১ রাজাবলী 15 - Chakma Bibleযিহূদার রাজা অবিয়াম 1 নবাটের পূঅ যারবিয়ামর্ রাজাগিরির্ আদার বজরত্ অবিয়ামে যিহূদার রাজা অলঅ। 2 তে তিন বজর্ সং যিরূশালেমত্ রাজাগিরি গোজ্যে। তা মাবোর্ নাঙান্ এলদে মাখা; তে অবীশালোমর ঝি। 3 অবিয়ামর্ বাপ্পো যেদক্কানি পাপ গোজ্যে তেয়ো সে পাপ্পানি গরা ধুরিলো। তার্ পূরোণি মানুচ্ দায়ূদো ধোক্ক্যেন্ তার্ মনান্ গোজেন লগেপ্রভুর উগুরে ভোক্তি ন-এলঅ। 4 তো দায়ূদো কধানি মনত্ ন-পড়িনে তা গোজেন্ লগেপ্রভু তারে যিরূশালেমত্ ইক্কো মানেক্ দিলো, অত্তাৎ তার সিংহাসনত্ বুজিবাত্তে তারে ইক্কো পূঅ দিলো আর যিরূশালেমানরে ভস্ত অনার্ আঢত্তুন্ রোক্ষ্যে গুরিলো, 5 কিত্তেই লগেপ্রভুর চোগেন্দি যিয়েন্ ঠিগ দায়ূদে সিয়েন গুরিদো। বানা হিত্তীয় ঊরিয়োর্ বেপারান্ বাদে তার পূরো জিংকানিগানত্ তে লগেপ্রভুর কনঅ উগুম অমান্য ন-গরে। 6 রহবিয়াম আর যারবিয়াম ভিদিরে যে যুদ্ধোগান্ আরাম্ভ ওইয়্যে সিয়েন্ অবিয়ামর্ পুরো জিংকানিগান ধুরিনে চোল্যে। 7 অবিয়ামর অন্য কামানি, অত্তাৎ তে যিয়েনি গোজ্যে সিয়েনি “যিহূদার রাজাগুনোর বিজগ” নাঙে বোইবোত্ লেগা আঘে। অবিয়াম আর যারবিয়ামর লগে যুদ্ধো অদঅ। 8 পরেন্দি অবিয়ামে তার্ পূরোণি মানুচ্চুনোর্ ইদু গেলগোই, আর দায়ূদ-শঅরত্ তারে গোর্ দিয়্যে অলঅ। তা জাগানত্ তার্ পূঅবো আসা রাজা অলঅ। যিহূদার রাজা আসা 9 ইস্রায়েলর রাজা যারবিয়ামর রাজাগিরি গরানার্ কুড়ি বজরত্ আসা যিহূদার রাজা অলঅ। 10 তে একচোল্লিশ বজর্ যিরূশালেমত্ রাজাগিরি গোজ্যে। তা বরঙাবোর্ নাঙান্ এলদে মাখা। তে এলদে অবীশালোমর্ ঝি। 11 তার্ পূরোণি মানুচ্ দায়ূদো ধোক্ক্যেন্ আসা লগেপ্রভুর চোগোত্ যিয়েনি ঠিগ সিয়েন গুরিদো। 12 তে দেজত্তুন্ মরদ্ মন্দির-বেশ্যেগুনোরে ধাবেই দিলো আর পূরোণি মানুচ্চুনোর বানেয়্যে বেক্ মূত্তিগুনো দূর্ গুরি দিলো। 13 এন্ কি, তে তার্ বরঙাবো মাখারেয়ো রাজমাতার পধত্তুন্ সোরেই দিলো, কিত্তে তে ইক্কো জঘন্য আশেরা-মূত্তি বানেয়্যে। আসা সে মূত্তিবো কাবি ফেলেইনে কিদ্রোণ কিঝিঙোত্ নেযেইনে সিবে পুড়ি ফেলেল। 14 পূজোর্ অজল্ জাগায়ানি যুনিয়ো তে ভস্ত ন-গরে তো সারা জিংকানিবর্ তা মনান্ লগেপ্রভু উগুরে ভোক্তিলোই ভর্পুণোং এলঅ। 15 তে আর তা বাপ্পো যেদক্কানি সোনা, রূবো আর অন্য জিনিস লগেপ্রভুর নাঙে যুদো গুরি রাগেয়োন সিয়েনি তে লগেপ্রভুর ঘরত্ নেযেল। 16 আসা আর ইস্রায়েলর রাজা বাশার পুরো রাজাগিরি গরানার সময়োত্ তারা ভিদিরে যুদ্ধো ওইয়্যে। 17 ইস্রায়েলর রাজা বাশা যিহূদার মানুচ্চুনোর বিরুদ্ধে যেইনে রামা শঅরান্ তাম্বুলো ধোক্ক্যেন্ গুরি তুলো ধুরিলো যেনে কনজনে যিহূদার রাজা আসা ইদু এই যেই ন-পারন্। 18 লগেপ্রভুর ঘরত্ আর নিজোর্ রাজঘর ভান্ডালত্ যেদক্কানি সোনা আর রূবো এলঅ আসা সিয়েনি বেক্কানি নিগিলেই নেযেল। সিয়েনি তার্ কামগুরিয়্যেগুনোর্ আঢত্ দিইনে অরামর রাজা বিনহদদ ইদু পাধেই দিলো। বিনহদদ অলদে টব্রিম্মোণর পূঅ হিষিয়োণর নাদিন্। তে সেক্কে দামেস্কত্ রাজাগিরি গুরিদো। আসা তারে কোই পাদেল, 19 “মর্ আর তঅ বাপ্পো ধোক্ক্যেন্ আয়, আমিয়ো আমা ভিদিরে এক্কান্ চুক্তি গুরিই। মুই তরে এ সোনা আর রূবোনি বক্শিজ্ দিলুং। ইস্রায়েলর্ রাজা বাশার সমারে তুই ইক্কিনে চুক্তিবো ভাঙ্, সেক্কে তে মর্ কায়-কুরেত্তুন্ যেবগোই।” 20 রাজা আসা কধালোই বিনহদদে রাজী ওইনে তার্ সেনাপতিগুনোরে ইস্রায়েলর আদামানির বিরুদ্ধে পাধেই দিলো। তে ইয়োন, দান, আবেল-বৈৎ-মাখা আর পুরো কিন্নেরৎ আর তা লগে নপ্তালি-চাগালাগান্ গজক্ গুরি নেযেল। 21 বাশা এ কধাগান শুনিনে রামা শঅরান্ দরমর গুরি তুলিবার্ কামান বন্ধ গুরি তির্সাতত্ ফিরি গেলঅ। 22 সে পরেন্দি রাজা আসা যিহূদার বেক্কুনো উগুরে এক্কান উঘুম্ জানেই দিলো, কাররে বাদ ন-দিলো। সেক্কে মানুচ্চুনে রামাত্ বাশার বেবহার গোজ্যে পাত্তর্ আর তক্তা বেক্কানি নেযেলাক্। রাজা আসা সিয়েনিলোই বিন্যামীনোর্ গেবা আর মিস্পা আদামান তাম্বুলো ধোক্ক্যেন্ গুরি বানেল। 23 রাজা আসার অন্য বেক্ কামানি, যুদ্ধোত্ তার জিদেনার্ কধা, তে যিয়েনি গোজ্যে আর যেদক্কানি আদাম্ তে নূয়াগুরিনে বানেয়্যে সিয়েনি “যিহূদার রাজাগুনোর বিজগ” নাঙে বোইবোত্ লেগা আঘে। বুড়ো বয়জত্ রাজা আসার ঠেঙত্ এক্কান পিড়ে অলঅ। 24 পরেন্দি রাজা আসা তার পূরোণি মানুচ্চুনোর্ ইদু গেলঅ আর তার্ পূরোণিমানুচ্ দায়ূদো শঅরত্ তার্ পূরোণি মানুচ্চুনোর্ লগে তারে গোর্ দিয়্যে অলঅ। তার্ পূঅবো যিহোশাফটে তা জাগানত্ রাজা অলঅ। ইস্রায়েলর রাজা নাদব 25 যিহূদার রাজা আসার রাজাগিরির্ দ্বিবজরত্ যারবিয়ামর পূঅ নাদবে ইস্রায়েলর রাজা অলঅ। তে ইস্রায়েলত্ দ্বিবজর্ রাজাগিরি গুরিলো। 26 লগেপ্রভুর চোগোত্ যিয়েনি বজং তে সিয়েনি গুরিদো। তে তার্ বাবঅ ধোক্ক্যেন্ চলিদো, অত্তাৎ তা বাপ্পো ইস্রায়েলীয়গুনোরে দিইনে যেধোক্ক্যেন্ পাপ গোজ্যে তেয়ো সেধোক্ক্যেন্ গুরিলো। 27 ইষাখর-গুট্টির অহিয়োর পূঅ বাশা নাদবর বিরুদ্ধে কুজুরোমি গুরিলো। নাদবে আর বেক্ ইস্রায়েলীয়গুনে যেক্কে পলেষ্টীয়গুনোর্ গিব্বথোন ঘেরায়ো গুরিলাক্ সেক্কে বাশা গিব্বথোনত্ নাদবরে মারে ফেলেল। 28 যিহূদার রাজা আসা রাজাগিরির্ তিন বজরত্ বাশা নাদবরে মারে ফেলেইনে তা জাগানত্ রাজা অলঅ। 29 তে রাজা ওইনে যারবিয়ামর্ ঘোর্বোগুনোর্ বেক্কুনোরে মারে ফেলেল। লগেপ্রভু তা চাগর্ শীলোনীয় ভাববাদী অহিয়োর্ মাধ্যমে যে কধানি কোইয়্যে সেই মজিম বাশা যারবিয়ামর ঘরবোগুনোর বেক্কুনোরে ভস্ত গুরি ফেলেল। 30 ইয়েনর্ কারণান্ অলঅ, যারবিয়ামে নিজে পাপ গোজ্যে আর ইস্রায়েলরে দিইনে পাপ গোরেয়্যে আর সিয়েন্ গুরিনে তে ইস্রায়েলর্ গোজেন্ লগেপ্রভুরে রাগ তুলি দিয়্যে। 31 নাদবর অন্য কামানি, অত্তাৎ তে যিয়েনি গোজ্যে সিয়েনি “ইস্রায়েলর রাজাগুনোর্ বিজগ” নাঙে বোইবোত্ লেগা আঘে। 32 আসা আর ইস্রায়েলর রাজা বাশার পুরো রাজাগিরি গরানার্ সময়ানত্ তারা ভিদিরে যুদ্ধো ওইয়্যে। ইস্রায়েলর রাজা বাশা 33 যিহূদার রাজা আসার রাজাগিরির তিন বজরত্ পুরো ইস্রায়েল দেজর্ উগুরে অহিয়োর পূঅ বাশা তির্সাত্ রাজাগিরি গরা আরাম্ভ গুরিলো। তে চোব্বিশ বজর্ রাজাগিরি গুরিলো। 34 তে লগেপ্রভুর্ চোগোত্ যিয়েনি বজং সিয়েনি গুরিদো। তে যারবিয়াম ধোক্ক্যেন্ চলিদো, অত্তাৎ যারবিয়ামে যেধোক্কেন ইস্রায়েলীয়গুনোরে দিইনে পাপ গুরিদো তেয়ো সেধোক্ক্যেন্ গুরিদো। |
Copyright © 2021 Bangladesh Bible Society
Bangladesh Bible Society