১ রাজাবলী 2 - Chakma Bible

শলোমন উগুরে দায়ূদোর শেজ্‌ উগুমান

¹ মরণর অক্তবো ঘোনেই এলে পরেন্দি দায়ূদে তার পূঅ শলোমনরে এই বেক্‌ উগুমানি কলদে,

² পিত্তিমীর বেক্কুনে যে পথ্‌তানন্দি যান্‌ মুইয়ো ইক্কিনে সেই পথ্‌তানন্দি যাঙর্‌। সেনত্তেই তুই দরমর অ, নিজোরে যোগাজ্যে মরদ্‌পূঅ ইজেবে দেগা।

³ তর্‌ গোজেন লগেপ্রভুর আওজ্ মজিম্‌ তুই তার পধেন্দি আদিবে আর মোশির রীদি-সুদোমত্ লেগা লগেপ্রভুর বেক্‌ সুদোম, উগুম, হুকুম আর দাবিগানি মানি চলিবা। সেক্কে তুই যিয়েনি গত্তে সাৎ আর যিয়োদোই যেদে সাৎ ফোলেই পারিবে।

⁴ সালে লগেপ্রভু যে এগেমান্ মইদু গোজ্যে সিয়েন পুরেই দিবো। সেই এগেমান্ অলঅ, যুনি তর্‌ গুট্টিগুনে বেক্‌ মনান্‌-পরাণান দিইনে বিশ্বেজ্ গুরিনে মর্‌ মুজুঙোত্‌ আদাউদো গুরিবাত্তে উজিয়ার্ গুরিনে জিংকানি কাদায় সালে ইস্রায়েলর সিংহাসনত্‌ বোজেবাত্তে তর্‌ বংশত্‌ মান্‌জ্যর অভাব ন-অবঅ।

⁵ “সরূয়ার পূঅ যোয়াবে মর্‌ উগুরে যিয়েনি গোজ্যে আর ইস্রায়েলীয় সৈন্যদলুনোর দ্বিবে সেনাপতি উগুরে, অত্তাৎ নেরের পূঅ অব্‌নের আর যেথরর পূঅ অমাসা উগুরে যিয়েনি গোজ্যে সিয়েন দঅ তুয়ই হবর্‌ পাচ্‌। তে তারারে খুন্ গোজ্যে, শান্তির অক্তত্‌অ যুদ্ধোর সময়ো ধোক্ক্যেন গুরিনে তে তারারে লো ঝোরেই দিয়্যে আর সেই লো-নি তার কমর-বিজোনিত্‌ আর টেঙর্‌ জদানিত্‌ বাস্যে।

⁶ তুই তা লগে বুদ্ধি খাদেইনে চলিবে, মাত্তর্‌ বুড়ো বয়জত্‌ তুই তারে সুগে-শান্দিয়্যে মরণর জাগাত্‌ যেবাত্তে ন-দিবে।

⁷ মাত্তর্‌ গিলিয়দর বর্সিল্লয়র পূঅগুনো উগুরে বিশ্বেজ্ গোজ্য। তর্‌ টেবিলোত্‌ যিগুনে তর্‌ লগে হানা-দানা গরন্‌ তারা ভিদিরে তুই তারারেয়ো জাগা দিস্‌। তর্‌ ভেই অবশালোমর্ ইত্তুন্‌ ধেই যেবার অক্তত্‌ তারা মর্‌ কায় এইনে থিয়্যেইয়োন।

⁸ মনত্‌ রাগেচ্‌, বহুরীমোর বিন্যামীন-গুট্টির গেরার পূঅ শিমিয়ি তঅ সমারে আঘে। মুই যেদিন্যে মহনয়িমোত্‌ যেইয়োং সেদিন্যে তে মরে জদবদে অভিশাব দিয়্যে। যর্দনত্‌ তে মঅ লগে দেগা গুরিবাত্তে এলে মুই লগেপ্রভুর নাঙে তাইদু শমক্‌ খেইয়োং, মুই তারে মারে ন-ফেলেম।

⁹ মাত্তর্‌ ইক্কিনে তুই তারে গম্‌ বিলিনে মনে ন-গুরিবে। তুই বুদ্ধিবলা; তা উগুরে তুই কি গুরিবে সিয়েন তুই নিজেই বুঝি পারিবে। তার বুড়ো বয়জত্‌ লো-ঝরানার মাধ্যমে তারে মরণজাগাত্‌ পাধেই দিবে।”

¹⁰ ইয়েনর্ পরেন্দি দায়ূদে তার পূরোণি মানেইয়ুনোর ইদু গেলগোই আর তারে দায়ূদ-শঅরত্‌ গোর্ দিয়্যে অলঅ।

¹¹ তে ইস্রায়েল উগুরে চোল্লিশ বজর্ রাজাগিরি গোজ্যে-সাত বজর্ হিব্রোণত্‌ আর তেত্রিশ বজর যিরূশালেমত্।

¹² পরেন্দি শলোমনে তা বাবঅ সিংহাসনত্‌ বুজিলো আরঅ তার রাজাগিরি দরমর গুরিনে থিদেবর্ অলঅ।

শলোমনর্ রাজাগিরি দরমর গুরিনে থিদেবর্ অলঅ

^13-14 পরেন্দি হগীতোর পূঅ আদোনিয় শলোমনর্ মা বৎশেবার ইদু গেলঅ। বৎশেবা তারে পুযোর্‌ গুরিলো, “তুই কি গম্‌ মন্দোই এচ্ছোস্‌?” তে কলঅ, “অয়, গম মন্দোই এচ্ছোং। তরে মত্তুন্‌ কিজু কবার্‌ আঘে।” বৎশেবা কলদে, “কঅ।”

¹⁵ সেক্কে তে কলঅ, “তুই দঅ হবর্‌ পাজ্‌ রেজ্যগান মর্ এলঅ। বেক্‌ ইস্রায়েলীয়গুনে মনে গোজ্যন্দে মুই রাজা ওম্‌। মাত্তর্‌ অবস্থাগান বুদুলি যেইনে রেজ্যগান মর্‌ ভেইয়োর্‌ আঢত্‌ যেইয়্যে, কিত্যে ইয়েন লগেপ্রভুর ইত্তুন্‌ তে পেইয়্যে।

¹⁶ ইক্কিনে তইদু মর্‌ এক্কান কোজোলী আঘে। তুই মরে ফিরেই ন-দিবে।” তে কলদে, “কঅ।”

¹⁷ তে সেক্কে কুয়ো ধুরিলো, “তুই রাজা শলোমনরে কঅ যেনে তে শূনেমীয়া অবীশগরে মত্তে বৌ দে। তে তর্‌ কধাগান ন-ফেলেব।”

¹⁸ জোবত্‌ বৎশেবা কলঅ, “ঠিগ্‌ আঘে, মুই তর্‌ কধাগান রাজারে কোম্‌।”

¹⁹ বৎশেবা যেক্কে আদোনিয়র কধানি কবাত্তে রাজা শলোমন ইদু গেলঅ সেক্কে রাজা উদিনে তাইদু যেইনে তারে সালাম গুরিলো আর সে পরেন্দি তার সিংহাসনত্‌ বুজিলো। রাজা তা মাবোত্তে এক্কান আসন আনিনে তার ডেন্‌ ডাগেন্দি রাগেল আর তা মাবো সিয়েনত্‌ বুজিলো।

²⁰ বৎশেবা কলঅ, “মুই তরে এক্কান চিগোন কোজোলী গুরিম; তুই মরে ফিরেই ন-দিস্‌।” জোবত্‌ রাজা কলঅ, “কঅ মা, মুই তরে ফিরেই ন-দিম্‌।”

²¹ বৎশেবা সেক্কে কলঅ, “তর্‌ ভেই আদোনিয় সমারে শূনেমীয়া অবীশগরে বৌ দিয়্যে ওক্‌।”

²² জোবত্‌ রাজা শলোমনে তা মাবোরে কলঅ, “আদোনিয়ত্তে কিত্তে তুই শূনেমীয়া অবীশগরে চর্‌? তুই তাত্তেই রেজ্যগান্‌অ দঅ চেই পারিদে, কিত্যে তে মর্‌ দাঙর্‌ ভেই; অয়, তাত্তে, ধর্মগুরু অবিয়াথরত্তে আর সরূয়ার পূঅ যোয়াবত্তেয়ো সিয়েনি চেই পারিদে।”

²³ ইয়েনর্ পরেন্দি রাজা শলোমন লগেপ্রভুর নাঙে শমক্‌ খেইনে কলদে, “এ কোজোলিগানত্তে যুনি আদোনিয়র পরাণান নেযা ন-অয় সালে লগেপ্রভু যেনে মরে সাজা দে, আর সিয়েন জদবদেগুরিনে দে।

²⁴ যিবে মঅ বাপ দায়ূদোর সিংহাসনত্‌ মরে দরমর গুরিনে থিদেবর্ গুরি দিয়্যে আর তার এগেম্ মজিম্ মত্তে এক্কো রাজবংশ থিদেবর্ গোজ্যে সেই জেদা লগেপ্রভুর নাঙে কঙর্‌, এচ্চ্যে আদোনিয়রে মারে ফেলা অবঅ।”

²⁵ সে পরেন্দি রাজা শলোমন যিহোয়াদার পূঅ বনায়রে উগুম দিলো, আর বনায় আদোনিয়রে মারে ফেলেল।

²⁶ পরেন্দি রাজা ধর্মগুরু অবিয়াথররে কলঅ, “তুই অনাথোতত্‌ নিজোর জাগাত্‌ ফিরি যা। তুই মুরিবার যোগাজ্যে, মাত্তর্‌ ইক্কিনে মুই তরে মারে ন-ফেলেম, কারণ তুই তর্‌ বাবা দায়ূদোর সময়োত্‌ লগেপ্রভুর সুন্দুক্কো বুয়োই নেযেয়োচ্‌ আর মঅ বাপ্পোর বেক্‌ দুখ-কষ্টর ভাগি ওইয়োচ্‌।”

²⁷ এসাইন্যাগুরি শলোমনে অবিয়াথররে লগেপ্রভুর ধর্মগুরু পধত্তুন্‌ সোরেই দিলো। লগেপ্রভু শীলোত্‌ এলির গুট্টিগুনো পৌইদ্যেনে যিয়েনি কোইয়্যে তার্‌ সেই কধানি এবাবোত্যেগুরি পূরোণ অলঅ।

²⁸ এই বেক্‌ হবরানি যোয়াবর্‌ কানত্‌ গেলঅ। তে অবশালোমর্‌ পক্ষেন্দি ন-গেলেয়ো আদোনিয়র পক্ষেন্দি যেইয়োন, সেনত্তেই তে ধেই যেইনে লগেপ্রভুর তাম্বুলোত্‌ যেইনে ডালিঘরর শিঙুন্‌ ধুরি থেলঅ।

²⁹ রাজা শলোমনরে কুয়া অলদে, যোয়াবে ধেইনে লগেপ্রভুর তাম্বুলোত্‌ যেইয়্যে আর ডালিঘর ইদু আঘে। সেক্কে শলোমন যিহোয়াদার পূঅ বনায়রে এ উগুমান দিলো, “তুই যেইনে তারে মারে ফেলা।”

³⁰ সেনত্তেই বনায় লগেপ্রভুর তাম্বুলোত্‌ সুমিনে যোয়াবরে কলঅ, “রাজা তরে নিগিলি এবাত্তে কোইয়্যে।” মাত্তর্‌ যোয়াবে কলদে, “না, মুই ইয়োদোই মুরিম।” বনায় রাজারে সে হবরান জানেইনে কলঅ, “যোয়াবে মরে এ জোব্‌পাান্ দিয়্যে।”

³¹ সেক্কে রাজা বনায়রে এ উগুমান দিলো, “তে যিয়েনি কোইয়্যে সিয়েনোই গোরোক্‌। তারে মারে ফেলেইনে গোর্ দুয়ো। যোয়াবে যে নিদ্দুজি মান্‌জ্যরে লো ঝোরেয়্যে তার্ দুষ্‌ছানি তুই মর্‌ আর মঅ বাবর্‌ বংশত্তুন্‌ এবাবোত্যেগুরি দূর্ গুরি দে।

³² যে লো-গানি তে ঝোরেয়্যে সে হেনাবো লগেপ্রভু নেযেব, কিত্যে মঅ বাপ্পো দায়ূদে হবর্‌ ন-পেইয়্যেগুরি দ্বিজন মান্‌জ্যরে আক্রমণ গুরিনে মারে ফেলেয়্যে। তারা অলাক্‌ ইস্রায়েলর সৈন্যদলর সেনাপতি নেরর পূঅ অব্‌নের আর যিহূদার সৈন্যদলর সেনাপতি যেথরর পূঅ অমাসা। এ দ্বিজনই এলাক্‌ তাত্তুন্‌ বেশ্‌ আরঅ খাটি আরঅ গম্‌ মানুচ্‌।

³³ তারার্ লো ঝরানার দুষ্‌ছান যোয়াবর আর তা বংশর মানুচ্চুনোর মাদা উগুরে জিংকানিবর থোক্‌। মাত্তর্‌ দায়ূদ আর তা বংশর মানুচ্চুনো উগুরে আর তা গিরির্ আর তা সিংহাসন উগুরে লগেপ্রভুর শান্তি জিংকানিবর থোক্‌।”

³⁴ সেক্কে যিহোদায়ার পূঅ বনায় যেইনে যোয়াবরে মারে ফেলেল। তারে ধূল্যে-চর চাগালাত্‌ তা নিজোর ঘরত্‌ গোর্ দিয়্যে অলঅ।

³⁵ রাজা সেক্কে যোয়াবর জাগানত্‌ যিহোয়াদার পূঅ বনায়রে সেনাপতি ইজেবে নেযা অলঅ আর অবিয়াথরর জাগাত্‌ বোজেল ধর্মগুরু সাদোকরে।

³⁶ সে পরেন্দি রাজা মানুচ্‌ পাদেইনে শিমিয়িরে ডাগি আনিনে কলঅ, “তুই যিরূশালেমত্‌ এক্কান ঘর বানেইনে সিয়োদোই থাক্‌, অন্য কনজাগাত্‌ তর্‌ যানা ন-চলিবো।

³⁷ যেদিন্যে তুই সিয়েনত্তুন্‌ নিগিলিনে কিদ্রোণ কিজিঙান্‌ পার্‌ অবে সেদিন্যে তুই গমেডালে মনত্‌ রাগেচ্‌, তত্তুন্‌ মরা পুরিবো; তর্‌ লো ঝরানার্‌ দুষ্‌ছান্‌ তর্‌ নিজোর্‌ মাদা উগুরেই পুরিবো।”

³⁸ জোবত্‌ শিমিয়ি রাজারে কলঅ, “তুই ঠিগই কোইয়োচ্‌। মর্‌ গিরোজ্‌ মহারাজে যিয়েনি কোইয়্যে তর্‌ চাগর্‌বো সিয়েনোই গুরিবো।” ইয়েনর্ পরেন্দি শিমিয়ি ভালোক্‌ দিন যিরূশালেমত্‌ থেলঅ।

³⁹ মাত্তর্‌ তিন বজর্‌ পরেন্দি শিমিয়ির দ্বিজন চাগরে মাখার পূঅ গাতর রাজা আখীশোর ইদু ধেই গেলাক্। শিমিয়িরে কুয়া অলঅ, তার্‌ চাগরুনে গাতত্‌ আগন্‌।

⁴⁰ সেক্কে শিমিয়ি তা গাধাবো উগুরে উদিনে তার্‌ চাগরুনোরে তোগেবাত্তে গাতত্‌ আখীশোর ইদু গেলঅ আর সিয়োত্তুন্‌ তারারে ফিরেই আনিলো।

⁴¹ যেরেন্দি শলোমনরে হবর্‌ দিয়্যে অলঅ, শিমিয়ি যিরূশালেমত্তুন্‌ গাতত্‌ যেইনে আরঅ ফিরি এলঅ।

⁴² রাজা সেক্কে শিমিয়িরে ডাগি আনিনে কলঅ, “মুই কি লগেপ্রভুর নাঙে তরে শমক্‌ খাবেইনে উজিয়ার্ গুরি ন-দুয়োং, যেদিন্যে তুই নিগিলিনে আর কনজাগাত্‌ যেবে সেদিন্যে তত্তুন্‌ হামাক্কাই মরা পুরিবো? সে সময়োত্‌ তুই মরে কোইয়োচ্‌, মুই ঠিগই কোইয়োং আর তুই সেধোক্ক্যেন্ চলিবে।

⁴³ সালে কিত্তে তুই লগেপ্রভুর্ ইদু গোজ্যে এগেমান্ আর মর্‌ উগুমানি ন-পালাচ্‌?”

⁴⁴ শলোমন শিমিয়িরে আরঅ কলঅ, “মঅ বাপ্পো দায়ূদো উগুরে তুই যেদক্কানি অন্যেয় গোজ্যস্‌ সিয়েন দঅ তর্‌ মনানে হবর্‌ পায়। ইক্কিনে লগেপ্রভুই তরে তর্‌ অন্যেয় কামর্‌ ফল দিবো।

⁴⁵ মাত্তর্‌ রাজা শলোমন উগুরে আশিদবাদ্‌ থেবঅ, আর দায়ূদোর সিংহাসন লগেপ্রভুর মুজুঙোত্‌ জিংকানিবর্‌ অদে অদে থেবঅ।”

⁴⁶ ইয়েনর্ পরেন্দি রাজা যিহোয়াদার পূঅ বনায়রে উগুম দিলো আর বনায় যেইনে শিমিয়িরে মারে ফেলেল। এধোক্ক্যেনগুরি শলোমনর্ আঢত্‌ রেজ্যগান দরমরগুরি থিদেবর্ অলঅ।