১ করিন্হীয় 3 - Chakma Bible

গোজেনর্ সেবাগুরিয়্যে

¹ ভেইলগ্, যিগুনে আধ্যাতিক্ সেবাবোত্যে মানুচ্চুনো ইধু যেবাবোত্যে গুরি কধা কনা উচিত, মুই তমা ইধু সেবাবোত্যেগুরি কধা কোই ন-পারং, বরং যিগুনে পাপ-স্বভাবর্ অধীনোত্ আঘন্ তারা ইধু যেবাবোত্যেগুরি কধা কনা উচিত, সেবাবোত্যেগুরি তমা ইধু কোইয়োং। খ্রীষ্টিয় জিংকানিত্ তুমি দঅ এক্কুবারে চিগোন্ গুরো ধোক্ক্যেন, সেনত্তে তমা ইধু সেবাবোত্যেগুরি কধা কোইয়োং।

² দরঅ হানা ন-দিইনে মুই তমারে দুধ হেবাত্যে দুয়োং, কিয়া সেক্কে তুমি সেই দরঅ হানা হেবার্ অবস্থাত্ ন-এলা। আর ইক্কিনিয়ো তুমি সেই অবস্থাত্ নেই,

³ কিয়া তুমি এজঅ পাপ-খাচ্চ্যদ অধীনোত্ আঘ। তমা ভিদিরে যেক্কে ইংসে আর কোল্-কোজ্যে গুরি আঘ সেক্কে কি তুমি পাপ-স্বভাবর্ অধীনোত্ নয়? আর তমা চালচলন কি এক্কুবারে সাধারন মান্‌‍‌‍‌‍‌‍জ্য ধোক্ক্যেন নয়? ‌‍

⁴ তমা ভিদিরেত্তুন্ যেক্কে একজনে কয় তে পৌল দলর্ আর একজনে কয় তে আপল্লো দলর্ সেক্কে তুমি কি এক্কুবারে সাধারন মান্‌‍জ্য ধোক্ক্যেন নয়?

⁵ আপল্লো কন্না? আর পৌলে বা কন্না? আমি দঅ বানা সেবাগুরিয়্যে যিগুনোর্ মাধ্যমে তুমি বিশ্বেজর্ পধত্ এচ্চ্য। প্রভু আমারে পত্তিজনরে যার্ যার্ কাম দিয়্যে।

⁶ মুই বীজি ফেলেয়োং, আপল্লো সিগুনোত্ পানি দিয়্যে, মাত্তর্ গোজেনে সিগুন বাড়েই তুল্ল্যে।

⁷ সেনত্তে যে বীজি লাগায় বা যে সিগুনোত্ পানি দে তে কিচ্চু নয়; মাত্তর্ গোজেনে, যিবে বাড়েই তুলে, তেয়ই বেক্কানি।

⁸ যে বীজি লাগায় আর যে পানি দে তারার উদ্দেচ্চ্য এক্কুই, মাত্তর্ পত্তিজনে যার্ যার্ কাম মজিম বক্‌শিজ্ পেবাক্,

⁹ কিয়া আমি দ্বিয়ো জনেই গোজেন সমারে কাম গুরির্। তুমি গোজেনর্ খেত্, গোজেনর্ বানেয়্যে বিল্ডিং।

¹⁰ গোজেনত্তুন্ যে বিশেষ দোয়্যে মুই পেয়োং সিয়েন্দোই কাবিল্ রাজমিস্ত্রি ধোক্ক্যেন্ মুই গড়াগান্ গাড়েয়োং, আর সিয়েন উগুরে অন্যগুনে বিল্ডিং বানাদন্। মাত্তর্ কন্না কেধোক্ক্যেন গুরি বানাদন্ সে পৌইদ্যেনে তে উজিয়ার্ ওক্‌।

¹¹ যে গড়াগান আগে গারা ওইয়্যে সিয়েন বাদে আর কনঅ গড়া কেঅ তুলি ন-পারন্। যীশু খ্রীষ্টই অলঅ সেই গড়াগান্।

¹² সেই গড়াগান উগুরে সনা, রুবো, মংগা পাত্তর্, তক্‌তা, খের্ বা নাড়ালোই যুনি মান্‌জ্যে তুলোন্,

¹³ সালে তে কিবাবোত্যে কাম্ গোজ্জ্যে সিয়েন গমেদালে দেগা যেবঅ। বিচের দিনোত্ সিয়েন ফগদাং অবঅ, কিয়া সেদিন্নোর্ ফগদাঙান্ আগুনো মাধ্যমে অবঅ। কার্ কাম কিবাবোত্যে সিয়েন আগুনানে যাচাই গুরিবো।

¹⁴ যে যিয়েন তুল্ল্যে সিয়েন যুনি ঠিগি থায় সালে তে বক্‌শিজ্ পেবঅ;

¹⁵ আর যুনি সিয়েন পুড়ি যায় সালে তার্ ক্ষতি অবঅ। খালিক্ তে নিজে উদ্ধোর্ পেবঅ, মাত্তর্ তা অবস্থাগান এমন্‌ মান্‌জ্য ধোক্ক্যেন অবঅ যে আগুনো ভিদিরেদি পার্ ওই এচ্চ্যে।

¹⁶ তুমি কি কোই ন-পারঅ যে, তুমি গোজেনর্ থেবার্ ঘর আর গোজেন আত্মা তমা মনত্ বজত্তি গরে?

¹⁷ যুনি কেঅ গোজেনর্ থেবার্ ঘর বর্‌বাদ গরে সালে গোজেনেয়ো তারে বর্‌বাদ গুরিবো, কিয়া তার্ থেবার্ ঘরান পবিত্র, আর তুমিই সেই ঘরান্।

¹⁸ তুমি কেঅ নিজোরে ফাগি ন-দুয়ো। তমাত্তুন্ যুনি কেঅ এ যুগোর চিন্তেলোই নিজোরে জ্ঞানী মনে গরে সালে তে মূর্খ ওক্‌ যেন তে ঘেচ্চেকগুরি জ্ঞানী ওই পারে,

¹⁹ কিয়া গোজেনর্ চোগেদি এ জগদর্ জ্ঞানান্ বানা মূর্খতা। পবিত্র বোইবোত্ লেগা আঘে, “গোজেনে জ্ঞানীগুনোরে তারার্ ছল-চালাগিগানিত্ ধরে।”

²⁰ আরঅ লেগা আঘে, “জ্ঞানীগুনোর বেক্‌ চিন্তেগানি যে ফল-নেইয়্যে সিয়েন প্রভু কোই পারে।”

²¹ সেনত্তে তুমি কেঅ কনঅ মান্‌জ্যরে নিইনে বার্‌বো ন-গোজ্জ্য, কিয়া বেক্কানি দঅ তমার।

²² পৌল, আপল্লো, পিতর, এ জগদ্‌তান, জিংকানি, মরণ, বত্তমান আর ভবিচ্চদর্ বেক্কানি, বেক্কানি তমার;

²³ তুমি খ্রীষ্টর্ আর খ্রীষ্ট গোজেনর্।