১ করিন্হীয় 9 - Chakma Bible

প্রচারগ্‌কুনোর্ অধিকার

¹ মুই কি স্বাধীন নয়? মুই কি প্রচারক্ নয়? আমা প্রভু যীশুরে কি মুই ন-দেগং? প্রভুত্যে মুই যে কাম্ গোজ্জ্যং তুমি কি সিয়েনর্ ফল নয়?

² অন্যগুনে যুনি মরে প্রচারক্ বিলিনে স্বীগের্ নয়ো-গরন্ তো তুমি অন্তত: সিয়েন স্বীগের্ গুরিবা। তুমি যে প্রভুর্ মানুচ্‌ ওইয়ো সিয়েনই মর্ প্রচারক্-পদর্ প্রমাণ।

³ যিগুনে মর্ প্রচারক অনা পৌইদ্যেনে প্রশ্ন তুলোন্ তারা ইধু মর্ জোব্‌‌পান ইয়েন-

⁴ আমার্ হানা-দানা গুরিবার্ অধিকার কি নেই?

⁵ অন্য বেক্‌ প্রচারগ্‌কুনে, প্রভুর ভেইয়ুনে আর পিতরে যেবাবোত্যে নিজোর্ নিজোর্ মোগ্‌কুনোরে লোইনে প্রচারত্ নিগিলে, সেবাবোত্যেগুরি খ্রীষ্ট বিশ্বেজি নিজো মোগ্‌কুনোরে লোইনে প্রচারত্ নিগিলিবার অধিকার কি আমার নেই?

⁶ বার্ণবা আর মত্তুন্ কি বানা কাম্ গুরি হা পুরিবো?

⁷ নিজোর্ পৌইজ্যে খরচ্ গুরিনে কন্না সৈনিগোর্ কাম গরে? আংগুর ক্ষেত যে গরে তে কি তার্ ফলুন্ ন-খায়? য়েমান পালুন্ যে চরায় তে কি সিগুনোর্ দুধ ন-খায়?

⁸ মুই কি বানা সাধারন বুদ্ধিলোই এ কধাগান্ কঙর্? মোশির্ রীতি-সুদোম্অ কি সেই একই কধা ন-কয়?

⁹ সিয়েনত্ লেগা আঘে, “শোজ্য মাড়িবার্ সময়োত্ বলদ মুয়োনত্ মোগোনি খাজা ন-বান্ন্য।” গোজেনে কি বানা বলদ কধা চিন্তে গরে?

¹⁰ আসলে তে দঅ আমাত্যে এ কধাগান কোইয়্যে, নয় কি? অয়, এ কধাগান আমাত্যে লেগা ওইয়্যে, কিয়া যে চাষ গরে আর যে শোজ্জ্য মাড়ে, শোজ্জ্য ভাগ্ পেবার আজালোই তারাত্তুন্ সিয়েন গরানা উচিত।

¹¹ আমি যেক্কে তমা ভিদিরে আত্মিক বীজি লাগেইয়্যেই সেক্কে তমাত্তুন্ যুনি জাগতিক্ হানা-উরোনা থুবোং সালে সিয়েন কি ভারী বেশ্ কিজু?

¹² এ পৌইদ্যেনে তমা উগুরে যুনি অন্যগুনোর্ দাবি থায় সালে আমার্ কি সিয়েন আরঅ বেশ্ গুরি ন-থেবঅ? মাত্তর্ আমি সেই দাবিগান কামত্ ন-লাগেই বরং বেক্কানি সোজ্জ্য গুরির্, যেন খ্রীষ্ট পৌইদ্যেনে গম্ হবর্ প্রচার পধত্ আমি কনঅ কাঙেলেত্যে ন-ওই।

¹³ তুমি কি কোই ন-পারঅ, যিগুনে উবোসনা-ঘরর্ কাম গরন্ সিগুনে উবোসনা-ঘরত্তুন্ হানা পান্, আর যিগুনে পূজোর্ কাম গরন্ সিগুনে পূজোবোত্ যিয়েনি উৎসর্ব গরা অয় সিয়েনির ভাগ্ পান?

¹⁴ ঠিগ্ সেবাবোত্যেগুরি প্রভু উগুম্ দিয়্যে, যিগুনে গম্ হবর্ প্রচার্ গরন তারা যেন সিয়েনত্তুন্ হানা-উরোনা পান্।

¹⁵ মাত্তর্ মুই ইয়েনির কনঅ কিছু ভোগ্ ন-গরং। তুমি যাতে মত্তে এবাবোত্যে বেবস্থা গরঅ সেনত্তে মুই এ কধাগান্ ন-লেগঙর্। আসলে মর্ এ দেমাগ্‌‌কান যুনি কেঅ মিজে গুরি দে সালে সিয়েনত্তুন্ মর্ মরণান্ বোউত্ গম্।

¹⁶ মুই গম্ হবর্ প্রচার গরঙর্ সত্য, মাত্তর্ সিয়েনত্যে মর্ বাঈনী গুরিবার কিচ্চু নেই, কিয়া মত্তুন্ সিয়েন গরা পুরিবো। দুর্ভাগ্গ্য মর্, যুনি মুই সেই গম্ হবরান্ প্রচার ন-গরং!

¹⁷ যুনি মুই নিজোর্ আয়োজে প্রচার গরং সালে দঅ মঅ বক্‌‌শিষ্‌‌চান আঘে, আর যুনি নিজোর্ আয়োজে ন-য়ো গরং তো মঅ উগুরে সেই ভারান্ আঘে বিলিনে মুই সিয়েন গরং।

¹⁸ সালে মঅ বক্‌‌শিজ্‌‌চান কি? সেই বক্‌‌শিজ্‌‌চান ইয়েন, মুই যেক্কে গম্ হবর্ প্রচার গরং সেক্কে সিয়েনর্ বদলে মর্ যিয়েন পাওনা আঘে সিয়েন ভোগ্ ন-গুরিনে মাগানা মুই সেই কামান্ গুরি পারং।

¹⁹ যুনিয়ো মুই কারঅ চাগর্ নয় তো মুই নিজোরে বেক্কুনোর্ চাগর্ বানেয়োং, যেন ভালোক্ জনরে খ্রীষ্টত্যে জিদি পারং।

²⁰ যিহূদীগুনোরে জিদিবাত্তে মুই যিহূদীগুনো ইধু যিহূদী ধোক্ক্যেন্ ওইয়োং। যুনিয়ো মুই মোশির আইন-কানুনো অধীনোত্ নয় তো যিগুনে আইন-কানুনো অধীনোত্ আঘন্ তারারে জিদিবাত্তে মুই তারা ধোক্ক্যেন ওইয়োং।

²¹ আরঅ আইন-কানুনো বারেদি যিগুনে আঘন্ তারারে জিদিবাত্তে মুই আইন-কানুনো বারেদি থেইয়্যে মান্‌জ্য ধোক্ক্যেন ওইয়োং। খালিক্ ইয়েনর্ মানে ইয়েন নয় যে, মুই গোজেনর্ দিয়্যে আইন-কানুনো বারেদি আঘং; মুই দঅ খ্রীষ্টর্ আইনোর্ অধীনোত্ আঘং।

²² যিগুনোর্ বিশ্বেজ্ কম্ তারা ইধু মুই সেবাবোত্যে মান্‌জ্য ধোক্ক্যেন ওইয়োং, যেন খ্রীষ্টত্যে তারারে পুরোপুরি গুরিনে জিদি পারং। আজল্ কধা, মুই বেক্কুনো ইধু বেক্কানি ওইয়োং যেন যে কনঅ বাবদে কিজু মন্‌জ্যরে উদ্ধোর্ গুরি পারং।

²³ ইয়েনি বেক্কানি মুই গম্ হবরত্যে গরঙর্ যেন ইয়েনর্ আশিদ্‌বাদর ভাগি ওই পারং।

²⁴ তুমি কি হবর্ ন-পঅ ধাবা দোন্দে খারাত্ বেক্কুনে ধাবা দুয়োন্, মাত্তর্ বানা একজনে বক্‌শিজ্ পায়? তুমি এমন্‌ গুরি ধাবা দুয়ো যেন বক্‌শিজ্ পেই পারঅ।

²⁵ যিগুনে ধাবা দেনাত্ মিজেন্ সিগুনে বেক্কুনে আগেত্তুন্ ধুরি দর-মর গুরিনে চলন্। যে জিদিবার্ মালাবো বর্‌বাদ ওই যায় সেই মালাবো পেবাত্যে তারা সিয়েন গরন্, মাত্তর্ আমি সিয়েন গুরিই সেই বক্‌শিজ্‌চানত্তে যিয়েন কনদিন্অ বর্‌বাদ ন-অবঅ।

²⁶ সেনত্তে উদ্দেচ্চ্য নেইয়্যে গুরি মুই ধাবা ন-দোঙর্। যিগুনে খালি জাগাত্ আঘাত্ গুরিনে আঢ্‌তোই যুদ্ধো গরন্ মুই তারা ধোক্ক্যেন নয়।

²⁷ মুই বরং কিয়্যেগানরে দুঘ্ দিইনে নিজো অধিনোত্ রাগেয়োং, যেন অন্যগুনো ইধু গম্ হবর্ প্রচার গরানার্ পরেদি মুই নিজে বক্‌শিজ্‌ পেবার অযোগ্য ওই ন-পরং।