১ বংশধর 19 - Chakma Bibleঅম্মোনীয়গুনো লগে যুদ্ধো 1 পরেন্দি অম্মোনীয় রাজা নাহশে মুরি যানার্ পরেন্দি তার্ পুয়ো হানূনে তা জাগানত্ রাজা অলঅ। 2 দায়ূদে কলদে, “হানূনোর বাপ্পো নাহশে মঅ উগুরে বিশ্বেজি এলঅ বিলিনে মুইয়ো হানূনো উগুরে বিশ্বেজি থেম্।” সেনত্তে তা বাপ্পো মুরিবার্ অক্তত্ তারে বুঝেবাত্তে তে কয়েক্কো মানুচ্ পাধেই দিলো। দায়ূদো মানুচ্চুনে হানূনরে বুঝেবাত্তে অম্মোনীয়গুনো দেজত্ গেলাক্। 3 মাত্তর্ অম্মোনীয় নেতাগুনে হানূনরে কলাক্কে, “তুই কি মনে গরচ্, দায়ূদে তঅ বাবরে সর্মান দেগেবাত্তে তরে বুঝেবাত্তে মানুচ্ পাদেয়্যে? তে তারারে তইদু পাদেয়্যে যেনে তারা এস্পাই ইজেবে দেজ হবর্ নেযেইনে পরেন্দি সিয়েন্ ভস্ত গুরি দি পারন্।” 4 হানূনে সেক্কে দায়ূদো মানুচ্চুনোরে ধুরিনে তারা দাড়িগানি মুড়েই দিলো আর লাম্বা সিলুমুনোর্ অদ্দেক্, অত্তাৎ কমর্ সং কাবি দিইনে তারারে বিদেয় গুরি দিলো। 5 কনঅ মানুচ্ এইনে দায়ূদোরে সে মানুচ্চুনোরে কি গরা ওইয়্যে সিয়েন্ জানেলে পরেন্দি তার্ পাদেয়্যে সে মানুচ্চুনোর লগে দেগা গুরিবাত্তে তে কয়েক্কো মানুচ্ পাধেই দিলো, কিত্তে সে মানুচ্চুনে অমকদ লাজত্ পোজ্যন্। রাজা তারারে কোই পাদেল, “তমা দাড়িগানি ন-উদোনা সং তুমি যিরীহোত্ থাগঅ; সে পরেন্দি তুমি ফিরি এচ্চ্য।” 6 অম্মোনীয়গুনে যেক্কে বুঝি পারিলাক্, তারা দায়ূদোর ইদু নিজোরে ফেলা যেইয়্যে মান্জ্য ধোক্ক্যেন গোজ্যন্, সেক্কে হানূনে আর অম্মোনীয়গুনে অরাম-নহরয়িম, অরাম-মাখা আর সোবাত্তুন্ রথ আর রথ চালেয়্যেগুনোরে ভাড়া গুরি আনিবাত্তে ঊনচোল্লিশ আজার্ কেজি রূবো পাধেই দিলো। 7 তারা বত্রিশ আজার্ রথ আর সৈন্যদল সুদ্ধো মাখার রাজারে ভাড়া গুরিলাক্। তে আর তার্ সৈন্যগুনে এইনে মেদবা ইদু তাম্বুলান্ টাঙেলাক্ আর এককিত্তেন্দি অম্মোনীয়গুনে নিজোর নিজোর শঅরত্তুন্ এগত্তর্ ওইনে যুদ্ধোত্তে নিগিলিলাক্। 8 ইয়েনি শুনিনে দায়ূদে যোয়াবরে আর তার্ বেক্ সৈন্যদল্লোরে পাধেই দিলো। 9 সেক্কে অম্মোনীয়গুনে নিগিলিনে তারার্ শঅরর্ গেদোত্ সুমিবার পথ্তানত্ যুদ্ধোত্তে সৈন্য সাজেলাক্। ইন্দি যে রাজাগুনে এচ্ছ্যন্ তারা এনেবাদে মাদত্ রলাক্। 10 যোয়াবে দেগিলোদে তা মুজুঙোন্দি আর পিজেন্দি অরামীয় সৈন্যগুনোরে সাজা ওইয়্যে। সেনত্তে তে তা সৈন্যগুনো ভিদিরেত্তুন্ কুদুক্কুন্ বেঈ লোইয়্যে সৈন্য তারা বিরুদ্ধে সাজেল। 11 বাদবাগি সৈন্যগুনোরে তে তার্ ভেই অবীশয় অধীনোত্ রাগেল; সেক্কে তারা অম্মোনীয়গুনোর বিরুদ্ধে যুদ্ধোত্তে নিজোরে সাজেলাক্। 12 যোয়াবে তা ভেইবোরে কলঅ, “যুনি অরামীয়গুনে মত্তুন্ বেশ্ বোলী অন্ সালে তুই মরে বল্ দিবাত্তে এবে, আর যুনি অম্মোনীয়গুনে তত্তুন্ বেশ্ বোলী অন্ সালে মুই তরে বল্ দিবাত্তে যেম্। 13 সাহস গরঅ; আমা মানুচ্চুনোত্তে আর আমা গোজেন শঅরানিত্তে এজঅ, আমি সাহস নিইনে যুদ্ধো গুরিই। লগেপ্রভুর চোগেন্দি যিয়েন্ গম্ তে সিয়েনোই গোরোক্।” 14 ইয়েন্ কোইনে যোয়াবে তা সৈন্যদলুন্ লোইনে অরামীয়গুনো সমারে যুদ্ধো গুরিবাত্তে উজেই যানার্ পরেন্দি অরামীয়গুনে তা মুজুঙোত্তুন্ ধেই গেলাক্। 15 অরামীয়গুনোরে ধেই যাদে দেগিনে অম্মোনীয়গুনেয়ো যোয়াব ভেই অবীশয় মুজুঙোত্তুন্ ধেই যেইনে শঅর ভিদিরে সুমিলাক্। সেনত্তে যোয়াবে যিরূশালেমত্ ফিরি গেলঅ। 16 অরামীয়গুনে যেক্কেনে দেগিলাক্, তারা ইস্রায়েলীয়গুনো ইদু পুরোপুরিভাবে ঊদিই যেয়োন্ সেক্কে তারা মানুচ্ পাদেইনে ইউফ্রেটিস গাঙর্ উইকুলে বজত্তি গোজ্যে অরামীয়গুনোরে আনিলাক্। হদদেষর সৈন্যদল সেনাপতি শোবকে তারারে পরিচালনা গুরিনে আনিলো। 17 দায়ূদোরে সে কধাগান জানানার পরেন্দি তে বেক্ ইস্রায়েলীয় সৈন্যগুনোরে এগত্তর্ গুরিলো আর যর্দন গাঙান্ পার্ ওইনে তারা বিরুদ্ধে উজেই গেলঅ আর তারা মুজুঙোন্দি যুদ্ধোত্তে সৈন্য সাজেল। সেক্কে অরামীয়গুনে দায়ূদো লগে যুদ্ধো গুরিলাক্। 18 মাত্তর্ ইস্রায়েলীয়গুনো মুজুঙোত্তুন্ তারা ধেই গেলাক্। সেক্কে দায়ূদে তারার্ সাত আজার্ রথচালেয়্যেরে আর চোল্লিশ আজার্ পদাতিক সৈন্যরে মারে ফেলেলাক্। তে তারার সেনাপতি শোবকরেয়ো মারে ফেলেলাক্। 19 হদদেষর অধীনোত্ রাজাগুনে যেক্কে দেগিলাক্, তারা ইস্রায়েলীয়গুনো ইদু উদি যেয়োন্ সেক্কে দায়ূদো লগে শান্তি-চুক্তি গুরিনে তারা তা অধীনোত্ এলাক্। সেনত্তে অম্মোনীয়গুনোরে বল্ দিবাত্তে অরামীয়গুনে আর রাজী ন-অলাক্। |
Copyright © 2021 Bangladesh Bible Society
Bangladesh Bible Society