১ করিন্হীয় 16 - Chakma Bibleচান্দা পৌইদ্যেনে 1 এবেরা মুই গোজেন মানুচ্চুনোর্ সাহায্যত্যে চান্দা তুলোনা পৌইদ্যেনে কঙর্। গালাতিয়া রেজ্যর্ মন্ডলীগুনোর্ মানুচ্চুনোরে মুই যে উগুমান দুয়োং তুমিয়ো সেবাবোত্যে গরঅ। 2 তুমি বেক্কুনে তমার্ আয় মজিম্ সাপ্তার্ পত্তম দিনোত্ কিজু তুলিনে থুবো, যেন মুই লুমিলে পরেদি চান্দা তুলো ন-পরে। 3 মুই যেক্কে তমা ইধু এম্ সেক্কে তমার্ সেই দানুন্ যিরূশালেমত্ নেযেবাত্যে তুমি যিগুনোরে যোগাজ্যে মনে গুরিবা, মুই চিধি দিইনে তারারে পাধেই দিম্। 4 যুনি মর্অ যানা দরকার্ মনে গরঅ সালে তারা মঅ সমারে যেই পারিবাক্। শেষ কধা 5 ম্যাসিডোনিয়া রেজ্যন্দি গুরি মুই তমা ইধু এম্, কিয়া মুই ম্যাসিডোনিয়া ভিদিরেদি যেম্। 6 অয়ত তমা ইধু কিজু দিন থেম্, বা যার্কাল্লো তমা সমারে কাদেম্, যেন মুই যিধু যেদুং সাৎ তুমি মর্ যেবার বেবস্থা গুরি দি পারঅ। 7 যেবার্ পধত্ ইক্কিনে মুই তমা সমারে দেগা গুরিবাত্তে ন-চাং, কিয়া মুই আজা গরং, প্রভুর অনুমতি অলে মুই তমা সমারে বেশ্ কিজু দিন থেম্। 8 পঞ্চাশত্তমী-পরব্অ সং মুই ইফিষোত্ থেম্, 9 কিয়া যে কামত্ সাগর ফল পা-যায় সেবাবোত্যে কামত্যে এক্কো দাঙর্ জু মঅ মুজুঙোত্ এচ্চ্যে; খালিক্ ভালোকজনে ইয়েনত্ মানায়ো গত্তন্। 10 তীমথিয় যুনি এজে সালে চেইয়ো যেন তে তমা ইধু গমেডালে থেই পারে, কিয়া মুই যেবাবোত্যে গুরি প্রভুর্ কাম গরঙর্ তেয়ো সেবাবোত্যে গুরি গরের্। 11 ইয়েনত্যে কেঅ যেন তারে থেঝেরা ন-গরন্। তুমি তারে সুগে-শান্দিয়্যে পাধেই দুয়ো, যেন তে মঅ ইধু এই পারে। তে ভেইয়ুনো সমারে এবঅ বিলিনে মুই বাজ্জ্যেই আঘং। 12 মুই এবেরা ভেই আপল্লো পৌইদ্যেনে কঙর্। মুই তারে বোউত্ কোজোলী গোজ্জ্যং যেন তে ভেইয়ুনো সমারে তমা ইধু যায়, মাত্তর্ ইক্কিনে তে কনঅ বাবদে যেবাত্তে ন-চেলঅ। যেরেদি জু পেলে তে যেবঅ। 13 তুমি সজাক্ থাগঅ, বিশ্বেজত্ থির্ থাগঅ, সাহজী আর বলবান অ। 14 তুমি যা কিজু গুরিদা সাৎ কোচ্পানার মনভাব্পোই গরঅ। 15 ভেইলগ্, তুমি দঅ কোই পারঅ, স্তিফানর্ পরিবার মানুচ্চুনে আখায়া রেজ্যর্ পত্তম বিশ্বেজি। গোজেন মানুচ্চুনোরে সেবা গুরিবাত্যে তারা নিজোরে উৎসর্ব গোজ্জ্যন্। 16 সেনত্যে এবাবোত্যে মানুচ্চুনোর্ অধীনতা স্বীগের্ গুরিবাত্যে মুই তমারে কোজোলী গরঙর্। আর অন্য যিগুনে এ কামত্ মিজেইনে দরমর গুরি কাম্ গরন তারার্অ অধীনতা স্বীগের্ গরঅ। 17 স্তিফান, ফর্তুনাত আর আখায়িকে এচ্চ্যন্ বিলিনে মুই ভারী হুজি ওইয়োং, কিয়া তুমি ন-থানাগান্ তারাই পূরোণ গোজ্জ্যন্। 18 তারা মর্ আর তমা মনত্ উচ্চোমি আন্ন্যন্। তুমি এবাবোত্যে মানুচ্চুনোরে সর্মান গোজ্জ্য। 19 এশিয়া রেজ্যর্ মন্ডলীগুনোর্ মানুচ্চুনে তমারে ভালেদি জানাদন্। আকিলা, প্রিষ্কিাল্লা আর তারার্ ঘরর্ মন্ডলী মানুচ্চুনে প্রভুর কোচ্পানার্ নাঙে তমারে মনত্তুন্ ভালেদি জানাদন্। 20 বেক্ ভেইয়ুনেয়ো তমারে ভালেদি জানাদন্। কোচ্পানার্ মনভাব্পোই তুমি একজন আরেকজনরে ভালেদি জানেয়ো। 21 মুই পৌল মঅ নিজোর্ আঢে এ ভালেদির্ কধানি লিগিলুং। 22 যুনি কেঅ প্রভুরে কোচ্ ন-পায় সালে তা উগুরে অভিশাব্ পোড়োক্। আমা প্রভু এজোক্। 23 প্রভু যীশুর্ আশিদ্বাদ্ তমা সমারে থোক্। 24 তমা বেক্কুনোত্যে মর্ খ্রীষ্টীয় কোচ্পানা রলঅ। |
Copyright © 2021 Bangladesh Bible Society
Bangladesh Bible Society