১ করিন্হীয় 2 - Chakma Bible

¹ ভেইলগ্, তমা ইধু যেইনে গোজেনর্ দিয়্যে গম্ হবর্ প্রচার গুরিবার অক্তত্ মুই দোল্ ভাষা বেবহার ন-গরং বা ভারী জ্ঞানী মান্‌জ্য ধোক্ক্যেন্ কধা ন-কং।

² মুই ঠিগ্ গোজ্জ্যংগে, তমা ইধু থেবার্ অক্তত্ মুই যীশু খ্রীষ্টরে, অত্তাৎ ক্রুশোত্ দিয়্যে যীশু খ্রীষ্টরে হবর্ পানা বাদে আর কিচ্চু হবর্ ন-পেম্।

³ যেক্কে তমা ইধু এলুং সেক্কে মুই নিজোরে বল্-নেইয়্যে মনে গত্তুং আর দরে ভারী গির্‌গিরেদুং।

⁴ মর্ প্রচার আর মর্ দিয়্যে হবর্ ভিদিরে মানুচ্চুনোরে ভাজেই নেযাইদ্যে ধোক্ক্যেন কনঅ জ্ঞানবলা যুক্তি-তর্ক ন-এলঅ বরং পবিত্র আত্মার্ খেমতা সিয়েনত্ দেগা যেইয়্যে,

⁵ যাতে তমা বিশ্বেজ্‌চান মান্‌জ্য জ্ঞান উগুরে নির্ভর্ ন-গুরিনে গোজেন খেমতা উগুরে নির্ভর গরে।

পবিত্র আত্মার্ দিয়্যে জ্ঞান

⁶ যিগুনে খ্রীষ্টীয় জিংকানিত্ পাগানা তারা ইধু অবুচ্চোই আমি জ্ঞানর্ কধা কোই; মাত্তর্ সেই জ্ঞানান্ এ জগদর্ নয়, বা এ জগদর্ নেতাগুনোর্‌অ নয় যিগুনে খেমতা-নেইয়্যে ওইয়োন্ ।

⁷ আজলে আমি গোজেনর্ জ্ঞানবলা গুমুরো উদ্দেচ্চ্যর্ কধা কোই। সেই উদ্দেচ্চ্যগান লুগেইয়্যে এলঅ আর জগদ্‌তান্ বানেবার আগেদি গোজেনে সিয়েন থির্ গুরি রাগেয়্যে যেন আমি তার্ মহিমার্ ভাগী ওই পারিই।

⁸ এ যুগোর্ নেতাগুনো ভিদিরে কনজনে সিয়েন ন-বুঝোন্; যুনি সিয়েন বুঝিদাক্ সালে সেই মহিমাবলা প্রভুরে ক্রুশোত্ ন-দিদাক্।

⁹ মাত্তর্ পবিত্র বোইবোর্ কধা মজিম, “গোজেনরে যিগুনে কোচ্‌‌পান তারাত্তে তে যিয়েন যিয়েন ঠিগ গুরি রাগেয়্যে, সিয়েনি কনজনে চোগেদিয়ো ন-দেগন্, কানেদিয়ো ন-শুনোন্ আর মনেদিয়ো ন-ভাবন্।”

¹⁰ মাত্তর্ গোজেনে তার্ আত্মার্ মাধ্যমে সিয়েনি আমা ইধু ফগদাং গোজ্জ্যে, কিয়া পবিত্র আত্মার্ অজানা কিচ্চু নেই; এমন্‌ কি, তে গোজেনর্ গভিন পৌইদ্যেনেয়ো কোই পারে।

¹¹ মান্‌জ্য ভিদিরে এমন্‌ কন্না আঘে, যে অন্য মান্‌জ্যর্ মন কধা কোই পারে? মান্‌জ্য ভিদিরে যে আত্মাগান্ আঘে তেয়ই বানা তার্ নিজোর্ মনর্ কধা কোই পারে। সে বাবোত্যে, গোজেনর্ আত্মা বাদে গোজেনর্ মন কধা অন্য কনজনে কোই ন-পারন।

¹² আমি জগদর্ আত্মাগানরে ন-পেই, বরং গোজেনত্তুন্ তার্ আত্মাগানরে পেইয়্যেই, যেন গোজেনে আমারে যেদক্কানি দান দিয়্যে সিয়েনি বুঝি পারিই;

¹³ আর সে দানানির্ কধা আমি কোই। সিয়েনি কবাত্যে আমি যেদক্কানি কধা বেবহার গুরিই সিয়েনি মান্‌জ্যর্ জ্ঞানত্তুন্ শিক্ষ্যে পেইনে ন-কোই, মাত্তর্ পবিত্র আত্মালোই শিক্ষ্যে পেইনে কোই। আত্মিক সত্য বুঝেবাত্তে আমি আত্মিক কধা বেবহার গুরিই।

¹⁴ যে মানুচ্চো আত্মিক নয় তে গোজেনর্ আত্মাত্তুন্ যিয়েনি এজে সিয়েনি মানি ন-লয়, কিয়া সিয়েনি তা ইধু মূর্খতা। সিয়েনি তে বুঝি ন-পারে, কিয়া পবিত্র আত্মাগানে শিক্ষ্যে ন-দিলে সিয়েনি পোরোক্ষ্যে গুরি দেগা ন-যায়।

¹⁵ যে মানুচ্চো আত্মিক্ তে বেক্কানি পোরোক্ষ্যে গুরি চায়, মাত্তর্ তারে কনজনে পোরোক্ষ্যে গুরি চেই ন-পারন্।

¹⁶ পবিত্র বোইবোত্ লেগা আঘে, কন্না প্রভুর্ মনান্ বুঝি পাজ্জ্যে যে, তে তারে উবদেশ্ দি পারে? মাত্তর্ খ্রীষ্ট মনান্ আমা মনত্ রোইয়্যে।