১ রাজাবলী 18 - Chakma Bibleএলিয় আর ওবদিয় 1 ইয়েনর্ ভালোক্ দিন পরেন্দি, ঝড়্ ন-অনার্ তিন বজরত্ লগেপ্রভু এলিয়রে কলঅ, “তুই যেইনে আহাবরে দেগা দে। মুই দেজত্ ঝড়্ পাধেই দুয়োঙর্।” 2 সেনত্তে এলিয় আহাবরে দেগা দিবাত্তে গেলঅ। সেক্কে শমরিয়াত্ অমকদ ভাদরাত্ চলের্। 3 আহাবে ওবদিয়রে ডাগিনে পাদেল। রাজঘরর্ দেগাশুনোর্ ভারান্ ওবদিয়োর্ উগুরে এলঅ। লগেপ্রভুর উগুরে ওবদিয়োর্ ভোক্তিবলা বিশ্বেজ্ অমকদ এলঅ। 4 ইষেবলে যেক্কে লগেপ্রভুর ভাববাদীগুনোরে মারে ফেলেল সেক্কে ওবদিয় একশজন ভাববাদীরে লোইনে পঞ্চাশজন পঞ্চাশজন গুরিনে দ্বিবে গাদত্ লুগেই রাগেল। তে তারার্ হানা আর পানি যুগেই দিদো। 5 ওবদিয় এজানার্ পরেন্দি আহাবে তারে কলঅ, “তুই দেজর্ বেক্ উইফুত্তুনো ইদু আর কিজিঙানি ইদু যাহ্। ঘোড়া আর খচ্চরুনোর্ পরাণান্ রোক্ষ্যে গুরিবাত্তে অয়ত কিজু ঘাস পাহ্ যেবঅ। সেক্কে আমাত্তুন্ কনঅ য়েমানরে মারে ফেলা ন-পুরিবো।” 6 তারা দ্বিজনে ঘুরি চেবাত্তে দেজ্ছান ভাগ গুরি নেযেলাক্। আহাবে নিজে এককিত্তেন্দি গেলঅ আর ওবদিয় গেলঅ অন্যকিত্তেন্দি। 7 ওবদিয় পধন্দি যার্ এন্ সময়োত্ এলিয়োর্ লগে তার্ দেগা অলঅ। ওবদিয় তারে চিনিনে মাদিত্ মাঢা নিগিরিনে কলঅ, “মঅ গিরোজ্ এলিয়, আজলে কি ঘেচ্চেকগুরি তুই?” 8 জোবত্ তে কলদে, “অয়, মুই। তুই তর্ গিরোজ্সোরে যেইনে হবর্ দেগোই, এলিয় ইদু আঘে।” 9 ওবদিয় কলঅ, “মুই কি অন্যেয়্ গোজ্যঙ্গে, তুই তঅ চাগর্ মরে মারে ফেলেবাত্তে আহাবর আঢত্ তুলি দোত্তে? 10 তর্ গোজেন জেদা লগেপ্রভুর্ নাঙান্ ধুরিনে কঙর্, এধোক্ক্যেন্ কনঅ জাত্ বা রেজ্য বাদ ন-যাই যিয়েনত্ মঅ গিরোজ্সো তরে তোগেবাত্তে মানুচ্ ন-পাদাই। সে বেক্ জাদ্তুনে বা রেজ্যগানিয়ে যেক্কে ফগদাঙ্ গোজ্যে, তুই সিদু নেই সেক্কে তে তারারে দিইনে এ শমক্তান্ গুরি নেযেয়্যে, তারা আজলে তরে তোগেইনে ন-পান্। 11 আর ইক্কিনে তুই মরে মঅ গিরোজ্সো ইদু যেইনে কবাত্তে কত্তে, এলিয় ইদু আঘে। 12 মুই তরে ফেলেই গেলে লগেপ্রভুর আত্মাগান্ তরে অন্য কন্ জাগাত্ নেযেব যিয়েন্ মুই হ্বর ন-পাং। মুই যেইনে আহাবরে কনার্ পরেন্দি যুনি তে তরে তোগেইনে ন-পাই সালে তে মরে মারে ফেলেব। মাত্তর্ চিগনত্তুন্ ধুরি তঅ চাগর্ মুই লগেপ্রভুরে ভোক্তি গুরিনে দোরেনেই এজঙর্। 13 ঈষেবল যেক্কে লগেপ্রভুর ভাববাদীগুনোরে মারে ফেলেয়্যে সেক্কে মুই কি গোজ্যং সিয়েন্ কি মঅ গিরোজ্সো ন-শুনে? লগেপ্রভুর ভাববাদীগুনোরে একশঅ জনরে পঞ্চাশজন পঞ্চাশ জন গুরিনে দ্বিবে গাদত্ লুগেই রাগেয়োং আর তারার্ হানা আর পানি যুগেই দুয়োং। 14 আর তুই ইক্কিনে মরে মঅ গিরোজ্সো ইদু যেইনে কবাত্তে কত্তে, এলিয় ইদু আঘে। তে দঅ মরে মারে ফেলেব।” 15 এলিয় কলদে, “মুই যিবেরে সেবা গরঙ্, অত্তাৎ গোদা সংসারানর্ গিরোজ্ জেদা লগেপ্রভুরে শমক্ হেইনে কঙর্, মুই এচ্ছ্যে আহাবর্ মুজুঙোত্ হামাক্কায় আঝিল্ ওম্।” এলিয় কর্মিল মুড়োবো উগুরে 16 সেক্কে ওবদিয় আহাবর লগে দেগা গুরিনে কধাগান্ তারে কলঅ আরে আহাবে এলিয়র লগে দেগা গুরিবাত্তে গেলঅ। 17 এলিয়রে দেগিনে আহাবে কলঅ, “ও ইস্রায়েলর কাদা, ইবে কি তুই?” 18 জোবত্ এলিয় কলঅ, “মুই কাদা নয়, মাত্তর্ তুই আর তঅ বাবঅ বংশর্ মানুচ্চুনে ইস্রায়েলর কাদা। তুমি লগেপ্রভুর উগুমানি ছাড়িনে বাল দেবেদাগুনোর্ পিজেন্দি যেইয়ো। 19 ইক্কিনে মানুচ্ পাদেইনে ইস্রায়েলর্ বেক্কুনোরে কর্মিল মুড়োবোত্ মইদু এগত্তর্ গর্। ঈষেবলের টেবিলোত্ বাল দেবেদার যে চেরশঅ পঞ্চাশজন ভাববাদী আর আশেরার চেরশঅ জন ভাববাদীরে হানা-দানা হাবেইনে তারারে আন্।” 20 সেক্কে আহাবে ইস্রায়েলর বেক্ জাগায়ানিত্ হবর্ পাধেই দিলো আর কর্মিল মুড়োবোত্ সে ভাববাদীগুনোরে এগত্তর্ গুরিলো। 21 এলিয় মানুচ্চুনোর মুজুঙোত্ যেইনে কলঅ, “আর কয়দিন তুমি দ্বিয়েন্ নৌকোত্ ঠেঙ্ দিইনে চলিবা? যুনি লগেপ্রভু গোজেন্ অয় সালে তারে সেবা গরঅ, আর যুনি বাল দেবেদাবো গোজেন অয় সালে তারে সেবা গরঅ।” মাত্তর্ মানুচ্চুনে কনঅ জোব্ ন-দিলাক্। 22 সেক্কে এলিয় তারারে কলঅ, “লগেপ্রভুর্ ভাববাদীগুনোর ভিদিরে বানা মুই বাগি আগং, মাত্তর্ বাল দেবেদার ভাববাদী আগন্দে সাড়ে চের্শ জন। 23 ইক্কিনে আমাত্তে দ্বিবে বলদ্ গোরু আনা ওক্। তারা নিজোত্তে ইক্কো বলদ গোরু বেঈ লোইনে কাবিনে কট্টা কট্টা গুরি তক্তা উগুরে রাগাদোক্, মাত্তর্ সিয়েনত্ আগুন্ ন-দেদোক্। মুই অন্য বলদ গোরুবো নেযেইনে কাবিনে যুক্কোল্ গুরি তক্তা উগুরে রাগেম্ মাত্তর্ সিয়েনত্ আগুন্ ন-দিম্। 24 সে পরেন্দি তারা তারার্ দেবেদাবোরে ডাগিবাক্ আর মুই ডাগিম্ লগেপ্রভুরে। যিবে আগুন্ পাদেইনে ইয়েনর জোব্ দিবো তেয়ই গোজেন।” এ কধাগান শুনিনে বেক্কুনে কলাক্, “তুই দোল্ কধা কোইয়োচ্।” 25 এলিয় বাল-দেবেদার ভাববাদীগুনোরে কলঅ, “তুমি ইক্কো বলদ গোরু বেঈ লোইনে পত্তমে সিবে কাবিনে যুক্কোল্ গুরি নেযঅ, কিত্তে তুমি জনেদি বোউত্ বেশ্। সে পরেন্দি তুমি তমা দেবেদাবোরে ডাগঅ, মাত্তর্ আগুন্ ন-দিবা।” 26 যে বলদ গোরুবো তারারে দিয়্যে অলঅ তারা সিবে কাবিনে যুক্কোল্ গুরি নেযেলাক্। সে পরেন্দি তারা বেন্যেত্তুন্ ধুরি দিবুজ্যে সং বাল দেবেদাবোরে ডাগা ধুরিলাক্। তারা রঅ ছাড়ি ছাড়ি কুয়া ধুরিলাক্, “ও বালদেব, আমারে জোব্ দে।” মাত্তর্ কনঅ সাড়া ন-মিলিলো, কনজনে জোব্ ন-দিলো। যে ডালিপূজোবো তারা বানেয়োন্ সিবের্ চেরোকিত্তে তারা নাজা ধুরিলাক্। 27 দিবুজ্যে অক্তত্ এলিয় তারারে ঠাট্টা গুরিনে কলঅ, “দাঙর্ গুরিনে রঅ ছাড়অ, তে দঅ দেবেদা। অয়ত তে গভীন্ চিন্তে গরের্, নয়ত আঘাছালত্ যেইয়্যে, নয়ত পদথ্ আদের্। অয়ত্ ঘুম্ যার্, তারে জাগা পুরিবো।” 28 সেনত্তে তারা আরঅ দাঙর্ গুরিনে রঅ ছাড়া ধুরিলাক্ আর তারার্ সুদোম মজিম্ কিয়্যেত্ লো নালি বেঈ ন-যানা সং ছুড়িলোই আর কাদালোই নিজোরে কাবা ধুরিলাক্। 29 দিবুজ্যে গেলগোই আর বেল্যে বেল্যে য়েমান্-উৎসর্বর অক্ত সং ভুদে পেয়্যে মান্জ্য ধোক্ক্যেন্ তারা ফুলু ফাল্যে ভাচ্ কুয়া ধুরিলাক্। মাত্তর্ কনঅ সাড়া পাহ্ ন-গেলঅ, কনজনে জোব্ ন-দিলাক্, কনজনে মনযোগ্অ ন-দিলাক্। 30 সেক্কে এলিয় বেক্ মানুচ্চুনোরে কলঅ, “তুমি মইদু এজঅ।” তারা তার্ কায়কুরে গেলাক্। এলিয় লগেপ্রভুর ভেদের-চেদের ওয়্যে ডালিপূজোবো সোর্ গুরিলো। 31 তে যাকোব পূঅগুনোর্ পত্তি গুট্টিত্তে ইক্কো গুরি বারবো পাত্তর্ নেযেল। এ যাকোবরে লগেপ্রভু কোইয়্যেদে, “তঅ নাঙান্ অবঅ ইস্রায়েল।” 32 সে পাত্তরুন্দোই এলিয় লগেপ্রভুর নাঙে ইক্কো ডালিপুজো বানেল আর সিবের্ চেরোকিত্তে এমন্ নালা কাবিলো যিবের্ ভিদিরে বার কেজি বীজিলোই ভোজ্যে ইক্কো থৈল্যে বজা যায়। 33 সে পরেন্দি তে ডালিপূজোবো উগুরে তক্তা সাজেইনে বলদ গোরুবো কট্টা কট্টা গুরিনে সে তক্তানি উগুরে রাগেল আর তারারে কলঅ, “তুমি চের্বো কুম্ পানিলোই ভোরেইনে এ পূজ্যে-উৎসর্বর য়েরা আর তক্তানি উগুরে ঢালি দুয়ো।” 34 সে পরেন্দি তে কলঅ, “আরঅ গরঅ।” মানুচ্চুনে সিয়েন গুরিলাক্। তে উঘুম্ দিলো, “তিনবার গরঅ।” তারা তিনবার সিয়েন গুরিলাক্। 35 সেক্কে ডালিপূজোবো উগুরেত্তুন্ পানি পড়িনে নালাবো ভুরি গেলঅ। 36 বেইল্যে বেইল্যে উৎসর্বর সময়ানত্ ভাববাদী এলিয় মুজুঙোত্ উজেই এইনে তবনা গুরিলো, “ও লগেপ্রভু, অব্রাহাম, ইসহাক আর ইস্রায়েলর গোজেন, এচ্ছ্যে তুই জানেই দে, ইস্রায়েলর ভিদিরে তুয়ই গোজেন আর মুই তঅ চাগর্, আর তঅ উগুমে মুই ইয়েনি গোজ্যং। 37 ও লগেপ্রভু, মরে জোব্ দে, জোব্ দে, যেনে এ বেক্ মানুচ্চুনে হবর্ পান্, ও লগেপ্রভু, তুয়ই গোজেন আর তুয়ই তারার্ মনানি ফিরেই আন্যচ্।” 38 সেক্কে উগুরেত্তুন্ লগেপ্রভুর আগুনান্ পড়িনে উৎসর্বর য়েরানি, তক্তানি, পাত্তরুন আর মাদিগানরে পুড়ি ফেলেল আর নাল্লোর্ পানিগানঅ শুজি নিলো। 39 ইয়েন্ দেগিনে মানুচ্চুনে মাদিত্ আদু পাড়ি পড়িনে রঅ ছাড়িনে কলাক্, “লগেপ্রভুই গোজেন, লগেপ্রভুই গোজেন।” 40 সেক্কে এলিয় তারারে এ উগুমানি দিলো, “বাল দেবেদার ভাববাদীগুনোরে ধরঅ। তারার্ একজনরেয়ো ধেই যেবাত্তে ন-দুয়ো।” সেক্কে মানুচ্চুনে তারারে ধুরি ফেলেলাক্। এলিয় তারারে কীশোন কিজিঙোত্ নেযেইনে সিদু তারারে মারে ফেলেল। 41 সে পরেন্দি এলিয় আহাবরে কলঅ, “তুই যেইনে হানা-দানা গর্, কিত্তেই অমকদ ঝড়র্ রঅ শুনো যার্।” 42 আহাবে হানা-দানা গুরিবাত্তে গেলঅ, মাত্তর্ এলিয় যেইনে কর্মিল মুড়োবো উগুরে উদিলো। তে মাদিত্ আদু পাদিনে দ্বিবে আদু ভিদিরে মুয়োন্ রাগেল। 43 পরেন্দি তে তা চাগর্বোরে কলঅ, “তুই যেইনে সাগরর্ ইন্দি চাহ্।” তে যেইনে দেগিনে কলঅ, “সিয়েনত্ কিচ্ছু নেই।” সাতবার এলিয় তারে ফিরি যেইনে চেবাত্তে কলঅ। 44 সাতবারত্ চাগর্বো এইনে কলঅ, “মান্জ্য আদ ধোক্ক্যেন্ চিগোন্ এক্কান মেঘ সাগরত্তুন্ উদের্।” সেক্কে এলিয় তারে কলঅ, “তুই যেইনে আহাবরে কঅ যেনে তে তা রথ্তান্ ঠিগ্ গুরিনে যায়, ন-অলে ঝড়ানে তারে যেবাত্তে ন- দিবো।” 45 এ ভিদিরে আগাজ্ছান মেঘে কালা ওই গেলঅ, বোইয়ের্ বেলঅ আর অমকদ ঝড় এলঅ। আহাবে রথ্তানত্ গুরিনে যিষ্রিয়েলত্ আঢা মারিলো। 46 সেক্কে লগেপ্রভুর্ বলান্ এলিয়ো উগুরে এলঅ। তে তা কাবড়ান্ কমর্-বিজোনিত্ গুজেইনে আহাবর্ আগে আগে ধাবা দিইনে যিষ্রিয়েলত্ গেলঅ। |
Copyright © 2021 Bangladesh Bible Society
Bangladesh Bible Society