১ বংশধর 9 - Chakma Bible1 “ইস্রায়েলীয় রাজাগুনোর্ বোই”-বোত্ বেক্ ইস্রায়েলীয়গুনো বংশর্-নাঙানি লেগা আঘে। যিরূশালেমত্ ইস্রায়েলীয়গুনে যিহূদার মানুচ্চুনোরে বিশ্বেজ্ ন-গরানার্ কারনে তারারে বাবিলোত্ বন্দী গুরি নেযা ওইয়্যে। 2 যিগুনে পত্তমে ফিরি এচ্ছ্যন্ নিজো শঅরত্ আর আদামত্ নিজো জাগা-জোমি উগুরে আরঅ বজত্তি গরানা আরাম্ভ গুরিলাক্ তারা অলাক্কে ধর্মগুরু, লেবীয়, তবনা-ঘরর্ সেবাগুরিয়্যে আর অন্য ইস্রায়েলীয়গুন। 3 যিহূদা, বিন্যামীন, ইফ্রয়িম আর মনঃশি-গুট্টির্ যিগুনে যিরূশালেমত্ বজত্তি গরা ধুরিলাক্ তারা অলাক্: 4 যিহূদা-গুট্টিত্তুন্: যিহূদার পুয়ো পেরসর বংশর উথয়। উথয় অলদে অম্মীহূদর পুয়ো, অম্মীহূদ অম্রির পুয়ো, অম্রি ইম্রির পুয়ো, ইম্রি বানির পুয়ো আর বানি পেরসর পুয়ো। 5 যিহূদার পুয়ো শেলার বংশর অসায় আর তার্ পুয়োগুনে। অসায় অলদে তা বাবর্ দাঙর্ পুয়োবো। 6 যিহূদার পুয়ো শেরহর বংশর যুয়েল। যিহূদা-গুট্টির্ যে মানুচ্চুনে যিরূশালেমত্ বজত্তি গুরিলাক্ তারা জনেদি অলাক্ ছয়শঅ নব্বই জন। 7 বিন্যামীন-গুট্টিত্তুন: মশুল্লমর পুয়ো সল্লু। তার্ পূরোণিমানুচ্চুনোর্ ভিদিরে এলঅ হোদবিয় আর হস্নূয়। 8 যিরোহমর পুয়ো যিব্নিয় মিখ্রির নাদিন, অত্তাৎ উষির পুয়ো এলা। শফটিয়র পুয়ো মশুল্লম। তার্ পূরোণিমানুচ্চুনো ভিদিরে এলাক্ রূয়েল আর যিব্নিয়। 9 ইগুনে এলাক্ নিজোর্ নিজোর্ বংশর নেতা। বিন্যামীন বংশর-নাঙানি অনুসারে যিদুক্কুন্ মানুচ্ যিরূশালেমত্ বজত্তি গুরিলাক্ তারা জনেদি এলাক্ নয়শঅ ছাপ্পান্ন জন। 10-11 ধর্মগুরুগুনোত্তুন্: যিদয়িয়, যিহোয়ারীব, যাখীন আর হিল্কিয় পুয়ো অসরিয়। অসরিয় এলদে গোজেন ঘরর্ কাম্ পেইয়্যে মানুচ্চুনো ভিদিরে আজল্। তা পূরোণি মানুচ্চুনো মোধ্যে এলাক্কে মশুল্লম, সাদোক, মরায়োৎ আর অহীটূব। 12 যিরোহম পুয়ো অদায়া। তার্ পূরোণি মানুচ্চুনো মধ্যে এলাক্কে পশ্হূর আর মল্কিয়। অদীয়েলর পুয়ো মাসয়। তা পূরোণি মানুচ্চুনোর্ মধ্যে এলাক্কে যহসেরা, মশুল্লম, মশিল্লমীত আর ইম্মের। 13 ইগুনে অলাক্ নিজোর্ নিজোর্ বংশর নেতা। যে ধর্মগুরুগুন যিরূশালেমত্ বজত্তি গোজ্যন্ তারা জনেদি এলাক্ এক আজার্ সাতশঅ ষায়েটজন। ইগুনে গোজেন ঘরর্ সেবা-কামর ভারান পেইয়্যে কাবিল্ মানুচ্। 14 লেবীয়গুনো ইত্তুন্: হশূবর পুয়ো শমরিয়। তা পূরোণি মানুচ্চুনো ভিদিরে এলাক্ অস্রীকাম, হশবিয় আর মরারি। 15 বকবক, হেরশ, গালল আর মীখার পুয়ো মত্তনিয়। মত্তনিয় পূরোণি মানুচ্চুনো ভিদিরে এলাক্ সিখ্রি আর আসফ। 16 শময়িয় পুয়ো ওবদিয়। তা পূরোণি মানুচ্চুনোর ভিদিরে এলাক্ গালল আর যিদূথূন। ইল্কানা নাদিন্, অত্তাৎ আসার পুয়ো বেরিখিয়। তে নটোফাতীয় গুনো আদামত্ বজত্তি গুরিদো। 17-19 রোক্ষ্যে গুরিয়্যেগুনো ইত্তুন্: শল্লুম, অক্কুব, টল্মোন, অহীমান আর তারা বংশর্ মানুচ্চুন। এ মানুচ্চুনে এলাক্ লেবি-গুট্টির্ তাম্বুলো চুগিদার। কোরির পুয়ো শল্লুমে এলদে তারার্ নেতা। তা পূরোণি মানুচ্চুনো ভিদিরে এলদে ইবীয়াসফ আর কোরহ। শল্লুম আর তা বংশর মানুচ্চুনোরে, অত্তাৎ কোরহীয়গুনো উগুরে তবনা-ঘরর্ দোরানি চুগি দিবার্ ভারান্ এলঅ। এজঅ তারা রাজঘর পূগেন্দি গেদোত্ থান্। তারার্ পূরোণি মানুচ্চুনো উগুরেয়ো ঠিগ্ এক্কুই লগেপ্রভুর থেবার-তাম্বুলো দোরান্ চুগি দিবার্ ভারান্ এলঅ। 20 সে সময়োত্ ইলীয়াসর পুয়ো পীনহস উগুরে রোক্ষ্যে গুরিয়্যেগুনোর্ চেইচিদিবার্ ভারান্ এলঅ আর লগেপ্রভু তা লগে এলঅ। 21 মশেলেমিয়র পুয়ো সখরিয় মিলন-তাম্বুলো দোরানর্ চুগিদার্ এলঅ। 22 দোরানি চুগি দিবাত্তে যিগুনোরে বেঈ নেযা ওইয়্যে তারা জনেদি এলাক্কে বেক্কুনে দ্বিশঅ বার জন। তারা আদামানিত্ যিদুক্কুন্ বংশর-নাঙ্ এলঅ সিদু তারার্ নাঙানি লেগা ওইয়্যে। দায়ূদ আর দর্শক শমূয়েলে এ মানুচ্চুনোরে দায়িত্ববলা চুগিদার কামত্ নেযেয়োন। 23 তারা বংশর্ মানুচ্চুনে লগেপ্রভু ঘরর্, অত্তাৎ থেবার্-তাম্বুলো দোরানিত্ চুগি দিদাক্। 24 পূগ্, পোজিম্, উত্তোর-দোগিন-এ চেরোকিত্তেন্দি চুগিদারুনে চুগি দিদাক্। 25 আদামত্তুন্ তারা ভেইয়ূনেয়ো পালা মজিম এইনে সাত দিন গুরি তারা কামত্ বল্ দিদাক্। 26 যে চেরজন্ লেবীয় আজল্ চুগিদার এলাক্ তারা উগুরে এলঅ গোজেন ঘরর্ ধনভান্ডাল গুদিগুনো ভারান্। 27 তারা গোজেন ঘর কায়-কুরে বজত্তি গুরিদাক্, কিত্তে সে ঘরান্ চুগি দিবার্ ভারান্ তারা উগুরে এলঅ, আর নিত্য বেন্যেমাদান্ ঘর দোরানিয়ো তারাত্তুন খুলি দিয়্যে পত্ত। 28 লেবীয়গুনো ভিদিরে কয়েকজন উগুরে তবনা-ঘরর্ সেবা-কামত্ বেবহার্ গোজ্যে পযাপিরানি চুগি দিবার্ ভারান্ এলঅ। সিয়েনি নিগিলেবার্ আর ভিদিরে আনিবার্ অক্তত্ তারা গুণি চেদাক্। 29 অন্যগুনো উগুরে এলঅ তবনা-ঘর খাট-পালঙানি আর বেক্ পিলেগুন, মোয়দে আর আংগুর-রস, তেল, লোবান আর বেক্ তুম্বাজ্ মজলানি চুগি দিবার্ ভারান্। 30 মাত্তর্ তুম্বাজ্ মজলানি মিজেবার্ ভারান্ এলদে ধর্মগুরুগুনোর্ কয়েকজন উগুরে। 31 লেবীয়গুনো ভিদিরে কোরহীয় শল্লুম দাঙর্ পুয়ো মত্তথিয় উগুরে শোজ্য-উৎসর্বর জিনিসছানি সিগি আনিবার্ ভারান্ দিয়্যে ওইয়্যে। 32 পত্তি জিরেবার্ দিনোত্ টেবিলো উগুরে যে মুজুঙো-রুটিগান্ সাজেই রাগা অদঅ সিয়েন্ বানেবার্ ভারান্ এলদে লেবীয়গুনো ভিদিরে কয়েক্কো কহাতীয়গুনো উগুরে। 33 লেবি-গুট্টির বংশ-নেতাগুনে যিগুনে গান-বাজনা গুরিদাক্ তারা তবনা-ঘরর্ গুদিগুনোত্ থেদাক্। গান-বাজনা কামত্ তারা দিন-রেত্ থেদাক্ বিলিনে তারা উগুরে অন্য কনঅ কাম ভারান্ দিয়্যে ন-অয়। 34 বংশর-নাঙানি মজিম বেক্কুনে এলাক্ লেবি-গুট্টির নিজোর্ নিজোর্ বংশর নেতা। ইগুনে যিরূশালেমত্ বজত্তি গুরিদাক্। শৌল বংশগুনোর-নাঙানি 35 যিয়ীয়েলে গিবিয়োন আদামান বানেইনে সিদু বজত্তি গুরিদো। তা মোক্কো নাঙান্ এলদে মাখা। 36 তা দাঙর্ পুয়োবো নাঙান্ অব্দোন, সে পরেন্দি সূর, কীশ, বাল, নের, নাদব, 37 গাদোর, অহিয়ো, সখরিয় আর মিক্লোৎ। 38 মিক্লোত পুয়ো শিমিয়াম। ইগুনে যিরূশালেমত্ তারা বংশর মানুচ্চুনো ইদু বজত্তি গুরিদাক্। 39 নেরের পুয়ো কীশ, কীশ পুয়ো শৌল আর শৌল পুয়োগুন অলাক্ যোনাথন, মল্কীশূয়, অবীনাদব আর ইশ্বাল। 40-41 যোনাথন পুয়ো মরীব্-বাল, মরীব্-বাল পুয়ো মীখা আর মীখা পুয়োগুন অলাক্ পিথোন, মেলক, তহরেয় আর আহস। 42 আহস পুয়ো যারঃ আর যার পুয়োগুন অলাক্ আলেমৎ, অস্মাবৎ আর সিম্রি। সিম্রি পুয়ো মোৎসা, 43 মোৎসা পুয়ো বিনিয়া, বিনিয়া পুয়ো রফায়, রফায় পুয়ো ইলীয়াসা আর ইলীয়াসা পুয়ো আৎসেল। 44 আৎসেল ছঅজন পুয়ো নাঙানি অলঅ অস্রীকাম, বোখরূ, ইশ্মায়েল, শিয়রিয়, ওবদিয় আর হানান। |
Copyright © 2021 Bangladesh Bible Society
Bangladesh Bible Society