১ বংশধর 27 - Chakma Bibleসৈন্যগুনোর্ দলভাগ অনা 1 ইগুনে অলাক্ ইস্রায়েলীয় বংশর নেতা, আজার্ আর শত উগুরে সৈন্যর্ সেনাপতি আর তারা অধীনোত্ কাম্গুরিয়্যেগুনো নাঙানি। ইগুনে নানান্ সৈন্যদল বেক্কানি বিষয়ে রাজারে বল্ দিদাক্। বারবো দলর্ এক্কোত্ চোব্বিশ আজার্ সৈন্য এলাক্। পুরো বজর্বো ধুরিনে এক্কো দলে এক মাস গুরিনে কাম্ গুরিদাক্। 2 পৌইল্যে মাসত্তে পত্তম্ সৈন্যদল ভারান্ এলদে সব্দীয়েল পুয়ো যাশবিয়াম উগুরে। 3 তে অলদে পেরস বংশধর। তে পত্তম মাসত্তে বেক্ সেনাপতিগুনোর নেতা এলঅ। তা দলত্ চোব্বিশ আজার্ সৈন্য এলাক্। 4 দ্বিমাসত্তে সৈন্যদল ভারান্ এলঅ অহোহীয় দোদাইয়র উগুরে। তা অধীনোত্ দলনেতা এলঅ মিক্লোৎ। তা দলত্ চোব্বিশ আজার্ সৈন্য এলাক্। 5 তিন মাসত্তে সেনাপতি এলদে ধর্মগুরু যিহোয়াদার পুয়ো বনায়। তে এলদে তিন লম্বর্ দল নেতা। তা দলত্ চোব্বিশ্ আজার্ সৈন্য এলাক্। 6 ইবে সে বনায় যিবে “ত্রিশ” নাঙে বীর যোদ্ধাগুনে দলর্ এক্কো এলঅ আর তেয়ই দল নেতা এলঅ। তা পুয়ো অম্মীষাবাদে তা দলত্ এলঅ। 7 চের্ মাসত্তে চের্ লম্বর্ দল সেনাপতি এলদে যোয়াব ভেই অসাহেল। তার মরাণার পরেন্দি সেনাপতি ওইয়্যেদে তাহ্ পুয়ো সবদিয়। তা দলত্ চোব্বিশ আজার্ সৈন্য এলাক্। 8 পাচ্ মাসত্তে পাচ্ লম্বর্ দল সেনাপতি এলদে যিষ্রাহীয় শমহূৎ। তা দলত্ চোব্বিশ্ আজার্ সৈন্য এলাক্। 9 ছয় মাসত্তে ছয় লম্বর্ দল সেনাপতি এলদে তকোয়ীয় ইক্কেশর পুয়ো ঈরা। তাহ্ দলত্ চোব্বিশ্ আজার্ সৈন্য এলাক্। 10 সাত্ মাসত্তে সাত্ লম্বর্ দল সেনাপতি এলদে পলোনীয় হেলস; তে এলদে ইফ্রয়িম-গুট্টির এক্কো মানুচ্। তাহ্ দলত্ চোব্বিশ আজার্ সৈন্য এলাক্। 11 আস্তো মাসত্তে আস্তো লম্বর্ দল সেনাপতি এলদে হূশাতীয় সিব্বখয়; তে এলদে সেরহ বংশর এক্কো মানুচ্। তাহ্ দলত্ চোব্বিশ্ আজার্ সৈন্য এলাক্। 12 নয় মাসত্তে নয় লম্বর্ দল সেনাপতি এলদে অনাথোতীয় অবীয়েষর; তে এলদে বিন্যামীন-গুট্টির এক্কো মানুচ্। তাহ্ দলত্ চোব্বিশ আজার্ সৈন্য এলাক্। 13 দশ মাসত্তে দশ লম্বর দল সেনাপতি এলদে নটোফাতীয় মহরয়। তে এলদে সেরহ বংশর এক্কো মানুচ্। তাহ্ দলত্ চোব্বিশ আজার্ সৈন্য এলাক্। 14 এগার মাসত্তে এগার দল সেনাপতি এলদে পিরিয়াথোনীয় বনায়। তে এলদে ইফ্রয়িম-গুট্টির এক্কো মানুচ্। তাহ্ দলত্ চোব্বিশ আজার্ সৈন্য এলাক্। 15 বার মাসত্তে বার লম্বর্ দল সেনাপতি এলদে নটোফাতীয় হিল্দয়। তে এলদে অৎনীয়েল বংশর এক্কো মানুচ্। তাহ্ দলত্ চোব্বিশ আজার্ সৈন্য এলাক্। নানান্ গুট্টির্ আজল্ নেতাগুন 16 ইস্রায়েল গুট্টিগুনোর আজল্ নেতাগুনোর নাঙানি ইয়েনি: রূবেণীয়গুনোর নেতা সিখ্রির পুয়ো ইলীয়েষর, শিমিয়োনীয়গুনোর নেতা মাখার পুয়ো শফটিয়, 17 লেবি-গুট্টির নেতা কমূয়েল পুয়ো হশবিয়, হারোণর বংশর নেতা সাদোক, 18 যিহূদা-গুট্টির নেতা দায়ূদো ভেই ইলীহূ, ইষাখর-গুট্টির নেতা মীখায়েল পুয়ো অম্রি, 19 সবূলূন-গুট্টির নেতা ওবদিয় পুয়ো যিশ্মায়য়, নপ্তালি-গুট্টির নেতা অস্রীয়েল পুয়ো যিরেমোৎ, 20 ইফ্রয়িম বংশর নেতা অসসিয় পুয়ো হোশেয়, মনঃশি-গুট্টির অদ্দেক্ মান্জ্য নেতা পদায়র পুয়ো যোয়েল, 21 গিলিয়দত্ বজত্তিগুরিয়্যে মনঃশি-গুট্টির বাদবাগি অদ্দেক্ মানুচ্চুনোর্ নেতা সখরিয় পুয়ো যিদ্দো, বিন্যামীন-গুট্টির নেতা অব্নের পুয়ো যাসীয়েল, 22 দান-গুট্টির নেতা যিরোহম পুয়ো অসরেল। ইগুনে এলাক্ ইস্রায়েল গুট্টিগুনোর আজল্ নেতা। 23 দায়ূদে কুড়ি বা তাত্তুন্ কম্ বয়জ মানুচ্চুনোরে ন-গুণিলো, কিত্তে লগেপ্রভু ইস্রায়েলীয়গুনোরে আগাজ তারা ধোক্ক্যেন গুণি ন-পুড়েইয়্যে গুরিবো বিলিনে এগেম্ গোজ্যে। 24 সরূয়ার পুয়ো যোয়াবে মানুচ্ গণা আরাম্ভ গুরিলো, মাত্তর্ থুম্ গুরি ন-পারে। মানুচ্ গুণিবাত্তে ইস্রায়েল উগুরে লগেপ্রভুর রাগ্কান লামি এচ্ছে। সেনত্তে রাজা দায়ূদোর বিজগ বোইবোত্ মানুচ্চুনোর কুদুক্কুন্ লেগা ন-অয়। রাজার সোম্বোত্তির চেইচিদিয়্যেগুনে 25 রাজার ভান্ডাল চেইচিদিবার্ ভারান্ এলদে অদীয়েলর পুয়ো অস্মাবত উগুরে। ক্ষেত্-খামারত্, শঅরত্, আদামত্ আর চুগি দিবার্ অজল্ ঘরানিত্ যেদক্কানি গুদোম্ এলঅ সিয়েনি চেইচিদিবার্ ভারান্ এলদে উষিয়র পুয়ো যোনাথন উগুরে। 26 চাষ্গুরিয়্যেগুনোর চেইচিদিবার্ ভারান্ এলদে কলূবর পুয়ো ইষ্রির উগুরে। 27 আংগুর ক্ষেদ ভারান্ এলদে রামাথীয় শিমিয়ি উগুরে। আংগুর ক্ষেদত্তুন্ যে আংগুর-রসছান্ পাহ্ যেদঅ সিয়েন ভান্ডাল ভারান্ এলদে শিফমীয় সব্দি উগুরে। 28 পোজিমেন্দি তলে মুড়ো-মুড়ি চাগালার জলপাই আর ডুমুর গাজ ভারান্ এলদে গদেরীয় বাল-হানন উগুরে। জলপাইয় তেল ভান্ডাল ভারান্ এলদে যোয়াশ উগুরে। 29 শারোণত্ যিদুক্কুন্ গোরু পাল্ চড়িদাক্ তারার্ ভারান্ এলদে শারোণীয় সিট্রয় উগুরে। কলগ গোরু পালুনো ভারান্ এলদে অদ্লয় পুয়ো শাফট উগুরে। 30 ইশ্মায়েলীয় ওবীল উগুরে এলদে উদো পালুনো ভারান্। মেরোণোথীয় যেহদিয় উগুরে এলদে গাধা পালুনোর্ ভারান্। 31 ছাগল আর ভেড়াছাগল পালুনোর্ ভারান্ এলদে হাগরীয় যাসীষ উগুরে। রাজা দায়ূদো সোম্বোত্তি চেইচিদিবার্ ভারান্ এলদে এ চেইচিদিয়্যেগুনো উগুরে। 32 দায়ূদো হুট্টোবো যোনাথনে এলদে বুদ্ধিদিয়্যে, বুদ্ধিবলা মানুচ্ আর রাজার লিগিয়্যে। রাজা পুয়োগুনোর শিগেবার্ ভারান্ এলদে হক্মোনির পুয়ো যিহীয়েল উগুরে। 33 অহীথোফলে এলদে রাজার বুদ্ধিদিয়্যে, অর্কীয় হূশয় এলদে রাজার সমাজ্যে। 34 অহীথোফল মরাণার্ পরেন্দি অবীয়াথর আর বনায়র পুয়ো যিহোয়াদা রাজার সল্লাদিয়্যে ওইয়্যে। রাজার সৈন্যদল সেনাপতি এলদে যোয়াবে। |
Copyright © 2021 Bangladesh Bible Society
Bangladesh Bible Society