১ করিন্হীয় 6 - Chakma Bible

বিশ্বেজিগুনো ভিদিরে মামলা-মগদ্দমা

¹ তমা ভিদিরে কারঅ যুনি কনঅ বিশ্বেজি ভেইয়োর্ বিরুদ্ধে নালিচ্‌ গুরিবার কনঅ কারণ থায়, সালে তে কন্ সাহজে গোজেন মানুচ্চুনো ইধু ন-যেইনে যিগুনে গোজেনর্ নয় তারা ইধু যেইনে বিচের্ মাগে?

² তুমি কি কোই ন-পারঅ যে, গোজেন মানুচ্চুনে জগদর্ বিচের গুরিবাক্? যেক্কে তুমি জগদর্ বিচের্ গুরিবা সেক্কে তুমি কি সামান্য বেপারর্ বিচের্ গুরি ন-পারঅ?

³ তুমি কি কোই ন-পারঅ আমি স্বর্গদূত্‌তুনোর্‌অ বিচের্ গুরিবোং? সিয়েন যুনি অয় সালে এ জগদর্ বেপারান্ দঅ সামান্য কধা!

⁴ যুনি তমার্ এবাবোত্যে কনঅ নালিশ থায় সালে যিগুনে মন্ডলীর্ মানুচ্ নয় তারারে কি তুমি বিচেরক্ অবাত্তে ঠিগ্ গুরি থাগঅ।

⁵ তমারে লাজ্ দিবাত্তে মুই এ কধাগান কঙর্। তমা ভিদিরে ঘেইচ্চ্যেক্ গুরিনে কি এমন্‌ কনঅ জ্ঞানী মানুচ্‌ নেই, যে ভেইউনো ভিদিরে কোল্-কোজ্জ্যের্ মিট্‌মাট গুরি দি পারে?

⁶ সিয়েনর্ বদলে ভেই বিলিনে ভেইয়ো বিরুদ্ধে আদালদত্ যায়, আহ্ সিয়েনঅ অারঅ অবিশ্বেজিগুনো মুজুঙোত্!

⁷ আসলে তুমি যে একজন অারেক জন বিরুদ্ধে মামলা-মগদ্দমা গরর্ সিয়েন্দোই ইয়েন প্রমাণ অত্তে যে, তুমি উদি যেয়ো। সিয়েনত্তুন্ বরং অন্যেয়ানি সোজ্জ্য ন-গরঅ কিত্ত্যে? ন-ঠুগিলা কিত্ত্যে?

⁸ সিয়েনর্ বদলে তুমি অন্যেয় গরর্, তুমি ঠগর্, আর সিয়েন তমা ভেইয়ুনো উগুরে গরর্।

⁹ যিগুনে অন্যেয় গরন্ সিগুনে যে গোজেন রেজ্যর্ অধিকারী ন-অবাক্, সিয়েন কি তুমি কোই ন-পারঅ? তুমি ভুল্ ন-গোজ্জ্য। যিগুনোর্ খাচ্চ্যত্ ভান্ন্যেই, যিগুনে মূর্ত্তি পুজো গরন্, যিগুনে বেগেয়্যে গরন্, যিগুনে মরদ-বেগেয়্যে, যে মরদ্‌তুনে মরদ্‌অ সমারে বেগেয়্যে গরন্,

¹⁰ যিগুনে চুর্, লুভী, মাত্তল্, যিগুনে পররে বদ্‌নাঙ্ গরন্ আর যিগুনে জোচ্চোর সিগুনে গোজেন রেজ্যর্ অধিকারী ন-অবাক্।

¹¹ তমা ভিদিরে কেঅ কেঅ সেবাবোত্যে এলা, মাত্তর্ প্রভু যীশু খ্রীষ্টর্ মাধ্যমে আর আমা গোজেন আত্মার্ মাধ্যমে তমারে ধোইনে সাব্ গরা ওইয়্যে, গোজেন নাঙে যুদো গরা ওইয়্যে আর নিদ্দুজি বিলিনে মানি লুয়ো ওইয়্যে।

নানান্ বাবোত্যে বেভিচার পৌইদ্যেনে

¹² কেঅ কেঅ কন্, “কনঅ কিজু গরানা মর্ পক্ষে অনুচিত নয়।” সিয়েন থিক্, মাত্তর্ বেক্কানি যে মান্‌জ্যর্ উপকার্ গরে, সিয়েন নয়। কনঅ কিজু গরানা মর্ পক্ষে অনুচিত নয় সত্য, মাত্তর্ মুই কনঅ কিচ্চুর্ চাগর্ ন-ওম্।

¹³ আরঅ কেঅ কেঅ এ কধাগান-অ কন্, “হানা পেদত্যে আর পেট্‌তো হানাত্যে।” ভারী গম্ কধা, মাত্তর্ এ দ্বিয়েন জিনিস এক দিন গোজেনে বাদ্ দি দিবো। কিয়্যেগান বেভিচার গুরিবাত্যে নয় বরং সিয়েন প্রভুত্যে, আর প্রভু কিয়্যেগানত্তে।

¹⁴ গোজেনে তা খেমতালোই যীশুরে মরণত্তুন্ জেদা গোজ্জ্যে আর তে আমারেয়ো জেদা গুরিবো।

¹⁵ তুমি কি কোই ন-পারঅ যে, তমা কিয়্যেগান খ্রীষ্ট কিয়্যেগানর্ ভাগ্? সালে মুই কি খ্রীষ্ট কিয়্যেগান ভাগ্‌কান্দোই বেশ্যে কিয়্যেগান সমারে এগত্তর্ গুরিম? কনদিনঅ নয়।

¹⁶ তুমি কি কোই ন-পারঅ, বেশ্যে সমারে যে এগত্তর্ অয় তে তা সমারে এক কিয়্যে অয়? কিয়া পবিত্র বোইবোত্ লেগা আঘে, “তারা দ্বিজনে এক কিয়্যে অবাক্।”

¹⁷ মাত্তর্ যে কেঅ প্রভুর্ সমারে এগত্তর্ অয়, তে তা সমারে আত্মালোই এক অয়।

¹⁸ বেক্ বেভিচারানিত্তুন্ ধেই যঅ। মানুচ্‌ অন্য যেদক্কানি পাপ্ গরন্ সিয়েনি তার্ কিয়্যের্ বারেদি গরন্, মাত্তর্ যে বেভিচের্ গরে তে নিজোর্ কিয়্যের্ বিরুদ্ধে পাপ গরে।

¹⁹ তুমি কি কোই ন-পারঅ, তমা মনত্ যে বজত্তি গরে আর যিয়েনরে তুমি গোজেনত্তুন্ পেইয়ো, সেই পবিত্র আত্মার্ থেবার্ ঘরান্ অলঅ তমার কিয়্যেগান? তুমি তমার্ নিজোর্ নয়;

²⁰ বোউত্ দাম্ দিইনে তমারে কিনে ওইয়্যে। সেনত্তে গোজেনর্ বাঈনীত্তে তমা কিয়্যেগানি বেবহার গরঅ।