১ বংশধর 24 - Chakma Bibleধর্মগুরুগুনো দল্লো ভাগ অনা 1 হারোণ বংশর মানুচ্চুনোরে নানান্ দলে ভাগ গরা ওইয়্যে। হারোণ পুয়োগুন অলাক্ নাদব, অবীহূ, ইলিয়াসর আর ঈথামর। 2 হারোণে মুরি যেবার্ আগেন্দি নাদব আর অবীহূ কনঅ পুয়ো ন-রাগেইনে মুরি গেলাক্; সেনত্তে ইলিয়াসর আর ঈথামর ধর্মগুরুগুনোর কামানি গুরিদাক্। 3 সাদোক নাঙে ইলিয়াসরর এক্কো বংশধর আর অহীমেলক নাঙে ঈথামরর এক্কো বংশধর বলে দায়ূদ ধর্মগুরুগুনোর কামানি অনুসারে তারারে নানান্ দলে ভাগ গুরি দিলো। 4 ইয়োত্ ঈথামর বংশর মানুচ্চুনোত্তুন্ ইলিয়াসর বংশর মানুচ্চুনো ভিদিরে ভালোক্কুন্ নেতা পাহ্ গেলঅ। সেনত্তে ইলিয়াস বংশর ষুলোজন নেতাত্তে তারা ষুলো দলে আর ইথামর বংশর আস্তোজন নেতাত্তে তারারে আস্তো দলে ভাগ্ গরা অলঅ। 5 ইলিয়াসর আর ঈথামর, এ দ্বিবে বংশর নেতাগুনে তবনা-ঘরর্ আর গোজেনর কামগুরিয়্যে এলাক্ বিলিনে কার পক্ষেন্দি ন-টানিনে চাম্বা চেইনে ধর্মগুরুগুনোর কামানি ভাগ গরা অলঅ। 6 রাজা আর তা উগুরে পোজিশনর কামগুরিয়্যেগুনো মুজুঙোত্ আর ধর্মগুরু সাদোক, অবিয়াথর পুয়ো অহীমেলক, ধর্মগুরু বংশর নেতাগুনোর আর লেবীয়গুনো মুজুঙোত্ নথনেল পুয়ো শমরিয় নাঙে এক্কো লেবীয় লিগিয়্যে চাম্বা অনুসারে সে নেতাগুনোর নাঙানি লিগিলো। গাদা পাল্লা গুরিনে ইলিয়াসর নানান্ বংশর ভিদিরেত্তুন্ একজন আর সে পরেন্দি ঈথামর নানান্ বংশর ভিদিরেত্তুন্ একজনত্তে চাম্বা চাহ্ অলঅ। 7 সেক্কে পৌইল্যা লম্বরত্ চাম্বাত্ উদিলো যিহোয়ারীবোর নাঙে, দ্বিলম্বরত্ যিদয়িয়োর নাঙে, 8 তিন্ লম্বরত্ হারীমোর নাঙে, চের্ লম্বরত্ সিয়োরীমোর নাঙে, 9 পাচ্ লম্বরত্ মল্কিয়ের নাঙে, ছঅ লম্বরত্ মিয়ামীনর নাঙে, 10 সাত্ লম্বরত্ হক্কোষর নাঙে, আট লম্বরত্ অবিয়োর নাঙে, 11 নয় লম্বরত্ যেশূয়োর নাঙে, দশ লম্বরত্ শখনিয়োর নাঙে, 12 এগার লম্বরত্ ইলীয়াশীবোর নাঙে, বার লম্বরত্ যাকীমোর নাঙে, 13 তের লম্বরত্ হুপ্পোর নাঙে, চোদ্দো লম্বরত্ যেশবাবর নাঙে, 14 পনর লম্বরত্ বিল্গার নাঙে, ষুলো লম্বরত্ ইম্মেরর নাঙে, 15 সতর লম্বরত্ হেষীরোর নাঙে, আদার লম্বরত্ হপ্পিসেসর নাঙে, 16 ঊনেশ লম্বরত্ পথাহিয়োর নাঙে, কুড়ি লম্বরত্ যিহিষ্কেলর নাঙে, 17 এগোশ্ লম্বরত্ যাখীনোর নাঙে, বেইশ্ লম্বরত্ গামূলোর নাঙে, 18 তেইশ্ লম্বরত্ দলায়র নাঙে আর চব্বিশ্ লম্বরত্ মাসিয়োর নাঙে। 19 তারার্ পুরোণি বুড়ো-বুড়ি হারোণরে দিয়্যে ইস্রায়েলর্ গোজেন লগেপ্রভুর উগুম্ মজিম হারোণে তারাত্তে যে সুদোমান্ ঠিগ্ গুরি দিয়্যে সেধোক্ক্যেন গুরি লগেপ্রভুর ঘরত্ যেইনে সেবা-কাম্ গুরিবাত্তে ইঙিরিনে তারারে পাল্লা ঠিগ্ গরা অলঅ। লেবীয়গুনোর নানান্ বংশ-নেতা 20-21 লেবি-গুট্টির বাদবাগি বংশগুনোর কধানি ইয়েনি: অম্রাম বংশর শবূয়েল আর রহবিয় এলদে বংশর বাপ; শবূয়েল বংশ-নেতা যেহদিয় আর রহবিয় বংশ-নেতা যিশিয়। 22 যিষ্হর বংশর বাপ্ শলোমীৎ আর শলোমীৎ বংশ-নেতা যহৎ। 23 হিব্রোণ বংশ ভিদিরে পৌইল্যে যিরিয়, দ্বিলম্বরত্ অমরিয়, তিন লম্বরত্ যহসীয়েল আর চের্ লম্বরত্ যিকমিয়াম অলদে বংশর বাপ্। 24-25 ঊষীয়েল বংশর মীখা আর যিশিয় এলদে বংশর বাপ্; মীখার বংশ-নেতা শামীর আর যিশিয়র বংশ-নেতা সখরিয়। 26 মরারি পুয়ো মহলি, মূশি আর যাসিয়; 27 যাসিয় বংশর বিনো শোহম, শক্কুর আর ইব্রি এলদে বংশর বাপ্। 28 মহলি বংশর ইলিয়াসর আর কীশ; ইলিয়াসর কনঅ পুয়ো ন-এলাক্। 29 কীশর বংশ-নেতা এলদে যিরহমেল। 30 মূশির বংশর মহলি, এদর আর যিরেমোৎ এলদে বংশর বাপ্। নানান্ বংশ অনুসারে ইগুনে অলাক্ লেবীয়। 31 ইগুনেয়ো রাজা দায়ূদ, সাদোক, অহীমেলক আর ধর্মগুরু আর লেবীয়গুনোর বংশ-নেতাগুনোর মুজুঙোত্ ইগুনো ভেইয়ুনোরে, অত্তাৎ হারোণ বংশর মানুচ্চুনো ধোক্ক্যেন গুরিনে চাম্বা চেয়োন্। দাঙর্ ভেইবো ওক্ বা চিগোন্ ভেইবো ওক্ তারা বেক্কুনোত্তে এক্কুই চাম্বা চাহ্ ওইয়্যে। |
Copyright © 2021 Bangladesh Bible Society
Bangladesh Bible Society