১ যোহন 4 - Chakma Bibleগোজেনর্ আত্মাগানরে চিনি লবার্ পধ 1 কোচ্পানার্ পুয়ো-ছা লগ্, তুমি বেক্ আত্মাগুনোরে বিশ্বেজ্ ন-গোজ্জ্য, বরং চাগি চঅ সিগুনে গোজেনত্তুন্ এচ্চ্যন কিনা, কিয়া জগদত্ বোউত্ ভন্ড ভাববাদী নিগিল্লোন। 2 গোজেনর্ আত্মাগানরে তুমি এবাবোত্যেগুরি চিনি পারিবা-যে আত্মাগানে স্বিগের্ গরে যীশু খ্রীষ্ট মানুচ্ ওইনে এচ্চ্যে সেই আত্মাগানে গোজেনত্তুন্ এচ্চ্যে; 3 মাত্তর্ যে আত্মাগানে এই যীশুরে অস্বীগের্ গরে সেই আত্মাগান গোজেনত্তুন্ ন-এজে। ইবে সেই খ্রীষ্ট-শত্রুর্ আত্মা। সেই আত্মাগান যে এজের্ সিয়েন দঅ তুমি শুন্ন্য, আজলে সেই আত্মাগান এজঅ জগদত্ আঘে। 4 মাত্তর্ পুয়ো-ছা লগ্, তুমি গোজেনর্। তুমি সেই ভন্ডগুনো উগুরে জিত্য, তাত্তুন্ যিবে তমা মনভিদিরে আঘে তে মহান। 5 সেই ভন্ডগুন এই জগদর্; সেনত্যে তারা এই জগদর্ কধা কন্ আর জগদ্তানে তারা কধা শুনে। 6 আমি গোজেনর্; যে গোজেনরে জানে তে আমা কধা শুনে, মাত্তর্ যে গোজেনর্ নয় তে আমা কধা ন-শুনে। ইয়েন্দোই আমি সত্যর্ আত্মাগানরে আর ছলনার্ আত্মাগানরে চিনি পারিই। গোজেনে নিজেই কোচ্পানা 7 কোচ্পেইয়্যে পুয়ো-ছা লগ্, আমি যেন একজন আরেকজনরে কোচ্পেই, কিয়া কোচ্পানাগান গোজেনত্তুন্ এজে। তারা মনভিদিরে কোচ্পানা আঘে, গোজেনত্তুন্ তারার্ জর্ম ওইয়্যে আর সিগুনে গোজেনরে চিনোন্। 8 যিগুনোর্ মনভিদিরে কোচ্পানা নেই সিগুনে গোজেনরে ন-জানন্, কিয়া গোজেনে নিজেই কোচ্পানা। 9 আমা উগুরে গোজেনর্ কোচ্পানা এবাবোত্যে গুরি ফগদাং ওইয়্যে তে তার্ বানা এক্কোগুরি পুয়োরে এই জগদত্ দিপাধেল যেন আমি তারে দিইনে জিংকানি পেই। 10 আমি যে গোজেনরে কোচ্পেয়্যেই সিয়েন নয়, মাত্তর্ তে আমারে কোচ্পেইনে তা পুয়োবোরে দিপাধেয়্যে, যেন পুয়োবো তার নিজোর জিংকানিগান-উৎসর্ব গরানায় আমা পাপ্পানি দূর্ গুরিনে গোজেনরে হুজি গরে। ইয়েনই অলঅ কোচ্পানা। 11 কোচ্পেইয়্যে পুয়ো-ছা লগ্, গোজেনে যেক্কে এবাবোত্যেগুরি আমারে কোচ্পেইয়্যে সেক্কে আমার্অ একজন আরেকজনরে কোচ্পানা উচিত। 12 কেঅ কনদিন্অ গোজেনরে ন-দেগে। যুনি আমি একজন আরেকজনরে কোচ্পেই সালে বুঝো যেবঅ যে, গোজেনে আমা মনভিদিরে আঘে আর তা কোচ্পানাগান আমা মনভিদিরে পুরোপুরি গুরিনে কাম গরের্। 13 তা আত্মাগান তে আমারে দান গোজ্জ্যে, আর ইয়েন্দোই আমি কোই পারিই যে, আমি তা সমারে আঘিই আর তেয়ো আমা মনভিদিরে আঘে। 14 আমি দেক্ক্যেই আর সাক্ষি দিত্তে, বাবা পুয়োবোরে মানুচ্চুনোর উদ্ধোর্ গুরিয়্যে ইজেবে পাধেয়্যে। 15 যে কেঅ স্বীগের্ গরে যীশু গোজেনর্ পুয়ো, গোজেনে তা ভিদিরে থায় আর তেয়ো গোজেন সমারে থায়। 16 আমি কোই পারিই গোজেনে আমারে কোচ্পায়, আর তা কোচ্পানাগান উগুরে আমার বিশ্বেজ্ আঘে। গোজেনে নিজেই কোচ্পানা। কোচ্পানা সমারে যে থেবঅ তে গোজেন সমারে থায় আর গোজেনে তা সমারে থায়। 17 এবাবোত্যে গুরি কোচ্পানাগানে আমা মনভিদিরে পেলেং পেলেং অয়, যেন বিচের দিনোত্ আমি সাহস পেই, কিয়া এই জগদত্ আমা জিংকানিগান তা জিংকানিগান ধোক্ক্যেন। 18 এই কোচ্পানাগান ভিদিরে দর্ নেই, মাত্তর্ যদবদে কোচ্পানাগানে দর্ জিনিস্চানরে ধাবেই দে, কিয়া দরান সমারে সাজার চিন্তেগান্অ থায়। যে দরায় তে কোচ্পানাগান পেলেং পেলেং ন-পায়। 19 তে পত্তমে আমারে কোচ্পেইয়্যে বিলিনে আমি কোচ্পেই। 20 যে কয় তে গোজেনরে কোচ্পায় অদচ তা ভেইবোরে ঘিনায় তে মিজেমাদিয়্যে; কিয়া চোগেদি দেক্ক্যে ভেইয়োরে যে কোচ্ ন-পায় তে অদেগা গোজেনরে কেধোক্ক্যেন গুরি কোচ্পেই পারে? 21 আমি তাত্তুন্ এই উগুমান পেইয়্যেইদে যে, গোজেনরে যিগুনে কোচ্পান তারা যেন ভেইয়োরেয়ো কোচ্পান। |
Copyright © 2021 Bangladesh Bible Society
Bangladesh Bible Society