১ করিন্হীয় 12 - Chakma Bible

পবিত্র আত্মার দান পৌইদ্যেনে

¹ ভেইলগ্, মুই ন-চাং যে, পবিত্র আত্মার দিয়্যে দান পৌইদ্যেনে তমার্ অজানা থায়।

² তুমি কোই পারঅ, যেক্কে তুমি গোজেনর্ উবোসনা ন-গুরিদা সেক্কে এমন মূত্তিগুনো ইন্দি তমারে টানি নেযা অদঅ যিগুনে কধা কোই ন-পারন্।

³ মুই তমারে জানাঙর্, গোজেন আত্মালোই কধা কলে কেঅ ন-কন্, “যীশু উগুরে অভিশাপ্ পোরোক্।” আরঅ পবিত্র আত্মার্ মাধ্যমে ন-অলে কেঅ কোই ন-পারন্, “যীশু প্রভু”।

⁴ একই পবিত্র আত্মার্ দিয়্যে দান নানান্ বাবোত্যে।

⁵ আমি নানান্ উপায়ে একই প্রভুর্ সেবা গুরিই।

⁶ আমা পত্তিজনরে নানান্ বাবোত্যে কাম্ দিয়্যে ওইয়্যে, মাত্তর্ একই গোজেনে নানান্ উপায়ে আমা পত্তিজন ইধু কাম গুরি থায়।

⁷ বেক্কুনোর্ ভালেদিত্যে এক এক মান্‌জ্য ভিদিরে এক এক বাবোত্যে গুরিনে পবিত্র আত্মা ফগদাং অয়।

⁸ কাররে কাররে সেই পবিত্র আত্মার্ মাধ্যমে জ্ঞানর্ কধা বা বুদ্ধির্ কধা কবাত্যে দিয়্যে অয়।

^9-10 অন্য কাররে কাররে সেই একই আত্মালোই বিশ্বেজ্ বা পীড়ে গম্ গুরিবার খেমতা বা আমক্ কাম গুরিবার খেমতা বা ভাববাদী ইজেবে গোজেনর্ কধা কবার্ খেমতা বা গম্ আর ভান্ন্যেই আত্মাগুনোরে চিনিবার্ খেমতা দিয়্যে অয়। আরঅ অন্য কাররে কাররে নানান্ ভাষায় কধা কবার্ খেমতা বা নানান্ ভাষায় অত্তগানি বুঝেই দিবার্ খেমতা দিয়্যে অয়।

¹¹ এ বেক্‌ কামানি সেই একই পবিত্র আত্মাগানে গুরি থায়। তে যেবাবোত্যেগুরি আওজ্ গরে সেবাবোত্যেগুরি এই বেক্ দানানি পত্তিজনরে যুদো যুদো গুরি দে।

কিয়্যে এক্কান মাত্তর্ ভাগ্ ভালোক্কানি

¹² এক্কান্ কিয়্যের্ যেবাবোত্যে ভালোক্কানি ভাগ্ থায় আর সেই ভাগ্‌‌কানি ভালোক্কানি অলেয়ো যেবাবোত্যেগুরি বেক্কানি মিলিনে এক্কানগুরি কিয়্যে অয়, খ্রীষ্টয়ো ঠিগ্ সেবাবোত্যে।

¹³ আমি যিহূদী কি অযিহূদী, চাগর্ কি স্বাধীন, বেক্কুনোর্ একই পবিত্র আত্মালোই একই কিয়্যে ভিদিরে বাপ্তিস্ম ওইয়্যে। আমি বেক্কুনে সেই একই পবিত্র আত্মাগানরে পেইয়্যেই।

¹⁴ কিয়্যে বানা এক্কান ভাগ্‌‌কোই বানেয়্যে নয়, সিয়েনি ভালোক্কানি ভাগ্‌‌কোই বানেয়্যে।

¹⁵ টেঙানে যুনি কয়, “মুই আঢ্ নয়, সেনত্যে কিয়্যেগান লগে নয়,” সালে সিয়েন যে কিয়্যেগানর্ লগে নয় ইয়েন্‌ নয়।

¹⁶ কানানে যুনি কয়,“মুই চোগ্ নয় বিলি কিয়্যের্ ভাগ্অ নয়,” সালে সিয়েন যে কিয়্যের্ ভাগ্ নয় এমন নয়।

¹⁷ যুনি গোদা কিয়্যেগান চোগ্ অদঅ সালে শুনিবার খেমতাগান্ কুধু থেদঅ? আর যুনি গোদা কিয়্যেগান কান অদঅ সালে শুনিবার খেমতাগান্ কুধু থেদঅ?

¹⁸ গোজেনে যেবাবোত্যেগুরি চেইয়্যে ঠিগ্ সেবাবোত্যেগুরি কিয়্যের্ ভাগ্‌‌কানিরে তে এক এক গুরি কিয়্যেগান ইধু তে বোজেয়্যে।

¹⁹ যুনি বেক্‌ কিয়্যেগান ভাগ্‌‌কানি এক বাবোত্যে অদঅ সালে কিয়্যেগান কুদু থেদঅ?

²⁰ কিয়্যের্ ভাগ্ ভালোক্কানি ঠিগ্ মাত্তর্ কিয়্যে এক্কান।

²¹ চোগ্‌কো আঢ্‌তানিরে কোই ন-পারে, “তরে মর্ দরকার্ নেই,” আরঅ মাঢাবো টেঙ্ দ্বিয়েনরে কোই ন-পারে, “তমারে মর্ দরকার্ নেই।”

²² আসলে কিয়্যের্ যে ভাগ্‌কানরে বল্-নেইয়্যে বিলিনে মনে অয় সিয়েনি বেচ্‌ দরকারী।

²³ কিয়্যের্ যে ভাগ্‌কানরে আমি কম্ সর্মানর্ যোগ্য বিলিনে মনে গুরিই সেই ভাগ্‌কানিরে বেশ্ সর্মান দেগেই। যে ভাগ্‌কানিরে বারেদি দেগা ন-যায় সিয়েনিরে আমি যত্তন্ গুরি ঢাগি রাগেই,

²⁴ মাত্তর্ যে ভাগ্‌কানি বারেদি দেগা যায় সিয়েনিরে আর্ ঢাঘিবার্ দরকার্ ন-অয়। কিয়্যের্ যে ভাগ্‌কানির্ কনঅ সর্মান নেই গোজেনে সিয়েনিরে বোউত্ বেশ্ সর্মান দান গোজ্জ্যে আর বেক্‌ কিয়্যেগানিরে একসমারে এগত্তর্ গোজ্জ্যে,

²⁵ যেন কিয়্যেগান ভাগ্ ওই ন-যায় বরং ভাগ্‌কানি যেন এক্কান আর এক্কানত্যে সং গুরিনে চিন্তে গরে। যুনি এক্কান ভাগর্ দুঘ্ অয় সালে তা সমারে বেক্ ভাগ্‌কানিয়ে দুঘ্ পায়।

²⁶ যুনি এক্কান ভাগর্ সর্মান অয় সালে বেক্ ভাগ্‌কানই তা সমারে হুজি অয়।

²⁷ তুমিই খ্রীষ্টর্ কিয়্যেগান্ আর এক একজন সেই কিয়্যেগানর্ এক এক্কান্ ভাগ্।

²⁸ গোজেনে মন্ডলীত্ পত্তম প্রচারক, দ্বি-লম্বরত ভাববাদী; তিন-লম্বরত্ মাষ্টর্ ইজেবে নেযেয়্যে। সে পরেদি এই বেক্ মানুচ্চুনোরে নেযা ওইয়্যে-যিগুনে আমক্ কাম গুরিবার খেমতা পেইয়োন, যিগুনে পীড়ে গম্ গুরিবার খেমতা পেইয়োন, যিগুনে সাহায্য গুরিবার খেমতা পেইয়োন, যিগুনে পরিচালনা গুরিবার খেমতা পেইয়োন, আর যিগুনে নানান্ ভাষা কবার খেমতা পেইয়োন। বেক্কুনে কি প্রচারক্?

²⁹ বেক্কুনে কি ভাববাদী? বেক্কুনে কি মাষ্টর্? বেক্কুনোর্ কি আমক্ কাম্ গুরিবার খেমতা আঘে?

³⁰ বেক্কুনোর্ কি পীড়ে গম গুরিবার্ খেমতা আঘে? বেক্কুনে কি নানান্ ভাষায় কধা কন্? বেক্কুনে কি সিয়েনির অত্তগান বুঝেই দুয়োন্? খামাক্কায় নয়!

³¹ মুই বরং কং, তুমি বেগত্তুন্ দরকারী দানানি পেবাত্যে আয়োজি অ। মুই তমারে এবার্ আরঅ গম্ এক্কান পথ দেগেই দোঙর্: