১ বংশধর 4 - Chakma Bibleযিহূদার্ বংশ 1 যিহূদার্ বংশর মানুচ্চুন্ অলাক্ পেরস, হিষ্রোণ, কর্মী, হূর আর শোবল। 2 শোবল পুয়ো রায়া, রায়ার পুয়ো যহৎ আর যহত পুয়ো অহূময় আর লহদ। ইগুনে এলাক্ সরাথীয় বংশর মানুচ্। 3 যে মানুচ্চো ঐটম আদামান্ বানেয়্যে তা পুয়োগুন অলাক্ যিষ্রিয়েল, যিশ্মা আর যিদ্বশ। তারা বোন্নো নাঙান্ অলদে হৎসলিল-পোনী। 4 পনূয়েল পুয়ো গাদোর আর এশর পুয়ো হূশ। তারা বেক্কুনে ইফ্রাথা দাঙর্ পুয়ো হূরো বংশর মানুচ্। হূর বৈৎলেহম আদামান্ বানেয়্যে। 5 তকোয় আদামান্ যে বানেয়্যে সে অস্হূরর্ দ্বিজন মোগোর্ নাঙানি এলদে হিলা আর নারা। 6 নারা পেদত্ অহুষম, হেফর, তৈমিনি আর অহষ্টরি জর্ম ওইয়্যে। ইগুনে এলাক্ নারা পুয়ো। 7 হিলা পুয়োগুনে অলাক্ সেরৎ, যিৎসোহ আর ইৎনন। 8 কোষ পুয়োগুনে অলাক্ আনূব আর সোবেবা। কোষ এলদে হারুমোর পুয়ো অহর্হল বংশর পূরোণিমানুচ্। 9 যাবেষ তা ভেইয়ুনোত্তুন্ বেশ্ আরঅ মানি মানুচ্ এলঅ। তা মাবো তার্ এ নাঙান্ রাগেইনে কোইয়্যেদে, “মুই খুব্ দুঘে তারে ফুদেয়োং।” 10 যাবেষ ইস্রায়েল গোজেনরে ডাগিনে কোইয়্যেদে, “তুই মরে বর্ দে আর মঅ সোম্বোত্তিগানি বাড়েই দে। তঅ বলান্ মঅ সমারে থোক্ আর দজাত্তুন্ তুই মরে রোক্ষ্যে গর্ যেনে মুই দুগ্ ন-পাং।” আর গোজেনে তার্ কোজোলিগান্ রোক্ষ্যে গুরিলো। 11-12 শূহর্ ভেই কলূবোর পুয়ো মহীর, মহীর পুয়ো ইষ্টোন আর ইষ্টোন পুয়োগুন অলাক্ বৈৎ-রাফা, পাসেহ আর তহিন্ন। তারা বেক্কুনে এলাক্ রেকা আদাম মানুচ্। হহিন্ন ঈরনাহস আদামান বানেয়্যে। 13 কনসর্ পুয়োগুন অলাক্ অৎনীয়েল আর সরায় আর অৎনীয়েলর পুয়ো হথৎ। 14 মিয়োনোথয়র পুয়ো অলঅ অফ্রা আর সরায়র পুয়ো যোয়াব। যোয়াব গী-হরসীম আদামান বানেয়্যে। সে আদামানরে গী-হরসীম কুয়ো অদঅ, কিত্তে তার্ বেক্ মানুচ্চুনে এলাক্ কালিগর। 15 যিফুন্নি পুয়ো কালেব পুয়োগুন অলাক্ ঈরূ, এলা আর নয়ম। এলার্ পুয়োবো নাঙান্ অলদে কনস। 16 যিহলিলেল পুয়োগুন অলাক্ সীফ, সীফা, তীরিয় আর অসারেল। 17-18 ইষ্রা পুয়োগুন অলাক্ যেথর, মেরদ, এফর আর যালোন। মেরদ ফরৌণর এক্কো ঝি বিথিয়ারে লোইয়্যে। তা পেদত্ মরিয়ম, শম্ময় আর যিশ্বহ জর্ম ওইয়্যে। যিশ্বহ ইষ্টিমোয় নাঙে এক্কান্ আদাম্ বানেয়্যে। মেরদ যিহূদী মোক্কো পেদত্ যেরদ, হেবর আর যিকুথীয়েল জর্ম ওইয়্যে। যেরদে গাদোর আদামান্, হেবরে সোখো আদামান্ আর যিকূথীয় সানোহ আদামানি বানেয়োন। 19 নহম বোন্নোরে হোদিয় লোইয়্যে। তা পুয়োগুন অলাক্ গর্মীয় কিয়ীলার বাপ্পো আর মাখাথীয় ইষ্টিমোয় বাপ্পো। 20 শীমোন পুয়োগুন অলাক্ অম্মোন, রিন্ন, বিন্-হানন আর তীলোন। যিশীর পুয়োগুন অলাক্ সোহেৎ আর বিন্-সোহেৎ। 21-22 যিহূদা পুয়ো শেলার বংশর মানুচ্চুনো ভিদিরে এলাক্ এর, লাদা, বৈৎ-অসবেয় যে মানুচ্চুনে মসীনার কাবড় বুনিদাক্ তারার্ বেক্ বংশগুনে, যোকীম, কোষেবা মানুচ্চুনে, যোয়াশ, সারফ আর যাশূ বিলেহম শেলা পুয়ো এর লেকা আদামান বানেয়োন আর লাদা বানেয়েদে মারেশা আদামান। যোয়াশ আর সারফ এলদে মোয়াব শাজন্গুরিয়্যে। ইয়েনি এলদে খুব পূরোণি দিনোর নাঙ্। 23 শেলা বংশর মানুচ্চুনো ভিদিরে যিগুনে নতায়ীম আর গদেরাত বজত্তি গুরিদাক্ তারা এলাক্ কুলি। রাজার কামানি গুরিবাত্তে তারা সিদু থেদাক্। শিমিয়োন বংশর-নাঙানি 24 শিমিয়োন পুয়োগুন অলাক্ নমূয়েল, যামীন, যারীব, সেরহ আর শৌল। 25 শৌল পুয়ো অলঅ শল্লুম, শল্লুম পুয়ো মিব্সম আর মিব্সম পুয়ো মিশ্ম। 26 মিশ্মর এক্কো পুয়ো অলদে হম্মুয়েল, হম্মুয়েল পুয়ো শক্কুর আর শক্কুর পুয়ো শিময়ি। 27 শিময়ির ষুলোজন পুয়ো আর ছঅ জন ঝি এলাক্, মাত্তর্ তা ভেইয়ুনোর বেশ্ পুয়ো-ছা ন-এলাক্। সেনত্তে তারার্ বেক্ গুট্টিগুনো ভিদিরে যিহূদা-গুট্টিগুনো ধোক্ক্যেন এদক্ মানুচ্ ন-এলাক্। 28-31 শিমিয়োন-গুট্টির মানুচ্চুনে বের্-শেবা, মোলাদা, হৎসর-শূয়াল, বিল্হা, এৎসম, তোলদ, বথূয়েল, হর্মা, সিক্লগ, বৈৎ-মর্কাবোৎ, হৎসর-সূষীম, বৈৎ-বিরী আর শারয়িমোত্ বজত্তি গুরিদাক্। দায়ূদোর রাজাগিরি সং এ আদামানি তারার্ এলঅ। 32-33 তারার অন্য আদাম নাঙানি এলঅ ঐটম, ঐন, রিম্মোণ, তোখেন আর আশন। বাল সং এ পাচছান্ আদামর্ চেরোকিত্তে জাগানিয়ো তারার্ অধীনোত্ এলঅ। ইয়েনিত্ তারা বজত্তি গুরিদাক্ আর নিজোর্ এক্কান্ বংশ-নাঙানি রাগেদাক্। 34-38 ইগুনে এলাক্ শিমিয়োন-গুট্টির নানান্ বংশর নেতা: মশোবব, যম্লেক, অমৎসিয়োর্ পুয়ো যোশঃ, যোয়েল আর যোশিবিয়োর পুয়ো যেহূ যিগুনোর্ পূরোণি মানুচ্চুন এলাক্ সরায় আর অসীয়েল। ইগুন্বাদেয়ো এলাক্ ইলিয়ৈনয়, যাকোবা, যিশোহায়, অসায়, অদীয়েল, যিশীমীয়েল, বনায় আর শিফির পুয়ো সীষঃ যিগুনোর্ পূরোণি মানুচ্চুন এলাক্ অলোন, যিদয়িয়, শিম্রি আর শময়িয়। তারার্ বংশর মানুচ্চুনে অমকদ বেশ্ ওইয়োন। 39-40 সেনত্তে এ্যামানপাল চোড়েবার্ বাম্ তোগেবাত্তে এ মানুচ্চুনে গদোরর বারেন্দি কলগ পূগেন্দি যেইনে দোল ঘাস বাম পেলাক্। বামান অজার্ এলঅ, রঅ নেইয়্যে আর নিরিবিলি। আগেন্দি হাম বংশর কিজু মানুচ্ সিদু বজত্তি গুরিদাক্। 41 শিমিয়োন-গুট্টির এই মানুচ্চুনে যিহূদার রাজা হিষ্কিয়োর সময়োত্ সিদু যেইয়োন্। তারা হামীয়গুনোর থেবার্ জাগানিত্ যেইনে তারারে আক্রমণ গুরিলাক্। ইগুনোরে বাদেয়ো তারা সে জাগার্ মিয়ূনীয়গুনোরেয়ো আক্রমণ গুরিনে পুরোপুরিগুরিনে ভস্ত গুরিলাক্। তারার্ আর কনঅ চিহ্নো ন-রলঅ। সে পরেন্দি তারা সে মানুচ্চুনোর জাগানিত্ বজত্তি গরা ধুরিলাক্, কিত্তে তারার্ য়েমানুনোত্তে সিদু বোজোমান ঘাস্ এলঅ। 42 শিমিয়োনীয়গুনোর ভিদিরে পাচশঅ মানুচ্ যিশীর পুয়ো পলটিয়, নিয়রিয়, রফায়িয় আর উষীয়েলরে তারার্ নেতা বানেইনে সেয়ীর নাঙে মুড়োমুড়ি চাগালাগান্ আক্রমণ গুরিলাক্। 43 আগেন্দি অমালেকীয়গুনোর কিজু মানুচ্ সেয়ীরোত্ ধেই এইনে সিদু বজত্তি গুরিলাক্। শিমিয়োনীগুনোর সে মানুচ্চুনোরে মারে ফেলেইনে সিদু বজত্তি গরা ধুরিলাক্। শিমিয়োনীয়গুনে সে মানুচ্চুনোরে মারে ফেলেইনে সিদু বজত্তি গরা ধুরিলাক্। এজঅ সং তারা সিদু বজত্তি গত্তন্। |
Copyright © 2021 Bangladesh Bible Society
Bangladesh Bible Society