১ করিন্হীয় 13 - Chakma Bible

¹ মুই যুনি মান্‌জ্যর আর স্বর্গদূত্‌‌তুনোর্ ভাষায় কধা কং মাত্তর্ ম-ইধু কোচ্‌পানা ন-থায়, সালে মুই বেশ গুরি বাজেয়্যে ঘন্টা বা ঝন্‌‌‌ঝন্‌ গোজ্জ্যে তাল ধোক্ক্যেন ওইয়োং।

² যুনি ভাববাদী ইজেবে কধা কবার্ খেমতা মত্তুন্ থায়, যুনি মুই বেক্‌ গুমুরো সত্যর্ পৌইদ্যেনে বুঝি পারং, আর যুনি মর্ নানান্ বাবোত্যে জ্ঞান থায়, এন্‌ কি, মুড়োগুনোরে এক জাগাত্তুন্ অন্য জাগাত্ সোরেই দিবার পুরো বিশ্বেজ্‌‌চান থায়, মাত্তর্ মত্তুন কোচ্‌পানা ন-থায়, সালে মর্ কনঅ-ই দাম্ নেই।

³ মর্ যিয়েনি আঘে সিয়েনি যুনি মুই নাঢা মানুচ্চুনোরে হাবেবাত্যে দান গরং, কিয়্যেগান্অ পুড়িবাত্যে দি দোং, মাত্তর্ মঅ ভিদিরে যুনি কোচ্‌‌পানা ন-থায়, সালে মর্ কনঅ লাভ নেই।

⁴ কোচ্‌পানা নিত্য ধৈজ্জ্য ধরে, দোয়্যে গরে, ইংসে ন-গরে, দেমাগ্ ন-গরে, বার্‌‌বো ন-গরে,

⁵ ভান্ন্যেই বেবহার ন-গরে, নিজোর্ সুবিধের্ চেষ্টা ন-গরে, রাগ্ ন-গরে, কারঅ ভান্ন্যেই বেবহারর্ কধা মনত্ ন-রাগায়,

⁶ ভান্ন্যেই কিজুলোই হুজি ন-গরে বরং যিয়েন সত্য সিয়েন্দোই হুজি গরে।

⁷ কোচ্‌পানাগানে বেক্কানি সোজ্জ্য গরে, বেক্কুনোরে বিশ্বেজ্ গত্তে আয়োজি, বেক্কানিত্ আজা রাগায় আর বেক্ অবস্থাত্ থির্ থায়।

⁸ এ কোচ্‌পানাগান্ কনদিন্অ থুম্ ন-অয়। ভাববাদী ইজেবে কধা কবার্ যে খেমতাগান্ আঘে সিয়েন থুম্ ওই যেবঅ; নানান্ ভাষায় কধা কবার্ যে খেমতাগান্ আঘে সিয়েন যেবগোই; জ্ঞান আঘে, সিয়েন-অ থুম্ ওই যেবঅ;

⁹ কিয়া আমি বেক্কানি পৌইদ্যেনে পুরোপুরিগুরি ন-জানিই, ভাববাদী ইজেবেয়ো পুরোপুরিগুরি কধা কোই ন-পারিই।

¹⁰ মাত্তর্ যিয়েন ফেলেং ফেলেং সিয়েন যেক্কে এবঅ সেক্কে সিয়েন ফেলেং ফেলেং নয় সিয়েন থুম্ ওই যেবঅ।

¹¹ মুই যেক্কে চিগোন চিজি এলুং সেক্কে চিগোন চিজি ধোক্ক্যেন কধা কদুং, চিগোন চিজি ধোক্ক্যেন চিন্তে গত্তুং আর চিগোন চিজি ধোক্ক্যেন বিচের্‌‌অ গত্তুং। ইক্কিনে মর্ বয়চ্ ওইয়্যে, সেনত্তে চিগোন্ চিজির আচার-বেবহারানি বাদ্ দুয়োং।

¹² আমি ইক্কিনে যেন আনাত্ গমেডালে ন-দেগির্, মাত্তর্ সেক্কেনে মুজুঙো-মুজুঙি দেগিবোং। মুই ইক্কিনে যিয়েন হবর্ পাং সিয়েন পুরো নয়, মাত্তর্ গোজেনে মরে যেবাবোত্যেগুরি হবর্ পায় সেক্কে মুই সেবাবোত্যেগুরি পুরোপুরি গুরি হবর্ পেইম্।

¹³ সালে দেগা যাত্তে বিশ্বেজ্, আজা আর কোচ্‌‌পানা-এ তিনেন্ থুম্ সং থিগি থায়; মাত্তর্ ইয়েনিত্তুন্ কোচ্‌পানাগান্ বেক্কুনোত্তুন্ দাঙর্।