১ করিন্হীয় 15 - Chakma Bibleযীশু খ্রীষ্টর্ জেঈ উদোনা পৌইদ্যেনে 1 ভেইলগ্, যে গম্ হবরান্ মুই তমা ইধু ফগদাং গোজ্জ্যং, সেই গম্ হবরানর্ কধাগান তমারে ইদোত্ তুলি দোঙর্। তুমি সিয়েন মানি লোইয়ো আর সিয়েনত্ থির্অ আঘঅ। 2 যে কধাগান্ মুই তমা ইধু ফগদাং গোজ্জ্যং সিয়েন যুনি তুমি দরমর গুরি ধুরি রাগেই থাগঅ সালেই তুমি সেই গম্ হবরানর্ মাধ্যমে পাপত্তুন্ উদ্ধোর্ পর্-খালিক্ যুনি তমার বিশ্বেজ্চান বানা বারেদি ন-অয়। 3 মুই নিজে যিয়েন পেয়োং সিয়েন বেগত্তুন্ দরকারী বিষয় ইজেবে তমারেয়ো দুয়োং। সেই বিষয়ান অলঅ ইয়েন-পবিত্র বোইবোর্ কধা মজিম খ্রীষ্ট আমার্ পাপত্যে মোজ্জ্যে, 4 তারে গোর্ দিয়্যে ওইয়্যে, পবিত্র বোইবোর্ কধা মজিম তিন দিনোত্ তারে মরাত্তুন্ জেদা গরা ওইয়্যে, 5 আর তে পিতররে আহ্ যেরেদি তার্ প্রচারগ্কুনোরে দেগা দিয়্যে। 6 ইয়েন্অ পরেদি তে একই সময়োত্ পাঁচশদত্তুন্-অ বেশ্ ভেইয়ুনোরে দেগা দিয়্যে। তারাত্তুন্ কেঅ কেঅ মুরি গেলেয়ো বেশ্ ভাগ মানুচ্ এজঅ বাঁজি আঘন্। 7 সে পরেদি তে যাকোবরে আর যেরেদি বেক্ প্রচারগ্কুনোরে দেগা দিয়্যে। 8 বে-অক্ত গুরি জোর্মেয়োংগে মুই, সেই মরেয়ো তে বেক্কুনোর্ শেজদি দেগা দিয়্যে। 9 প্রচারগ্কুনো ভিদিরে মুই বেক্কুনোত্তুন্ তলে, এন্ কি, প্রচারক বিলিনে কেঅ যে মরে ডাগে সিয়েনর্ যগাজ্যেয়ো মুই নয়, কিয়া গোজেনর্ মন্ডলীরে মুই অত্যেচার্ গত্তুং। 10 মাত্তর্ ইক্কিনে মুই যিয়েন ওইয়োং সিয়েন গোজেনর্ দোয়্যেলোই ওইয়োং। মঅ উগুরে তার্ সেই দোয়্যেগান্ নিষ্ফল ন-অয়। মুই অন্য প্রচারগ্কুনোর্ বেক্কুনোত্তুন্ বেশ্ কাম গোজ্জ্যং; মাত্তর্ কাম যে মুই গোজ্জ্যং সিয়েন নয়, বরং মঅ উগুরে গোজেনর্ যে দোয়্যে আঘে সেই দোয়্যেগানে সিয়েন গোজ্জ্যে। 11 সেনত্তে মুই প্রচার গরং বা অন্য প্রচারগ্কুনে প্রচার গরন্, আমি এ পৌইদ্যেনে প্রচার গুরিই আর তুমি সিয়েনিই বিশ্বেজ্ গোজ্জ্য। মরাগুনোর্ জেঈ উদোনা পৌইদ্যেনে 12 মাত্তর্ যুনি প্রচার গরা অয় যে, খ্রীষ্টরে মরণত্তুন্ জেদা গরা ওইয়্যে সালে তমাত্তুন্ কেঅ কেঅ কেধোক্ক্যেন গুরি কদন্ যে, মরাগুনোর্ জেঈ উদোনা বিলিনে কিচ্চু নেই? 13 মরাগুনে যুনি জেঈ ন-উদোন্ সালে দঅ খ্রীষ্টরেয়ো জেদা গরা ন-অয়; 14 আর খ্রীষ্টরে যুনি জেদা গরা ন-ওই থায় সালে আমার্ প্রচার-অ মিজে আর তমার বিশ্বেজ্-অ মিজে। 15 ইয়েনি বাদে এ কধাগান্ প্রমাণ অত্তে যে, গোজেন পৌইদ্যেনে আমি মিজে সাক্ষ্য দির্, কিয়া আমা সাক্ষ্যগান ইয়েন, গোজেনে খ্রীষ্টরে মরণত্তুন্ জেদা গুরি তুল্ল্যে। মাত্তর্ যুনি মরাগুনোরে জেদা গুরি তুলো ন-অয় সালে তে খ্রীষ্টরেয়ো জেদা গুরি ন-তুলে, 16 কিয়া মরাগুনোরে যুনি জেদা গরা ন-অয় সালে খ্রীষ্টরেয়ো জেদা গরা ন-অয়। 17 যুনি খ্রীষ্টরে জেদা গরা ন-ওই থায় সালে তমার্ বিশ্বেজ্ নিষ্ফল আর এজঅ তুমি পাপ ভিদিরে পড়ি আঘঅ। 18 সালে খ্রীষ্ট সমারে এগত্তর্ ওইনে যিগুনে মুরি যেইয়োন্ তারা দঅ ভস্ত ওইয়োন। 19 খ্রীষ্ট উগুরে আমার্ যে আজা সিয়েন যুনি বানা এ জিংকানিত্যে অয় সালে বেক্ মানুচ্চুনোত্তুন্ আমার বেশ্ পড়াকবাল্যে। 20 মাত্তর্ খ্রীষ্টরে ঘেচ্চ্যেকগুরি মরণত্তুন্ জেদা গুরি তুলো ওইয়্যে। তে পত্তম ফল, অত্তাৎ মরণত্তুন্ যিগুনোরে জেদা গরা অবঅ তারা ভিদিরে তেয়ই পত্তমে জেদা ওইয়্যে। 21 এক্কো মান্জ্যর্ মাধ্যমে মরণ এচ্চ্যে বিলি মরণত্তুন্ জেদা ওই উদোনায়ো এক্কো মান্জ্যর্ মাধ্যমে এচ্চ্যে। 22 আদম সমারে এগত্তর্ আঘন্ বিলিনে যেবাবোত্যেগুরি বেক্ মানুচ্চুন মুরি যান্, সেবাবোত্যেগুরি খ্রীষ্ট সমারে যিগুনে এগত্তর্ আঘন্ তারারে বেক্কুনোরে জেদা গরা অবঅ; 23 মাত্তর্ সিয়েন ভিদিরে পালা আঘে-পত্তম ফল ধোক্ক্যেন পত্তমে খ্রীষ্ট, সে পরেদি যিগুনে খ্রীষ্টর্ নিজোর্। খ্রীষ্ট এবার্ অক্তত্ তারারে জেদা গরা অবঅ। 24 ইয়েন পরেদি খ্রীষ্ট যেক্কে বেক্ শাসন-বেবস্থাগানি, অধিকার আর খেমতাগানি ভস্ত গুরিনে বাবা গোজেন আঢত্ রেজ্যগান দি দিবো সেক্কে থুম্ সময়ান এবঅ। 25 গোজেনে যেদক্ বিলোন সং খ্রীষ্টর্ বেক্ শত্রুগুনোরে তার্ টেঙ তলাত্ ন থবঅ সেদক্ বিলোন সং খ্রীষ্টর্ রাজাগিরি গরা পরিবো। 26 শেষ শত্রুবো যে মরণান্, তারেয়ো ভস্ত গরা অবঅ। 27 পবিত্র বোইবোর্ কধা মজিম,“তে বেক্কানি তার্ টেঙ তলাত্ থোইয়্যে।” বেক্ জিনিস্চানি অধীনোত্ থুয়ো ওইয়্যে কলে গমেডালে বুঝো যায়, যিবে বেক্ জিনিস্চানি খ্রীষ্টর্ অধীনোত্ থোইয়্যে সেই গোজেনে নিজোরে বাদ দিইনে সিয়েনি গোজ্জ্যে। 28 যেক্কে বেক্কানি খ্রীষ্টর্ অধীনোত্ থুয়ো অবঅ, সেক্কে যিবে বেক্কানি খ্রীষ্ট অধীনোত্ থোইয়্যে সেই গোজেনে যাতে বানা এক্কো গিরোজ্ ওই পারে সেনত্তে পুয়োবোয়ো নিজে গোজেনর্ অধীন অবঅ। 29 মাত্তর্ মরাগুনোত্যে যিগুনে বাপ্তিস্ম লন্ তারার্ কি অবঅ? মরাগুনোরে যুনি জেদা গুরি তুলো ন-অয় সালে কিত্ত্যে তারা মরাগুনোত্যে বাপ্তিস্ম লন্? 30 আর কিত্ত্যেই বা আমি আমিঝে দজাত্ পুরির্? 31 ভেইলগ্, আমা প্রভু খ্রীষ্ট যীশুর্ কামত্ তমারে লোইনে মর্ যে বাড়্, সেই বাড়ান্দোই মুই ঘেচ্চেকগুরি কঙত্তে, পত্তি দিন মুই মরণর্ মুয়োমি অঙর্। 32 ইফিষত্ ঝার্বো এ্যামানুনো সমারে মত্তুন্ যে লড়াই গরা পোজ্জ্যে, সিয়েন যুনি বানা জাগতিক্ উদেচ্চ্য নিইনে গুরি থাং, সালে সিয়েনত্ মর্ কি লাভ ওইয়্যে? মরাগুনোরে যুনি জেদা গুরিনে তুলো ন-ওই থায় সালে চলেত্তে কধা মজিম, “এজঅ, আমি হানা-দানা গুরিই, কিয়া কেল্ল্যে দঅ আমি মুরিবোং।” তুমি ভুল্ ন-গোজ্জ্য। 33 কধায় কয়, “বজং সমাজ্জ্যে গম্ মান্জ্যরেয়ো বজং গুরি ফেলায়।” 34 সেনত্তে তুমি তমা মনানরে জাগেই তুলো আর পাপ ন-গোজ্জ্য; তমাত্তুন্ কেঅ কেঅ গোজেনরে নঅ চিনোন্; মুই তমারে লাজত্ ফেলেবাত্যে এ কধাগান্ কঙর্। 35 কেঅ অয়ত কবাক্, “মরাগুনোরে কেধোক্ক্যেন্ গুরি জেদা গুরি তুলো অবঅ? কেধোক্ক্যেন্ কিয়্যেলোই বা তারা উদিবাক্?” 36 তুই দঅ মূর্খ! তুই নিজে যে বীজি লাগায়োচ্ সিগুন ন-মুরিলে দঅ চারা গেজেই ন-উদিবাক্। 37 তর্ লাগেইয়্যে বীজিগুনোত্তুন্ যে চারাগুন অয় সিগুন তুই ন-লাগেচ্ বরং বানা এক্কো বীজ্ লাগা-সেই বীজিবো গমর্ ওক্ বা অন্য কনঅ শোজ্জ্যর্ ওক্। 38 মাত্তর্ গোজেনে নিজোর্ আয়োচ্ মজিম সেই বীজিবোরে কিয়্যেগান দি থায়। তে পত্তি বীজিরে তার্ যগাজ্যে কিয়্যেগান দি থায়। 39 বেক্ য়েরানি এক বাবোত্ত্যা নয়। মান্জ্যর য়েরানি এক বাবোত্ত্যা, এ্যামানুনোর্ এক বাবোত্ত্যা, পেগোর্ এক বাবোত্ত্যা আর মাছর্ এক বাবোত্ত্যা। 40 আগাজত্ বোউত্ কিয়্যে আঘে, জগদত্অ বোউত্ কিয়্যে আঘে, মাত্তর্ আগাজর্ কিয়্যেগানির্ ছদক্ এক বাবোত্যে আর জগদর্ কিয়্যেগানির্ ছদক্ আর এক বাবোত্যে। 41 বেলানর্ ছদক্ এক বাবোত্যে, চানানর্ এক বাবোত্যে আর তারাগুনোর্ আরেক্ বাবোত্যে। এমন্ কি, ছদগ ইন্দিত্তুন্ এক্কো তারা অন্য আর এক্কোত্তুন্ জুদো। 42 মরাগুনোর্ জেদা ওই উদানায়ো ঠিগ্ সেবাবোত্যে। কিয়্যেগান্ কবর্ দেনার পরেদি সিয়েন বর্বাদ ওই যায়, মাত্তর্ সেই কিয়্যেগান এমন্ অবস্থায় জেদা গুরি তুলো অবঅ যিয়েন আর কনদিন্অ বর্বাদ ন-অবঅ। 43 সিয়েন অসর্মান সমারে মাদিত্ দিয়্যে অয়, মাত্তর্ সর্মান লগে তুলো অবঅ; বল্নেইয়্যে অবস্থায় মাদিত্ দিয়্যে অয়, মাত্তর্ খেমতালোই তুলো অবঅ; 44 সাধারণ কিয়্যে মাদিত্ দিয়্যে অয়, মাত্তর্ অসাধারণ কিয়্যে তুলো অবঅ। যেক্কে সাধারণ কিয়্যে আঘে সেক্কে অসাধারণ কিয়্যেও আঘে। 45 পবিত্র বোইবোত্ এবাবোত্যে গুরি লেগা আঘে, “পত্তম মানুচ্ আদম জেদা প্রাণী অলঅ।” আর শেজ্ আদম জিংকানিদান গুরিয়্যে আত্মা অলঅ। 46 মাত্তর্ যিয়েন অসাধারণ সিয়েন পত্তম নয়, বরং যিয়েন সাধারণ সিয়েনই পত্তম, সিয়েনঅ পরেদি অসাধারণ। 47 মাত্তর্ দ্বি লম্বরত্ মানুচ্চো স্বর্গত্তুন্ এচ্চ্যে। 48 পিত্থিমীর্ মানুচ্চুনে সেই মাদিলোই বানেয়্যে মান্জ্য ধোক্ক্যেন, আর যিগুনে স্বর্গত্ যেবাক্ তারা সেই স্বর্গর্ মান্জ্য ধোক্ক্যেন। 49 আমি যেধোক্ক্যেন সেই মাদির্ মান্জ্য ধোক্ক্যেন্ ওইয়্যেই ঠিগ্ সেবাবোত্যে গুরি সেই স্বর্গর্ মান্জ্য ধোক্ক্যেন্অ অবং। 50 ভেইলগ্, মুই যিয়েন কঙর্ সিয়েন এই-মানুচ্ তার্ লুয়ো-য়েরা কিয়্যেলোই গোজেন রেজ্যর্ অধিকারী ওই ন-পারে। যিয়েন বর্বাদ ওই যেবঅ সিয়েন এমন কিজুর্ অধিকারি ওই ন-পারে যিয়েন বর্বাদ ন-অবঅ। 51 মুই তমারে এক্কান গুমুরো সত্যর্ কধা কঙর্, শুনো। আমি বেক্কুনে যে মুরি যেবং সিয়েন নয়, মাত্তর্ বুদুলি যেবং। 52 এক মুহুত্তো ভিদিরে, চোগ তেবদত্, শেষ সময়োর্ তূরীর্ আবাজ সমারে সমারে আমি বেক্কুনে বুদুলি যেবং। সেই তূরীবো যেক্কে বাঁজিবো সেক্কে মরাগুনে এমন্ অবস্থায় জেদা ওইনে উদিবাক্ যে, তারা আর কনদিন্অ বর্বাদ ন-অবাক্; আর আমিয়ো বুদুলি যেবং। 53 যিয়েন্ বর্বাদ অয় সিয়েনরে কাবড় ধোক্ক্যেন গুরি এমন্ কিজু পিনে পুরিবো যিয়েন কনদিন্অ ন-মরে। 54 যিয়েন বর্বাদ অয় আর যিয়েন মুরি যায়, সিয়েনি যেক্কে সেবাবোত্যে গুরি বুদুলি যেবঅ সেক্কে পবিত্র বোইবোর্ এ কধাগান্ পূরোণ অবঅ যে, “মরণান্ ভস্ত ওইনে জিদেনাগান এচ্চ্যে।” 55 “মরণান্, তর্ জিদেনা কুদু? মরণান্, তর্ কামাড়ানাগান্ কুদু?” 56 মরণর্ কামড়ান্ পাপ, আর পাপর্ খেমতা মোশির আইন-কানুন। 57 মাত্তর্ গোজেনরে ভালেদি জানেই, আমা প্রভু যীশু খ্রীষ্টর্ মাধ্যমে তে আমারে জয় দান গোজ্জ্যে। 58 সেনত্যে, মর্ পরাণর্ ভেইলগ্, দর-মর গুরি থিয়ো; কনঅ কিজুয়ে যেন তমারে লাড়েই ন-পারে। নিত্য প্রভুর্ কামত্যে নিজোরে পুরোপুরি গুরি দি দুয়ো, কিয়া তুমি কোই পারঅ, তা কামত্ তমার্ কামানি নিষ্ফল নয়। |
Copyright © 2021 Bangladesh Bible Society
Bangladesh Bible Society