১ বংশধর 28 - Chakma Bibleতবনা-ঘরত্তে দায়ূদোর সল্লা 1 দায়ূদে ইস্রায়েলর বেক্ কামগুরিয়্যেগুনোরে যিরূশালেমত্ এইনে এগত্তর্ অবাত্তে উগুম্ দিলো। ইয়োত্ বেক্ বীর যোদ্ধাগুনে এচ্ছ্যন্। তারা এলাক্কে নানান্ গুট্টির্ নেতা, রাজার্ বারবো গুট্টির্ সৈন্যদলর্ আজল্ সেনাপতিগুন, আজার্ আর শত উগুরে সৈন্যর সেনাপতিগুন, রাজা আর রাজার পুয়োগুনোর গদা সোম্বোত্তির্ চেইচিদিয়্যেগুন, রাজঘরর্ মুরুব্বীগুন আর বীর যোদ্ধাগুন। 2 পরেন্দি রাজা দায়ূদে থিয়্যেইনে তারারে কলঅ, মর্ ভেইয়ূন আর মর্ মানুচ্চুন্, মঅ কধাগান্ গমেডালে শুনো। লগেপ্রভুর সুদোম-সুন্দুক্কোত্তে, অত্তাৎ আমা গোজেন টেঙ্ থবার্ জাগানত্তে এক্কান্ থিদেবর্ গোজ্যে ঘর্ বানেবার্ আওজ্ মঅ মনত্ এলঅ, আর মুই সিয়েন্ বানেবার্ যুক্কোলঅ গোজ্যং। 3 মাত্তর্ গোজেনে মরে কলঅ, মত্তে তুই ঘর্ ন-বানেবে, কিত্তে তুই এক্কো যোদ্ধা আর তুই লো ঝোরেয়োচ্। 4 তো ইস্রায়েল গোজেন লগেপ্রভু জনমভুরি ইস্রায়েল উগুরে রাজা অবাত্তে মঅ গদা গিরিবো ভিদিরেত্তুন্ মরে বেঈ নেযেয়োচ্। তে নেতা ইজেবে যিহূদারে বেঈ লোইয়্যে, সে পরেন্দি যিহূদা-গুট্টিত্তুন্ মঅ বাবঅ বংশবোরে বেঈ নেযেয়্যে আর ইস্রায়েল উগুরে রাজা অবাত্তে তে হুজি ওইনে মঅ ভেইয়ূনো ভিদিরেত্তুন্ মরে বেঈ লোইয়্যে। 5 লগেপ্রভু মরে ভালোক্কুন্ পুয়ো দিয়্যে, আর সে পুয়োগুনো ভিদিরে লগেপ্রভুর রেজ্যগান্ ইস্রায়েল সিংহাসনত্ বোজেবাত্তে তে মঅ পুয়োবো শলোমনরে বেঈ লোইয়্যে। 6 তে মরে কোইয়্যেদে, তঅ পুয়োবো শলোমনে সে মানুচ্চো, যে মঅ ঘরান্ আর উদোনান্ বানেব, মুই তারে মর্ পুয়ো অবাত্তে বেঈ লোইয়োং আর মুই তাহ্ বাপ্ ওম্। 7 যেবাবোত্যে ইক্কিনে গরা অর্ সেধোক্ক্যেন গুরি যুনি তে মঅ উগুমান আর নিদ্দেশ্ছানি পালানা পৌইদ্যেনে ঠিগ্ থায় সালে মুই তাহ্ রেজ্যগান্ উমরত্যে থিদেবর্ গুরিম্। 8 সেনত্তে বেক্ ইস্রায়েলীয়গুনোরে, অত্তাৎ লগেপ্রভু সমাজ মানুচ্চুনোরে আর আমা গোজেন মুজুঙোত্ মুই তমারে এ উগুমান্ দুয়োঙর্, তুমি তমার্ গোজেন্ লগেপ্রভুর বেক্ উগুমানি পালেবাত্তে মনান্ দুয়ো যেনে তুমি এ দোল্ দেজ্ছানত্ থেই পারঅ আর উমরত্তে সোম্বোত্তি ইজেবে তমা বংশধরুনো আদত্ সিয়েনি দি যেই পারে। 9 “আর তুই, মর্ পুয়োবো শলোমন, তুই তঅ বাপ্পো গোজেনরে মুজুঙোত্ রাগেইনে চলিবে আর তঅ মনান্ ঠিগ্ রাগেইনে আর মন আওজে তারে সেবা গুরিবে, কিত্তে লগেপ্রভু পত্তিজনর্ মনানি গমেডালে চায় আর চিদে গরানার্ পত্তিজন উদ্দেশ্যগানি বুঝে। তাহ্ আওজ্সানি জানিবাত্তে চেলে তুই সিয়েনি জানি পারিবে, মাত্তর্ যুনি তুই তারে ছাড়ি যাচ্ সালে তেয়ো তরে উমরত্তে এলাফেলা গুরিবো। 10 ইক্কিনে মনযোগী অ, কিয়া তবনা গুরিবাত্তে এক্কান্ ঘর্ বানেবাত্তে লগেপ্রভু তরে বেঈ লোইয়্যে। তুই বোলী অ আর কাম্ গর্।” 11 সে পরেন্দি দায়ূদে তাহ্ পুয়ো শলোমনরে তবনা-ঘরর্ আস্ছালা, বিল্ডিঙানি, ভান্ডাল্-ঘরানি, উগুরে আর ভিদিরে গুদিগুন্ আর পাপ ঢাগিবার জাগান আরুক্কানি দিলো। 12 লগেপ্রভু ঘরর্ উদোন, সিয়েন চেরোকিত্তে গুদিগুন্, গোজেন ঘরর্ ধনভান্ডালানি আর উৎসর্ব পযাপিরানি রাগেবার্ ভান্ডাল যে আরুক্কানি পবিত্র আত্মা দায়ূদো ইদু ফগদাঙ্ গোজ্যে সিয়েনি বেক্কানি তে শলোমনরে জানেল। 13 ধর্মগুরু আর লেবীয়গুনোর নানান্ দল কামানি, লগেপ্রভু ঘরর্ বেক্ সেবা-কামানি আর সে কামত্ বেবহার বেক্ পযাপিরানি পৌইদ্যেনে তে তারে উগুম্ দিলো। 14 নানান্ বাবোত্তে সেবা-কামানিত্তে যেদক্কানি সোনা আর রূবোর্ জিনিস বেবহার্ গরা পুরিবো তে সিয়েনিত্তে কদক্কানি সোনা আর রূবো লাগিবো সিয়েনি উগুম্ দিলো। 15 পত্তি সোনার চেরাগ টগ্ আর চেরাগত্তে কত্তমান্ সোনা আর বেবহার মজিম পত্তি রূবোর্ চেরাগ টগ্ আর চেরাগত্তে কত্তমান্ রূবো লাগিবো সিয়েন উগমান্ দিলো। 16 মুজুঙো-রুটি রাগেবার্ সোনার টেবিলোত্তে কত্তমান্ সোনা আর রূবোর্ টেবিলোত্তে কত্তমান্ রূবো লাগিবো সিয়েন উগুমান্ দিলো। 17-18 য়েরা তুলিবার কাদা, উৎসর্ব লো রাগেবার কদরা আর কুম্ আর আগর্বাট্টি-পূজোবোত্তে কত্তমান্ খাটি সোনা লাগিবো আর পত্তি সোনা আর রূবোর্ পিলেবোত্তে কত্তমান্ সোনা আর রূবো লাগিবো সিয়েন উগুমান্ দিলো। ইয়েন বাদেয়ো রথ, অত্তাৎ লগেপ্রভুর সুদোম-সুন্দুক্কো ঢাগি রাগেবাত্তে যে সোনার করূব্পুনে ডুয়ো-মেল্যে অবস্থায় থেবাক্ তারাত্তে কত্তমান্ খাটি সোনা লাগিবো তে সিয়েন অ উগুম্ দিলো। 19 দায়ূদে কলঅ, “লগেপ্রভু যে আরুক্কান্ মইদু ফগদাঙ্ গোজ্যে সিয়েন পরিচালনায় মুই সিয়েন্ ছাবেয়োং, আর সে আরুক্কানর্ বেক্কানি বুঝিবার জ্ঞানান্ তে মরে দিয়্যে।” 20 দায়ূদে তাহ্ পুয়ো শলোমনরে এ কধাগান অ কলঅ, “তুই বোলী অ, মনত্ সাহস আন্ আর কাম্ গর্। তুই ন-দোরেচ্, আজা ন-আরেচ্, কিত্তে লগেপ্রভু গোজেন, মর্ গোজেনে তঅ সমারে আঘে। লগেপ্রভুর সেবা-কামত্তে তবনা-ঘর বানেবার বেক্ কামান্ শেজ্ ন-অনা সং তে তরে ছাড়ি ন-যেবঅ বা ফেলেই ন-যেবঅ। 21 গোজেন ঘরর্ বেক্ সেবা-কামানিত্তে নানান্ দল ধর্মগুরু আর লেবীয়গুনে যুক্কোল্ আগন্। বেক্ কামানিত্ তরে বল্ দিবাত্তে কাবিল্ আর আওজ্বলা মানুচ্চুনেয়ো আগন্। নেতাগুনে আর বেক্ মানুচ্চুনে তঅ উগুমান্ মানিবাক্।” |
Copyright © 2021 Bangladesh Bible Society
Bangladesh Bible Society