১ রাজাবলী 5 - Chakma Bibleউবোসনা-ঘর তুলোনার যুক্কোল্ 1 সোরের রাজা হীরমে যেক্কে শুনিলো, শলোমনরে তা বাবঅ জাগানত্ রাজপদথ্ অভিষেগ গরা ওইয়্যে সেক্কে তা মানুচ্চুনোরে তে শলোমনর্ ইদু পাদেল, কিত্তেই দায়ূদ লগে তার সমাজ্যের মিল্ এলঅ। 2 শলোমনে হীরমরে কোই পাদেল, 3 মঅ বাপ্পো দায়ূদো বিরুদ্ধে চেরোকিত্তেত্তুন্ যুদ্ধো ওইয়্যে, সেনত্তেই যেদকদিন সং লগেপ্রভু তা শত্রুগুনোরে তা টেঙ তলে ন-আনিলো সেদকদিন তে তার্ গোজেন লগেপ্রভুর নাঙে কনঅ উবোসনা-ঘর বানেই ন-পারিলো। তুই দঅ এ কধানি হবর্ পাজ্। 4 মাত্তর্ ইক্কিনে মঅ গোজেন লগেপ্রভু চেরোকিত্তেত্তুন্ মরে সুগ-শান্দি দিয়্যে। ইক্কিনে মর্ কনঅ শত্রু নেই আর কনঅ দযায়ো ন-অয়। 5 সেনত্তে মুই মঅ গোজেন লগেপ্রভুর নাঙে এক্কান তবনা-ঘর বানেবাত্তে চাং। লগেপ্রভু মঅ বাপ্পো দায়ূদোরে কোইয়্যেদে, তর্ যে পূঅবো মুই সিংহাসনত্ তঅ জাগানত্ বোজেম্ তেয়ই মর্ নাঙে তবনা-ঘর বানেব। 6 “সেনত্তেই তুই উগুম্ গর্ যেনে মত্তে লেবানন দেজর্ এরস গাজ্ছুন কাবা অয়। মঅ মানুচ্চুনে হামাক্কায় তঅ মানুচ্চুনো লগে থেবাক্ আর তুই যে বেতনুন্ ঠিগ্ গুরি দিবে মুই সে বেতনুন্ তঅ মানুচ্চুনোরে দিম্। তুই দঅ হবর্ পাজ্, গাজ্ কাবেদে কামত্ সীদোনীয়গুনো ধোক্ক্যেন কাবিল মানুচ্ আমা ইদু কনজন নেই।” 7 শলোমনত্তুন্ এ হবরান্ পেইনে হীরমে অমকদ হুজি ওইনে কলঅ, “এচ্যে লগেপ্রভুর বাঈনী ওক্, কিত্তেই এ দাঙর্ জাদ্তো উগুরে রাজাগিরি গুরিবাত্তে দায়ূদোরে তে এন্ ইক্কো জ্ঞানী পূঅ দান গোজ্যে।” 8 হীরম শলোমনরে এ হবরান্ পাদেল, “তর্ পাদেয়্যে হবরান্ মুই পেইয়োং। এরস আর বেরস গাজ পৌইদ্যেনে তর্ বেক্ আওজ্ছানি মুই পুরেই দিম্। 9 মঅ মানুচ্চুনে সিয়েনি লেবাননত্তুন্ লামেইনে সাগরত্ আনিবাক্। সে পরেন্দি তারা তক্তানিলোই ভের্বো বানেইনে সাগরত্ ভাজেইনে তর্ ঠিগ্ গোজ্যে জাগানত্ নেযেবাক্। সিয়েনত্ তারা সিয়েনি খুলি ফেলেবাক্ আর সেক্কে তুই সিয়েনি নেযেই পারিবে। মুই চাং যেনে তুই মর্ রাজঘরর্ মানুচ্চুনোত্তে হানা যুগেই দুয়োচ্।” 10 এবাবোত্যেগুরি হীরমে শলোমনর্ চেইয়্যেদে ধোক্কেন্ বেক্ এরস ও বেরস গাজ্ দিলো, 11 শলোমন হীরমরে তার রাজঘরর্ মানুচ্চুনে হেবাত্তে তিন আজার ছয়শ টন গম আর চের্ আজার আস্তোশত্ লিটার জলপাইয়র খাটি তেল দিলো। শলোমনে এধোক্ক্যেনগুরি বজরর্ পর্ বজর্ সিগুন্ দিয়্যে ধুরিলো। 12 লগেপ্রভু তার এগেম্ মজিম শলোমনরে জ্ঞান দিলো। হীরম আর শলোমনর্ দ্বিসেরে শান্তির সম্বন্ধ এলঅ আর তারা দ্বিজনে ইক্কো চুক্তি গুরিলাক্। 13 রাজা শলোমনে পুরো ইস্রায়েলত্তুন্ ত্রিশ আজার মান্জ্যরে কাম গত্তে বাধ্য গুরিলো। 14 পত্তি মাসে পালা গুরিনে তারা ভিদিরেত্তুন্ তে দশ আজার মান্জ্যরে লেবাননত্ পাধেদ। তারা একমাস লেবাননত্ থেদাক্ আর দ্বিমাস নিজো ঘরত্ থেদাক্। তারার এ কামানি দেগাশুনো গুরিবার ভারান্ এলদে অদোনীরাম উগুরে। 15 শলোমন অধীনোত্ এলাক্ সত্তুর্ আজার কামভার পেইয়্যে মানুচ্ আর মুড়োমুড়িত্ পাত্তর্ কাবিবাত্তে এলাক্ আশি আজার মানুচ্। 16 তারার কামানি দেগাশুনো গুরিবাত্তে তিন আজার তিনশঅ কামগুরিয়্যে এলাক্। 17 তবনা-ঘরর ঘরাগান্ দরঅ গুরিবাত্তে তারা রাজার উগুমে ছড়াত্তুন্ দাঙর্ দাঙর্ পাত্তর্ কাবিনে তুলি আনিদাক্। 18 শলোমন আর হীরমর কালিগরুনে আর গিব্লীয়োগুনে সে পাত্তরুন্ দোল্ গুরি কাবিনে তবনা-ঘরান বানেবাত্তে গাজ আর পাত্তর্ যুক্কোল্ গুরিদাক্। |
Copyright © 2021 Bangladesh Bible Society
Bangladesh Bible Society