১ করিন্হীয় 8 - Chakma Bible

মূত্তিপূজোর্ হানা পৌইদ্যেনে

¹ এবার্ মুই মূত্তি ইধু উৎসর্ব-গোজ্জ্যে হানা পৌইদ্যেনে কঙর্। আমি কোই পারিই, আমার্ বেক্কুনোর জ্ঞান আঘে। জ্ঞান মান্‌জ্যরে দেমাগ্ গরে, মাত্তর্ কোচ্‌পানা মান্‌জ্যরে গড়েই তুলে।

² যে কিজু হবর্ পায় বিলিনে মনে গরে, তে যেবাবোত্যে হবর্ পানা উচিত সেবাবোত্যেগুরি এজঅ হবর্ ন-পায়।

³ মাত্তর্ যে গোজেনরে কোচ্‌পায়, গোজেনে তারে জানে।

⁴ এবেরা মূত্তি ইধু উৎসর্ব-গোজ্জ্যে হানা পৌইদ্যেনে কঙর্। আমি কোই পারিই, জগদত্ মূত্তি আজলে কিচ্চু নয় আর গোজেন্অ বানা একজন বাদে আর নেই।

⁵ স্বর্গত্ ওক্‌ বা পিত্‌থিমীত্ ওক্‌ দেব-দেবী বিলিনে যুনি কিজু থেই থায়-খালিক্ দেবেদায়ো বোউত্, প্রভুয়ো বোউত-

⁶ মাত্তর্ আমাত্তে গোজেন বানা এক্কো আঘে। তেয়ই বাপ্; তাত্তুন্ বেক্কানি এচ্চ্যে আর তাত্তেই আমি বাঁজি আঘিই। আর প্রভুয়ো আমার বানা এক্কো, তে যীশু খ্রীষ্ট। তা মাধ্যমে বেক্কানি এচ্চ্যে আর তা মাধ্যমে আমি বাঁজি আঘিই।

⁷ মাত্তর্ এই জ্ঞানান্ বেক্কুনোর নেই। মূত্তি পূজোর্ অভ্যেস্ এল বিলি মূত্তি ইধু উৎসর্ব-গোজ্জ্যে হানা এজঅ সং কেঅ কেঅ সেই ইজেবে হেই থান্। সেক্কে তারার্ বিবেক নরম বিলি অসিজি অয়।

⁸ মাত্তর্ হানালোই আমি গোজেনর্ মানি লোইয়্যে ন-ওই। আমি যুনি ন-হেই সালে আমার্ কনঅ ক্ষতিয়ো ন-অয়, আর যুনি হেই সালে আমার্ কনঅ লাভঅ ন-অয়।

⁹ মাত্তর্ উজিয়ার্! যিগুনোর বিশ্বেজ্ নরম, তমার্ এই স্বাধীনতাগান তারা ইধু যেন পাপর্ কারন ন-অয়।

¹⁰ তর্ দঅ জ্ঞান আঘে, মাত্তর্ যিবের্ বিবেক নরম তে যুনি তরে দেবেদা মন্দিরোত্ বৈইনে হাদে দেগে সালে তেয়ো কি মূত্তি ইধু উৎসর্ব-গোজ্জ্যে হানা হেবাত্তে উচ্চোমি ন-পেবঅ?

¹¹ সেই খেমতা নেইয়্যে মানুচ্, সেই ভেই, যিবেত্তে খ্রীষ্ট মোজ্জ্যে, তর্ জ্ঞানর্ মাধ্যমে তার্ বোউত্ ক্ষতি অয়।

¹² এবাবোত্যেগুরি তুমি তমা ভেইয়ুনো বিরুদ্ধে পাপ গুরিনে যেক্কে তারার নরম বিবেগত্ আঘাত দুয়ো সেক্কে তুমি আজলে খ্রীষ্টর্ বিরুদ্ধে পাপ গরঅ।

¹³ হানাত্তে যুনি মঅ ভেইবো পাপত্ পড়ে সালে মঅ ভেইবো যাতে পাপত্ ন-পড়ে সেনত্তে মুই য়েরা হানা ছাড়ি দিম।