১ করিন্হীয় 14 - Chakma Bible

নানান্ ভাষায় কধা কনা পৌইদ্যেনে

¹ এ কোচ্‌পানাগানত্যে তুমি বিশেষ গুরিনে চেষ্টা গরঅ, আর পবিত্র আত্মার্ দিয়্যে দান, বিশেষ গুরিনে ভাববাদী ইজেবে কধা কবার্ খেমতা পেবাত্যে তমার্ আওজ্ থোক্।

² অন্য কনঅ ভাষায় যে মানুচ্চো কধা কয় তে মান্‌জ্য ইধু কধা ন-কয় মাত্তর্ গোজেন ইধু কধা কয়, কিয়া কেঅ সিয়েন বুঝি ন-পারন্। তে আত্মালোই গুমুরো সত্যর্ কধা কয়।

³ মাত্তর্ ভাববাদী ইজেবে যে কধা কয় তে মান্‌জ্য ইধু এমন্‌ কধা কয় যিয়েনি তারারে গড়েই তুলে আর উচ্চোমি আর সান্তনা দে।

⁴ অন্য কনঅ ভাষায় যে মানুচ্চো কধা কয় তে নিজোরে গড়েই তুলে, মাত্তর্ ভাববাদী ইজেবে যে কধা কয় তে মন্ডলী মানুচ্চুনোরে গড়েই তুলে।

⁵ মুই চাং যেন তুমি বেক্কুনে নানান্ ভাষায় কধা কোই পারঅ, মাত্তর্ আরঅ বেশ্ গুরি চাং যেন তুমি ভাববাদী ইজেবে কধা কোই পারঅ। অন্য কনঅ ভাষায় যে মানুচ্চো কধা কয়, মন্ডলীর্ মানুচ্চুনোরে গড়েই তুলিবাত্যে যুনি তে তার্ কধানির্ অত্তগান বুঝেই ন-দে, সালে তাত্তুন্ ভাববাদী ইজেবে যে কধা কয় তে-ই বরং দাঙর্।

⁶ সেনত্তে ভেইলগ্, মুই যুনি তমা ইধু এইনে বানা অন্য ভাষায় কধা কং, মাত্তর্ সিয়েনির মাধ্যমে গোজেনর্ সত্যগান ফগদাঙর্ কধা বা জ্ঞানর্ কধা বা ভাববাদী ইজেবে গোজেনর্ দিয়্যে কধা বা শিক্ষ্যের্ কধা ন-কং, সালে মুই তমারে কি উপকার গুরি পারিম্?

⁷ এন্‌ কি বাশী বা বীণা ধোক্ক্যেন্ পরাণ-নেইয়্যে বাজনা যুনি গমেডালে যুদো যুদো সুরে ন-বাজে, সালে বাশী বা বীণাত্ কি সুর্ বাজের্ সিয়েন কেধোক্ক্যেন গুরিনে জানা যেবঅ?

⁸ যুদ্ধোর্ তূরীবো যুনি গমেডালে ন-বাজে সালে কন্না যুদ্ধোত্ যেবাত্তে নিজোরে যুক্কোল্ গুরিবো।

⁹ ঠিগ্ সেবাবোত্যেগুরি যে ভাষা মানুচ্চুনে ন-বুঝোন্ তুমি যুনি সেই ভাষায় কধা কঅ সালে তুমি যিয়েন কঅ সিয়েন কেধোক্ক্যেন গুরি বুঝো যেবঅ? কিয়া সেক্কে যে কধানি তুমি কঅ সিয়েনি দঅ বোইয়্যের ইধু কঅ।

¹⁰ এ জগদত্ নানান্ বাবোত্যে ভাষা আঘে; সিয়েনির ভিদিরে কনগান অত্ত নেইয়্যে নয়।

¹¹ ইয়েনত্যে মুই যুনি কনঅ ভাষার্ অত্ত ন-বুঝোং সালে যে মানুচ্চো কধা কর্ তাইধু দঅ মুই অজানা বিদেশী ধোক্ক্যেন ওম্, আর তেয়ো মইধু সেধোক্ক্যেন্ অবঅ।

¹² তমার্ বেলায়-অ এ কধাগান্ খাদে। তুমি যেক্কে পবিত্র আত্মার্ দিয়্যে দান পেবাত্যে বিশেষ গুরিনে আয়োজি অর্ সেক্কে যে যে দান্‌দোই মন্ডলীরে গড়েই তুলো যায় সিগুন্ বেশ্ গুরি পেবার চেষ্টা গরঅ।

¹³ ইয়েনত্যে অন্য কনঅ ভাষায় যে মানুচ্চো কধা কয় তে তবনা গোরোক্ যেন সিয়েনর্ অত্তগান্ তে বুঝেই দি পারে।

¹⁴ মুই যুনি অন্য কনঅ ভাষায় তবনা গরং সালে মর্ আত্মাগানে তবনা গরে মাত্তর্ মর্ মনানে কনঅ কাম্ ন-গরে।

¹⁵ সালে মত্তুন্ কি গরানা উচিত? মুই আত্মালোই তবনা গুরিম, বুদ্ধিলোই তবনা গুরিম; মুই আত্মালোই নাঙ্ গিনেদে গীদ্ গেইম্, বুদ্ধিলোইয়ো নাঙ্ গিনেদে-গীদ্ গেইম্।

¹⁶ সিয়েন ন-অলে যুনি তুই আত্মালোই ভালেদি জানাচ্ সালে সেই ভাষা বুঝি ন-পারে এন্ কনঅ মানুচ্‌ যুনি সিয়েনত্ থায়, সালে তে কেধোক্ক্যেন গুরি তর্ ভালেদিগান আমেন বিলিনে মানি লবঅ? তে দঅ কোই ন-পারে তুই কি কর্।

¹⁷ তুই অয়ত গমেডালে ভালেদি জানর্, মাত্তর্ সেক্কে সেই অন্য মানুচ্চোরে দঅ গড়েই তুলো ন-অর্।

¹⁸ মুই তমার্ বেক্কুনোত্তুন্ নানান্ ভাষায় কধা কবাত্তে বেশ্ পারং বিলিনে গোজেনরে ভালেদি দুয়োং।

¹⁹ মাত্তর্ মন্ডলী ভিদিরে নানান্ ভাষায় আজার্ আজার্ কধা কবার্ বদলে অন্যগুনোরে শিক্ষ্যে দিবাত্যে মুই বুদ্ধিলোই বরং বানা পাচ্চান্ কধা কোম্।

²⁰ ভেইলগ্, চিগোন গুরো ধোক্ক্যেন আর চিন্তে ন-গোজ্জ্য। ভান্ন্যেয় পৌইদ্যেনে তমা মনানি চিগোন গুরো ধোক্ক্যেন সরল ওক্, মাত্তর্ চিন্তেলোই তুমি বুড়ো মান্‌জ্য ধোক্ক্যেন্ অ।

²¹ মোশির আইন-কানুনোত্ প্রভু কয়, “অন্য ভাষার্ মানুচ্চুনোরে দিইনে আর অন্যগুনোর মুয়োদি মুই এ জাদ ইধু কধা কোম্, মাত্তর্ তো তারা মঅ কধা ন-শুনিবাক্।”

²² সালে দেগা যায়, বিশ্বেজিগুনোত্যে নানান্ ভাষায় কধা কনা কনঅ চিহ্নো নয়, বরং অবিশ্বেজিগুনোত্যে সিয়েন এক্কান চিহ্নো; মাত্তর্ অবিশ্বেজিগুনোত্যে ভাববাদী ইজেবে কধা কনা কনঅ চিহ্নো নয়, বরং বিশ্বেজিগুনোত্যে সিয়েন এক্কান চিহ্নো।

²³ মন্ডলীর্ বেক্‌ মানুচ্চুন এক জাগাত্ এগত্তর্ অলে পরেদি যুনি বেক্কুনে নানান্ ভাষায় কধা কনাত্ থান্ আর সেক্কে সেই মন্ডলীর্ বারেদি মানুচ্চুনে আহ্ অবিশ্বেজিগুনে ভিদিরে এজন্, সালে কি তারা তমারে পাগল ন-কবাক্?

²⁴ মাত্তর্ যুনি বেক্কুনে ভাববাদী ইজেবে কধা কন্ আর সেক্কে কনঅ অবিশ্বেজি বা মন্ডলীর বারেদি মানুচ্‌ ভিদিরে এজন্, সালে সে মানুচ্চো বেক্কুনোর কধার্ মাধ্যমে নিজোর্ পাপ পৌইদ্যেনে চেতনা পেবঅ আর সেই বেক্‌ কধালোই তার্ মনর্ বিচের্ অবঅ।

²⁵ সেক্কে তা মনত্ গুমুরো বেপারানি নিগিলি এবঅ, আর তে সেক্কে মাদিত্ মাঢা নিগিরিনে গোজেনরে বাঈনী গুরিনে কবঅ, “ঘেচ্চ্যেকগুরি, গোজেনে তমা ভিদিরে আঘে।”

মন্ডলীত্ শৃঙ্খলা রোক্ষ্যে

²⁶ ভেইলগ্, সালে কি কোম্? তুমি যেক্কে মন্ডলীত্ এক জাগাত্ এগত্তর্ অ সেক্কে তমাত্তুন্ কেঅ নাঙ্-গিনিবার্ গীদ্ গরে, কেঅ শিক্ষ্যে দে, কেঅ গোজেনর্ সত্য ফগদাং গরে, কেঅ অন্য ভাষায় কধা কয়, আরঅ কেঅ সিয়েনর্ অত্তগান বুঝেই দে। যে যিয়েন গত্ত সাৎ বেক্কানি যেন মন্ডলীরে গড়েই তুলিবাত্যে গরা অয়।

²⁷ যুনি কেঅ অন্য ভাষায় কধা কয় সালে দ্বিজন্ বা বেশ্ অলে তিনজনে এক একজন গুরি কধা কোদোক্, আর অন্য একজনে সিয়েনর্ অত্তগান বুঝেই দোক্।

²⁸ যুনি অত্তগান বুঝেবার কেঅ ন-থায় সালে তারা মন্ডলীত্ কধা ন-কোদোক্; তারা গায় গায় নিজো সমারে আর গোজেন সমারে কধা কোদোক্।

²⁹ যিগুনে ভাববাদী ইজেবে কধা কন্ তারা দ্বিজন বা তিনজন কধা কোদোক্ আর অন্যগুনে তার্ বিচের্ গুরি চাদোক্।

³⁰ যে বৈই আঘে তা ইধু যুনি গোজেনর্ সত্যগান্ ফগদাং অয় সালে যে কধা কোইয়্যে তে কধা কনা থামোক্,

³¹ কিয়া তুমি বেক্কুনে এক এক গুরিনে ভাববাদী ইজেবে কধা কোই পারঅ যেন বেক্কুনে শিক্ষ্যে আর উচ্চোমি পান্।

³² ভাববাদীগুনোর্ আত্মা তারার্ নিজো অধীনোত্ থায়।

³³ গোজেনে বিশৃঙ্খলার গোজেন নয়, তে শান্তির্ গোজেন। গোজেন মানুচ্চুনোর্ বেক্ মন্ডলীগুনোত্ যেবাবোত্যে ওই থায়,

³⁴ সেবাবোত্যেগুরি মিলেগুনে মন্ডলীত্ অলর্ গুরি থাদোক্, কিয়া কধা কবার্ অনুমতি তারারে দিয়্যে ন-অয়। মোশির আইন-কানুন্ যেধোক্ক্যেন কয় সেধোক্ক্যেন তারা বরং বাধ্য ওইনে থাদোক্।

³⁵ যুনি তারা কিজু জানিবাত্যে চান্ সালে ঘরত্ তারার্ নেগ্‌কোরে পুযোর্ গোত্তোক্, কিয়া মন্ডলীত্ কধা কনা এক্কো মিলের্ পক্ষে লাজর্ বেপার।

³⁶ গোজেনর্ কধানি কি তমাত্তুন্ নিগিলি এচ্চ্যে বা সিয়েন কি বানা তমা ইধু এচ্চ্যে?

³⁷ যুনি কেঅ নিজোরে ভাববাদী কয় বা আত্মিক্ মানুচ্ বিলি মনে গরে সালে তে স্বীগের্ গোরোক্ যে, মুই তমা ইধু যিয়েনি লিগিলুং সিয়েনি বেক্কানি প্রভুর উগুম্।

³⁸ যুনি কেঅ সিয়েনি এলাফেলা গরে সালে তারেয়ো এলাফেলা গরা অবঅ।

³⁹ সেনত্তে মর্ ভেইলগ্, ভাববাদী ইজেবে কধা কবাত্যে বিশেষ্ গুরিনে আয়োজি অ আর নানান্ ভাষায় কধা কবাত্যে মানা ন-গোজ্জ্য।

⁴⁰ বেক্কানি যেন যগাজ্জ্যেগুরিনে আর গুচ্চ্যেয়্যে গুরিনে গরা অয়।