১ বংশধর 23 - Chakma Bible1 দায়ূদে যেক্কে লুম্বুর বুড়ো ওই গেলঅ সেক্কে তা পুয়ো শলোমনরে তে ইস্রায়েল উগুরে রাজা বানেল। লেবীয়গুনোর দল্লো ভাগ অনা 2 দায়ূদে ইস্রায়েল বেক্ নেতাগুনোরে, ধর্মগুরুগুনোরে আর লেবীয়গুনোরে এগত্তর্ গুরিলো। 3 যিদুক্কুন্ লেবীয় মরদ ত্রিশ বা তাত্তুন্ বেশ্ বয়জর্ এলাক্ তারারে গুণিনে দেগা গেলদে তারা জনেন্দি আত্রিশ আজার্। 4-5 ইগুনো ভিদিরে চব্বিশ আজার্ জন লগেপ্রভু ঘর কামানি দেগাশুনো গুরিবাত্তে নেযা অলঅ আর ছয় আজার্ জন অফিসার অলাক্ আর বিচেরক্ আহ্ চের্ আজার্ জন চুগিদার অলাক্। দায়ূদে যিদুক্কুন্ বাজনা বানেয়্যে সিয়েনি বেবহার গুরিনে লগেপ্রভুরে নাঙ্ গিনিবাত্তে বাদবাগি চের্ আজার্ লেবীয় নেযা অলঅ। 6 লেবির পুয়ো গের্শোন, কহাৎ আর মরারি গুট্টি অনুসারে দায়ূদ লেবীয়গুনোরে তিন্নো দলে ভাগ গুরিলো। 7 গের্শোন গুট্টিগুনো ভিদিরে এলাক্কে লাদন আর শিমিয়ি। 8 লাদনর তিন্নো পুয়ো ভিদিরে আজল্লো এলদে যিহীয়েল, সে পরেন্দি সেথম আর যোয়েল। 9 শিমিয়ির তিন্নো পুয়ো অলাক্ শলোমৎ, হসীয়েল আর হারণ। ইগুনে অলাক্ লাদন নানান্ গুট্টির্ নেতা। 10 শিমিয়ির চের্বো পুয়ো অলাক্ যহৎ, সীন, যিয়ূশ আর বরীয়। 11 ইগুনো ভিদিরে পত্তম অলদে যহৎ আর দ্বিলম্বরত্ অলদে সীন; মাত্তর্ যিয়ূশ আর বরীয়র পুয়োগুন্ কম্ এলাক্ বিলিনে তারার্ বেক্কুনোরে এক্কো বংশর ভিদিরে ধরা অলঅ। 12 কহাতর চের্বো পুয়ো অলাক্ অম্রাম, যিষ্হর, হিব্রোণ আর উষীয়েল। 13 অম্রামর পুয়োগুন অলাক্ হারোণ আর মোশি। হারোণ আর তা বংশধরুনোরে উমরত্তে গোজেনর নাঙে ফারক্ গরা অলঅ যেনে তারা মহাপবিত্র জিনিসছানির ভারান্ নেযেই পারন্, লগেপ্রভুর মুজুঙোত্ আগুনোত্ গোজ্যে উৎসর্ব পরব্পো গুরি পারন্, তা মুজুঙোত্ সেবা-কাম্ গুরি পারন্ আর তা নাঙে বর্ দি পারন্। 14 মাত্তর্ গোজেন মানুচ্ মোশির পুয়োগুনোরে বাদবাগি লেবীয়গুনো ভিদিরে ধরা অদঅ। 15 মোশি পুয়োগুন অলাক্ গের্শোম আর ইলীয়েষর। 16 গের্শোম বংশধরুনো ভিদিরে শবূয়েল এলদে নেতা। 17 ইলীয়েষর বংশধরুনো ভিদিরে রহবিয় এলদে নেতা। ইলীয়েষর আর কনঅ পুয়ো ন-এলাক্, মাত্তর্ রহবিয় পুয়ো ভালোক্কুন্ এলাক্। 18 যিষ্হর বংশধরুনো ভিদিরে শলোমীৎ এলদে নেতা। 19 হিব্রোণ পুয়োগুনো ভিদিরে পৌইল্যে এলদে যিরিয়, দ্বিলম্বরত্ অমরিয়, তিন লম্বরত্ যহসীয়েল আর চের্ লম্বরত্ যিকমিয়াম। 20 উষীয়েল পুয়োগুনো ভিদিরে মীখা এলদে পত্তম আর যিশিয় অলদে দ্বিলম্বরত্। 21 মরারি পুয়োগুন অলাক্ মহলি আর মূশি। মহলি পুয়োগুন অলাক্ ইলিয়াসর আর কীশ। 22 ইলিয়াসরে কনঅ পুয়ো ন-রাগেইনে মুরি গেলঅ, তার্ বানা ঝি এলাক্। কীশোর পুয়োগুন, অত্তাৎ তারা হুট্টোবো পুয়োগুনে সে মিলেগুনোরে মোক্ ললাক্। 23 মূশির তিন্নো পুয়ো অলদে মহলি, এদর আর যিরেমোৎ। লেবীয়গুনোর কামানি 24 ইগুনে অলাক্ বংশ অনুসারে লেবি-গুট্টির নানান্ বংশর নেতা। ইগুনো বংশ মানুচ্চুনো ভিদিরে যিগুনোর বয়স এলদে কুড়ি বা তাত্তুন্অ বেজ্ তারারে গুণিনে নাঙানি লেগা ওইয়্যে, আর তারা অলাক্ লগেপ্রভুর ঘরর্ সেবাগুরিয়্যে। 25 দায়ূদে কোইয়্যেদে, “ইস্রায়েলর গোজেন লগেপ্রভু তা মানুচ্চুনোরে সুগ্-শান্দি দিয়্যে আর তে জনমত্তে যিরূশালেমত্ বজত্তি গুরিবো। 26 সেনত্তে সেবা-কামত্ বেবহার্ গুরিবাত্তে থেবার-তাম্বুল্ বা অন্য কনঅ জিনিস লেবীয়গুনোত্তুন্ আর বুয়োই নেযা ন-পুরিবো।” 27 দায়ূদোর যের উগুমান্ অনুসারে কুড়ি বজরত্তুন্ ধুরি আরাম্ভ গুরিনে তাত্তুন্ বেজ্ বয়জর্ লেবীয়গুনোরে গণা ওইয়্যে। 28 এ লেবীয়গুনোর্ কামান্ এলদে লগেপ্রভু ঘরর্ সেবা-কামত্ হারোণ বংশধরুনোরে বল্ দেনা। ইয়েনি ভিদিরে এলদে তবনা-ঘরর্ উদোন্ আর কায়-কুরে গুদিগুন্ দেগাশুনো গরানা, বেক্ পবিত্র জিনিসছানি সিজি গুরি নেযানা আর গোজেন ঘরর্ অন্য কামানি গরানা। 29 তারা উগুরে এ জিনিসছানির ভারান্ এলঅ-মুজুঙো-রুটি, শোজ্য-উৎসর্বর মোয়দে, সদানেইয়্যে রুটি, সেক্ক্যে রুটি আর তেল্ মিজেয়্যে মোয়দ্যে। ইয়েনি বাদেয়ো তারা উগুরে ভারান্ এলদে বেক্কানি মাবানা আর কত্তমান্ সিয়েনি চানা, 30-31 পত্তি দিন বেন্যে আর বেল্যে থিয়্যেইনে লগেপ্রভুরে ভালেদি আর নাঙ্গিনেনা আর জিরেবার দিন্নোত্, আঙোস্যে পরবত্ আর অন্য ঠিগ্ গোজ্যে পরবত্ যেক্কে লগেপ্রভুর নাঙে পূজ্যে-উৎসর্বর অনুষ্ঠানান্ গরা অয় সেক্কেয়ো লগেপ্রভুরে ভালেদি জানানা আর নাঙ্ গিনেনা। লগেপ্রভুর্ মুজুঙোত্ সুদোম মজিম, তা উগুম্ মজিম আর গুণ্যে মানুচ্চো তারার্ সেবা-কামানি গরা পুরিবো। 32 ইঙিরিনে লেবীয়গুনে মিলন-তাম্বুলোর আর পবিত্র জাগানি দেগাশুনো গুরিদাক্ আর লগেপ্রভুর ঘর সেবা-কামত্তে তারার্ ভেই হারোণ বংশধরুনো অধীনোত্ কাম্ গুরিদো। |
Copyright © 2021 Bangladesh Bible Society
Bangladesh Bible Society