১ যোহন 5 - Chakma Bibleগোজেনর্ পুয়ো-ছাগুনে জগদ্তানরে জিদি লন্ 1 যিগুনে বিশ্বেজ্ গরন যীশুই সেই মশীহ, গোজেনত্তুন্ তারার্ জর্ম ওইয়্যে। যিগুনে বাবরে কোচ্পান সিগুনে তার্ পুয়ো-ছাগুনোরেয়ো কোচ্পান। 2 যেক্কে আমি গোজেনরে কোচ্পেই আর তা উগুমানি পালেই সেক্কে কোই পারিই যে, গোজেনর্ পুয়ো-ছাগুনোরেয়ো আমি কোচ্পেই। 3 গোজেনর্ উগুমানি পালানা অলঅ গোজেনরে কোচ্পানা। 4 গোজেনর্ পত্তি পুয়ো-ছাগুনে জগদ উগুরে জিদিই থান্। জগদ উগুরে যিয়েন জিত্যে সিয়েন অলঅ আমার বিশ্বেজ্। 5 যিগুনে বিশ্বেজ্ গরন যীশু গোজেনর্ পুয়ো, বানা সিগুনে জগদ উগুরে জিদিবাক্। গোজেন পুয়োবো পৌইদ্যেনে সাক্ষি 6 ইবেই যীশু খ্রীষ্ট, যিবে পানি আর লো-লোই এচ্চ্যে। বানা পানিলোই নয়, মাত্তর্ পানি আর লো-লোই এচ্চ্যে। পবিত্র আত্মাগানে এ পৌইদ্যেনে সাক্ষি দে, কিয়া তে নিজেই সত্য। 7-8 পবিত্র আত্মা, পানি আর লো-এই তিনেনর্ মাধ্যমে সেই সাক্ষিগান এজের্ আর সেই তিনেনর্ সাক্ষি এক। 9 আমি মান্জ্যর সাক্ষি লোই থেই, মাত্তর্ গোজেনর্ সাক্ষিগান তাত্তুন্-অ দাঙর্; আর তে তা পুয়োবো পৌইদ্যেনে সেই সাক্ষিগান দিয়্যে। 10 গোজেন পুয়োবো উগুরে যে বিশ্বেজ্ গরে তা মনভিদিরে সেই সাক্ষিগান আঘে। যিগুনে গোজেনরে বিশ্বেজ্ ন-গরন তারা তারে মিজেমাদিয়্যে বানেয়োন, কিয়া গোজেনে তা পুয়োবো পৌইদ্যেনে যে সাক্ষিগান দের্ সিয়েন তারা বিশ্বেজ্ ন-গরন। 11 সেই সাক্ষিগান ইয়েন, গোজেনে আমারে উমর্অ জিংকানি দিয়্যে আর সেই জিংকানিগান তা পুয়োবো ভিদিরে আঘে। 12 গোজেনর্ পুয়োবোরে যে পেইয়্যে তে সেই জিংকানিগান্অ পেইয়্যে; মাত্তর্ গোজেনর্ পুয়োবোরে যে ন-পায় তে সেই জিংকানিগান্অ ন-পায়। শেজ্ কধা 13 তুমি যিগুনে গোজেন পুয়োবো উগুরে বিশ্বেজ্ গরঅ, তমা ইধু মুই ইয়েনি লিগিলুং যেনে তুমি হবর্ পঅ যে, তুমি উমর্অ জিংকানি পেইয়ো। 14 গোজেন উগুরে আমার এই বিশ্বেজ্চান আঘেদে যে, তা আওজ্ মজিম যুনি আমি কিজু মাগিই সালে তে আমা কধানি শুনে। 15 আমি যুনি কোই পারিই, আমি যিয়েনি মাগিই সিয়েনি তে শুনে সালে ইয়েন্অ হবর্ পেই যে, আমি তাত্তুন্ যিয়েনি মাক্ক্যেই সিয়েনি আমার পানা ওইয়্যে। 16 যুনি কেঅ তা ভেইয়োরে এন্ গুরি পাপ গত্তে দেগে যিয়েন মরেদে ধোক্ক্যেন নয়, মাত্তর্ তে গোজেন ইধু মাগি চেবঅ আর সেক্কে তে তারে বাজেই রাগেব। মুই ইয়েনত্ তারা কধা কঙর্ যিগুনে পাপ গত্তন্ অদচ তারার্ পাপ্পানি মরেদে ধোক্ক্যেন নয়। মাত্তর্ মরেদে ধোক্ক্যেন পাপ্অ আঘে। সে পৌইদ্যেনে কোজোলি গুরিবার কধা মুই তমারে ন-কঙর্। 17 বেক্ অন্যেয়ানি পাপ, মাত্তর্ বেক্ পাপ্পানি মরণ ধোক্ক্যেন নয়। 18 আমি কোই পারিই, গোজেনত্তুন্ যিবের জর্ম ওইয়্যে তে পাপত্ পড়ি ন-থায়। যিবে গোজেনত্তুন্ জোর্মেয়্যে তেয়ই তারে রোক্ষ্যে গরে, আর শদানে তারে ধুরি ন-পারে। 19 আমি কোই পারিই আমি গোজেনর্ আর গোদা জগদ্তান শদানর্ খেমতার্ তলেদি পড়ি আঘে। 20 আমি আরঅ কোই পরিই যে, গোজেনর্ পুয়োবো এইনে আমারে বুঝিবার খেমতা দিয়্যে যেন সত্য গোজেনরে আমি জানি পারিই। যিবে সত্য গোজেন আমি তা সমারে এগত্তর্, অত্তাৎ তা পুয়োবো যীশু খ্রীষ্ট সমারে এগত্তর্ আঘিই। তেয়ই সত্য গোজেন আর তেয়ই উমর্অ জিংকানি। 21 পুয়ো-ছা লগ্, মূত্তি সমারে তমার কনঅ মিলেমিলি ন-থোক্। |
Copyright © 2021 Bangladesh Bible Society
Bangladesh Bible Society