১ বংশধর 20 - Chakma Bibleরব্বা অধিকারান্ 1 ফাগোন-চোত্ মাজত্ যেক্কেনে রাজাগুনে সচরাসর্ যুদ্ধো গুরিবাত্তে নিগিলিদাক্ সেক্কে যোয়াবে সৈন্যদলুন্ লোইনে নিগিলিদো। তে অম্মোনীয়গুনোর দেজ্ছানরে ভস্ত গুরি দিইনে রব্বাত যেইনে সিয়েন্ ঘিরিলো। মাত্তর্ দায়ূদে যিরূশালেমত্ থেলঅ। যোয়াবে রব্বাগান্ আক্রমণ গুরিনে সিয়েন্ ভস্ত গুরি দিলো। 2 দায়ূদে সিদুগো রাজার্ মাদাবোত্তুন্ মুকুটটো খুলি নেযেল। সিবে পেরায়্ চোত্রিশ কেজি সোনালোই বানেয়্যে এলঅ, আর সিবেত্ দামী পাত্তর্ বোজেয়্যে এলঅ। মুকুটটো দায়ূদো মাদাথ্ পিনেই দিয়্যে অলঅ। দায়ূদে সে শঅরত্তুন্ ভালোক্কানি লুদেয়্যে পযাপিরা নেযেল। 3 তে শঅর মানুচ্চুনোরে নিগিলেই আনিলো আর আরা, খন্দা আর কুড়োল্লোই তারারে কাবি ফেলেল। অম্মোনীয়গুনোর বেক্ শঅরানিত্অ তে সেধোক্ক্যেন গুরিলো। ইয়েন পরেন্দি দায়ূদে তার্ বেক্ সৈন্যদলুন্ লোইনে যিরূশালেমত্ ফিরি গেলঅ। পলেষ্টীয়গুনো লগে যুদ্ধো 4 যেরেন্দি গেষরত্ পলেষ্টীয়গুনো লগে যুদ্ধো আরাম্ভ অলঅ। সে অক্তত্ হূশাতীয় সিব্বখয় রফায়ীয়গুনোর বংশর সিপ্পয় নাঙে একজনরে মারে ফেল্যন্, আর সেক্কে পলেষ্টীয়গুনে উদিই গেলাক্। 5 পলেষ্টীয়গুনো লগে আর এক্কো যুদ্ধোত্ যায়ীর পুয়ো ইল্হানন গাতীয় গলিয়াতর ভেই লহমিরে মারে ফেল্যন্। তা শেল্লো অলদে বেন বুনিয়েগুনোর্ বিয়োঙ ধোক্ক্যেন। 6 গাতদ্ আর একবার যুদ্ধো ওইয়্যে। সে যুদ্ধোত্ এক্কো লাম্বা মানুচ্ এলঅ যিবের্ দ্বিআদত্ আর দ্বিটেঙত্ ছোবো গুরিনে বেক্কুনে চব্বিশছুয়ো আঙুল্ এলাক্। তেয়ো এলদে এক্কো রফায়ীয়। 7 তে যেক্কেনে ইস্রায়েল জাত্তোরে ঈচ্ গুরিলো সেক্কে দায়ূদো ভেই শিমিয় পুয়ো যোনাথনে তারে মারে ফেলেল। 8 গাতর্ এ মানুচ্চুনে অলাক্ রফা বংশর মানুচ্। দায়ূদ আর তা মানুচ্চুনোর আদত্ ইগুনে মারা পড়িলাক্। |
Copyright © 2021 Bangladesh Bible Society
Bangladesh Bible Society