১ রাজাবলী 20 - Chakma Bibleবিন্হদদর শমরিয়া আক্রমণ 1 অরাম দেজর্ রাজা বিন্হদদে তার্ বেক্ সৈন্যগুন্ এগত্তর্ গুরিলো। তে বত্রিশজন রাজা আর ভালোক্কুন্ ঘোড়া আহ্ রথ লগে নেযেইনে শমরিয়া আক্রমণ গুরিবাত্তে ঘিরিলো। 2 তে কয়েকজন মান্জ্যরে শঅরত্ পাদেইনে ইস্রায়েলর রাজা আহাবরে এ কধাগান্ জানেল, “বিন্হদদে কত্তে, 3 ‘তর্ সোনা আর রূবোনি মর্, আর তর্ দোল্ দোল্ মোক্কুন্ আর ঝি-পূঅগুনঅ মর্।’” 4 জোবত্ ইস্রায়েলর রাজা কলঅ, “মুই কঙর্, মর্ গিরোজ্ মহারাজ, তুই যিয়েন্ কোইয়োচ্ সিয়েন্ ঠিগ্। মুই আর মর্ বেক্কানি তর্।” 5 পরেন্দি সে মানুচ্চুনে আহাবর ইদু আরঅ ফিরি এইনে কলাক্, “বিন্হদদে কত্তে, ‘তর্ সোনা-রূবো, মোক্কুনোরে আর ঝি-পূঅগুনোরে যে মরে দিয়্যে পুরিবো সে দাবিগান জানেবাত্তে মুই মানুচ্ পাধেই দুয়োং। 6 মাত্তর্ এজেত্তে কেল্যে এ সময়ানত্ মর্ কামগুরিয়্যেগুনোরে মুই পাধেই দিম্। তারা তর্ রাজঘরান্ আর তর্ কামগুরিয়্যেগুনোর্ ঘরত্ চেক্ গুরিবাক্ আর যেদক্কানি পজাবিরা তঅ চোগেন্দি মংগা সিয়েনি আনিবাক্।’” 7 সেক্কে ইস্রায়েলর রাজাবো দেজর্ বেক্ বুড়ো নেতাগুনোরে ডাগিনে কলঅ, “চঅ, এ মানুচ্চো ক্ষোতি গুরিবার্ চেট্ট্যা গরের্, কিত্তে তে যেক্কে মঅ মোক্কুনোরে আর ঝি-পূঅগুনোরে আর সোনা-রূবো দি দিবাত্তে দাবি জানেয়্যে সেক্কে মুই সিয়েনি দিবাত্তে রাজি ওইয়োং।” 8 জোবত্ বুড়ো নেতাগুনে আর বেক্ মানুচ্চুনে কলাক্, “তা কধানি ন-শুনিবা বা তা দাবিগানিয়ো ন-মানিবা।” 9 সেনত্তে আহাবে বিন্হদদর মানুচ্চুনোরে কলঅ, “মঅ গিরোজ্ মহারাজারে কবা, তার্ পত্তম্ দাবি অনুসারে মুই বেক্কানি গুরিম্, মাত্তর্ দ্বিলম্বর্ দাবিগান্ মুই পূরোণ গুরি ন-পারিম্।” মানুচ্চুনে সেক্কে সে জোব্পান্দোই বিন্হদদ ইদু গেলাক্। 10 বিন্হদদে সেক্কে আহাব ইদু এ হবরান্ পাদেল, “মর্ বেক্ মানুচ্চুনোরে এক মুঠ্ গুরিনে দিবার্ ধোক্ক্যেন্ ধূল্যেয়ো যুনি শমরিয়াত্ থায় সালে দেবেদাগুনে যেনে মরে সাজা দুয়োন্ আর সিয়েন্ অমকদ গুরিনে দুয়োন্।” 11 জোবত্ ইস্রায়েলর্ রাজা কলঅ, “তারে কবে, ‘যে মানুচ্চো অসিলোই এজঅ যুদ্ধোত্ ন-লামে তে যেনে যুদ্ধোত্ জিদিনে ফিরি এচ্ছ্যে মান্জ্য ধোক্ক্যেন্ বাড়্ ন-গরে।’” 12 বিন্হদদর ইদু এ হবরান্ যেক্কে লুমিলো সেক্কে তে আর অন্য রাজাগুনে তারার্ তাম্বুলানিত্ মদ হাদন্। তে তা মানুচ্চুনোরে উঘুম্ দিলো, “আক্রমণ গুরিবাত্তে তুমি যুক্কোল্ অ।” সেনত্তে তারা শঅরান্ আক্রমণ গুরিবাত্তে যুক্কোল্ অলাক্। আহাবর আঢত্ বিন্হদদর উদিই যানা 13 এ ভিদিরে ইস্রায়েলর রাজা আহাবর ইদু ইক্কো ভাববাদী এইনে এ কধাগান ফগদাঙ্ গুরিলো, “লগেপ্রভু কোইয়্যেদে, ‘তুই জদবদে দাঙর্ সৈন্যদল্লো দেগর্? এচ্ছ্যে মুই তারারে তঅ আঢত্ তুলি দিম্ আর সেক্কে তুই হবর্ পেবেদে, মুয়ই লগেপ্রভু।’” 14 আহাবে পূযোর্ গুরিলো, “মাত্তর্ কারে দিইনে তে সিয়েন্ গুরিবো?” ভাববাদীবো কলঅ, “লগেপ্রভু কত্তে, নানান্ চাগালাত্ শাজন্গুরিয়্যেগুনোর্ তলে যে গাবুজ্যে সৈন্যগুন্ আগন্ তারা সিয়েনি গুরিবাক্।” আহাবে পূযোর্ গুরিলো, “যুদ্ধোগান্ কন্না আরাম্ভ গুরিবো?” জোবত্ ভাববাদীবো কলঅ, “তুই গুরিবে।” 15 আহাবে এ কধাগান শুনিনে নানান্ চাগালার্ শাজন্গুরিয়্যেগুনোর্ তলে গাবুজ্যে সৈন্যগুনোরে এগত্তর্ গুরিলো। সেক্কে তারা বেক্কুনে দ্বিশ বত্রিশজন অলাক্। সে পরেন্দি তে বেক্ ইস্রায়েলীয় সৈন্যগুনোরে এগত্তর্ গুরিলে সাত আজার সৈন্য অলাক্। 16-17 তারা দ্বিবুজ্যে অক্তত্ নিগিলিলাক্। নানান্ চাগালাত্ শাজন্গুরিয়্যেগুনোর্ সে গাবুজ্যে সৈন্যগুনে পৌইল্যা যাহ্ ধুরিলাক্। ইন্দি বিন্হদদ আর তা লগে আগন্দে বত্রিশজন রাজা তারার্ তাম্বুলো ভিদিরে মাত্তল্ অনার্ পরেন্দিয়ো মদ হাদন্। সে অক্তত্ বিন্হদদে তোগেবাত্তে মানুচ্ পাধেই দিলে তারা তারে হবর্ দিলাক্, “শমরিয়াত্তুন্ মানুচ্চুনে উজেই এজদন্।” 18 তে কলঅ, “তারা আত্ মিলেবাত্তে এলে তারারে জেদা ধরা অবঅ, আরঅ যুদ্ধোত্তে এলেয়ো তারারে জেদা ধরা অবঅ।” 19 এ ভিদিরে সে গাবুজ্যে সৈন্যগুনে তারার্ পিজেন্দি থেইয়্যে সৈন্যদলুন্ লোইনে আক্রমণ গরা আরাম্ভ গুরিলাক্। 20 তারা পত্তিজনে তারারে মানাগুরিয়্যেগুনোরে মারে ফেলেলাক্। সিয়েন্ দেগিনে অরামীয়গুনে ধেই গেলাক্ আর ইস্রায়েলীয়গুনে তারার্ পিজেন্দি লোড়েলাক্। মাত্তর্ অরামর রাজা বিন্হদদে তার্ কয়েক্কো ঘোড়াচালেয়্যেরে সমারে নেযেইনে ঘোড়া পিদিত্ গুরিনে ধেই গেলাক্। 21 ইস্রায়েলর রাজা উজেই যেইনে বাদবাগি ঘোড়া আর রথ্তানি ভস্ত গুরি দিলো আর অরামীয়গুনোরে অমকদ ক্ষোতি গুরিলো। 22 পরেন্দি সে ভাববাদীবো ইস্রায়েলর রাজা ইদু এইনে কলঅ, “তঅ বলান্ বাড়া আর কি গরা পুরিবো সিয়েন্ ভাবি চাহ্, কিত্তেই এজেত্তে জার্কালত্ অরামর রাজাবো তরে আরঅ আক্রমণ গুরিবো।” 23 এ ভিদিরে অরাম রাজার কামগুরিয়্যেগুনে তারে এ শল্লাগান্ দিলাক্, “তারার্ দেবেদাগুন্ মুড়ো-মুড়ির্ দেবেদা, সেনত্তে আমাত্তুন্ বেশ্ তারা বোলী। মাত্তর্ আমি যুনি সংজাগাত্ তারার্ লগে যুদ্ধো গুরিই সালে হামাক্কাই আমি তারাত্তুন্ বেশ্ বোলী অবং। 24 তুই এক্কান্ কাম্ গর্। রাজাগুনোরে সোরেই দিইনে তারার্ জাগানিত্ সেনাপতিগুনোরে নেযা। 25 সিয়েনবাদেয়ো যে সৈন্যদলুন্ তুই আরেয়োচ্ ঠিগ্ সেধোক্ক্যেন্ আর ইক্কো সৈন্যদল তত্তুন্ বানা পুরিবো, ঘোড়ার বদলে ঘোড়া আর রথর বদলে রথ। সালে আমি সংজাগাত্ ইস্রায়েলর লগে যুদ্ধো গুরি পারিবোং। সেক্কে হামাক্কাই আমি তারাত্তুন্ বেশ্ বোলী অবং।” তে তারার্ কধালোই রাজী ওইনে সেধোক্ক্যেন্ গুরি কাম্ গুরিলো। 26 এজেত্তে বজর্ জার্কালত্ বিন্হদদে অরামীয়গুনোরে এগত্তর্ গুরিনে ইস্রায়েলর লগে যুদ্ধো গুরিবাত্তে অফেকত্ গেলঅ। 27 ইন্দি ইস্রায়েলীয়গুনোরে এগত্তর্ গরা অলঅ। তারারে হানা-দানা যুগেই দেনার্ বেবস্থা গরা অলে যেরেন্দি তারায়ো অরামীয়গুনোর লগে যুদ্ধো গুরিবাত্তে নিগিলি গেলাক্। ইস্রায়েলীয়গুনে অরামীয়গুনোর্ মুজুঙেন্দি তারার্ তাম্বুলান্ ফেলেলাক্। তারারে দেগিনে মনে অর্ দ্বিবে ছাগল পাল, আর ইন্দি অরামীয়গুনে পুরো দেজ্ছানত্ ছিদি পুরিলাক্। 28 সেক্কে গোজেনর্ ইক্কো মানুচ্ এইনে ইস্রায়েলর রাজারে কলঅ, “লগেপ্রভু এ কধাগান কত্তে, ‘অরামীয়োগুনে মনে গোজ্যন্ লগেপ্রভু মুড়ো-মুড়ির্ গোজেন, কিজিঙোর্ গোজেন্ নয়; সেনত্তে মুই এ দাঙর্ সৈন্যদল্লোরে তঅ আঢত্ তুলি দিম্, আর সেক্কে তুমি জানি পারিবা, মুই লগেপ্রভু।’” 29 সাতদিন সং তারা একজন আরেকজনর্ মুজুঙো-মুজুঙি তাম্বুল্ ফেলেইনে রলাক্। সে পরেন্দি সাত দিনোত্ যুদ্ধো আরাম্ভ ওই গেলঅ। ইস্রায়েলীয়গুনে এক দিনে এক লাখ্ অরামীয় ঘোড়ার্ সৈন্যরে মারে ফেলেলাক্। 30 বাদবাগি সৈন্যগুনে অফেকত্ ধেই গেলাক্ আর সিদু তারার্ সাতেশ আজার সৈন্য উগুরে দেবাল্ ভাঙি পুরিলো। বিন্হদদে সিদু ধেই যেইনে ঘরঅ ভিদিরে ইক্কো গুদিত্ পৌল্যেই রলঅ। 31 বিন্হদদর কামগুরিয়্যেগুনে তারে কলাক্, “চাহ্, আমি শুন্যেইদে, ইস্রায়েলর রাজাগুনে দোয়েলু। আঢঅ, আমি কমরত্ বস্তাফাদা পিনিনে আর মাঢাত্ দুড়ি বানিনে ইস্রায়েল রাজার ইদু যেই। অয়ত তে তঅ পরাণান্ রোক্ষ্যে গুরিবো।” 32 তারা কমরত্ বস্তা ফাদা পিনিনে আর মাঢাত্ দুড়ি বানিনে ইস্রায়েল রাজার ইদু যেইনে কলাক্, “তঅ চাগর্বো বিন্হদদে কত্তে, তুই যেনে দোয়্যে গুরিনে তারে বাঁজেই রাগাচ্।” জোবত্ রাজা কলঅ, “তে কি এজঅ জেদা আঘে? তে মর্ ভেই।” 33 সে মানুচ্চুনে ইয়েনরে গম্ কধা বিলিনে মনে গুরিনে যাদিমাদি গুরি তা কধাগান মজিম্ কলাক্, “অয়, বিন্হদদে ঘেচ্চেকগুরি তর্ ভেই।” রাজা কলঅ, “তুমি যেইনে তারে আন।” বিন্হদদে নিগিলি এজানার্ পরেন্দি আহাবে তারে তার্ রথতানত্গুরি তুলি নেযেল। 34 বিন্হদদে কলঅ, “তঅ বাবত্তুন্ মঅ বাপ্পো যেদক্কানি আদাম নেযেয়্যে মুই সিয়েনি তরে ফিরেই দিম্। মঅ বাপ্পো যেধোক্ক্যেন্ শমরিয়াত্ বাজার্ বোজেয়্যে সেধোক্ক্যেন্ তুয়ো দামেস্কর্ নানান্ জাগাত্ বাজার্ বোজেই পারিবে।” আহাবে কলঅ, “এক্কান্ সুদোম গুরিনে তরে মুই ইরি দিম্।” ইয়েন্ কোইনে তে বিন্হদদর্ লগে এক্কান্ সুদোম গুরিনে তারে ইরি দিলো। আহাবর দুষ্ 35 লগেপ্রভুর উগুমে শিচ্চ্য-ভাববাদীগুনো ভিদিরে একজনে তা সমাজ্যেবোরে কলঅ, “দোয়্যে গুরিনে মরে আঘাত্ গর্।” মানুচ্চো সেক্কে রাজী ন-অলঅ। 36 সেক্কে সে ভাববাদীবো কলঅ, “তুই লগেপ্রভুর কধালোই বাধ্য ন-অলে সেনত্তে মরে ছাড়ি যানার্ লগে লগে ইক্কো সিংহ তরে মারে ফেলেব।” মানুচ্চো যানার্ পরেন্দি ইক্কো সিংহ তারে দেগিনে মারে ফেলেল। 37 সে ভাববাদীবো আর ইক্কো মান্জ্যরে দেগিনে তারে কলঅ, “দোয়্যে গুরি মরে আঘাত্ গর্।” মানুচ্চো তারে আঘাত্ গুরিনে ঘা গুরি দিলো। 38 সে পরেন্দি সে ভাববাদীবো পধঅ কায় থিয়্যেইনে রাজাত্তে বাজ্জেই থাহ্ ধুরিলো। তে তা মাঢাবোত্ কাবড় বানিনে তা চোগো উগুরে লামেই আনিনে নিজো পরিচয়ান্ গুমুরোত্ রাগেল। 39 রাজা সে পধেন্দি যেবার্ অক্তত্ সে ভাববাদীবো তারে ডাগিনে কলঅ, “তঅ চাগর্ মুই যুদ্ধোর্ সংমোধ্যে যেইয়োং। সেক্কে ইক্কো মানুচ্ ইক্কো বন্দীরে মইদু আনিনে কলঅ, ‘এ মানুচ্চোরে চুগি দে। যুনি তে আজি যায় সালে তা পরাণানর্ বদলে তঅ পরাণান্ নেযেম, আর সিয়েন্ ন-অলে ঊনচল্লিশ কেজি রূবো ঘুনহার্ দিয়্যে পুরিবো।’ 40 মাত্তর্ তঅ চাগর্বো যেক্কে অমকদ কামত্ এলঅ সেক্কে তে কুদু যেয়েগোই।” সেক্কে ইস্রায়েলর রাজা কলঅ, “সে সাজাগান্ তর্ অবঅ। তুই নিজোর্ মুয়োন্দি সিয়েন্ কোইয়োচ্।” 41 সেক্কে সে ভাববাদীবো যাদিমাদি চোগো উগুরেত্তুন্ মাঢাবোর্ কাবড়ান্ সোরেই ফেলেল আর ইস্রায়েলর রাজা তারে ভাববাদীগুনোত্তুন্ এক্কো বিলিনে চিনি পারিলো। 42 সে ভাববাদীবো রাজারে কলঅ, “লগেপ্রভু এ কধাগান কত্তে, ‘মুই যিবেরে ভস্ত অনার্ অভিশাব অধীন গোজ্যং তুই তারে ছাড়ি দুয়োচ্। সেনত্তে তা পরাণান বদলে তঅ পরাণান্ আর তা মানুচ্চুনোর্ বদলে তঅ মানুচ্চুনোর্ পরাণান্ যেবঅ।’” 43 ইয়েন্দোই ইস্রায়েলর রাজা মুয়োন্ কালা গুরিলো আর কাঙেলেত্যে পেইনে শমরিয়াত্ তা রাজঘরত্ গেলঅ। |
Copyright © 2021 Bangladesh Bible Society
Bangladesh Bible Society