১ করিন্হীয় 1 - Chakma Bible

পাত্তুরুতুরু

^1-2 গোজেনর্ আওজে তার্ ভাত্যেনালোই মুই পৌল যীশু খ্রীষ্টর্ এক্কো প্রচারক্ ওইয়োং। মুই আর ভেই সোস্থিনি করিন্থ শঅরর্ গোজেন মন্ডলীর্ মানুচ্চুনো ইধু, অত্তাৎ তমা ইধু লেগঙর্। খ্রীষ্ট যীশু সমারে মিজেনার্ মাধ্যমে গোজেনে তা নিজোর্ নাঙে তমারে যুদো গুরি রাগেয়্যে আর তা নিজো মানুচ্ অবাত্তে ডাক্ক্যে। তমা ইধু আর অন্য বেক্‌ জাগানিত্ যিগুনে আমা প্রভু যীশু খ্রীষ্টরে প্রভু বিলিনে স্বিগের্ গরন্ তারা ইধু আমি এ চিধিগান্ লিগির্। তে তারার্-অ প্রভু, আমার্-অ প্রভু।

³ আমা বাবা গোজেন আর প্রভু যীশু খ্রীষ্ট তমারে দোয়্যে গোরোক্ আর শান্তি দান গোরোক্।

⁴ মুই নিত্য তমাত্তে মঅ গোজেনরে ভালেদি জানাং, কিয়া খ্রীষ্ট যীশু সমারে মিজেনেই তুমি গোজেনর্ দোয়্যে পেইয়ো।

⁵ সেই দোয়্যেগান্ ইয়েন, তুমি খ্রীষ্ট সমারে মিজেইনে বেক্কানিত্তুন্, অত্তাৎ বেক্কানি কবার্ খেমতা আর জ্ঞানদি বাড়ি উত্ত্য,

⁶ কিয়া খ্রীষ্ট পৌইদ্যেনে আমা সাক্ষ্যগান্ তমা রিবেঙত্ ফুদি থেবঅ।

⁷ সেনত্তে যেক্কে তুমি আমা প্রভু যীশু খ্রীষ্ট ফগদাং অবাত্তে আওজ্ গুরিনে বাজ্জেই আঘঅ সেক্কে গোজেনর্ দিয়্যে কনঅ দানর্ অভাব তমার্ ন-অর্।

⁸ আমা প্রভু যীশু খ্রীষ্ট থুম্ অয় সং তমারে থির্ রাগেব, যিয়েনর কারনে তার্ এবার্ দিনোত্ তুমি নানান্ বাবোত্যে বদ্‌নাঙর্ বারেদি থেবা।

⁹ গোজেনে বিশ্বেজবলা; তেয়ই তমারে ডাক্ক্যে যেন তা পুয়োবো আমা প্রভু যীশু খ্রীষ্ট আর তমা ইধু কধাবাত্তা-মিলেমিলি থায়।

মন্ডলীত্ দলাদুলি

¹⁰ ভেইলগ্, আমা প্রভু যীশু খ্রীষ্টর্ ওইনে মুই তমারে বিশেজ্ গুরিনে কোজোলি গরঙর্, তুমি বেক্কুনে এক্ অ। তমা ভিদিরে কনঅ দলাদুলি ন-থোক্, মাত্তর্ তুমি একমন আর এককধার মানুচ্ অ।

¹¹ মর্ ভেইয়ুন, তমা পৌইদ্যেনে ক্লোয়ীর ঘরর্ মানুচ্চুনো ইধু এ হবরান্ পেলুং, তমা ভিদিরে কোল্-কোজ্জ্যে আঘে।

¹² মুই এ কধাগান্ কবার্ চাঙত্তে, তমা ভিদিরে কেঅ কন্দে, “মুই পৌল দলর্”; কেঅ কন্দে, “মুই আপল্লো দলর্”; কেঅ কন্দে, “মুই পিতর দলর্”; আরঅ কেঅ কন্দে, “মুই খ্রীষ্ট দলর্।”

¹³ মাত্তর্ খ্রীষ্টরে কি ভাগ্ গরা ওইয়্যে? পৌলরে কি তমাত্যে ক্রুশোত্ দিয়্যে ওইয়্যে? তুমি কি পৌল নাঙে বাপ্তিস্ম লোইয়ো?

¹⁴ মুই গোজেন ইধু ভালেদি জানাঙর্, ক্রীষ্প আর গাইয় বাদে তমারে আর কাররে মুই বাপ্তিস্ম ন-দুয়োং,

¹⁵ যেনে কেঅ কোই ন-পারন্ যে, তুমি মঅ নাঙে বাপ্তিস্ম লোইয়ো।

¹⁶ হালিক্ স্তিফান পরিবার মানুচ্চুনোরেয়ো মুই বাপ্তিস্ম দুয়োং, মাত্তর্ সিগুন বাদে আর কাররেয়ো বাপ্তিস্ম দুয়োং বিলিনে মর্ মনত্ ন-পড়ের্।

¹⁷ খ্রীষ্ট মরে বাপ্তিস্ম দিবাত্যে দি ন-পাধায় বরং গম্ হবর্ প্রচার গুরিবাত্যে দিপাধেয়্যে। সেই গম্ হবরান তে মরে জ্ঞানীগুনোর্ ভাষায় প্রচার গুরিবাত্যে দি ন-পাধায়, যেন খ্রীষ্টর্ ক্রুশোত্ মরণাগান্ খেমতা নেইয়্যে ওই ন-পড়ে।

খ্রীষ্ট গোজেনর্ জ্ঞান আর খেমতা

¹⁸ যিগুনে ভস্ত অবার্ পধেদি উজেই যাদন্ তারা ইধু খ্রীষ্টর্ সেই ক্রুশোত্ মরাণার্ কধাগান্ মূর্খতা বাদে আর কিচ্চু নয়; মাত্তর্ আমি যিগুনে পাপত্তুন্ উদ্ধোরর্ পধেদি উজেই যের্ আমা ইধু সিয়েন গোজেনর্ খেমতা।

¹⁹ পবিত্র বোইবোত্ লেগা আঘে, “মুই জ্ঞানীগুনোর্ জ্ঞানান্ বর্‌‌বাদ গুরিম, বুদ্ধিমানুনোর্ বুদ্ধিগানি বিফল গুরিম।”

²⁰ মাত্তর্ জ্ঞানী মানুচ্‌ কুধু? পন্ডিত্ মানুচ্ বা কুধু? আর যিবের্ তর্ক গুরিবার খেমতা আঘে এ যুগোর্ সেবাবোত্যে মানুচ্ বা কুধু? এ জগদর্ জ্ঞানান্ যে বানা মূর্খতা সিয়েন কি গোজেনে ন-দেগায়?

²¹ গোজেনে তার্ নিজোর্ জ্ঞানে থির্ গোজ্জ্যে বিলিনে জগদ্‌তানে তার্ নিজো জ্ঞান্দোই গোজেনরে হবর্ ন-পায়। ইয়েনত্তে গম্ হবরর্ মূর্খতালোই পাপত্তুন্ বিশ্বেজিগুনোরে উদ্ধোর্ গরানা গোজেনে গম্ বিলি মনে গুরিলো।

²² যিহূদীগুনে চিহ্ন ইজেবে আমক্ অবার্ কাম দেগিবাত্তে চান্, গ্রীককুনে জ্ঞানানরে তগান্,

²³ মাত্তর্ আমি সেই ক্রুশোত্ দিয়্যে খ্রীষ্টর্ কধা প্রচার গুরিই। সেই কধাগান যিহূদীগুনো ইধু এক্কান মানা আর অযিহূদীগুনো ইধু মূর্খতা,

²⁴ মাত্তর্ যিহূদী ওক্‌ আর গ্রীকই ওক্‌, গোজেনে যিগুনোরে ডাক্ক্যে তারা ইধু সেই খ্রীষ্টই গোজেনর্ খেমতা আর গোজেনর্ জ্ঞান।

²⁵ গোজেন ভিদিরে যিয়েন মূর্খতা বিলি মনে অয় সিয়েন মান্‌জ্যর্ জ্ঞানত্তুন্অ বেচ্‌ জ্ঞানবলা, আর যিয়েন খেমতা নেইয়্যে বিলি মনে অয় সিয়েন মান্‌জ্যর্ খেমতাত্তুন্অ বোউত্ বেশ্ খেমতাবলা।

²⁶ ভেইলগ্, তমারে যেক্কে ডাগা ওইয়্যে সেক্কে তুমি কিবাবোত্যে মানুচ্‌ এলা সে কধাগান ভাবি চঅ। মান্‌জ্যর্ বিচেরত্ তমা ভিদিরে ভালোক্ জনে যে জ্ঞানী বা খেমতাবলা বা উচ্চ বংশর্ সিয়েন নয়।

²⁷ মাত্তর্ জগদ্‌তানে যিয়েনরে মূর্খতা বিলি মনে গরে গোজেনে সিয়েনই বেঈ লোইয়্যে যেন জ্ঞানীগুনে লাজান্। জগদ্‌তানে যিয়েনরে খেমতা নেইয়্যে মনে গরে গোজেনে সিয়েনই বেঈ লোইয়্যে যেন যিয়েন খেমতাবলা সিয়েন খেমতানেইয়্যে অয়।

²⁸ জগদ্‌তানে যিয়েনরে তলে আর তুচ্চ বিলি মনে গরে, এমন কি, জগদর্ চোগেদি যিয়েন কিচ্চু নয় গোজেনে সিয়েনই বেঈ লোইয়্যে যেন জগদর্ চোগেদি যিয়েন মূল্যবান সিয়েন মূল্য নেইয়্যে ওই পারে।

²⁹ তে সিয়েনি বেক্কানি বেঈ লোইয়্যে যেন তা মুজুঙোত্ কনঅ মানুচ্ বাড়্ গুরি ন-পারন্।

³⁰ যীশু খ্রীষ্ট সমারে যে তুমি এগত্তর্ গুরি আঘ সিয়েন গোজেনত্তুন্ ওইয়্যে। যীশু খ্রীষ্ট আমা ইধু গোজেনর্ দিয়্যে জ্ঞান; তেয়ই আমার নিদ্দুজি, পবিত্র আর উদ্ধোর্।

³¹ ইয়েনত্তে পবিত্র বোইবোর্ কধা মজিম, “যে দেমাগ্ গরে তে প্রভুরে নিইনে দেমাগ্ গোরোক্।”