১ বংশধর 29 - Chakma Bibleতবনা-ঘর বানেবাত্তে দান 1 রাজা দায়ূদে সে পরেন্দি বেক্ মানুচ্চুনোরে কলঅ, “মর্ পুয়োবো শলোমনরে গোজেনে বেঈ নেযেয়্যে; তার্ বয়জঅ বেজ্ ন-অয় আর অভিজ্ঞতায়ো কম্। এ কামান্ খুব দাঙর্, কিত্তে এ দাঙর্ ঘরান্ গোজেন লগেপ্রভুত্তে, কনঅ মান্জ্যত্তে নয়। 2 মঅ খেমতা মজিম মুই মঅ গোজেন ঘরত্তে ইয়েনি থুবেয়োং-সোনার জিনিজোত্তে সোনা, রূবোর্ জিনিজোত্তে রূবো, পিদল জিনিজোত্তে পিদোল্, লুয়োর্ জিনিজোত্তে লুয়ো আর তক্তার্ জিনিজোত্তে তক্তা। ইয়েনি বাদেয়ো বৈদুর্যমণি, বোজেবাত্তে নানান্ বাবোত্তে মণি, জোল্জোল্যে পাত্তর্, নানান্ রঙর্ পাত্তর্ আর নানান্ বাবোত্তে মংগা পাত্তর্ রাগেয়োং আর ভালোক্কুন্ মার্বেল পাত্তর্অ রাগেয়োং। 3 এ পবিত্র তবনা-ঘরানত্তে মুই যিয়েনি থুবেয়োং সিয়েনি বাদেয়ো মর্ গোজেন ঘরান উগুরে মর্ কোচ্পানার্ কারনে ইক্কিনে মুই মর্ নিজোর্ সোনা আর রূবো দুয়োঙর্। 4-5 সে ঘরান দেবালান্ ঢাগিবাত্তে আর কালিগরুনোর বেক্ কামানিত্তে মুই একশ সতর টন ওফীরোর সোনা আর দ্বিশঅ তেয়োত্তুর্ টন খাটি রূবো দিলুং। এচ্চ্যে তুমি কন্না কন্না হুজি ওইনে লগেপ্রভুর নাঙে নিজোরে উৎসর্ব গুরিনে দান দিবাত্তে চঅ?” 6 সেক্কে বংশর্ নেতাগুনে, ইস্রায়েলীয়গুনোর নানান্ গুট্টির্ নেতাগুনে, আজার সৈন্য আর শত উগুরে সৈন্যর্ সেনাপতিগুনে আর রাজার কামানির চেইচিদিয়্যেগুনে হুজি ওইনে দান গুরিলাক্। 7 গোজেন ঘর কামত্তে তারা একশ পাচানব্বই টন সোনা, দশ আজার্ সোনার অদর্কোন, তিনশ নব্বই টন রূবো, সাতশ দ্বিটন পিদোল্ আর তিন আজার্ নয়শ টন লুয়ো দিলো। 8 যিগুনো ইদু দামী পাত্তর্ এলঅ তারা সিয়েনি লগেপ্রভুর ঘরর্ ভান্ডালত্ রাগেবাত্তে গের্শোনীয় যিহীয়েল আদত্ দিলো। 9 তারা হুজি মনে আর খুলো আদে মন দিইনে লগেপ্রভুরে দি পারিনে হুজি অলাক্। রাজা দায়ূদেয়ো অমকদ হুজি ওইয়্যে। দায়ূদোর তবনা গরানা 10 দায়ূদে বেক্ মানুচ্চুনো মুজুঙোত্ ইয়েন্ কোইনে লগেপ্রভুরে বাঈনী গুরিলো, ও লগেপ্রভু, আমা পুরোণি মানুচ্ ইস্রায়েলর গোজেন, পুরোণি কালত্তুন্ ধুরিনে থুম্ ন-ওইয়্যে কাল সং তরে বাঈনী গোরোদোক্। 11 ও লগেপ্রভু, মহিমা, খেমতা, সয়-সাগোজ্যে, জিদেনা আর বাঈনী পানা তর্, কিত্তে স্বর্গর আর পিত্থিমীর বেক্কানি তর্। ও লগেপ্রভু, তুয়ই বেক্কানি উগুরে রাজাগিরি গরর্; তর্ জাগায়ান্ বেক্কানি উগুরে। 12 ধন আর সর্মান এজেদে তত্তুন্; তুয়ই বেক্কানি শাজন্ গুরি থাচ্। তঅ আদত্ রোইয়্যেদে বল্ আর খেমতা; মান্জ্যরে ভালেদি গুরিবার আর বল্ দিবার্ অধিকারান্ তর্। 13 ইক্কিনে, ও আমার গোজেন্, আমি তরে ভালেদি জানেই, তরে বাঈনী গুরিনে নাঙ্ গিনিই। 14 “মাত্তর্ ও প্রভু, মুই কন্না বা মর্ মানুচ্চুনে বা কন্না, আমি ইঙিরিনে হুজি ওইনে দান গুরি পারিই? বেক্কানি দঅ তত্তুন্ এজে। তঅ আদত্তুন্ যিয়েনি পেইয়োং মুই বানা তরে সিয়েনি দুয়োঙ্। 15 আমি তঅ চোগেন্দি আমা বেক্ পূরোণি মানুচ্চুনো ধোক্ক্যেন পরদেজর্ আদাম্মে। পিত্থিমীত আমা দিনুন্ ছাবা ধোক্ক্যেন, আমার্ কনঅ আজা নেই। 16 ও আমা গোজেন লগেপ্রভু, তর্ পবিত্র নাঙে এক্কান্ ঘর্ বানেবাত্তে ইয়েনি যে ভালোক্কানি জিনিজো আয়োজন আমি গোজ্যেই সিয়েনি তত্তুন এচ্ছ্যে আর বেক্কানি তর্। 17 ও মর্ গোজেন, মুই হবর্ পাঙ্, তুই মনানিরে যগা চাজ্ আর গমত্ হুজি অচ্। এ বেক্ জিনিজ্ছানি মুই হুজি ওইনে আর মন ভোক্তিলোই দুয়োং। ইক্কিনে মুই দেগিনে হুজি অলুং, তঅ মানুচ্চুনে যিগুনে ইদু আগন্ তারায়ো কেধোক্ক্যেন হুজি ওইনে তরে দুয়োন্। 18 ও লগেপ্রভু, আমা পূরোণি মানুচ্ অব্রাহাম, ইসহাক আর ইস্রায়েল গোজেন, তঅ মানুচ্চুনো মনত্ এধোক্ক্যেন আওজ্ তুই জিংকানিবর্ রাগেচ্ আর তঅ উগুরে তারা মনানি বিশ্বেজ্ রাগেচ্। 19 মর্ পুয়ো শলোমনরে এধোক্ক্যেন উজুউস্যে মান্জ্য মন দান গুরিচ্ যেনে তে তঅ উগুমানি, তঅ কধানি আর তঅ সুদোমানি পালেই পারে আর মুই যে পাক্কা ঘরান্ বানেবার্ যুক্কোল গোজ্যং সিয়েন্ বানেই পারে।” 20 পরেন্দি দায়ূদে বেক্ মানুচ্চুনোরে কলঅ, “তুমি তমা গোজেন লগেপ্রভুরে বাঈনী গরঅ।” সেক্কে তারা বেক্কুনে তারার্ পূরোণি মানুচ্চুনোর গোজেন লগেপ্রভুরে বাঈনী গুরিলাক্ আর লগেপ্রভু আর রাজার নাঙে মাদা নিগিরিনে জু জু জানেলাক্। শলোমনে রাজা অলঅ 21 তার্ কেল্যে তারা লগেপ্রভুর নাঙে এ্যামান্-উৎসর্ব আর পুজ্যে-উৎসর্বর অনুষ্ঠানান্ গুরিলাক। বেক্ ইস্রায়েলীয়গুনোত্তে তারা এক আজার বলদ গোরু, এক আজার্ ভেড়াছাগল আর এক আজার্ ভেড়া ছাগল ছঅ উৎসর্ব গুরিলাক্ আর পত্তিবোর্ লগে সুদোম মজিম্ ঢালন-উৎসর্ব আর ভালোক্কুন্ য়েমান দিইনে অন্য উৎসর্ব অনুষ্ঠানান্ গুরিলাক্। 22 সেদিন্যে তারা লগেপ্রভু মুজুঙোত্ অমকদ রংগ-ফুত্তি গুরিনে হানা-দানা গুরিলাক্। তারা দায়ূদো পুয়ো শলোমনরে এ দ্বিবার্ রাজা বিলিনে স্বীগের্ গুরিলাক্ আর তারে রাজা আর সাদোকরে ধর্মগুরু ইজেবে লগেপ্রভুর নাঙে অভিষেগ্ গুরিলাক্। 23 সেক্কে শলোমনে তাহ্ বাপ্পো দায়ূদো জাগানত্ রাজা ইজেবে লগেপ্রভুর সিংহাসনত্ বুজিলো। তে বেক্কানিন্দি গম ফোলেল আর বেক্ ইসায়েল মানুচ্চুনে তা কধা মজিম্ চলিদাক্। 24 বেক্ নেতাগুনে আর সৈন্যগুনে আর রাজা দায়ূদো অন্য পুয়োগুনে রাজা শলোমন অধীনতা স্বীগের্ গুরিলাক্। 25 লগেপ্রভু বেক্ ইস্রায়েল মানুচ্চুনো চোগোত্ শলোমনরে অমকদ দাঙর্ গুরিলো আর তারে এধোক্ক্যেন রাজকীয় বার্ গরানা দান গুরিলো যিয়েন্ ইয়েন আগেন্দি কনঅ রাজা ন-পায়। দায়ূদোর মরানা 26-27 যিশয় পুয়ো দায়ূদে বেক্ ইস্রায়েলান উগুরে চোল্লিশ বজর্ রাজাগিরি গুরিলো-সাত বজর হিব্রোণত্ আর তেত্রিশ বজর যিরূশালেমত্। 28 তে ভালোক্ বজর বাঁজি থেইনে ধন আর সর্মান পেইনে লুঙুরো বুড়ো বয়জত্ মুরি গেলঅ। তার্ পুয়ো শলোমনে তা জাগানত্ রাজা অলঅ। 29 দর্শক শমূয়েলর, ভাববাদী নাথনর আর দর্শক গাদর বিজগ বোইবোত্ রাজা দায়ূদো রাজাগিরির বেক্ কধানি আরাম্ভত্তুন্ ধুরি থুম্ সং লেগা আঘে। 30 তার্ রাজাগিরির্ খুটিনাটি আর খেমতার কধানি আর তারে নিইনে, ইস্রায়েলরে নিইনে আর অন্য দেজর্ বেক্ রেজ্যগানিরে নিইনে যেদক্কানি ঘটনা ঘোট্যে সে কধানিয়ো সিয়েনত্ লেগা আঘে। |
Copyright © 2021 Bangladesh Bible Society
Bangladesh Bible Society