১ করিন্হীয় 5 - Chakma Bible

দুষী ভেইয়োর্ শাসন

¹ শুনো যাত্তে, তমা ইধু সিনেলীর্ পাপ আঘে, আর সেই সিনেলীগান এদক্ বেশ্ ওইয়্যেদে, অযিহূদীগুনেয়ো সিয়েনি ন-গরন্। এন্‌ কি, একজনে তার্ সাদাঙা মাবোরে নিজো মোগো ধোক্ক্যেন গুরি থোইয়্যে।

² আর ইয়েনর্ পরেদিয়ো তুমি দেমাগ্ গরর্! ইয়েনত্তুন্ কি তমার্ দুঘ্ গরানা আর যে এ কামান গোজ্জ্যে তারে তমাত্তুন্ নিগিলেই দেনা কি উচিত্ ন-এলঅ?

³ মুই কিয়্যেদি আঝির্ ন-থেলেয়ো আত্মায় তমা সমারে আঘং। যে এবাবোত্যে কাম্ গোজ্জ্যে, আঝির্ থেইয়্যে মান্‌জ্য ধোক্ক্যেন্ মুই তা বিচেরান্ আগেদি গুরি থোইয়োং।

⁴ মঅ বিচেরান্ ইয়েন, আমা প্রভু যীশুর্ নাঙে যেক্কে তুমি এক জাগাত্ অবা আর মুইয়ো আত্মায় তমা সমারে থেম্ আর প্রভু যীশুর্ খেমতা আমা উগুরে থেবঅ,

⁵ সেক্কে সেই মানুচ্চোরে শদান আঢত্ দি দিয়্যে পরিবো, যেন তা কিয়্যেগান ভস্ত অয় মাত্তর্ আত্মাগান প্রভু যীশুর্ এবার্ দিনোত্ উদ্ধোর্ পায়।

⁶ দেমাগ্ গরানা তমাত্যে গম্ নয়। তুমি কি কোই ন-পার যে, এক্কেনাগুরি সদা এক্কান গোদা মোইদ্যের্ তালরে ফুলেই তুলে? তমা ভিদিরেত্তুন্ সেই পুরোণি সদাগানরে ফেলেই দুয়ো,

⁷ যেন তুমি এক্কান নুয়ো সদানেইয়্যে মোইদ্যের্ তাল্ ওই পারঅ; আর আসলেয়ো তুমি সিয়েন। আমা উদ্ধোর্-পরবর্ ভেড়া-ছঅ খ্রীষ্টরে উৎসর্ব গরা ওইয়্যে।

⁸ সেনত্তে পুরোণি সদা, অত্তাৎ ইংসে আর ভান্ন্যেই দিইনে নয়, বরং এজঅ, আমি সদা নেইয়্যে রুটি, অত্তাৎ সরলতা আর সত্যলোই পরব্‌পো পালেই।

⁹ মঅ চিধিগানত্ মুই তমা ইধু লেক্ক্যং, তুমি যেন বজং খাচ্চ্যদ মানুচ্চুনো সমারে মিলেমিশে ন-গরঅ।

¹⁰ এ জগদর্ বজং খাচ্চ্যদর্ মানুচ্, লুভী, চুর্ বা যিগুনে মূত্তি পূজো গরন্ তারার্ কধা অবুচ্চ্যই মুই ন-কং, কিয়া সালে তমার দঅ এ জগদর্ বারেদি যাহ্ পড়িবো।

¹¹ আসলে মুই যিয়েন লেক্ক্যং সিয়েনর অত্তগান ইয়েন-যুনি কেঅ নিজোরে বিশ্বেজি ভেই কয় অদচ তে বজং খাচ্চ্যদর্ মানুচ্‌ বা লুভী অয়, মূত্তি পূজো গরে, অন্যরে নিন্দে গরে, মাত্তল্ বা দেঙ্‌বাঁজি অয়, মাত্তর্ তা সমারে মিলেমিলি ন-গোজ্জ্য। এমন কি, তা সমারে হানা-দানায়ো ন-গোজ্জ্য।

¹² মন্ডলীর্ বারেদি মানুচ্চুনোরে বিচের গুরিবাত্যে মর্ কি গরচ্ পোজ্জ্যে? মাত্তর্ মন্ডলীর্ ভিদিরে মানুচ্চুনোরে বিচের গরানা কি তমার্ উচিত নয়?

¹³ যিগুনে বারেদি তারারে গোজেনে বিচের্ গুরিবো। পবিত্র বোইবোর্ কধা মজিম,“তমা ভিদিরেত্তুন্ সেই বজং মানুচ্চোরে নিগিলেই দুয়ো।”