১ করিন্হীয় 7 - Chakma Bible

জড়া-সুগুলোঙ পৌইদ্যেনে

¹ তুমি মরে যেদক্কানি পৌইদ্যেনে লেক্ক্য এবার্ সিয়েনির্ জোব্ দোঙর্। যুনি কেঅ মোক্ ন-লয় সালে তে গম্ কাম্ গরে;

² মাত্তর্ চেরোকিত্তে বোউত্ বেভিচের্ অর্, সেনত্তে পত্তি মরদর্ নিজোর্ মোক্ থোক্ আর পত্তি মিলের্ নিজোর্ নেক্ থোক্।

³ কিয়্যেগানদি মোক্কোর্ যিয়েন পাওনা, তা নেক্কো তারে সিয়েন দোক্; সেবাবোত্যেগুরি মোক্কোয়ো নেক্কোরে দোক্।

⁴ মোক্কোর্ কিয়্যেগান তার্ নিজোর্ নয়, তা নেক্কোর্। এবাবোত্যেগুরি নেক্কোর্ কিয়্যেগান তার্ নিজোর্ নয়, তা মোক্কোর্।

⁵ একজন আরেকজন সমারে কিয়্যেদি মিজেবাত্তে মানা ন-গোজ্জ্য; মাত্তর্ বানা তবনা গুরিবার্ সুযোগ্ পেবাত্তে একমত ওইনে কিজু সময়োত্তে ফারগ্ থেই পারঅ। সে পরেদি আরঅ একসমারে মিজেয়ো, যেন নিজোরে দমনর্ অভাবে শদানে তমারে পাপ ইন্দি টানি ন-পারে।

⁶ এ কধাগান মুই তমারে উগুম দিইনে ন-কঙর্ বরং অনুমতি দিইনে কঙর্।

⁷ যুনি বেক্কুনে মঅ ধোক্ক্যেন্ অদাক্! মাত্তর্ গোজেনত্তুন্ এক একজন এক এক্কান্ দান পেইয়্যে। একজনর্ দান এক বাবোত্যে, আরঅ অন্যজনর্ দান আর এক বাবোত্যে।

⁸ গাবুজ্যে আর রানি মিলেগুনোরে মুই কঙর্, তারা যুনি মঅ ধোক্ক্যেন্ থেই পারন্ সালে তারার্ পক্কে সিয়েন গম্।

⁹ মাত্তর্ যুনি তারা নিজোরে দোঙেই ন-পারন্ সালে নেক্ লোদোক্, কিয়া কিয়্যেগানর্ কামনায় জ্বলিনে-পুড়িনে মরানাত্তুন্ বরং নেক্ লনা বোউত্ গম্।

¹⁰ যিগুনোর্ মেলা ওইয়্যে তারারে মুই এ উগুমান দোঙর্-খালিক্ মুই ন-দোঙর্, প্রভুই দের্-মোক্কো যেন নেগত্তুন্ ন-যায়ই।

¹¹ মাত্তর্ যুনি তে যায়ই সালে আর নেক্ ন-লোগ্ বা নেক্কো সমারে আরঅ মিলন্ ওক্‌। নেক্কোয়ো তা মোক্কোরে ছাড়ি ন-দোক্।

¹² অন্য বেক্কুনোরে খালিক্ প্রভু ন-কর্ মাত্তর্ মুই কঙর্, যুনি কনঅ ভেইয়োর্ খ্রীষ্টিয় অবিশ্বেজি মোগ্ থায় আর সেই মোক্কো তা সমারে থেবাত্তে রাজী থায়, সালে সেই নেক্কো যেন তারে ছাড়ি ন-দে।

¹³ আরঅ যুনি কনঅ মিলের্ খ্রীষ্টিয় অবিশ্বেজি নেগ্ থায় আর সেই নেক্কো তা সমারে থেবাত্তে রাজী থায়, সালে সেই নেক্কোরেয়ো যেন তে ছাড়ি ন-দে;

¹⁴ কিয়া মোক্কোর্ মাধ্যমে সেই অবিশ্বেজি নেক্কোরে আর নেক্কোর্ মাধ্যমে সেই অবিশ্বেজি মোক্কোরে গোজেনে গমেডালে চায়। সিয়েন ন-অলে তমা পুয়ো-ঝিগুনে দঅ অসিজি অদাক্; মাত্তর্ আসলে গোজেনে তারারে গম্ চোগেদি চায়।

¹⁵ মাত্তর্ যুনি সেই অবিশ্বেজি নেক্কো বা মোক্কো যেবাত্তে চায় সালে তে যোক্। এবাবোত্যে অবস্থায় সেই বিশ্বেজি ভেই বা বোন্নো কনঅ বানা-বান্যের্ মধ্যে ন-থায়। গোজেনে দঅ আমারে সুগে-শান্দিয়্যে থেবাত্তে ডাক্ক্যে।

¹⁶ মিলেবো, তুই কেধোক্ক্যেন গুরি কোই পারচ্ যে, তঅ নেক্কোরে তুই উদ্ধোর্ গুরি ন-পারিবে? মরত্তো, তুই কেধোক্ক্যেন গুরি কোই পারচ্ যে, তঅ মোক্কোরে তুই উদ্ধোর্ গুরি ন-পারিবে?

¹⁷ সেনত্তে, প্রভু যিবেরে যে অবস্থায় থোইয়্যে আর গোজেনে যিবেরে যিয়েনত্তে ডাক্ক্যে, সেই মজিম তে চোলোক্। এ উগুমান মুই বেক্ মন্ডলীগুনোত্ দি থাং। কনঅ চুনু মাঢা কাবা মান্‌জ্যরে কি ডাগা ওইয়্যে? মাত্তর্ সে চুনু মাঢা কাবা চিহ্নোগান্ পুজি ন-ফেলোক্।

¹⁸ কনঅ চুনু মাঢা-ন কাপ্যে মান্‌জ্যরে কি ডাগা ওইয়্যে? সালে তার্ চুনু মাঢা কাবা ন-ওক্।

¹⁹ চুনু মাঢা কাবিলে বা কি আর ন-কাবিলে বা কি, গোজেনর্ উগুম পালানা অলঅ আজল্ কধা।

²⁰ গোজেনে যারে যে অবস্থায় ডাক্ক্যে তে সেই অবস্থায় থোক্।

²¹ তরে যেক্কে ডাগা ওইয়্যে সেক্কে কি তুই চাগর্ এলে? সেনত্তে দুঘ্ ন-পেইচ্; খালিক্ যুনি স্বাধীন অবার্ জু পাচ্ সালে সিয়েন মানি লঅ।

²² চাগর্ থানা অবস্থায় প্রভু যারে ডাক্ক্যে তে প্রভুলোই স্বাধীন ওইয়্যে। সেবাবোত্যে যারে স্বাধীন অবস্থায় ডাগা ওইয়্যে তে খ্রীষ্টর্ চাগর্ ওইয়্যে।

²³ বোউত্ দাম দিইনে তমারে কিনে ওইয়্যে; মান্‌জ্যর্ চাগর ন-ওইয়ো।

²⁴ ভেইলগ্, গোজেনে যারে যে অবস্থায় ডাক্ক্যে, তে গোজেন মুজুঙোত্ সেই অবস্থায় থোক্।

²⁵ গাবুজ্যে মিলেগুনোত্ত্যে প্রভুত্তুন্ কনঅ উগুম মুই ন-পাং। মাত্তর্ গোজেনর্ দোয়্যে পেইনে মুই বিশ্বেজবলা ওইয়োং বিলিনে মঅ কধাগান জানাঙর্।

²⁶ যে অমকদ দুঘোর্ সময় এজের্ সিয়েনত্তে মর্ মনে অয় তুমি যে যেধোক্ক্যেন আঘ সেবাবোত্যে থানা গম্।

²⁷ তর্ কি মোগ্ আঘে? সালে মোগরে ছাড়ি দিবার্ চেষ্টা ন-গুরিচ্। তর্ কি মোগ্ নেই? সালে মোগ্ লবার্ চেষ্টা ন-গুরিচ্।

²⁸ মাত্তর্ মোগ্ যুনি তুই লস্ সালে তর্ কনঅ পাপ ন-অয়। কনঅ গাবুর্ মিলে যুনি নেক্ লয় সালে সিয়েন্অ পাপ ন-অয়। মাত্তর্ যিগুনে লন্ সিগুনে এ সংসারত্ দুঘ্ পেবাক্, আর মুই এ বেক্কানিত্তুন্ তমারে রেহাই দিবাত্তে চাঙর্।

²⁹ ভেইলগ্, যে কধাগান মুই তমারে কবাত্তে চাঙর্ সিয়েন এ-সময়ত্ ভারী কম্। সেনত্তে ইক্কেত্তুন্ ধুরি এমন্‌ গুরিনে চলানা দরকার যে, যিগুনোর্ মোগ্ আঘে তারার্ যেন মোগ্ নেই;

³⁰ যিগুনে দুঘ্ গত্তন্ তারা যেন দুঘ্ ন-গত্তন্; যিগুনে ফুত্তি গত্তন্ তারা যেন ফুত্তি ন-গত্তন্; যিগুনে বেচা-কিনে গত্তন্ তারার্ যেন সেই জিনিসচানি উগুরে অধিকার্ নেই;

³¹ যিগুনে জগদ পৌইদ্যেনে জোড়েইয়্যে তারা যেন পুরোপুরি জোড়েইয়্যে নয়; কিয়া জগদর্ চেঙেরাগান্ বুদুলি যার্।

³² মুই চাং যেন তুমি চিন্তে ভাবনাত্তুন্ মুক্ত থেই পারঅ। গাবুজ্যে মানুচ্‌ প্রভুর্ পৌইদ্যেনে চিন্তে গরে; তে চিন্তে গরে কেধোক্ক্যেন গুরিনে তে প্রভুরে হুজী গুরিবো।

³³ মোগ্‌বলা মানুচ্‌ সংসার পৌইদ্যেনে চিন্তে ভাবনা গরে; তে চিন্তে গরে কেধোক্ক্যেন গুরিনে তে মোগরে হুজী গুরিবো।

³⁴ এধোক্ক্যেন গুরিনে দ্বি কিত্তেদি তারে টানে। যে মিলেবোর্ নেগ্ নেই তে আর গাবুজ্যে মিলেবো প্রভুর্ পৌইদ্যেনে চিন্তে গরে যাতে তে কিয়্যেদি আর মনেদি প্রভুর্ ওই পারে। মাত্তর্ বৌ যেইয়্যে মিলেবো সংসার পৌইদ্যেনে ভাবে; তে চিন্তে গরে কেধোক্ক্যেন গুরিনে তে নেক্কোরে হুজি গুরিবো।

³⁵ এ কধাগান মুই তমার্ মংগলত্যে কঙর্। মুই তমারে ধরানা-মানা গরানা ভিদিরে রাগেবাত্যে সিয়েনি ন-কঙর্, বরং যিয়েন গরানা উচিত্ আর গম্ সিয়েন গুরিবাত্তে তমারে উচ্চোমি দোঙর্, যেন তুমি পুরো মনান্দোই প্রভুরে সেবা গুরি পারঅ।

³⁶ যুনি কেঅ মনে গরে তে তার্ গাবুর্ মিলেবো উগুরে গম্ বেবহার ন-গরের্, যুনি মিলেবোর্ বৌ দেনার্ বয়স পার্ ওই যাইদ্যে ধোক্ক্যেন অয় আর যুনি তে তারে বৌ দিবার দরকার্ মনে গরে, সালে তে নিজোর্ আওজ্ মজিম কাম্ গোরোক্। মিলেবোর্ মেলা ওক্, সিয়েনত্ কনঅ পাপ ন-অয়।

³⁷ মাত্তর্ যে মান্‌জ্যর মনান্ থির্, যিবে উগুরে কনঅ চাপ নেই বিলি তে নিজোর্ আওজ্ মজিম কাম্ গুরি পারে, তে যুনি তা ঝিবোরে বৌ ন-দিয়্যে গুরি রাগেব বিলি ঠিগ্ গুরি থায় সালে তে গম্ কাম গরে।

³⁸ সালে দেগা যায়, যে তা ঝিবোরে বৌ দে তে গম্ কাম্ গরে, আর যে তারে বৌ ন-দে তে আরঅ গম্ কাম গরে।

³⁹ নেক্কো যেদকদিন বাঁজি থায় সেদক দিন মোক্কো তাইধু বান্ন্যে থায়। মাত্তর্ যুনি নেক্কো মুরি যায় সালে তে যিবেরে আওজ্ সিবেরে লোই পারে, খালিক্ সে মানুচ্চো যেন প্রভুর্ অয়।

⁴⁰ মাত্তর্ মর্ মতে তে যেবাবোত্যে আঘে যুনি সেবাবোত্যে থায় সালে তে আরঅ সুগি অয়। মর্ মনে অয়, মুই গোজেনর্ আত্মার্ মাধ্যমে এ কধাগান্ কঙর্।