১ বংশধর 5 - Chakma Bibleরূবেণ বংশর-নাঙানি 1 ইস্রায়েলর্ দাঙর্ পুয়ো রূবেণ তা বাবর্ বিচ্ছোনান্ ফিবলা গোজ্যে বিলিনে দাঙর্ পুয়োবো অধিকারান্ আড়েইয়্যে। সে অধিকারান্ ইস্রায়েলর অন্য পুয়ো যোষেফর পুয়োগুনোরে দিয়্যে ওইয়্যে। সেনত্তে বংশগুনো নাঙানিত্ তা পোজিশনান্ দাঙর্ পুয়ো ইজেবে লেগা ন-অয়। 2 আরঅ যুনিয়ো ভেইয়ো গুট্টিগুনো ভিদিরে যিহূদা-গুট্টিবো বেগত্তুন্ বোলী এলঅ আর তা গুট্টিত্তুন্ নেতা বেঈ নেযা ওইয়্যে তো দাঙর্ পুয়োবো অধিকারান্ যোষেফে পেইয়্যে। 3 ইস্রায়েল দাঙর্ পুয়ো রূবেণ পুয়োগুন অলাক্ হনোক, পল্লু, হিষ্রোণ আর কর্মী। 4 যোয়েল বংশর মানুচ্চুনে অলাক্ যোয়েল পুয়ো শিময়িয়, শিময়িয় পুয়ো গোগ, গোগ পুয়ো শিমিয়ি, 5-6 শিমিয়ি পুয়ো মীখা, মীখা পুয়ো রায়া, রায়া পুয়ো বাল আর বাল পুয়ো বেরা। বেরা এলদে রূবেণীয়গুনো নেতা। আসিরিয়া রাজা তিগ্লৎ-পিলেষর তারে বন্দী গুরিনে নেযেয়্যে। 7-8 রূবেণ-গুট্টির নাঙানি বংশ মজিম লেগা ওইয়্যে। তারা ভিদিরে আজল্লো এলদে যিয়ীয়েল, সখরিয় আর আসস পুয়ো বেলা। আসসে এলদে শেমা পুয়ো আর শেমা এলদে যোয়েল পুয়ো। ইগুনে অরোয়রত্তুন্ নবো সং আর বাল্-মিয়োন সং জাগানিত্ বজত্তি গুরিদাক্। 9 গিলিয়দদ্ তারার্ য়েমান পালুন্ বেশ্ ওইয়োন্ বিলিনে পূগেন্দি ধূল্যেচর- চাগালাগান্ যিয়োত্তুন্ আরাম্ভ ওইয়্যে সিয়েন সং তারা গজক গুরি নেযেলাক্। এ ধূল্যেচর-চাগালাগান্ ইউফ্রেটিস গাঙর্ পোজিমেন্দি এলঅ। 10 শৌলর রাজাগিরির অক্তত্ রূবেণীয়গুনে হাগরীয়গুনোর বিরুদ্ধে যুদ্ধো গুরিনে তারারে মারে ফেলেয়োন। তারা গিলিয়দ পূগেন্দি, অত্তাৎ হাগরীয়গুনোর বেক্ জাগানি গজক্ গুরিনে সিদু বজত্তি গরা ধুরিলাক্। গাদ বংশগুনোর-নাঙানি 11 গাদ-গুট্টির মানুচ্চুনে রূবেণীয়গুনো কায় বাশন দেজর সলখা সং চাগালাত্ বজত্তি গুরিদাক্। 12 তারা ভিদিরে আজল্লো অলদে যোয়েল, দ্বিলম্বর শাফম, সে পরেন্দি যানয় আর শাফট। ইগুনে বাশনত্ থেদাক্। 13 গাদ-গুট্টির বাদবাগি মানুচ্চুনে এলাক্ এ সাতজনর, অত্তাৎ মীখায়েল মশুল্লম, শেবা, যোরায়, যাকন, সীয় আর এবরর বংশ মানুচ্। 14 ইগুনে এলাক্ হূরির পুয়ো অবীহয়িলর বংশর্ মানুচ্। হূরির বাপ্পো এলদে যারোহ, যারোহ বাপ্পো গিলিয়দ, গিলিয়দ বাপ্পো মীখায়েল, মীখায়েল বাপ্পো যিশীশয়, যিশীশয় বাপ্পো যহদো আর যহদো বাপ্পো বূষ। 15 অব্দিয়্যেল পুয়ো অহি অলদে তারা বংশর নেতা আর অব্দিয়েলে অলদে গূনির পুয়ো। 16 গাদ-গুট্টির মানুচ্চুনে বাশন দেজত্, গিলিয়দ আর সিদুগো আদামানিত্ আর শারোণ চাগালার য়েমান চোড়েবার জাগানিত্ বজত্তি গুরিদাক্। 17 যিহূদা রাজা যোথম আর ইস্রায়েল রাজা যারবিয়াম রাজাগিরির সময়োত্ এ মানুচ্চুনো নাঙানি বংশ-নাঙানিত্ লেগা ওইয়্যে। 18 রূবেণ-গুট্টির, গাদ-গুট্টির আর মনঃশি-গুট্টির অদ্দেক্ মান্জ্যত্তুন্ চোচোল্লিশ আজার্ সাতশঅ ষায়েটজন বোলী মানুচ্ যুদ্ধো গুরিবাত্তে যুক্কোল্ এলাক্। তারা ঢাল, ধামা আর ধনু কার্বারানি জানিদাক্ আর যুদ্ধোত্ বজমান কাবিল্ এলাক্। 19 তারা হাগরীয়গুনোর, অত্তাৎ যিটূরোর, নাফীশর আর নোদব মানুচ্চুনোর বিরুদ্ধে যুদ্ধো গুরিলাক্। 20 ইগুনো সমারে যুদ্ধো গুরিবার্ সময়োত্ গোজেনে তারারে বল্ দিয়্যে। তে হাগরীয় আর তারা পক্ষেন্দি বেক্ মানুচ্চুনোরে তারা আদত্ তুলি দিয়্যে, কিত্তে যুদ্ধোত্ তারা গোজেন ইদু তবনা গোজ্যন্। তারা তা উগুরে বিশ্বেজ্ গোজ্যন্ বিলিনে তে তারার্ তবনা জোবপান্ দিয়্যে। 21 তারা হাগরীয়গুনোর পঞ্চাশ আজার্ উট, আড়ি লাখ্ ভেড়া আর দ্বিআজার্ গাধা কারি নেযেলাক্ আর এক লাখ্ মান্জ্যরে বন্দী গুরি নেযেলাক্। 22 ইগুন্ বাদেয়ো শত্রুগুনোত্তুন্ বোউত্ মারা পড়িলাক্, কিত্তে গোজেনে এ যুদ্ধোগান্ ওইয়্যে। ইস্রায়েলীয়গুনে বন্দী অবার আগেন্দি সং সিদু বজত্তি গুরিদাক্। 23 মনঃশি-গুট্টির অদ্দেক্ মানুচ্ বাশনত্তুন্ বাল-হর্মোণ, সনীর আর হর্মোণ মুড়োবো সং যে জাগায়ানি এলঅ সিদু বজত্তি গরা ধুরিলাক্। তারা জনেদি বালুক্কুন্ এলাক্। 24 তারা বংশর নেতাগুনোর নাঙানি এলদে এফর, যিশী, ইলীয়েল, অস্রীয়েল, যিরমিয়, হোদবিয় আর যহদীয়েল। এ বোলী যোদ্ধাগুনে নাঙ্গোজ্যে মানুচ্ এলাক্। 25 মাত্তর্ তারা পূরোণি মানুচ্চুনোর গোজেন উগুরে তারা বিশ্বেজ্ আরেলাক্। দেজর্ যে জাত্তুনোরে গোজেনে তারা মুজুঙোত্তুন্ ভস্ত গুরি দিয়্যে তারার্ দেব-দেবেদাগুনো ইদু তারা নিজোরে বিজি দুয়োন্। 26 সেক্কে ইস্রায়েল গোজেন আসিরিয়ার রাজা পূলর, অত্তাৎ তিগ্লৎ-পিলেষর মনত্ রাগ উদিলো। তে রূবেণীয়, গাদীয় আর মনঃশি-গুট্টির অদ্দেক্ মান্জ্যরে বন্দী গুরিনে হেলহ, হাবোর আর হারা চাগালাত্ আর গোষণ গাঙর্ পারত্ নেযেল; এজঅ সং তারা সিদু আগন্। |
Copyright © 2021 Bangladesh Bible Society
Bangladesh Bible Society