১ বংশধর 22 - Chakma Bible1 ইয়েন পরেন্দি দায়ূদে কলঅ, “গোজেন লগেপ্রভুর ঘর আর ইস্রায়েলর পূজ্যে-উৎসর্বর ডালিপূজো ঘরান্ ইয়োদোই অবঅ।” তবনা-ঘরত্তে যুক্কোল্ 2 নানান্ জাদর্ যিদুক্কুন্ মানুচ্ ইস্রায়েল্ দেজত্ বজত্তি গুরিদাক্ দায়ূদে উগুম্ দিলো যেনে তারারে এগত্তর্ গরা অয়। তারা ভিদিরেত্তুন্ তে পাত্তর্ কাবিয়্যে মানুচ্চুনোরে বেঈ নেযা অলঅ যেনে গোজেন ঘরান্ বানেবাত্তে তারা পাত্তর্ কাবিনে-চাজিচাজাই যুক্কোল্ গরা অয়। 3 গেট্টুনোর্ পেরেক্ আর কব্জাগানত্তে তে ভালোক্কানি লুয়ো দিলো, এদক্ পিদোল্ দিলো, সিয়েনি মাবা ন-গেলঅ। 4 ইয়েনি বাদেয়ো তে বোউত্ এরস গাজঅ তক্তায়ো দিলো, কিত্তে সীদোনীয় আর সোরীয়োগুনে দায়ূদোরে ভালোক্কানি এরস তক্তা আনি দিলাক্। 5 দায়ুদে কলঅ, “মর্ পুয়োবো শলোমন বয়সছান কম্ আর তার্ অভিজ্ঞতায়ো কম্, মাত্তর্ লগেপ্রভুত্তে যে ঘরান্ বানা পড়িবো সিয়েন্ যেনে বেক্ জাদ্তুনো চোগোত্ নাঙ্গোজ্যে আর যদবদে আর বাঈনী গরে পারা অয়। সেনত্তে তাত্তে মুই বেক্কানি যুক্কোল্ গুরি রাগেম্।” ইয়েন্ কোইনে দায়ূদে তার্ মুরিবার আগেন্দি ভালোক্কানি আয়োজন গুরি রাগেল। 6 সে পরেন্দি তে তার্ পুয়ো শলোমনরে ডাগিনে তা উগুরে ইস্রায়েল গোজেন লগেপ্রভুত্তে এক্কান্ ঘর্ তুলোনা কামান্ দিলো। 7 দায়ুদ শলোমনরে কলঅ, বাবা, মর্ গোজেন লগেপ্রভুত্তে এক্কান্ ঘর্ বানেবার আওজ্ মঅ মনত্ এলঅ। 8 মাত্তর্ লগেপ্রভুর এ কধাগান মরে জানা অলঅ, তুই বোউত্ লো ঝোরেয়োচ্ আর বোউত্ যুদ্ধোয়ো গোজ্যস্। তুই মত্তে ঘর্ ন-বানেবে, কিত্তে মঅ চোগো মুজুঙোত্ তুই পিত্থিমীত্ বোউত্ লো ঝোরেয়োচ্। 9 মাত্তর্ তর্ এক্কো পুয়ো অবঅ যে সুগ্-শান্দিয়্যে থেবাত্তে গম্ পেবঅ। তা চেরোকিত্তে শত্রুগুনো আদত্তুন্ মুই তারে সুগে-শান্দিয়্যে রাগেম্। তা নাঙান্ অবঅ শলোমন (যিয়েনর্ ভেদ্তান্ শান্তি), কিত্তে মুই তার্ রাজাগিরি সময়োত্ ইস্রায়েলরে সুগে-শান্দিয়্যে আর গমেডালে রাগেম্। 10 তে মত্তেই এক্কান্ ঘর্ বানেব। তে অবঅ মর্ পুয়ো আর মুই ওম্ তা বাব্। ইস্রায়েল উগুরে তার্ রাজাগিরি মুই উমরত্তে থিদেবর্ গুরিম্। 11 ইক্কিনে ও মর্ পুয়োবো, লগেপ্রভু তঅ লগে থোক্; তুই ভালেদি গর্ আর লগেপ্রভুর কধামজিম্ তর্ গোজেন্ লগেপ্রভুর ঘরান্ বানেই নেযা। 12 লগেপ্রভু তঅ উগুরে যেক্কেনে ইস্রায়েলর শাজন্ গুরিবার্ ভারান্ দিবো সেক্কে যেনে তে তরে বুদ্ধি-বিবেচনা আর বুঝিবার বলান্ দে যেনে তুই তর্ গোজেন লগেপ্রভুর রীদি-সুদোম মানিনে চলি পারচ্। 13 মোশির মাধ্যমে লগেপ্রভু ইস্রায়েলরে যে সুদোমান্ আর উগুমান্ দিয়্যে সিয়েন্ যুনি তুই গমেডালে পালাচ্ সালে তুই ভালেদি গুরি পারিবে। তুই বোলী অ আর মনত্ সাহস রাগা। ন-দোরেচ্ আজা ন-আরেচ্। 14 “মুই বোউত্ দুগ্ গুরিনে লগেপ্রভু ঘরত্তে তিন আজার্ নয়শ টন সোনা আর ঊনচোল্লিশ আজার্ টন রূবো রাগেয়োং। ইয়েনিবাদে এদক্ বেশ্ পিদোল্ আর লুয়ো রাগেয়োং যিয়েনি মাবানা সম্ভব নয়, আর তক্তা আহ্ শিলঅ ঠিগ্ গুরি রাগেয়োং। হামাক্কাই ইয়েন সমারে তুয়ো কিজু দি পারিবে। 15-16 তর্ ভালোক্কুন্ কামঅ মানুচ্ আগন; তারা অলাক্ শিল্ কাবেদে কালিগর, রাজকালিগর আর গাজ কালিগর। ইগুন্ বাদেয়ো আগন্ অন্য নানান্ বাবোত্যে কাম্ গুরিবার কাবিদ্যং মানুচ্ যিগুনে সোনা, রূবো, পিদোল আর লুয়োর্ কাম্ গুরি পারন্। এ কালিগরুন্ ভালোক্কুন। ইক্কিনে তুই কাম্ আরাম্ভ গুরি দে আর লগেপ্রভু তঅ সমারে থোক্।” 17 দায়ূদে সে পরেন্দি তা পুয়ো শলোমনরে বল্ দিবাত্তে ইস্রায়েলর বেক নেতাগুনোরে উগুম দিইনে কোইয়্যেদে, 18 “তমা গোজেন লগেপ্রভু কি তমা সমারে নেই? তে কি বেক্কানিন্দি তরে সুগ-শান্দি নঅ-দে? তে দঅ এ দেজর্ মানুচ্চুনোরে মঅ আদত্ তুলি দিয়্যে আর দেজ্ছান লগেপ্রভু আর তা মানুচ্চুনোর্ অধীন্ ওইয়্যে। 19 ইক্কিনে তুমি তমার গোজেন লগেপ্রভুর আওজ্ছান জানেবাত্তে তমা বেক্ মনান্-পরাণান্ ঠিগ্ গর আর লগেপ্রভুর নাঙে তার্ পবিত্র ঘরান্ বানেবাত্তে আরাম্ভ গুরি দুয়ো, যেনে সিয়েন ভিদিরে লগেপ্রভুর সুদোম-সুন্দুক্কো আর গোজেন পবিত্র জিনিসছানি আনিনে রাগা যায়।” |
Copyright © 2021 Bangladesh Bible Society
Bangladesh Bible Society