১ যোহন 2 - Chakma Bible

¹ মর্ কোচ্‌পেইয়্যে পুয়ো-ছাগুন্, তুমি যেনে পাপ ন-গরঅ সেনত্যে মুই তমা ইধু এ বেক্‌ কধানি লেগঙর্। মাত্তর্ কেঅ যুনি পাপ গুরি ফেলান্ সালে বাবা ইধু আমার পৌইদ্যেনে কধা কবাত্যে একজন আঘে; তে অলঅ যীশু খ্রীষ্ট, যিবে নিদ্দুজি।

² আমা পাপ্পানি দূর্ গুরিবাত্যে খ্রীষ্ট তার্ নিজো জিংকানিগান্ উৎসর্ব গুরিনে গোজেনরে হুজি গোজ্জ্যে। বানা আমা পাপ্পানি নয়, মাত্তর্ বেক মানুচ্চুনোর পাপ্পানি দূর্ গুরিবাত্যে তে সিয়েন গোজ্জ্যে।

খ্রীষ্টর্ উগুমানি পালানা

³ আমি যুনি তার বেক্‌ উগুমানি পালেই সালে আমি ঘেচ্চ্যেকগুরি বুঝি পারিবোং যে, আমি তারে চিন্ন্যেই।

⁴ যে কয়, “মুই তারে চিন্নোং,” অদচ তা উগুমানি পালন ন-গরে তে মিজে মাদিয়্যে; তা ভিদিরে সত্যগান নেই।

^5-6 মাত্তর্ যে তা কধানি পালায় তা ভিদিরে গোজেনর্ কোচ্‌পানাগান ঘেচ্চ্যেকগুরি আঘে। কেঅ যুনি কয় তে তা ভিদিরে আঘে সালে তে যেধোক্ক্যেন গুরি চলিদো সেধোক্ক্যেন গুরি তার্‌অ চলানা উচিত্। ইয়েন্দোই আমি কোই পারিই যে, আমি তা সমারে আঘিই।

সেই নুয়ো উগুমান্

⁷ কোচ্‌পেইয়্যে পুয়ো-ছাগুন, মুই তমা ইধু কনঅ নুয়ো উগুমোর্ কধা ন-লেগঙর্, বরং পত্তমত্তুন্ ধুরি যে উগুমান এলঅ সেই পুরোণি উগুমানর্ কধা লেগঙর্। তুমি যে কধাগান আগে শুন্ন্য সিয়েনই সেই পুরোণি উগুমান।

⁸ মাত্তর্ এই যে উগুমানর্ কধা ইক্কিনে আমি তমা ইধু লিগির্ সিয়েন পুরোণি অলেয়ো নূয়ো। এই উগুমানর্ সত্যগান যীশু খ্রীষ্ট ভিদিরে আর তমা জিংকানিত্ দেগা যেইয়্যে, কিয়া আন্ধারান কাদা যার্ আর সেই আজল্ পহ্‌রান ইক্কিনে জ্বলের্।

⁹ যে মানুচ্চো কয় তে পহ্‌রত্ আঘে অদচ তা ভেইবোরে ঘিনায় তে এজঅ আন্ধারত্ আঘে।

¹⁰ যে তা ভেইবোরে কোচ্‌পায় তে পহ্‌রত্ থায় আর তা ভিদিরে উজোট্ হেবার কনঅ কারণ নেই।

¹¹ মাত্তর্ যে তা ভেইবোরে ঘিনায় তে আন্ধারত্ আঘে আর আন্ধারত্ আঢাউদো গরের্। তে কোই ন-পারে তে কুধু যার্, কিয়া আন্ধারানে তা চোগ্‌কুন কান্ গুরি দিয়্যে।

¹² পুয়ো-ঝিগুন্, খ্রীষ্টত্যে তমা পাপ্পানি ক্ষেমা গরা ওইয়্যে বিলিনে মুই তমা ইধু লেগঙর্।

¹³ বাবলগ্, সেই পৌইল্যাত্তুন্ ধুরি যিবে আঘে তুমি তারে হবর্ পেইয়ো বিলিনে তমা ইধু লেগঙর্। গাবুজ্জ্যেলগ্, শদান উগুরে তুমি জিত্য বিলিনে তমা ইধু লেগঙর্।

¹⁴ পুয়ো-ঝিগুন্, মুই তমা ইধু লিগিলুং, কিয়া তুমি বাবা গোজেনরে জানঅ। বাবলগ্, মুই তমা ইধু লিগিলুং, কিয়া সেই পৌইল্যাত্তুন্ ধুরি যিবে আঘে তুমি তারে হবর্ পেইয়ো। গাবুজ্জ্যেলগ্, মুই তমা ইধু লিগিলুং, কিয়া তুমি বোলী আর গোজেন কধা তমা মন ভিদিরে আঘে, আর তুমি শদান উগুরে জিত্য।

পিত্‌থিমীগানরে কোচ্‌ ন-পেইয়ো

¹⁵ তুমি জগদ আর জগদর্ কনঅ কিচ্চু কোচ্‌ ন-পেইয়ো। যুনি কেঅ জগদ্‌তানরে কোচ্‌পঅ সালে তে বাবারে কোচ্‌ ন-পায়।

¹⁶ কিয়া জগদ ভিদিরে যিয়েনি আঘে-কিয়্যের্ কামনা, চোগোর্ লুভ আর সংসার পৌইদ্যেনে দেমাগ্-ইয়েনর্ কনগান বাবা ইত্তুন্ ন-এজে, জগদত্তুন্ এজে।

¹⁷ জগদ্ আর জগদর্ কামনা-বাসনা থুম্ ওই যার্, মাত্তর্ গোজেনর্ আওজ্‌চান যে পালায় তে উমরত্যে থেবঅ।

খ্রীষ্টর্ শত্রু

¹⁸ পুয়ো-ছা লগ্, ইবেয়ই শেজ্ সময়। তুমি দঅ শুন্ন্য যে, খ্রীষ্ট-শত্রুবো এজের্, মাত্তর্ তার আরঅ ভালোক্কুন্ শত্রু এ ভিদিরে এই যেইয়োন। সেনত্যে আমি বুঝি পারির্, ইবেয়ই শেষ্ সময়।

¹⁹ খ্রীষ্টর্ এ শত্রুগুন আমা ভিদিরেত্তুন্ নিগিলি যেয়োন। মাত্তর্ তারা আমা মানুচ্‌ ন-এলাক্। যুনি তারা আমার্ অদাক্ সালে আমা সমারে থেদাক্, মাত্তর্ তারা নিগিলি যেইয়োন বিলিনে বুঝো যার্, তারা কেঅই আমার নয়।

²⁰ মাত্তর্ তুমি সেই পবিত্র মানুচ্চোত্তুন্ অভিষেক্ পেইয়ো, অত্তাৎ পবিত্র আত্মাগানরে পেইয়ো আর তুমি বেক্কুনে সত্যগান হবর্ পেইয়ো।

²¹ সত্যগানরে কোই ন-পারঅ বিলি মুই যে তমা ইধু লিগিলুং সিয়েন নয়, মাত্তর্ তুমি সত্যগানরে কোই পারঅ আর ইয়েন-অ কোই পারঅ যে, সত্যত্তুন্ মিজে কধানি ন-এজে; আর সেনত্যে মুই তমা ইধু লিগিলুং।

²² যে কয়, যীশু মশীহ নয়, তে মিজেমাদিয়্যে বাদে আর কি? বাব আর পুয়োবোরে যে অস্বীগের্ গরে তেয়ই দঅ খ্রীষ্টর শত্রু।

²³ পুয়োবোরে যে অস্বীগের্ গরে তা সমারে বাবর্ কনঅ মিল্ নেই, মাত্তর্ পুয়োবোরে যে স্বীগের গরে তা সমারে বাবর্-অ মিল্ আঘে।

²⁴ পৌইল্যাত্তুন্ ধুরি তুমি যিয়েনি শুনি এজর্ সিয়েনি যেন তমা মনভিদিরে থায়। পৌইল্যাত্তুন্ ধুরি যিয়েনি তুমি শুনি এজর্ সিয়েনি যুনি তমা মনভিদিরে থায় সালে তুমি পুয়োবো আর বাবা সমারে থেবা।

²⁵ ইয়েনই অলঅ উমর্‌‍অ জিংকানি, যিয়েন খ্রীষ্ট আমারে দিবার এগেম্ গোজ্জ্যে।

²⁶ যিগুনে তমারে ভান্ন্যেই পধেদি নেযেবার চেট্ট্যা গত্তন্ তারা পৌইদ্যেনে মুই তমা ইধু ইয়েনি বেক্কানি লিগিলুং।

²⁷ মাত্তর্ তুমি খ্রীষ্টত্তুন্ অভিষেক্ পেইয়ো, অত্তাৎ পবিত্র আত্মাগানরে পেইয়ো। তে তমা মনভিদিরে থায়। ইয়েনত্যে অন্য কারঅ শিক্ষ্যে তমার দরকার নেই। বেক্কানি পৌইদ্যেনে পবিত্র আত্মাগানে তমারে শিক্ষ্যে দের্। তে সত্য, মিজে নয়। সেনত্যে যেধোক্ক্যেন গুরি তে তমারে খ্রীষ্ট সমারে থেবাত্যে শিক্ষ্যে দে সেধোক্ক্যেন গুরি খ্রীষ্ট সমারে থাগঅ।

²⁸ পুয়োলগ্, সেনত্যে কঙর্, তুমি খ্রীষ্ট সমারে থাগঅ যেনে তে যেক্কে ফগদাং অবঅ সেক্কে আমার সাহচ্‌ থায় আর তে যেক্কে এবঅ সেক্কে তা মুজুঙোত্ আমার্ লাজে মুয়োনি লুগো ন-পরে।

²⁹ তুমি যুনি কোই পারঅ, তে কনদিন্অ অন্যেয় ন-গরে মাত্তর্ ইয়েন হবর্ পেইয়ো-যিগুনে ন্যায় কামত্ নিজোরে কামত্ লাগান, গোজেনত্তুন্ তারার্ জর্ম ওইয়্যে।