১ যোহন 3 - Chakma Bibleগোজেনর্ পুয়ো 1 চঅ, বাবা গোজেনে আমারে কদক্ কোচ্পায়! তে আমারে তার্ পুয়ো বিলিনে ডাগে; আজলে আমি সিয়েনই। ইয়েনত্যে জগদ্তানে আমারে ন-চিনে, কিয়া জগদ্তানে গোজেনরেয়ো ন-চিনে। 2 পরাণর্ পুয়ো-ছাগুন, ইক্কিনে আমি গোজেনর্ পুয়ো, মাত্তর্ যেরেদি কি অবং সিয়েন এজঅ ফগদাং ন-অয়। মাত্তর্ আমি কোই পারিই, খ্রীষ্ট যেক্কে ফগদাং অবঅ সেক্কে আমি তা ধোক্ক্যেন অবং, কিয়া তে আজলে যেধোক্ক্যেন, সেই চেঙেরালোই আমি তারে দেগিবোং। 3 যে কেঅ খ্রীষ্ট উগুরে এই আজাগান রাগায় তে নিজোরে খাটি গরানাত্ থায় যেধোক্ক্যেন খ্রীষ্ট খাটি। 4 যিগুনে পাপ গরন্ সিগুনে গোজেনর্ কধা অমান্য গরন্। পাপ অলঅ গোজেনর্ কধা অমান্য গরানা। 5 তুমি দঅ কোই পারঅ যে, আমা পাপ্পানি ধাবেই দিবাত্যে খ্রীষ্ট ফগদাং ওইয়্যে। খ্রীষ্ট ইধু কনঅ পাপ নেই। যিগুনে খ্রীষ্ট সমারে থান্ তারা পাপত্ পড়ি ন-থান্। 6 যিগুনে পাপত্ পড়ি থান্ সিগুনে খ্রীষ্টরে ন-দেগন আর নয়ো-জানন্। 7 পুয়ো-ছাগুন, কেঅ যেন তমারে ভান্ন্যেই পধেদি ন-নেযান। খ্রীষ্ট অন্যেয় ন-গরে, আর যে কেঅ নিজোরে ন্যায় কামত্ রাগান তেয়ো অন্যেয় ন-গরে। 8 যে পাপ গরানাত্ থায় তে শদানর্, কিয়া শদানে পৌইল্যাত্তুন্ ধুরি পাপ গুরি যার্। শদানর্ কামানিরে ভস্ত গুরিবাত্যে গোজেনর্ পুয়োবো ফগদাং ওইয়্যে। 9 গোজেনত্তুন্ যিবের্ জর্ম ওইয়্যে তে পাপত্ পড়ি ন-থায়, কিয়া গোজেনর্ খাচ্চ্যত্ তা ভিদিরে থায়। গোজেনত্তুন্ জর্ম ওইয়্যে বিলিনে তে পাপত্ পড়ি থেই ন-পারে। 10 যিগুনে ন্যায় কামত্ নিজোরে ন-রাগান আর ভেইয়োরে কোচ্ ন-পান্, সিগুনে গোজেনর্ নয়। ইয়েন্দোই ফগদাং পায়, কন্না গোজেনর্ পুয়ো আর কন্না বা শদানর্ পুয়ো। 11 যে কধাগান তুমি পত্তমত্তুন্ ধুরি শুনি এজর্ সিয়েন এবাবোত্যে-আমার একজন আরেকজনরে কোচ্পানা উচিত। 12 সেনত্যে মুই কঙর্, আমি যেন কয়িন ধোক্ক্যেন ন-ওই। কয়িনে শদানর্ মানুচ্ এলঅ আর তা ভেইবোরে তে খুন্ গোজ্জ্যে। কিত্ত্যেই তে তারে খুন্ গোজ্জ্যে? কিয়া তে ভান্ন্যেই কাম গত্ত আর তা ভেইবো ন্যায় কাম গুরিদো। একজন আরেকজনরে কোচ্পঅ 13 ভেইলগ্, জগদর্ মানুচ্চুনে যুনি তমারে ঘিনায় সিয়েনত্যে আমক্ ন-ওইয়ো। 14 আমি ভেইয়ুনোরে কোচ্পেই বিলিনে বুঝি পারির্, আমি মরণত্তুন্ জিংকানিত্ পার্ ওই এচ্চ্যেই। যিগুনে কোচ্ ন-পান্ সিগুনে মরণান ভিদিরে থান্। 15 ভেইয়োরে যে ঘিনায় তে খুনী। কনঅ খুনী ভিদিরে যে উমর্অ জিংকানি ন-থায়, সিয়েন তমার অজানা নেই। 16 খ্রীষ্ট আমাত্যে নিজোর পরাণান্ দিয়্যে, সেনত্যে কোচ্পানা কি সিয়েন আমি কোই পাজ্জ্যেই। সালে ভেইয়ুনোত্যে নিজোর পরাণান্ দেনা আমার্অ উচিত। 17 এই জগদত্ হেইনে-উরিনে পিনিনে বাঁজি থাইদ্যে ধোক্ক্যেন অবস্থা যিবের্ আঘে, তে তার্ ভেইয়ুনোর অভাব দেগিনেয়ো যুনি চোগ্কুন নাঢি থায় সালে কেধোক্ক্যেন গুরি তা মনভিদিরে গোজেন উগুরে কোচ্পানা থেই পারে? 18 পুয়ো-ছা লগ্, আমি যেন বানা মুয়োর্ কোচ্পানা ন-দেগেইনে কামানিলোই ঘেচ্চ্যেকগুরি কোচ্পানা দেগেই। 19-20 ইয়েন্দোই আমি কোই পারিবোং, আমি সত্যর্। সিয়েনবাদে কনঅ পৌইদ্যেনে যুনি আমা মনানে আমারে দুষি গরে সেক্কে গোজেন মুজুঙোত্ আমা মনানিরে বুঝেই পারিবোং। গোজেনে আমা মনানিত্তুন্ দাঙর্ আর তে বেক্কানি কোই পারে। 21 পরাণর্ পুয়ো-ছা লগ্, আমা মনানে যুনি আমারে দুষি ন-গরে সালে গোজেন মুজুঙোত্ আমার সাহচ্ থেবঅ। 22 সিয়েনত্যে আমি যিয়েনি মাগিবোং সিয়েনি তাত্তুন্ পেবং, কিয়া তে যেদক্কানি উগুম দিয়্যে সিয়েনি আমি পালন গুরিই আর তে যেদক্কানি কামত্ হুজি অয় আমি সিয়েনি গুরিই। 23 তার্ উগুমান ইয়েন-আমি যেন তার্ পুয়ো যীশু খ্রীষ্ট উগুরে বিশ্বেজ্ গুরিই আর একজন আরেকজনরে কোচ্পেই। এই উগুমানই তে আমারে দিয়্যে। 24 তা উগুমান যে পালন গরে তে তা সমারে থায় আর তেয়ো তা সমারে থায়। যে পবিত্র আত্মাগান তে আমারে দিয়্যে সেই পবিত্র আত্মাগান্দোই আমি বুঝি পারিই যে, তে আমা মন ভিদিরে থায়। |
Copyright © 2021 Bangladesh Bible Society
Bangladesh Bible Society