১ বংশধর 18 - Chakma Bibleদায়ূদোর জিদেনা 1 পরেন্দি দায়ূদে পলেষ্টীয়গুনোরে ওদেই দিইনে তারারে নিজো অধীনোত্ আনিলো। তে পলেষ্টীয়গুনো আদত্তুন্ গাৎ আর তা কায়-কুরে আদামানি গজক্ গুরি নেযেল। 2 দায়ূদে মোয়াবীয়গুনোরেয়ো ওদেই দিলো। তারা দায়ূদো অধীন ওইনে তারে খাজানা দিয়া ধুরিলাক্। 3 পরেন্দি সোবার রাজা হদদেষরে যেক্কে ইউফ্রেটিস গাঙান সং তা জাগায়ানিত্ আরঅ তার্ খেমতাগান থিদেবর্ গুরিবাত্তে গেলঅ সেক্কে দায়ূদে তা লগে যুদ্ধো গুরিবাত্তে হমাৎ সং গেলঅ। 4 দায়ূদে তার্ এক আজার্ রথ, সাত আজার্ ঘোড়াবাহিনী আর কুড়ি আজার্ পদাতিক সৈন্য আক্সোল। তারার্ একশত্তুয়ো রথর্ ঘোড়া রাগেইনে তে বাদবাগি বেক্ ঘোড়াগুনো টেঙ রক্কুন কাবি দিলো। 5 দামেস্কর অরামীয়গুনে যেক্কেনে সোবার রাজা হদদেষররে বল্ দিবাত্তে এলাক্ সেক্কে দায়ূদে তারার্ বেইশ্ আজার্ মান্জ্যরে মারে ফেলেল। 6 দায়ূদে অরাম রেজ্যর দামেস্কত্ সৈন্যদলুন্ রাগেল। সেক্কে অরামীয়গুনে তা অধীনোত্ ওইনে তারে কর্ দিয়্যে ধুরিলাক্। ইঙিরিনে দায়ূদে যে কনঅ জাগাত্ গেলে লগেপ্রভু সিদু তারে জিদেই দিদো। 7 হদদেষর মানুচ্চুনোর সোনার ঢালানি দায়ূদে যিরূশালেমত্ আনিলো। 8 টিভৎ আর কূন নাঙে হদদেষর দ্বিয়েন্ শঅরত্তুন দায়ূদে ভালোক্কানি পিদোল্ আনিলো। এ পিদোলানিলোই শলোমনে সে দাঙর্ পিলেবো, খুদোগুন্ আর পিদোল অন্য জিনিসছানি বানেয়্যে। 9 হমাত রাজা তয়ি শুনিলোদে, দায়ূদে সোবার রাজা হদদেষর পুরো সৈন্যদল্লোরে ওদেই দিলো। 10 দায়ূদে হদদেষর লগে যুদ্ধোত্ জিত্যে বিলিনে তারে ভালেদি আর পাত্তুরু পাত্তুরু জানেবাত্তে তয়ি তার্ পুয়ো হদোরামরে রাজা দায়ূদো ইদু পাধেই দিলো। এ হদদেষর লগে তয়ির ভালোক্বার যুদ্ধো ওইয়্যে। হদোরামে দায়ূদোত্তে লগে গুরিনে সোনা, রূবো আর পিদলর নানান্ বাবোত্যে জিনিস আন্যে। 11 ইয়েন আগেন্দি রাজা দায়ূদে ইদোমীয়, মোয়াবীয়, অম্মোনীয়, পলেষ্টীয় আর অমালেকীয়গুনো ইত্তুন্ সোনা আর রূবো আনিনে যেধোক্ক্যেন লগেপ্রভুর নাঙে যুদো গুরি রাগেয়োন্ সেধোক্ক্যেন ইয়েনিলোই তে সেধোক্ক্যেন গুরিলো। 12 সরূয়ার পুয়ো অবীশয়ে নুন্-কিজিঙোত্ আটার আজার্ ইদোমীয়রে মারে ফেলেল। 13 তে ইদোম কয়েক্কান্ জাগাত্ সৈন্যদল রাগেল আর সেক্কে বেক্ ইদোমীয়গুনে দায়ূদো অধীনোত্ অলাক্। দায়ূদে যে কনঅ জাগাত্ গেলে লগেপ্রভু সিদু তারে জিদেই দিদো। দায়ূদোর কামগুরিয়্যেগুন 14 দায়ূদে গদা ইস্রায়েল দেজ উগুরে রাজাগিরি গরা ধুরিলো। তা মানুচ্চুনোরে তে গমেডালে বিচের্ আর শাজন্ গুরিদো। 15 সরূয়ার পুয়ো যোয়াবে এলদে তার্ আজল্ সেনাপতি আর অহীলূদোর পুয়ো যিহোশাফটে তা রাজাগিরির পুরো বিজগ্কানি লিগি রাগেদ। 16 অহীটূবর পুয়ো সাদোক আর অবিয়াথর পুয়ো অবীমেলকে এলদে ধর্মগুরু আর শব্শ এলদে রাজার্ লিগিয়্যেবো। 17 যিহোয়াদার পুয়ো বনায় এলদে দায়ূদো কিয়্যে চুগিদার করেথীয় আর পলেথীয়গুনোর আজল্লো, আর দায়ূদো পুয়োগুনে রাজার আজল্ আজল্ পোজিশনত্ ঠিগ্ এলাক্। |
Copyright © 2021 Bangladesh Bible Society
Bangladesh Bible Society