১ রাজাবলী 7 - Chakma Bibleশলোমনে রাজঘর বানেল 1 রাজঘরান বানাদে শলোমনর্ তের বজর্ লাগিলো। 2 রাজঘরত্ তে লেবানন-বন-কুটির নাঙে এক্কান ঘর বানেল। এ ঘরান একশঅ আত্ লাম্বা, পঞ্চাশ আত্ পাদাজ্যে আর তিরিশ আত্ অজল এলঅ। এরস গাজর্ চের্ সুর খুদো উগুরে এরস গাজর ছাজি নেযেয়্যে টেগেনুন্ বোজেয়্যে এলঅ। 3 থুনিগুনো উগুরে বোজেয়্যে টেগেনুনো উগুরে এরস তক্তালোই দোন্দমা দিয়্যে অলঅ; এক ইক্কো সুরোত্ পন্দরবো গুরিনে পাচচোল্লিশছুয়ো টেগেন্ এলাক্। 4 ঘরর্ চেরোকিত্তে দেবালত্ মুজুঙো-মুজুঙি তিন সুর জানালা দিয়্যে অলঅ। 5 পুরো দোরানির ফ্রেমানি এলদে চের্কুণ্যে; জানালানি তিন্নো সুরোত্ মুজুঙো-মুজুঙি গুরি বানা ওইয়্যে। 6 সে পরেন্দি তে থাম-কুটির নাঙে এক্কান ঘর বানেল। সিয়েন লাম্বান্দি এলদে পঞ্চাশ আত্ আর পাদাজ্যেন্দি তিরিশ আত। সিয়েনর মুজুঙেন্দি এলদে এক্কান চাল-দিয়্যে আস্চালা, আর সে চালান্ কয়েক্কো থুনি উগুরে বোজেয়্যে এলঅ। সে থুনিগুনোর মুজুঙোত্ চালানর্ তলেন্দি ইক্কো থুনি এলঅ। 7 বিচের-কুটির নাঙে তে এক্কান ঘর বানেল; সিয়েনত্ তার সিংহাসন এলঅ। বিচের গুরিবাত্তে এ ঘরান বানা অলঅ। ঘরর দেবালান তলেত্তুন ধুরি উগুরে সং তে এরস তক্তালোই নাদি দিলো। 8 যে ঘরানত্ তে বজত্তি গুরিবো সিয়েন বিচের-কুটিরোর পিজেন্দি এক বাবোত্যে গুরি বানা অলঅ। ফরৌণর যে মিলেবোরে তে লোইয়্যে তাত্তেই সেধোক্ক্যেন্ গুরি আর এক্কান ঘর বানেল। 9 রাজঘরর্ দাঙর্ উদোনান্ আর বেক্ ঘরানির গোড়াত্তুন্ ধুরি চালর্ কার্ণিশ সং বেক্কানি মাপযগা গুরি কাবিনে দামি পাত্তর্লোই বানা ওইয়্যে। সে পাত্তরুন্ করাত্তোই সং গুরি কাবি নেযা ওইয়্যে। 10 পাক্কা ঘরর গোড়ানি গাড়া ওইয়্যেদে দাঙর্ দাঙর্ দামি পাত্তর্লোই। সিগুনোর কনঅ কনঅগান এলদে দশ আত্ আরঅ কনঅ কনঅগান আস্তো আত। 11 গোড়াগানর পাত্তরুনো উগুরে এলদে মাপযগা দিয়্যে কাপ্যে দামি পাত্তর্ আর এরস গাজ। 12 আজ্চালা সুদ্ধো লগেপ্রভুর ঘর ভিদিরে উদোন ধোক্ক্যেন রাজঘরর্ দাঙর্ উদোনর চেরোকিত্তে দেবালানি দোল্ গুরি কাবিনে তিন সুর পাত্তর্ আর এরস গাজর এক সুর দাদঅ তক্তালোই বানা ওইয়্যে। তবনা-ঘরর পযাপিরানি আর সাজগুচ্ছানি 13 রাজা শলোমনে সোরত্ মানুচ্ পাদেইনে হীরামরে আনিলো। 14 তা মাবো অলদে রানিমিলে আর নপ্তালি-গুট্টির ঝি। তা বাবে অলদে সোরর মানুচ্। হীরমে পিদল কালিগর এলঅ। হীরমে পিদলর নানান্ বাবোত্যে কাম জানিদো আর সে কামত্ তে অমকদ কাবিল এলঅ। তে রাজা শলোমন ইদু এলঅ আর তারে যেদক্কানি কাম দিয়্যে অলঅ সিয়েনি গুরিলো। 15 হীরমে পিদলর দ্বিবে থুনি বানেল। সিগুনোর পত্তিবো লাম্বান্দি এলদে আদার আত্ আর বেড়্ বার আত। 16 সে দ্বিবে থুনি উগুরে দিবাত্তে তে পিদল ছাজি ফেলেনে দ্বিবে মাঢা বানেল। মাঢা দ্বিবে এক ইক্কো পাচ্ আত্ গুরি অজল এলঅ। 17-18 পত্তি থুনির মাদাগুনোত্তে তে পিদলর আরুক্ গোজ্যে পাগেয়্যে সাত্তান শিগোল আর দ্বিসুর্ পিদল ডালোম ফল বানেল। 19 থুনিগুনোর উগুরেন্দি মাঢা দ্বিবে উগুরেন্দি চের্ আত্ এলদে লিলি ফুলো ধোক্কেন্। 20 মাঢাগুনোর তলে কট্টাগান গুল্ এলঅ। সে গুল কট্টাগানর চেরোকিত্তে শিগোলানি লাগেয়্যে এলঅ। পত্তি মাঢাগুনোর চেরোকিত্তে শিগল লগে সুর্ সুর্ গুরি পিদলর দ্বিশত্ ডালোম ফল লাগেয়্যে এলাক্। 21 হীরামে সে দ্বিবে পিদলর্ থুনি তবনা-ঘরর্ আজ্চালাত্ বোজেই দিলো। দোগিণে যিবে রাগেল সিবের নাঙান্ দিয়্যে অলঅ যাখীন (যিয়েনর্ ভেদ্তান্ “যিবে থিদেবর্ গরে”) আর উত্তোরেন্দি যিবে রাগেল সিবের নাঙান্ দিয়্যে অলঅ বোয়স (যিয়েনর্ ভেদ্তান্ “তা ভিদিরে বল্”)। 22 লিলি ফুলো ধোক্কেন্ পিদলর মাঢা দ্বিবে সে থুনি দ্বিবে উগুরে বোজেয়্যে এলঅ। এধোক্ক্যেন্গুরি সে থুনি বানানার কামানি থুম্ গরা অলঅ। 23 সে পরেন্দি হীরামে পিদল গোলেইনে ঢাল্যে পানি রাগেবাত্তে ইক্কো গুল্গুরি দাঙর পিলে বানেল। পিলেবোর এক ডাগেত্তুন্ সোজাসুজি অন্যডাগন্দি মাপ এলদে দশ আত্, গভীন্ পাচ্ আত্ আর বেড়েয়্যেগুরি চেরোকিত্তে মাপ্পো তিরিশ আত্। 24 পিলেবোর্ মুয়োন বারেন্দি কাজানর্ তলে পত্তি আদে দশছুয়ো গুরি দ্বিসুর্ পিদল লুদি গাজর্ গুলো এলাক্। যে ছাস্যেগান ভিদিরে পিলেবো বানা ওইয়্যে সে ছাস্যেগান ভিদিরে গুলোগুনোর আরুক্কান্ এলঅ বিলিনে বেক্কানি মিলিনে ইক্কো জিনিজ অলঅ। 25 পিলেবো বারবুয়ো পিদল গোরু পিদি উগুরে বোজেয়্যে এলঅ। সিগুনোর তিন্নো উত্তোরেন্দি মোক্যে মু, তিন্নো পোজিমেন্দি মোক্যে মু, তিন্নো দোগিণেন্দি মোক্যে মু আর তিন্নো পূগেন্দি মোক্যে মু এলাক্ তারার্ পিজেন্দিগুন এলঅ ভিদিরেন্দি। 26 পিলেবো এলদে চের্ আঙুল্ দাদঅ। তা মুয়োন্ ইক্কো কদরা মু ধোক্কেন্ এলঅ আর লিলি ফুলোর কুড়ি ধোক্কেন্ বারেন্দি উল্লেয়্যে এলঅ। সিয়েনত্ চোচোল্লিশ আজার লিটার পানি ধুরিদো। 27 হীরামে পিদলর দশছুয়ো বাক্স ধোক্কেন্ জিনিস বানেল। সিগুনোর পত্তিবো চের্ আত্ লাম্বা, চের্ আত্ পাদাজ্যে আর তিন আত্ অজল এলঅ। 28 বাক্সুবোর চেরোকিত্তে পিদলর পাত্ ফ্রেম ভিদিরে বোজেয়্যে এলঅ। 29 সে পাত্তানি উগুরে সিংহ, গোরু আর করূবোর মূত্তি এলাক্ আর সিংহ আর গোরুবোর তলে ফুলো ধোক্কেন্ নক্শা গোজ্যে এলঅ। বাক্সুবো উগুরে ফ্রেমর লগে বাজেয়্যে ইক্কো গাবালা বোজেবার জাগা এলঅ। 30 পত্তি বাক্সত্ পিদলর ধুরা সুদ্ধো পিদলর চের্বো চাক্কা এলাক্। গাবালা বোজেবাত্তে চের্কণাত্ পিদলর চেরান ঠেং এলঅ। সিগুনোত্অ ফুলো ধোক্কেন্ নক্শা গোজ্যে এলঅ। 31 গাবালা বোজেবার্ আসনান ভিদিরে এক্কান্ গুল্ ফাগ জাগা এলঅ। সে ফাগ জাগানর্ এক কিত্তেত্তুন্ অন্যকিত্তেন্দির্ মাপ্পান্ অলদে দেড় আত্। সে ফাগ জাগানর চেরোকিত্তে কাবিনে লেখ্যে আরুগো কাম্ এলঅ। গাবালাবো সে ফাগ জাগানর ভিদিরে বজানা অলে আসনানত্তুন্ গাবালাবোর্ অজলান অলঅ এক আত্। বাক্সবোর পাত্তানি গুল্ ন-এলঅ, চের্কুণ্যে এলঅ। 32 পাত্তানির তলে চের্বো চাক্কা এলঅ আর চাক্কার ধুরাগুন বাক্সবোর্ লগে লাগেয়্যে এলঅ। ইক্কো চাক্কা দেড় আত্ অজল এলাক্। 33 চাক্কাগুন রথ চাক্কা ধোক্কেন্ এলাক; গাজ চাক্কাগুনোর বেড়, শিক আর ভিদিরে নিয়্যেইয়ুন বেক্কুন্ গোলেইনে ঢালাই গরা ওইয়্যে। 34 পত্তি বাক্সুর্ চের্ কোণাত্ চেরান ঠেং লাগেয়্যে এলঅ। 35 বাক্সুগুনো উগুরে পিদোল্লোই বানেয়্যে এক বিগোত্ অজল ইক্কো গুল্ গুরি জিনিস এলঅ। 36 সে গুল্গুরি জিনিসছানির বারেন্দি জাগা মাপ মজিম্ করূব, সিংহ আর খাজোর গাজ কাবিনে বানা ওইয়্যে। পত্তি ভাগ ফাগত্ ঠেং এলঅ, আর সে ঠেঙানি উগুরে বানেয়্যে এলদে ফুলো ধোক্কেন্ নক্শা। এ গুলবাবোত্যে জিনিস্ছো বাক্সুবোর্ লগে বানা ওইয়্যে। 37 এধোক্ক্যেন্গুরি তে দশছুয়ো বাক্সু বানেল। সিগুন্ এক বাবোত্যে গোলেইনে ঢালা ওইয়্যে আর আয়তন আর আরুগোন্দি এক্কুই এলাক্। 38 তে পত্তি বাক্সুত্তে ইক্কো গুরিনে পিদোল দশছুয়ো গাবালা বানেল। পত্তি গাবালার বেড়্ এলদে চের্ আত্ আর সিয়োত্ আস্তোশ আশি লিটার পানি আদিদো। 39 তে তবনা-ঘরর দোগিণেন্দি পাচছুয়ো আর উত্তোরেন্দি পাচছুয়ো বাক্সু রাগেল; আর দোগিণে-পূগ কুণোত্ রাগেল সে দাঙর্ পিলেবো। 40 ইগুনবাদে তে অন্য পিলেগুন, মেজাং আর কদরা বানেল। এধোক্ক্যেনগুরি রাজা শলোমনত্তে হীরামে লগেপ্রভুর ঘরর যে যে কামানি আরাম্ভ গোজ্যে সিয়েনি থুম্ গুরিলো। সিয়েনি অলদে: 41 দ্বিবে থুনি, থুনি উগুরে গুলগুরি দ্বিবে মাঢা, সে মাঢাগুনো উগুরে সাজেবাত্তে দ্বিসুর্ নক্সা গোজ্যে পাগেয়্যে শিগোল; 42 সে শিগোলানিত্তে চেরশত্ ডালোম-থুনি উগুরে মাঢাগুনো গুলগুরি কট্টাগান সাজেবাত্তে পত্তি সুর্ শিগোলত্তে দ্বিসুর ডালোম; 43 দশছুয়ো বাক্সু আর দশছুয়ো গাবালা; 44 দাঙর্ পিলেবো আর তা তলে বারবো গোরু; 45 পিলে, মেজাং আর কদরা। হীরামে যেদক্কানি জিনিস রাজা শলোমন উগুমে লগেপ্রভুর ঘরত্তে বানেয়্যে সিগুন অলদে জোল্জোল্যে পিদলর। 46 যর্দনর সংজাগাত্ সুক্কোৎ আর সর্তনর দ্বিসেরে এক্কান জাগাত্ রাজা এ জিনিসছানি মাদি গাদথ গোলে ফেলেইনে বানেয়্যে। 47 জিনিসছানি এদক্ বেশ্ এলদে যে, শলোমনে সিয়েনি ন-মাবে; সেনত্তেই পিদলর ভারান্ হবর্ পাহ্ ন-যায়। 48 লগেপ্রভুর ঘরর্ যেদক্কানি পযাপিরা শলোমনে বানেয়্যে সিয়েনি অলদে: সনার ডালিঘর, মুজুঙোত্-পিদে রাগেবার সোনার টেবিলান; 49 খাটি সনার চেরাগ থক্-সিগুন অলদে দাঙর্ পবিত্র জাগানর মুজুঙোত্, ডেনে পাচছুয়ো আর বাঙে পাচছুয়ো; সনার ফুল, চেরাগ আর চিম্টি; 50 খাটি সনার গলস, বুদ্দিবো কাজেবার চিম্টিগান, চেরাগ, মেজাং আর আগুন্ রাগেবার পিলেবো; ভিদিরে গুদিবো, অত্তাৎ দাঙর্ পবিত্র জাগানর দোরানত্তে আর তবনা-ঘরর আজল্ গুদিবো দোরানত্তে সনার কব্জা। 51 এবাবোত্যেগুরি রাজা শলোমনে লগেপ্রভুর ঘরর বেক্ কামানি থুম্ গুরিলো। সে পরেন্দি তে তা বাপ্পো দায়ূদে যেদক্কানি পযাপিরা লগেপ্রভুর নাঙে যুদো গুরি রাগেয়্যে সিয়েনি আনিলো। সিয়েনি অলদে সনা, রূবো আর নানান বাবোত্যে পিলে। সিয়েনি তে লগেপ্রভুর ঘরর ধনভান্ডালত্ থোই দিলো। |
Copyright © 2021 Bangladesh Bible Society
Bangladesh Bible Society