১ রাজাবলী 13 - Chakma Bibleগোজেনর পাদেয়্যে ইক্কো মানুচ্ 1 এ্যমান্ উৎসর্বত্তে যারবিয়ামে যেক্কে ডালিপূজোবো ইদু থিয়্যেই এলঅ সেক্কে লগেপ্রভুর কধামজিম্ গোজেনর্ ইক্কো মানুচ্ যিহূদাত্তুন্ বৈথেলত্ লুমিলো। 2 তে লগেপ্রভুর কধামজিম্ ডালিপূজোবোর্ বিরুদ্ধে ফগদাং গুরিলো, “ও ডালিপূজো, ও ডালিপূজো, লগেপ্রভু এ কধাগান কত্তে, ‘দায়ূদোর্ বংশত্ যোশিয় নাঙে ইক্কো পূঅর্ জর্ম অবঅ। পূজোর্ অজল্ জাগানিত্ যে ধর্মগুরুগুনে ইক্কিনে তঅ উগুরে এ্যমান্ উৎসর্ব গত্তন্ সে ধর্মগুরুগুনোরে তে তঅ উগুরে উৎসর্ব গুরিবো আর মান্জ্যর্ আড়ুন্অ পুড়িবো।’” 3 সে একই দিনোত্ গোজেনর্ মানুচ্চো এক্কান্ চিহ্নোর কধা কলঅ। তে কলদে, “লগেপ্রভু এ চিহ্নোগানর্ কধা ফগদাং গরেত্তে, এ ডালিপূজোবো ফাদি যেবঅ আর তা উগুরে ছেইয়ানি বেক্কানি পড়ি যেবঅ।” 4 বৈথেলত্ ডালিপূজোবোর্ বিরুদ্ধে গোজেনর মানুচ্চো কধা শুনিনে রাজা যারবিয়ামে ডালিপূজোবো উগুরে আঢ্ বাবেইনে কলদে, “তারে ধরঅ।” মাত্তর্ যে আঢ্তান্ তে মানুচ্চোর্ ইন্দি বাবেই দিলো সিয়েন্ শুগেই গেলঅ। তে আর্ সিয়েন্ কায়কুরে টানি নেযেই ন-পারিলো। 5 সিয়েনবাদেয়ো লগেপ্রভুর কধামজিম্ গোজেন মানুচ্চোর্ কোইয়্যে চিহ্নো মজিম্ ডালিপূজোবো ফাদি গেলঅ আর সিবের্ ছেইয়ান্ পড়ি গেলঅ। 6 সেক্কে রাজা গোজেনর্ মানুচ্চোরে কলদে, “তুই তর্ গোজেন্ লগেপ্রভুরে কোজোলি গর্ আর মত্তে তবনা গর্ যেনে মঅ আঢ্তান্ আরঅ গম্ ওই যায়।” যেক্কে গোজেন মানুচ্চো লগেপ্রভুরে কোজোলি গুরিলো সেক্কে রাজার আঢ্তান্ আরঅ গম্ ওইনে আগঅ ধোক্কেন্ অলঅ। 7 রাজা গোজেন মানুচ্চোরে কলদে, “তুই মঅ ঘরত্ এইনে কিজু হানা-দানা গুরিচ্ সেক্কে মুই তরে এক্কান্ বক্শিজ্ দিম্।” 8 মাত্তর্ গোজেন মানুচ্চো রাজারে কলঅ, “তর্ সোম্বোত্তির্ অদ্দেক্ দিলেয়ো মুই তঅ সমারে ন-যেম্ বা কন হানা বা পানিয়ো ইদু ন-হেম্। 9 ইয়েন অলঅ, লগেপ্রভুর কধামজিম্ মুই এ উগুমান্ পেইয়োঙ্, মুই যেনে কনঅ হানা বা পানি ন-হাং আর যে পথ্তানন্দি এচ্ছোং সে পথ্তানন্দি ফিরি ন-যাঙ্।” 10 সেনত্তে তে যে পথ্তানন্দি বৈথেলত্ এচ্ছ্যে সে পথ্তানন্দি ফিরি ন-যেইনে অন্য পধেন্দি যাহ্ ধুরিলো। 11 বৈথেলত্ ইক্কো বুড়ো ভাববাদীয়ে বজত্তি গুরিদো। গোজেন মানুচ্চো সেদিন্যে সিয়েনত্ যিয়েনি গোজ্যে তার পূঅগুনে যেইনে তারে সিয়েনি বেক্কানি জানেলাক্। রাজারে তে যিয়েনি কোইয়্যে সিয়েনিয়ো তারা তারার্ বাপ্পোরে কলাক্। 12 সিগুনোর্ বাপ্পো তারারে পুযোর্ গুরিলো, “তে কন্ পধেন্দি যেইয়্যে?” যিহূদার সে গোজেনর্ মানুচ্চো যে পথ্তানন্দি আহ্দি যেইয়্যে তা পূঅগুনে সিয়েন্ দেখ্যন্। 13 সেক্কে তে তা পূঅগুনোরে কলদে, “মত্তেই গাধাবো সাজঅ।” তারা সাজানার্ পরেন্দি তে সিবেত্ উদিলো। 14 সে পরেন্দি তে গোজেন মানুচ্চোরে তোগেবাত্তে গেলঅ। তে তারে ইক্কো এলোন গাজর্ গড়াত্ বুজি থাগদে দেগিনে পুযোর্ গুরিলো, “তুই কি গোজেন সে মানুচ্চো যিবে যিহূদা দেজত্তুন্ এচ্ছ্যে?” জোবত্ তে কলঅ, “অয়, মুয় সে মানুচ্চো।” 15 সেক্কে ভাববাদীবো তারে কলঅ, “মঅ সমারে ঘরত্ যেই, হানা-দানা গত্তি।” 16 গোজেনর্ মানুচ্চো কলঅ, “মুই তঅ সমারে ফিরিয়ো যেই ন-পারঙ্ বা তঅ সমারে এ জাগানত্ হানা বা পানিয়ো হেই ন-পারঙ্। 17 গোজেনে মরে উঘুম্ দিইনে কোইয়্যেদে, মুই যেনে সিদু হানা বা পানি ন-খাং আর যে পথ্তান ইন্দি এচ্ছোং সে পথ্তানন্দি ফিরি ন-যাঙ্।” 18 জোবত্ সে ভাববাদীবো কলঅ, “মুই তঅ ধোক্কেন্ ইক্কো ভাববাদী। লগেপ্রভুর কধামজিম্ ইক্কো স্বর্গদূতে মরে কোইয়্যেদে যেনে মুই তরে মঅ ঘরত্ ফিরেই নেযাং যেনে তুই হানা আর পানি হেই পারচ্।” মাত্তর্ তে তারে মিজে কধা কলঅ। 19 গোজেন মানুচ্চো সেক্কে তা সমারে ফিরি গেলঅ আর তা ঘরত্ হানা-দানা গুরিলো। 20 তারা সেক্কেয়ো টেবিলো ইদু বুয়োই আগন্, এন্ সময়োত্ যিবে গোজেন মানুচ্চোরে ফিরেই আন্যে সে ভাববাদীবো ইদু লগেপ্রভুর কধানি ফগদাং অলঅ। 21 যিহূদাত্তুন্ এচ্চ্যে গোজেন মানুচ্চোরে সে ভাববাদীবো রঅ ছারিনে কলঅ, “লগেপ্রভু এ কধাগান কত্তে, তুই লগেপ্রভুর কধা অমান্য গোজ্যস্ আর তরে দিয়্যে তঅ গোজেন লগেপ্রভুর উঘুম্ তুই ন-পালাচ্। 22 যে জাগানত্ তে তরে হানা-দানা গুরিবাত্তে মানা গোজ্যে তুই সিয়েনত্ ফিরি যেইনে হানা আর পানি হেইয়োচ্। সেনত্তে তর্ পূরোণি মানুচ্চুনোর্ গোরুনোত্ তঅ কিয়্যেগান রাগা ন-অবঅ।” 23 গোজেনর্ মানুচ্চো হানা-দানা থুম্ গরানার্ পরেন্দি তাত্তে সে ভাববাদীবো তার্ ইক্কো গাধা উগুরে বোজেল। 24 গোজেন মানুচ্চো লট্ দিবার্ পরেন্দি পদথ্ ইক্কো সিংহ তারে পেইনে মারে ফেলেল। তা কিয়্যেগান পধঅ উগুরে পড়ি থেলঅ আর সে কিয়্যেগান কায়-কুরে থিয়্যেই রলাক্ সে গাধা আর সিংহবো। 25 কয়েক্কো মান্জ্যে সে পথ্তানন্দি যেবার্ সময়োত্ সে পড়ি থেইয়্যে কিয়্যেগান দেগিলাক্ আর দেগিলাক্ তা কায়-কুরে ইক্কো সিংহ থিয়্যেই আঘে। তারা যেইনে সে বুড়ো ভাববাদীবোর্ আদামত্ হবর্ দিলাক্। 26 সে কধাগান শুনিনে যে ভাববাদীবো তারে তার পথ্তানত্তুন্ ফিরেই আন্যে তে কলদে, “সিবে গোজেন সে মানুচ্চো যিবে লগেপ্রভুর উঘুম্ অমান্য গোজ্যে। লগেপ্রভু তারে যে কধাগান কোইয়্যে সেই মজিম্ তে তারে সিংহ আঢত্ তুলি দিয়্যে আর সিংহবো তারে কট্টা কট্টা গুরিনে মারে ফেলেয়্যে।” 27 সে পরেন্দি সে ভাববাদীবো তা পূঅগুনোরে কলঅ, “মত্তেই গাধাবো সাজঅ।” পূঅগুনে সিয়েন গুরিলাক্। 28 সে পরেন্দি তে যেইনে দেগিলোদে পথ্তান উগুরে কিয়্যেগান পড়ি আঘে আর তার্ কায়-কুরে থিয়্যেই আগেদে গাধা আর সিংহবো। সিংহবো সে মরাকিয়্যেগান ন-হায় আর গাধাবোরেয়ো আঘাত্ ন-গরে। 29 গোজেন মানুচ্চোরে গোর্ দিবাত্তে আর তাত্তে আবিলেচ্ গুরিবাত্তে সে ভাববাদীবো তা কিয়্যেগান তুলি নেযেইনে গাধাবো উগুরে বোজেনে নিজো আদামত্ ফিরি গেলঅ। 30 তে নিজোত্তে বানেয়্যে গোরানত্ তারে গোর্ দিলো। তে আর তার্ পূঅগুনে ইয়েন্ কোইনে তাত্তে আবিলেচ্ গরা ধুরিলাক্, “হায়, ভেইবো আমার!” 31 তারে গোর্ দেনার্ পরেন্দি সে ভাববাদীবো তা পূঅগুনোরে কলঅ, “গোজেন মানুচ্চোরে যিয়েনত্ গোর্ দিয়্যে ওইয়্যে মুই মুরি যানার্ পরেন্দি মরে সে গোরানত্ গোর্ দুয়ো, মঅ আড়ুন্ তা আড়ুনোর্ কায়কুরে রাগেয়ো; 32 কিত্তেই বৈথেলর ডালিপূজোবো আর শমরিয়ার বেক্ আদামর্ পূজোর্ অজল্ জাগায়ানি মন্দিরোর্ বিরুদ্ধে লগেপ্রভুর্ কধামজিম্ তে যে পৌইদ্যেনে ফগদাঙ্ গোজ্যে সিয়েন্ হামাক্কাই ফলিবো।” 33 ইয়েন পরেন্দিয়ো যারবিয়ামে তার্ ভান্ন্যেই পধত্তুন্ ন-ফিরিলো বরং পূজোর্ অজল্ জাগানিত্তেই বেক্ মানুচ্চুনো ভিদিরেত্তুন্ ধর্মগুরু নেযেল। যে কনজনে ধর্মগুরু অবাত্তে চেলে তারে তে পূজোর্ অজল্ জাগায়ানিত্ ধর্মগুরু ইজেবে নেযেদ। 34 এ কামানি যারবিয়াম বংশর পক্ষেন্দি পাপ অলঅ যেনে তারা ভস্ত ওইনে পিত্তিমীর্ বুগোত্তুন্ উদি যান্দোই্। |
Copyright © 2021 Bangladesh Bible Society
Bangladesh Bible Society