১ করিন্হীয় 10 - Chakma Bibleইস্রায়েলীয়গুনো বিজগত্তুন্ শিক্ষ্যে 1 ভেইলগ্, মুই চাং যেন তুমি কোই পারঅ, আমা পুরোণি মানুচ্চুনে বেক্কুনে সেই মেঘ ছাবাত্ এলাক্ আর বেক্কুনে লোহিত সাগর ভিদিরেন্দি যেয়োন্। 2 মোশি সমারে এক অবাত্যে মেঘ আর সাগর ইধু তারার্ বেক্কুনোর্ বাপ্তিষ্ম ওইয়্যে। 3-4 গোজেনর্ দিয়্যে সেই এক্কুই হানা আর সেই এক্কুই পানি তারা বেক্কুনে হেইয়োন্। গোজেনর্ দিয়্যে যে শিল্লো তারা সমারে সমারে যার্ সিবেত্তুন্ তারা হেবাত্যে পানি পেদাক্; আর খ্রীষ্টই এলদে সেই শিল্লো। 5 তো গোজেনে সেই মানুচ্চুনো ভিদিরে বেশির্ ভাগ মান্জ্য উগুরে হুজী ন-এলঅ। সেনত্তে তারার্ মরা কিয়্যেনি ধূল্যেচর-চাগালাত্ পড়ি রলঅ। 6 আমি যেনে দেগিনে শিগি পারিই সেনত্তে ইয়েনি বেক্কানি ঘোট্ট্যে, যেন তারা যেবাবোত্যে ভান্ন্যেয় পৌইদ্যেনে লুভ্ গোজ্জ্যন আমি সেবাবোত্যে ন-গুরিই। 7 তারা ভিদিরে কেঅ কেঅ যেবাবোত্যে মূত্তি পূজো গোজ্জ্যন্ তুমি সেবাবোত্যে ন-গোজ্জ্য। পবিত্র বোইবোত্ লেগা আঘে, মানুচ্চুনে হানা-দানা গুরিবাত্যে বলাক্, জেরেদি তারা নাচ-গান গুরিবাত্যে উদিলাক্। 8 তারা ভিদিরে ভালোকজনে বেভিচের্ গরানার্ ফলে এক দিনোত তেইশ্ আজার মানুচ্ মুরি যেয়োন। আমি যেন সেবাবোত্যে বেভিচের্ ন-গুরিই। 9 তারা ভিদিরে ভালোকজনে প্রভুরে পোরোক্ষ্যে গুরিনে যেবাবোত্যে সাপ কামরত্ মুরি যেইয়োন সেবাবোত্যেগুরি আমি যেন প্রভুরে পোরোক্ষ্যে ন-গুরিই। 10 তারা ভিদিরে ভালোকজনে কাঙেলেত্যে পেইনে যেবাবোত্যেগুরি ভস্তগুরিয়্যে দূত্তুন্দোই ভস্ত ওইয়োন্ সেবাবোত্যেগুরি তুমি কাঙেলেত্যেগান ফগদাং ন-গোজ্জ্য। 11 অন্য মানুচ্চুনে যেনে দেগিনে শিগি পারন্ সেনত্তে তারা উগুরে ইয়েনি ঘোট্যে। আর আমি যিগুনে যুগোর্ শেষ্ সময়োত্ এইনে লুম্মেয়ি, সিয়েনই আমারে উজিয়ার্ গুরিবাত্তে ইয়েনি বেক্কানি লেগা ওইয়্যে। 12 ইয়েনত্যে যুনি কেঅ মনে গরে তে দরমর গুরিনে থিয়্যেই আঘে সালে তে উজিয়ার্ ওক্ যেন পড়ি ন-যায়। 13 মান্জ্য জিংকানিত্ যেদক্কানি পোরোক্ষ্যে ওই থায় সিয়েনি বাদে আর অন্য কনঅ পোরোক্ষ্যে দঅ তমা উগুরে ন-অয়। গোজেনে বিশ্বেজবলা; সোজ্জ্যর্ বারেদি পোরোক্ষ্যে তে তমা উগুরে অবাত্তে ন-দিবো, বরং পোরোক্ষ্যের্ লগে লগে সিয়েনত্তুন্ নিগিলি এবার্ এক্কান পধ-অ তে গুরি দিবো যেন তুমি সিয়েন সোজ্জ্য গুরি পারঅ। 14 ইয়েনত্যে মর্ কোচ্পেইয়্যে সমাজ্জ্যেগুন, তুমি মূত্তি পূজোত্তুন্ দূরোত্ যঅ। 15 তমারে বুদ্ধিবলা কোই পারিনে মুই এ বেক্ কধানি কঙর্। মুই যিয়েনি কং সিয়েনি তুমি নিজেই বিচের্ গুরি চঅ। 16 প্রভুর্ ভোজ সময়োত্ ভালেদি জানেইনে যে অাশিদ্বাদ গলজত্তুন্ আমি হেই, সিয়েন কি খ্রীষ্টর্ লো-গান ভাগ্ লনা ধোক্ক্যেন নয়? আর যে রুটিগানি আমি কট্টা গুরিনে হেই সিয়েন কি খ্রীষ্টর্ কিয়্যের্ ভাগ্ লনা ধোক্ক্যেন নয়? 17 আমি ভালোক্কুন অলেয়ো একই কিয়্যে, কিয়া বানা এক্কান রুটি আঘে, আর আমি বেক্কুনে সেই রুটির কট্টাগান্ লোই। 18 ইস্রায়েল জাদ কধা চিন্তে গরঅ। তারা ইধু যিগুনে উৎসর্বর জিনিচ্ হেই থান্ তারা কি সেই পূজোবোর্ বেক্কানিত্ ভাগ ন-লন্? 19 মর্ এ কধাগানত্ কি ইয়েনই বুঝো যায়, মূত্তি ইধু উৎসর্ব-গোজ্জ্যে হানা বিশেষ কিজু বা মূত্তি বিশেষ কিজু? 20 সিয়েন নয়, বরং মুই কঙর্, অযিহূদীগুনে যিয়েনি উৎসর্ব গরন্ সিয়েনি গোজেন ইধু ন-গরন্, ভান্ন্যেই আত্মাগুনো ইধু গরন্। মুই ন-চাং, ভান্ন্যেই আত্মাগুনো সমারে তমার কনঅ উদো-বসা থায়। 21 প্রভুর গলচ্চো আর ভান্ন্যেই আত্মাগুনোর গলচ্চো, এ দ্বিবে গলজত্তুন্ তুমি হেই ন-পারঅ। প্রভুর টেবিলো উগুরে আর ভান্ন্যেই আত্মাগুনোর্ টেবিলো উগুরে যিয়েনি আঘে, এই দ্বিয়েনর্ ভাগ্ তুমি লোই ন-পারঅ। 22 ইয়েন গুরিনে কি আমি ঘেচ্চ্যেকগুরি প্রভুর মনর্ জ্বালা জাগেই তুলিবাত্তে চেইর্? আমি কি তাত্তুন্ বেশ্ খেমতাবলা? বিশ্বেজিগুনোর্ স্বাধীনতা 23 কেঅ কেঅ কন্, “কনঅ কিজু গরানা অনুচিত্ নয়।” সিয়েন ঠিগ্, মাত্তর্ বেক্কানি যে মান্জ্যর উপকার গরে সিয়েন নয়। কনঅ কিজু গরানা অনুচিত্ নয় ঠিগ্, মাত্তর্ বেক্কানিয়ে যে মান্জ্যরে গোড়েই তুলে সিয়েন নয়। 24 কেঅ তার নিজোর্ মংগল চেষ্টা ন-গোরোক্ বরং পত্তিজনে অন্যর্ মংগল চেষ্টা গোরোক্। 25 বাজারত্ যে কনঅ য়েরা বেজা অয় সিয়েনি হেয়ো; বিবেগ্কানরে শান্ত থবাত্যে কনঅ কিজু পুযোর্ ন-গোজ্জ্য, 26 কিয়া পবিত্র বোইবোর্ কধা মজিম, “পিত্থিমী আর তা ভিদিরে বেক্কানি প্রভুর।” 27 যুনি কনঅ অবিশ্বেজি তমারে হেবাত্যে বলান্ আর তুমি যেবাত্তেয়ো চঅ, সালে বিবেগরে শান্ত-থবাত্যে কনঅ কিজু পুযোর্ ন-গুরিনে তমা মুজুঙোত্ যিয়েনি দিয়্যে ওইয়্যে সিয়েনি হেয়ো। 28 মাত্তর্ যুনি কেঅ তমারে কয়, ইয়েন মূত্তিবো ইধু উৎসর্ব গরা ওইয়্যে, সালে যে সিয়েন কোইয়্যে তাত্যে আর বিবেগত্যে সিয়েন ন-হেইয়ো। 29 মুই তমার্ বিবেগর্ কধা ন-কঙর্, অন্য মান্জ্যর বিবেগর্ কধা কঙর্। মাত্তর্ অন্য এক্কো মান্জ্যর বিবেগত্যে কিত্ত্যে মর্ স্বাধীনতাত্ আঢ দিয়্যে অবঅ? 30 মুই যুনি ভালেদি জানেইনে হাং সালে যে হানাগানত্তে মুই ভালেদি জানাঙর্ সিয়েনত্তে কিত্তে মরে বদ্নাঙ গরা অবঅ? 31 সেনত্তে তুমি হানা-দানা গরঅ আর যিয়েনই গরঅ, বেক্কানি গোজেনর্ বাঈনী গুরিবাত্তে গরঅ। 32-33 মুই যেবাবোত্যে গুরি বেক্ মান্জ্যরে নানান্ বাবোত্যে গুরি হুজি গুরিবাত্তে চেষ্টা গরং তুমিয়ো সেবাবোত্যে গরঅ; অত্তাৎ যিহূদী বা অযিহূদী বা গোজেন মন্ডলীর মানুচ্চুনোর পধত্ কাঙেলেত্যে ন-গোজ্জ্য। মুই নিজোর্ মংগল চেষ্টা ন-গুরিনে ভালোক জনর্ মংগলর্ চেষ্টা গরং যেন তারা পাপত্তুন্ উদ্ধোর্ পান্। |
Copyright © 2021 Bangladesh Bible Society
Bangladesh Bible Society