১ রাজাবলী 9 - Chakma Bibleলগেপ্রভু শলোমনরে দেঘা দিলো 1 এধোক্ক্যেনগুরি শলোমনে লগেপ্রভুর ঘর, রাজঘর আর নিজোর্ আওজ্ মজিম্ যেদক্কানি কাম্ গুরিবাত্তে চেইয়্যে সিয়েনি থুম্ গুরিলো। 2 সে পরেন্দি লগেপ্রভু দ্বিবার্ তাইদু দেঘা দিলো যেবাবোত্যে গিবিয়োনত্ একপল্লা তাইদু দেঘা দিলো। 3 লগেপ্রভু তারে কলঅ, তুই যে তবনা আর কোজোলিগান মইদু গোজ্যস্ সিয়েন্ মুই শুন্ন্যং। তর্ বানেয়্যে এ তবনা-ঘরান্ জিংকানিবর্ মর্ থেবারঘর্ ইজেবে মঅ নাঙে যুদো গোজ্যং। ইয়েন উগুরে নিত্য মঅ চোখ্কুন্ আর মনান্ থেবঅ। 4 আর তুই, তুই যুনি তঅ বাপ্পো দায়ূদো ধোক্ক্যেন্ দোল্ মনে, গমেডালে মঅ মুজুঙোত্ আদচ্ আর মর্ বেক্ উগুমানি, সুদোমানি আর নিদ্দেশ্ছানি পালাচ্, 5 সালে মুই উমরত্তে ইস্রায়েল উগুরে তর্ রাজসিংহাসনান্ থিদেবর্ গুরি দিম্। এ কধাগান মুই তঅ বাপ্পো দায়ূদোরে শমক্ গুরিনে কোইয়োং, ইস্রায়েল সিংহাসনত্ বজিবাত্তে তর্ বংশত্ মানজ্যর্ অভাব ন-অবঅ। 6 “মাত্তর্ যুনি তুমি বা তমা পূঅ-ঝিগুনে মত্তুন্ ফিরি যগোই আর তমাইদু দিয়্যে মর্ উঘুম্ আর সুদোমানি ন-পালেইনে দেব-দেবেদাগুনোরে সেবা আর পূজো গরঅ, 7 মাত্তর্ ইস্রায়েলীয়গুনোরে যে দেজ্ছান মুই দুয়োং সিয়োত্তুন্ মুই তারারে ধাবেই দিম্। যে তবনা-ঘরান মুই মর্ থেবারঘর্ ইজেবে যুদো গোজ্যং সিয়েন্অ মঅ চোগো মুজুঙেত্তুন্ দূর্ গুরি দিম। সেক্কে ইস্রায়েলানে অন্য বেক্ জাত্তুনোর্ ইদু ঈচ্গোজ্যা আর চোগোছাল্ অবঅ। 8 এ তবনা-ঘরান্ ইক্কিনে দাঙর্ অলেয়ো সেক্কে যিগুনে তা কুরেন্দি যেবাক্ তারা আমক্ ওই উদিবাক্ আর ঈচ্ গুরিনে কবাক্, ‘হিত্তেই লগেপ্রভু এ দেজ্ছান্ আর এ তবনা-ঘরান উগুরে এধোক্কেন্ গুরিলো?’ 9 ইয়েন জোবত্ মানুচ্চুনে কবাক্, ‘এ কারনান্ অলঅ, যিবে তারার্ পূরোণি মানুচ্চুনোরে মিসর দেজত্তুন্ নিগিলেই আন্যে সে পূরোণি মানুচ্চুনোর্ গোজেন্ লগেপ্রভুরে তারা ছাড়ি যেইয়োন। তারা দেব-দেবেদার পিজেন্দি যেইনে তারারে পূজো আর সেবা গোজ্যন্। সেনত্তেই লগেপ্রভু এ অমংগলানি তারা উগুরে আন্যে।’” শলোমনর্ অন্য কাম্ 10 লগেপ্রভুর ঘর আর রাজঘরান্ বানাদে শলোমনর্ কুড়ি বজর সময় লাক্ক্যে। 11 সোরর রাজা হীরমে শলোমনর্ আওজ মজিম্ এরস আর বেরস গাজ আর সনা যুগেই দিয়্যে বিলিনে রাজা শলোমনে গালীল দেজর্ কুড়িগান আদাম্ তারে দান গুরিলো। 12 হীরমে সে আদামানি চেবাত্তে সোরত্তুন্ এলঅ, মাত্তর্ সিয়েনি দেগিনে তে হুজি ন-অলঅ। 13 তে শলোমনরে কলঅ, “ভেই, ইয়েনি কেধোক্কেন্ আদাম তুই মরে দিলে?” তে সিয়েনির নাঙ্ দিলোদে কাবূল দেশ (যিয়েনর্ ভেদ্তান্ “কনঅ কামর্ নয়”)। এজঅ সিয়েনি সে নাঙে আঘে। 14 হীরম বেক্কানিয়ে সাড়ে চের্ টনত্তুনো বেশ্ সনা রাজারে পাধেই দিলো। 15 রাজা শলোমনে লগেপ্রভুর ঘরান্, নিজোর্ রাজঘরান, মিল্লো, যিরূশালেমর্ দেবালান্, হাৎসোর, মগিদ্দো আর গেষরান বানেবাত্তে ভালোক্কুন মান্জ্যরে কাম্ গুরিবাত্তে জোড়্ গোজ্যে। 16 ইয়েনর্ আগেন্দি মিসরর রাজা ফরৌণে গেষর গজক্ গুরিনে সিয়েন্ আগুনোত্ পুড়ি দিয়্যে আর সিদুগোর্ আদাম্মে কনানীয়গুনোরে মারে ফেলেয়্যে। যেরেন্দি তে জাগায়ান তা ঝিবোরে, অত্তাৎ শলোমনর্ মোক্কোরে বৌর্ ডাবা ইজেবে দিয়্যে। 17 সেনত্তেই শলোমনে গেষরান আরঅ বানেয়্যে। ইয়েনবাদে তে তলেন্দি বৈৎ-হোরোণ, 18 বালৎ, যিহূদার ধূল্যেচর-চাগালার্ তামর, 19 তার বেক্ ভান্ডাল-শঅর্, রথ আর ঘোড়াচালেয়্যেগুনোত্তে শঅর্ বানেল, অত্তাৎ যিরূশালেম, লেবানন আর তার্ শাজনর অধীনোত্ যেদক্কানি রেজ্য এলঅ সিয়েনি ভিদিরে যিয়েনি যিয়েনি তে বানেবাত্তে চেইয়্যে সিয়েনি বেক্কানি গুরিলো। 20-21 যিগুনে ইস্রায়েলীয় ন-এলাক্, অত্তাৎ যিদুক্কুন্ ইমোরীয়, হিত্তীয়, পরিষীয়, হিব্বীয় আর যিবূষীয়গুনোর গুট্টিগুনে সেক্কেয়ো দেজত্ বাঁজি এলাক্, যিগুনোরে ইস্রায়েলীয়গুনে পুরোপুরিভাবে শেজ্ গুরি ন-পারন্, তারারে শলোমনে চাগর্ ইজেবে কাম গুরিবাত্তে জোড়্ গোজ্যে, আর তারা এজঅ সং সে কামানি গত্তন্। 22 মাত্তর্ তে কনঅ ইস্রায়েলীয়রে চাগর্ ন-বানায়; তারা এলাক্কে তা যুদ্ধোগুরিয়্যে, তা কামগুরিয়্যে, তা তলেন্দি শাজন্গুরিয়্যে, তা সেনাপতি আর তা রথচালেয়্যে আর ঘোড়াচালেইয়্যেগুনোর সেনাপতি। 23 ইয়েন্ বাদেয়ো শলোমনর্ বেক্ কামানি দেগাশুনো গুরিবার্ ভারান্-পেইয়্যে পাচশঅ পঞ্চাশ জন আজল্ কামগুরিয়্যে এলাক্। যে মানুচ্চুনে কাম্ গুরিদাক্ ইগুনে তারার কামানি তালাশ গুরিদাক্। 24 ফরৌণর ঝিবো দায়ূদ-শঅরান্ ছাড়িনে তাত্তেই শলোমনর্ বানেয়্যে রাজঘরত্ এজানার পরেন্দি শলোমনে মিল্লো ঘরান বানেল। 25 লগেপ্রভুর নাঙে শলোমনে যে ডালিঘরান্ বানেয়্যে সিয়েনত্ তে বজরে তিনবার পুজ্যে-উৎসর্ব আর উদোলোলি-উৎসর্বর অনুষ্ঠান গুরিদো। সে সমারে তে লগেপ্রভুর মুজুঙোত্ আগর্বাট্টিঅ জালেদ। সালে দেগা যাত্তে, শলোমনে তবনা-ঘরর্ বেক্ কামানি থুম্ গোজ্যে। 26 রাজা শলোমনে আকাবা উপসাগরর পারত্ ইদোমর এলৎ শঅরর্ ইদু ইৎসিয়োন-গেবরত্ কয়েক্কান জাহাজ বানেল। 27 শলোমন মানুচ্চুনোর লগে নোকোত্ কাম গুরিবাত্তে হীরমে তার কয়েকজন কাবিদ্যং নাবিক পাধেই দিলো। 28 তারা ওফীরোত্ যেইনে পেরায় সাড়ে ষুলো টন সোনা আনিনে রাজা শলোমনরে দিলাক্। |
Copyright © 2021 Bangladesh Bible Society
Bangladesh Bible Society