১ রাজাবলী 16 - Chakma Bible1 সেক্কে বাশার বিরুদ্ধে হনানির পূঅ যেহূর ইদু লগেপ্রভুর এ কধাগান ফগদাং অলঅ, 2 “ও বাশা, মুই তরে ধূল্যেত্তুন্ তুলি আনিনে মঅ মানুচ্ ইস্রায়েলীয়গুনোর নেতা বানেয়োং। মাত্তর্ তুই যারবিয়ামর্ পধেন্দি যর্ আর মঅ মানুচ্ ইস্রায়েলীয়গুনোরে দিইনে পাপ গোরেয়োচ্ আর সে পাপর্ কারণে মরে বেজার্ গোজ্যচ্। 3 সেনত্তে তরে আর তর্ বংশবোরে মুই শেজ্ গুরিবাত্তে যাঙর্। মুই তর্ বংশবোরে নবাটর পূঅ যারবিয়ামর বংশ ধোক্ক্যেন্ গুরিম্। 4 তর্ যে মানুচ্চুনে শঅরত্ মুরিবাক্ তারারে কুগুরে হেবাক্ আর মাদত্ যিগুনে মুরি যেবাক্ তারারে পেক্কুনে হেবাক্।” 5 বাশার অন্য কামানি, যুদ্ধোত্ তার জিদেনার্ কধা আর তে যিয়েনি গোজ্যে সিয়েনি “ইস্রায়েলর রাজাগুনোর বিজগ” নাঙে বোইবোত্ লেগা আঘে। 6 পরেন্দি বাশা তার্ পূরোণি মানুচ্চুনোর্ ইদু গেলগোই আর তির্সাত্ তারে গোর্ দিয়্যে অলঅ। তা জাগানত্ তা পূঅবো এলা রাজা অলঅ। 7 হনানির পূঅ ভাববাদী যেহূর মাধ্যমে বাশা আর তার্ বংশগুনোর্ বিরুদ্ধে লগেপ্রভুর কধানি ফগদাঙ্ ওইয়্যে, কিত্তেই যারবিয়ামর্ বংশগুনো ধোক্ক্যেন্ তে লগেপ্রভুর চোগোত্ যিয়েনি বজঙ্ সিয়েনি গুরিনে লগেপ্রভুরে বেজার্ গোজ্যে আর যারবিয়ামর্ বংশবোরে ভস্ত গুরি দিয়্যে। ইস্রায়েলর রাজা এলা 8 যিহূদার রাজা আসার রাজাগিরির্ ছাব্বিশ বজরত্ বাশার পূঅ এলা ইস্রায়েলর রাজা অলঅ। তে তির্সাত্ দ্বিবজর্ রাজাগিরি গুরিলো। 9 সিম্রি নাঙে তার্ ইক্কো সেনাপতি তা বিরুদ্ধে কুজুরোমি গুরিলো। এলার্ যেদক্কানি রথ এলঅ তার্ অদ্দেক্ ভারান্ এলদে সিম্রির উগুরে। এলা এ সময়োত্ অর্সার ঘরত্ মাত্তল্ অবাত্তে মদ হার্। এ অর্সার উগুরে তির্সার রাজঘরর্ দেগাশুনোর্ ভারান্ এলঅ। 10 যিহূদার রাজা আসার রাজাগিরির্ সাতেশ্ বজরত্ সিম্রি সে ঘরানত্ সুমিনে এলারে মারে ফেলেল। সে পরেন্দি তে এলার্ জাগানত্ রাজা অলঅ। 11 সিংহাসনত্ বুজিনে রাজাগিরির আরাম্ভত্ সিম্রি বাশার বংশর বেক্কুনোরে মারে ফেলেল। কুদুম্মো-সমাজ্যে কনঅ মরদরে তে বাঁজেই ন-রাগেল। 12 ভাববাদী যেহূর মাধ্যমে লগেপ্রভু বাশার বিরুদ্ধে যে কধানি কোইয়্যে সেই মজিম সিম্রি বাশার বংশবোর্ বেক্কুনোরে ভস্ত গুরি দিলো। 13 ইয়েন অলঅ, বাশা আর তা পূঅবো এলা নিজেই ভালোক্কানি পাপ গোজ্যন্ আর ইস্রায়েলরে দিনেয়ো পাপ গোরেয়োন্। তারা অসার মূত্তিলোই ইস্রায়েলর গোজেন লগেপ্রভুরে অহুজি গোজ্যন্। 14 এলার্ অন্য কামানি, অত্তাৎ তে যিয়েনি গোজ্যে সিয়েনি “ইস্রায়েলর রাজাগুনোর বিজগ্” নাঙে বোইবোত্ লেগা আঘে। ইস্রায়েলর রাজা সিম্রি 15 যিহূদার রাজা আসার রাজাগিরির্ সাতেশ্ বজরত্ সিম্রি তির্সাত্ সাত দিন রাজাগিরি গুরিলো। সে অক্তত্ ইস্রায়েলীয় সৈন্যগুনে পলেষ্টীয়গুনোর গিব্বথোনান ঘিরি রাগেয়োন। 16 ইস্রায়েলীয়গুনে তাম্বুলো ভিদিরে যেক্কে শুনিলাক্, সিম্রি রাজার বিরুদ্ধে কুজুরোমি গুরিনে তারে মারে ফেলেয়োন সেক্কে সেদিন্যে তারা তাম্বুলো ভিদিরে আজল্ সেনাপতি অম্রিরে ইস্রায়েলর রাজা বিলিনে ফগদাঙ্ গুরিলাক্। 17 সেক্কে অম্রি আর তা লগে বেক্ ইস্রায়েলীয়গুনে গিব্বথোনত্তুন্ সুরি এইনে তির্সাগান ঘিরিলাক্। 18 শঅরান গজক্ গরা ওইয়্যে দেগিনে সিম্রি রাজঘরর্ তাম্বুলোত্ গেলঅ আর আগুন্ বাজেই দিইনে গোদা রাজঘরান্ পুড়ি দিলো। সে অক্তত্ তে নিজেয়ো পুড়ি গেলঅ। 19 তা পাপত্তে তাত্তুন্ মরা পুড়িলো, কিত্তেই লগেপ্রভুর চোগোত্ যিয়েনি বজঙ্ তে সিয়েনি গুরিদো। তে যারবিয়াম ধোক্ক্যেন্ চলিদো, অত্তাৎ যারবিয়ামে ইস্রায়েলীয়গুনোরে দিইনে যেবাবোত্যে পাপ গোরেয়্যে তেয়ো সেধোক্ক্যেন্ গুরিলো। 20 সিম্রির অন্য কামানি আর তার্ উল্লোমির্ কধানি “ইস্রায়েলর রাজাগুনোর বিজগ্” নাঙে বোইবোত্ লেগা আঘে। ইস্রায়েলর রাজা অম্রি 21 ইয়েনর্ পরেন্দি ইস্রায়েলীয়গুনে দ্বিদলত্ ভাগ্ ওই গেলাক্। তারার্ অদ্দেক্ মান্জ্যে চেলাক্ গীনতের পূঅ তিব্নিরে রাজা গুরিবাত্তে আর বাগি অদ্দেক্ মান্জে চেলাক্ অম্রিরে রাজা বানেবাত্তে। 22 মাত্তর্ অম্রির পক্ষে মানুচ্চুনে গীনতের পূঅ তিব্নির পক্ষে মানুচ্চুনোরে ওদেই দিলাক্। সেনে তিব্নি মুরি গেলঅ আর অম্রি রাজা অলঅ। 23 যিহূদার রাজা আসার রাজাগিরির্ একত্রিশ বজরত্ অম্রি ইস্রায়েলর রাজা অলঅ। তে বার বজর্ রাজাগিরি গুরিলো, সে ভিদিরে ছয় বজর্ রাজাগিরি গুরিলো তির্সাত। 24 তে আদায়োত্তুর্ কেজি রূবোলোই শেমরের ইত্তুন্ শমরিয়া মুড়োবো কিনিলো আর মুড়োবো উগুরে এক্কান্ শঅর্ বানেল আর মুড়োবোর্ আগ গিরোজ্ শেমরের নাঙান্ মজিম্ শঅরানর্ নাঙান্ রাগেল শমরিয়া। 25 অম্রি লগেপ্রভুর চোগোত্ যিয়েনি বজঙ্ সিয়েনি গুরিদো আর তা আগেন্দি যিগুনে রাজা এলাক্ তারার্ বেক্কুনোত্তুন্ তে বেশ্ পাপ গুরিদো। 26 তে পুরোপুরিভাবে নবাটর পূঅ যারবিয়াম ধোক্ক্যেন্ চলিদো, অত্তাৎ যারবিয়ামে যেধোক্ক্যেন্ ইস্রায়েলীয়গুনোরে দিইনে পাপ গোরেয়্যে অম্রিয়ো সেধোক্ক্যেন্ গোজ্যে। সেক্কে ইস্রায়েলীয়গুনে অসার মূত্তিলোই তারার্ গোজেন লগেপ্রভুরে অহুজি গোজ্যন্। 27 অম্রির অন্য বেক্ কামর কধানি আর যুদ্ধোত্ তার জিদেনার কধানি “ইস্রায়েলর রাজাগুনোর বিজগ্” নাঙে বোইবোত্ লেগা আঘে। 28 পরেন্দি অম্রি তার্ পূরোণি মানুচ্চুনোর ইদু গেলগোই আর তারে শমরিয়াত্ গোর্ দিয়্যে অলঅ। তা জাগানত্ তার্ পূঅ আহাবে রাজা অলঅ। ইস্রায়েলর রাজা আহাব 29 যিহূদার রাজা আসার রাজাগিরির্ আটত্রিশ বজরত্ অম্রির পূঅ আহাবে ইস্রায়েলর্ রাজা অলঅ। তে বেইশ্ বজর্ শমরিয়ায়ত্তুন্ ইস্রায়েলর্ উগুরে রাজাগিরি গোজ্যে। 30 অম্রির পূঅবো আহাবে লগেপ্রভুর চোগেন্দি যিয়েনি বজঙ্ সিয়েনি গুরিদো, এন্ কি, তা আগেন্দি যিগুনে রাজা এলাক্ তারার্ বেক্কুনোত্তুন্অ বেশ্ গুরিনে সিয়েনি গুরিদাক্। 31 নবাটর পূঅবো যারবিয়ামে যেদক্কানি পাপ গোজ্যে সিয়েনিরে তে সামান্য বেপার্ বিলিনে মনে গুরিদো। বানা সিয়েনি নয়, তে সীদোনীয়গুনোর রাজা ইৎবালর ঝি ঈষেবলরে লল আর বাল দেবেদার সেবা আর পূজো গরা ধুরিলো। 32 তে শমরিয়াত্ বাল দেবেদাত্তে যে মন্দিরান বানেয়্যে সিয়েনত্ তাত্তে এক্কান্ ডালিপূজো বানেল। 33 তে ইক্কো আশেরা-মূত্তিয়ো বানেল আর তা আগেন্দি ইস্রায়েলীয়গুনোর্ বেক্ রাজাগুনে ইস্রায়েলীয়গুনোর্ গোজেন লগেপ্রভুরে যেত্তমান্ অহুজি গোজ্যন তে তার্ কামর্ মাধ্যমে তারে আরঅ বেশ্ অহুজি গুরিলো। 34 আহাবর সময়োত্ বৈথেলীয় হীয়েল যিরীহো শঅরান্ আরঅ বানেল। নূনোর পূঅ যিহোশূয়র মাধ্যমে লগেপ্রভুর কধা মজিম্ সে শঅরানর্ গড়াগান্ গারেবাত্তে হীয়েলর দাঙর্ পূঅবো অবীরামত্তুন্ পরাণান্ দিয়্যে পড়িলো আর তার্ গেদোর্ দুয়োরান্ লাগেবাত্তে তা চিগোন্ পূঅবো সগূবত্তুন্ পরাণান্ দিয়্যে প-লঅ। |
Copyright © 2021 Bangladesh Bible Society
Bangladesh Bible Society