” যেন আন্ধারত্তুন্ যিবে তমারে তার্ আমক্ অবার্ পহ্‌রত্ ডাগি আন্ন্যে তুমি তারে গুণগীত্ গঅ।

¹⁰ এক সময়োত্ তুমি গোজেনর্ মানুচ্‌ ন-এলা, মাত্তর্ ইক্কিনে ওইয়ো; এক সময়োত্ তুমি দোয়্যে ন-পঅ, মাত্তর্ ইক্কিনে পেইয়ো।

¹¹ কোচ্‌‌পেইয়্যে সমাজ্জ্যেগুন, এ পিত্‌থিমীত তুমি বিদেশী আর পরদেজত্ কয়েকদিন বজত্তি গুরিয়্যে বিলিনে মুই তমারে বিশেষ গুরিনে কোজোলী গরঙত্তে, তুমি পাপ-খাচ্চ্যদর্ কামনা-বাসনাত্তুন্ দূরোত্ থাগঅ,

¹² কারন সিয়েনিয়ে তমার আত্মার বিরুদ্ধে যুদ্ধো গরে। গোজেনরে যিগুনে ন-জানন্ তারা ভিদিরে তুমি গমেডালে চলঅ যেনে অন্যেয়গুরিয়্যে বিলিনে তারা তমারে নিন্দে গুরিলেয়ো তমা গম কামানি খিয়েল্ গরন্ আর বিচেরর্ দিনোত্ তমার্ সেই কামানিত্যে গোজেনরে বাঈনী গরন্।

¹³ তুমি প্রভু উগুরে বাধ্য ওইনে মান্‌‌জ্যর্ বানেয়্যে শাসনগুরিয়্যে গুনোর অধীনতা স্বীগের্ গরঅ। সম্রাটে বেক্কুনোর আজল্ বিলিনে তার অধীনোত্ থাগঅ;

¹⁴ অন্যেয় গুরিয়্যে গুনোরে সাজা দিবাত্যে আর যিগুনে গম কাম গরন্ তারারে নাঙ্ গিনিবাত্যে সম্রাটে যে শাসনগুরিয়্যে গুনোরে পাদায় তারার্ অধীনোত্অ থাগঅ।

¹⁵ গোজেনর্ আওজ্‌ ইয়েন, তুমি যেন গম কাম গুরিনে অঘা মানুচ্চুনোর বুদ্ধি-নেইয়্যে কধাবাত্তা বন্ধ গুরি দুয়ো।

¹⁶ স্বাধীন মানুচ্‌ ইজেবে জিংকানি কাদঅ, মাত্তর্ সদান কামানি ঢাগিবাত্যে সেই স্বাধীনতাগান বেহবার ন-গোজ্জ্য। সিয়েনর বদলে গোজেনর্ চাগর ইজেবে জিংকানি কাদঅ।

¹⁷ বেক্‌ মানুচ্চুনোরে সর্মান গরঅ, তমার বিশ্বেজি ভেইয়ুনোরে কোচ্‌পঅ, গোজেনরে ভোক্তি গরঅ, সম্রাটরে সর্মান গরঅ।

¹⁸ ঘরর্ চাগর-বাগরুন্, তুমি তমার গিরোজ্‌‌চুনোরে সর্মান গুরিনে তারার্ অধীনোত্ থাগঅ। যে গিরোজ্‌‌চুনে গম আর দোয়্যেলু বানা যে তারার্ অধীনতাগান স্বীগের গুরিবা সিয়েন নয়, মাত্তর্ যিগুনে ভান্ন্যেই কধা বেবহার গরন তারার্‌‌অ অধীনতা স্বীগের গরঅ।

¹⁹ যুনি কেঅ অন্যেয় গুরিনে দুঘোত্ ভুগোন্ আর গোজেনরে মনত্ থোইনে সিয়েন সোজ্জ্য গরে সালে তে গোজেনর্ চোগোদি নাঙ্ গিনে হেবার যগাজ্জ্যে।

²⁰ অন্যেয় কামত্যে মেইর্ খেইনে যুনি তুমি সিয়েন সোজ্জ্য গরঅ সালে সিয়েনত্ বাঈনী গুরিবার কি আঘে? মাত্তর্ গম কাম গুরিনেয়ো যুনি তুমি সিয়েনত্যে দুঘ্ পেইনে সিয়েন সোজ্জ্য গরঅ, সালে সিয়েনই গোজেন চোগেদি নাঙ্ গিনেদে ধোক্ক্যেন।

²¹ ইয়েনত্যে গোজেনে তমারে ডাক্ক্যে, কিয়া খ্রীষ্ট তমাত্যে দুঘ্ ভুগিনে তমা ইধু আলাম্ থোই যেয়্যে, যেন তুমিয়ো তা ধোক্ক্যেন চলঅ,

²² যিবে কনঅ পাপ ন-গরে বা যিবের্ মুয়োত কনঅ ছলনার কধা ন-এলঅ।

²³ মান্‌জ্যে তারে যেক্কে অগমান গোজ্জ্যন্ সেক্কে তে তারারে ফিরিনে অগমান ন-গরে, আর দুঘ্ ভুগোনার সময়োত্ হেনা সুজিবার দর্‌‌অ ন-দেগায়, বরং যিবে ন্যায় বিচের গরে তা আঢত্ তে নিজোরে ইরি দিয়্যে।

²⁴ তে ক্রুশো উগুরে নিজোর কিয়্যেগান্দোই আমার পাপর্ ভারান্ বুয়োল, যেন আমি পাপর দাবি-দেনা ইধু মুরিনে গোজেনর্ আওজ্‌ মজিম চলিবাত্যে বাঁজি থেই। তার্ কিয়্যেগানর্ ঘা গানিয়ে তমারে গম গোজ্জ্যে।

²⁵ ভুল পধত্ যেইয়্যে ভেড়া ধোক্ক্যেন তুমিয়ো ভুল পধেদি যর্, মাত্তর্ যে পালক তমা মন ভিদিরে দেগাশুনো গরে তুমি তা ইধু ফিরি এচ্চ্য।