১ রাজাবলী 10 - Chakma Bibleশলোমন ইদু শিবা দেজর রাণী 1 শলোমনর্ সুনাঙ্ আর তা মাধ্যমে ফগদাং পেইয়্যে লগেপ্রভুর বাঈনীগানর্ কধা শুনিনে শিবা দেজর রানী আগাত্যে কধালোই পুজোর্ গুরিনে তারে জগা চেবাত্তে এলঅ। 2 তে ভালোক্কুন্ মানুচ্ আর উটসুমুত্তো যিরূশালেমত্ এইনে লুমিলো। উটতুনোর্ পিদিত্ এলঅ তুম্বাজ্ মজলা, ভালোক্কানি সোনা আর মানেক্। তে শলোমন ইদু এইনে তা মনত্ যিয়েনি এলঅ সিয়েনি বেক্কানি তারে কলঅ। 3 শলোমনে তার্ বেক্ প্রশ্নগানির জোব্ দিলো। রাজা ইদু কনঅ কিজুর্ এন্ আগাত্যা নঅ-এল যে, যিয়েনি তে তারে বুঝেইনে কোই ন-পারে। 4 শিবার রানী শলোমনর্ বেক্ জ্ঞানান্ আর তার বানেয়্যে রাজঘরান্ চেলঅ। 5 তে আরঅ দেগিলোদে তা টেবিলোর্ হানা, তার্ কামগুরিয়্যেগুনোর থেবার জাগানি, দোল্ কাবড়-চুগোড়্ পিন্যে তার সেবাগুরিয়্যেগুনোরে, তার পানীয় দিয়্যেগুনোরে আর লগেপ্রভুর ঘরত্ তার্ পুজ্যে-উৎসর্বর এ্যামানর্ সোংখ্যেগুন্। এদক্কানি দেগিনে তে আমক্ ওই গেলঅ। 6 তে রাজারে কলঅ, “মঅ নিজোর দেজত্ থাগদে তর্ কামানি আর জ্ঞানর পৌইদ্যেনে যে হবর্ শুন্ন্যং সিয়েনি সত্য। 7 মাত্তর্ ইদু এইনে নিজো চোগেন্দি ন-দেগানা সং মুই সে কধানি বিশ্বেজ্ ন-গত্তুং। অয়, ইয়েনির অদ্দেক্অ মরে কুয়ো ন-অয়। যে হবরানি মুই পেইয়োং তর্ জ্ঞান আর ধন তাত্তুন্ বোউত্ বেশ্। 8 তঅ মানুচ্চুনে কদক্ সুগী! যিগুনে নিত্য তঅ মুজুঙোত্ থান্ আর তর্ জ্ঞানর কধানি শুনোন্ তর্ সে কামগুরিয়্যেগুনে কদক্ ভাগ্যত্যে! 9 তর্ গোজেন লগেপ্রভুর বাঈনী ওক্, যিবে তঅ উগুরে হুজি ওইনে তরে ইস্রায়েলর সিংহাসনত্ বোজেয়্যে। ইস্রায়েলীয়গুনোরে তে জিংকানিবর্ কোচ্পায় বিলিনে তে দোল্বিচের্ আর ন্যায় রোক্ষ্যে গুরিবাত্তে তরে রাজা বানেয়্যে।” 10 তে রাজারে সাড়ে চের্ টনত্তুন্অ বেশ্ সোনা, ভালোক্কানি তুম্বাজ্ মজলা আর মানেক্ দিলো। শিবার রাণী রাজা শলোমনরে যেদক্কানি মজলা দিয়্যে সেদক্কানি মজলা আর কনদিনঅ দেজত্ আনা ন-অয়। 11 ইয়েনিবাদেয়ো হীরমর যে জাহাজছানি ওফীরত্তুন্ সোনা আনিদো সিয়েনি ভালোক্কানি বেরস তক্তা আর মানেক্অ আনিদো। 12 রাজা সে বেরস তক্তানিলোই লগেপ্রভুর ঘরর্ আর রাজঘরর্ রেলিং আর গানগেই্য়্যেগুনোত্তে বীণা আর সুরবাহার বানেল। এচ্ছে সং এদক্ বেরস তক্তা কনদিন্অ দেজত্ আনা ন-অয় আর দেগায়ো ন-যায়। 13 রাজা শলোমন দান ইজেবে শিবার রাণীরে ভালোক্কানি দিয়্যে। সিয়েনি বাদেয়ো রাণী যিয়েনি চেইয়্যে সিয়েনি বেক্কানি দিয়্যে। ইয়েনর্ পরেন্দি রাণী তা মানুচ্চুনোরে লোইনে নিজোর্ দেজত্ ফিরি গেলঅ। রাজা শলোমনর্ সয়-সাগোজ্যে 14 পত্তি বজর্ শলোমন ইদু যে সোনাগানি এদঅ সিয়েনির ভরান্ অলদে পেরায় ছাব্বিশ টন। 15 ইয়েনিবাদেয়ো বণিক আর সদাগরুনোর্ ইত্তুন্, আরবীয় রাজাগুনো ইত্তুন্ আর দেজর্ শাজন্গুরিয়্যেগুনো ইত্তুনঅ সোনা এদঅ। 16 রাজা শলোমনে পিদেয়্যে সোনালোই দ্বিশত্ দাঙর্ ঢাল বানেল। পত্তি ঢালত্ সাত কেজি আস্তোশত্ গ্রাম সোনা লাক্ক্যে। 17 পিদেয়্যে সোনালোই তে তিনশত্ চিগোন্ ঢালঅ বানেয়্যে। সিয়েনির এক এক্কানত্ সোনা লাক্ক্যেদে পেরায় দ্বিকেজি গুরিনে। তে সিয়েনি লেবানন-বন-কুটিরোত্ রাগেল। 18 ইয়েনর্ পরেন্দি রাজা এদো দাদর্ এক্কান্ দাঙর্ সিংহাসন বানেইনে গম্ সোনালোই সিয়েন বেড়েই দিলো। 19 সে সিংহাসনর সাঙুগানত্ ছগান পোইদ্যে এলঅ আর সিংহাসন পিজেন্দি উগুরেগান এলদে গুল্। বজিবার্ জাগানত্ দ্বিকিত্তেন্দি এলদে আঢ্ রাগোনিগান আর আঢ্ রাগাইদে কুরে এলদে থিয়্যেই থেইয়্যে সিংহ মূত্তি। 20 সে ছগান পোইদ্যের্ এক এক্কানর দ্বিকিত্তেন্দি ইক্কো গুরি বেক্কুনে বারবো সিংহমূত্তি এলঅ। অন্য কনঅ রেজ্যত্ এবাবোত্যে সিংহাসন কনদিন্অ ন-বানান্। 21 শলোমনর্ পানীয়ো হেবার বেক্ পিলেগুন্ এলাক্কে সোনার আর লেবানন-বন-কুটিরোর বেক্ পিলেগুন্অ এলাক্কে গম সোনালোই বানেয়্যে। রূবোর বানেয়্যে কিচ্ছু ন-এলঅ, কিত্তেই শলোমনর্ সময়োত্ রূবোর সে বাবোত্যে কনঅ দাম ন-এলঅ। 22 সাগরত্ হীরমর জাহাজ সমারে রাজারঅ দাঙর্ দাঙর্ তর্শীশ-জাহাজ এলঅ। পত্তি তিন বজর্ পর পর সে জাহাজছানি সোনা, রূবো, এদো দাত্, বান্দর আর বেবুন লোইনে ফিরি এদঅ। 23 রাজা শলোমনে পিত্তিমীর্ অন্য বেক্ রাজাগুনোত্তুন্ ধনী আর জ্ঞানী ওই উদিলো। 24 গোজেনে শলোমনর্ মনানত্ যে জ্ঞানান্ দিয়্যে সে জ্ঞানবলা কধা বাত্তানি শুনিবাত্তে পিত্তিমীর বেক্ দেজর্ মানুচ্চুনে তা লগে দেগা গুরিবাত্তে চেট্ট্যা গুরিদাক্। 25 যিগুনে এদাক্ তারা বেক্কুনে কিজু না কিজু বক্শিজ্ আনিদাক্। সিগুনো ভিদিরে এলদে সোনা-রূবোর পিলে, কাবড়-চুগোড়, আত্যের্, তুম্বাজ্ মজলা, ঘোড়া আর খচ্চর। বজরকে বজর্ এবাবোত্যেগুরি আনিদাক্। 26 শলোমনে ভালোক্কানি রথ আর ঘোড়া এগত্তর্ গুরিলো। তার্ রথ এলদে এক আজার চের্শঅ আর ঘোড়া এলাক্কে বার আজার। তে সিয়েনি রথ রাগেবার শঅরত্ আর যিরূশালেমত্ নিজো ইদু রাগেদ। 27 রাজা যিরূশালেমত্ রূবোগানরে গুরিলো পাত্তর ধোক্কেন্ সয়সাগজ্যে, আর এরস গাজ্ছোরে গুরিলো তলে মুড়োমুড়ি চাগালাত্ গোজেয়্যে ডোমোর গাজ ধোক্কেন্ সয়সাগজ্যে। 28 মিসর আর কিলিকিয়াত্তুন্ শলোমনর্ ঘোড়াগুন্ আনিদাক্। রাজার বণিক্কুনে কিলিকিয়াত্তুন্ সিগুনোরে কিনি আনিদাক্। 29 মিসর দেজত্তুন্ আন্যে এক্কান্ রথর দাম পড়িদো সাত কেজি আস্তোশত্ গ্রাম রূবো আর ইক্কো ঘোড়ার দাম পড়িদো সাত কেজি আস্তোশত্ গ্রাম রূবো। সে বণিক্কুনে হিত্তীয় আর অরামীয় বেক্ রাজাগুনোর ইদু সিয়েনি বিজিদাক্। |
Copyright © 2021 Bangladesh Bible Society
Bangladesh Bible Society