১ বংশধর 26 - Chakma Bibleমন্ডির চুগিদার দল্লো 1 মন্ডির চুগিদার দল্লোরে নানান্ দলে ভাগ গরা ওইয়্যে। কোরহীয়গুনো ভিদিরেত্তুন্ আসফ বংশর কোরির পুয়ো মশেলিমিয় অলদে বংশ-বাপ্। 2 মশেলিমিয় পুয়োগুন অলাক্, পৌইল্যে সখরিয়, দ্বিলম্বরত্ যিদীয়েল, তিন লম্বরত্ সবদিয়, চের্ লম্বরত্ যৎনীয়েল, 3 পাজ্ লম্বরত্ এলম, ছয় লম্বরত্ যিহোহানন, সাত্ লম্বরত্ ইলিহৈনয়। 4-5 ওবেদ-ইদোমে অলদে বংশ-বাপ্। গোজেনে ওবেদ-ইদোমরে আস্তোবুয়ো পুয়ো দিইনে বর্ দিলো। তাহ্ পুয়োগুন অলাক্, পৌইল্যে শময়িয়, দ্বিলম্বরত্ যিহোষাবদ, তিন লম্বরত্ যোয়াহ, চের্ লম্বরত্ সাখর, পাজ্ লম্বরত্ নথনেল, ছয় লম্বরত্ অম্মীয়েল, সাত লম্বরত্ ইষাখর আর আস্তো লম্বরত্ পিয়ূল্লতয়। 6 ওবেদ-ইদোম পুয়ো শময়িয়র কয়েক্কো পুয়ো এলঅ; তারা পত্তিজনে তারার্ বংশর নেতা এলাক্, কিত্তে তারা অলাক্ বীর যোদ্ধা। 7 শময়িয় পুয়োগুন অলাক্ অৎনি, রফায়েল, ওবেদ, ইল্সাবদ। শময়িয় বংশর ইলীহূ আর সমথিয়য়ো এলঅ খেমতাবলা মানুচ্। 8 ইগুনে বেক্কুনে অলাক্ ওবেদ-ইদোম বংশর মানুচ্। তারা, তারার্ পুয়োগুন আর বংশর মানুচ্চুনে এলাক্কে যোগাজ্যে আর খেমতাবলা। ওবেদ-ইদোম বংশর মানুচ্চুনে বেক্কুনে এলাক্ বাষোট্টি জন। 9 মশেলিমিয় পুয়োগুন আর তাহ্ বংশর মানুচ্চুন এলাক্ খেমতাবলা মানুচ্। তারা এলাক্ বেক্কুনে আদারজন। 10-11 মরারি-বংশর হোষার চের্বো পুয়ো ভিদিরে পৌইল্যে শিম্রি, দ্বিলম্বরত্ হিল্কিয়, তিন লম্বরত্ টবলিয়, চের্ লম্বরত্ সখরিয়। খালিক্ শিম্রি পত্তম্ পুয়ো ন-এলঅ, তা বাবে তারে নেতা পদবিগান্ দিয়্যে। হোষার পুয়োগুন আর তা বংশর মানুচ্চুনে বেক্কুনে এলাক্ তেরজন। 12 নানান্ দলে ভাগ গোজ্যে এ চুগিদারুনে তারা নেতাগুনোর্ অধীনোত্ থেইনে তারা গুট্টি-ভেইয়ুনো ধোক্ক্যেন লগেপ্রভুর ঘরত্ সেবা-কামর্ ভারান্ পেইয়োন্। 13 বংশ মজিম পুয়ো-বুড়ো বেক্কুনোত্তে চাম্বা চাহ্ ওইয়্যে যেনে ঠিগ্ গরা যায় কন্ দল্লো কন্ গেদোত্ চুগি দিবো। 14 পূগেন্দি গেট্টোত্ চাম্বা উদিলো শেলিমিয়র নাঙে। সে পরেন্দি তাহ্ পুয়ো সখরিয়র নাঙে চাম্বা চাহ্ অলে তা নাঙে উত্তোরেন্দি গেট্টোত্ চাম্বাত্ উদিলো। তে এলদে এক্কো জ্ঞানী বুদ্ধিদিয়্যে। 15 দোগিণেন্দি গেট্টোত্ চাম্বাত্ উদিলো ওবেদ-ইদোম নাঙে। ভান্ডাল-ঘরত্তে চাম্বাত্ উদিলো তাহ্ পুয়োগুনো নাঙে। 16-17 পোজিমেন্দি গেট্টোত্ চাম্বাত্ উদিলো শুপ্পীম আর হোষার নাঙে। এ গেট্টো এলদে উগুরেন্দি পথ্তান উগুরে শল্লেখৎ নাঙে গেদো কায়। এ বেক্ লেবীয়গুনে পালা পালা গুরিনে কামানি গুরিদাক্-পূগেন্দি পত্তিদিন ছয়জন, উত্তোরেন্দি চের্জন আর দোগিণেন্দি চের্জন চুগিদার কাম্ গুরিদাক্ আর ভান্ডাল-ঘরত্ দ্বিজন দ্বিজন গুরিনে থেদাক্। 18 পোজিমেন্দি উদোনত্তে পথ্তান ইন্দি চেরজন আর উদোনত্ দ্বিজন থেদাক্। 19 ইয়েন্ অলঅ কোরহ আর মরারি বংশর চুগিদারুনোর দলভাগ। ধনভান্ডালর চেইচিদিয়্যে আর অন্য কাম্গুরিয়্যেগুন্ 20 গোজেন ঘরর ধনভান্ডাল্ আর গোজেন নাঙে যুদো গোজ্যে পযাপিরার্ ধনভান্ডাল চেইচিদেনার্ ভারান্ এলদে বাদবাগি লেবীয়গুনো ভিদিরেত্তুন্ অহিয়োর উগুরে। 21-22 গের্শোনীয় লাদন পুয়ো অলঅ যিহীয়েলি। যিহীয়েলি পুয়ো সেথম আর তাহ্ ভেই যোয়েল উগুরে এলঅ লগেপ্রভু ঘরর্ ধনভান্ডালর দেগাশুনোর্ ভারান্। ইগুনে অলাক্ তারার্ নিজো নিজো বংশর নেতা। 23 অম্রামীয়, যিষ্হরীয়, হিব্রোণীয় আর উষীয়েলীয়গুনোরেয়ো কাম ভারান্ দিয়্যে ওইয়্যে। 24 শবূয়েল নাঙে মোশির পুয়ো গের্শোমর এক্কো বংশধর আজল্ ধন চুগিদার এলঅ। 25 গের্শোম ভেই ইলীয়ষের মাধ্যমে শলোমোৎ এলদে শবূয়েল বংশর মানুচ্। ইলীয়ষের পুয়ো রহবিয়, রহবিয় পুয়ো যিশায়াহ, যিশায়াহ পুয়ো যোরাম, যোরাম পুয়ো সিখ্রি, সিখ্রির পুয়ো শলোমোৎ। 26 রাজা দায়ূদ, ইস্রায়েল নানান্ বংশর নেতাগুন, আজার্ আর শত উগুরে সৈন্যর সেনাপতিগুন আর বেগঅ দাঙর্ সেনাপতিগুন যেদক্কানি পযাপিরা গোজেন নাঙে যুদো গুরি রাগেয়োন্ শলোমৎ আর তা বংশর মানুচ্চুনে সে পযাপিরানির ভান্ডালর্ চেইচিদিয়্যে এলাক্। 27 যুদ্ধোত্ লুদেয়্যে কয়েক্কান্ পযাপিরা তারা লগেপ্রভুর ঘর্ ঠিগ্ গুরিবাত্তে তার্ নাঙে যুদো গুরি রাগেয়োন্। 28 ইয়েনবাদে দর্শক শমূয়েল, কীশর পুয়ো শৌল, নেরর পুয়ো অব্নের আর সরূয়ার পুয়ো যোয়াবে যেদক্কানি পযাপিরা গোজেন নাঙে যুদো গুরি রাগেয়োন্, আজল্ কধা, বেক্ যুদো গোজ্যে পযাপিরানি চেইচিদিবার্ ভারান্ এলদে শলোমোৎ আর তা বংশর মানুচ্চুনো উগুরে। 29 যিষ্হরীয়গুনো ভিদিরেত্তুন্ কননিয় আর তাহ্ পুয়োগুনে তবনা-ঘরর্ কামত্ নয়, মাত্তর্ ইস্রায়েল দেজ উগুরে নেতা আর বিচেরগ কামত্ নেযা অলঅ। 30 হিব্রোণীয়গুনো ভিদিরেত্তুন্ হশবিয় আর তা বংশর এক আজার্ সাতশ খেমতাবলা মানুচ্ লগেপ্রভুর আর রাজার বেক্ কামানি গুরিবাত্তে যর্দন গাঙর্ পোজিমেন্দি ইস্রায়েলীয়গুনো উগুরে দিয়্যে অলঅ। 31 হিব্রোণীয়গুনো ভিদিরে যিরিয় এলদে নেতা। দায়ূদো রাজাগিরির্ চোল্লিশ বজরত্ তারার্ বংশ-নাঙানি ভিদিরে থগা অলঅ আর গিলিয়দ যাসেরত্ হিব্রোণীয়গুনো ভিদিরে বোউত্ বীর্ যোদ্ধা পাহ্ গেলঅ। 32 যিরিয় বংশর দ্বিআজার্ সাতশঅ জন মানুচ্ খেমতাবলা এলাক্। তারা অলাক্ নিজো নিজো গিরির্ নেতা। রাজা দায়ূদে গোজেন আর রাজার বেক্ কামানি গুরিবাত্তে রূবেণীয়, গাদীয় আর মনঃশি-গুট্টির্ অদ্দেক্ মান্জ্য উগুরে এ হিব্রোণীয়গুনোরে নেযা অলঅ। |
Copyright © 2021 Bangladesh Bible Society
Bangladesh Bible Society