১ বংশধর 17 - Chakma Bibleদায়ূদ ইদু গোজেন এগেম্ 1 রাজঘরত্ বজত্তি গুরিবার অক্তত্ একদিন্যে দায়ূদ ভাববাদী নাথনরে কলঅ, “মুই ইক্কিনে এরস গাজ ঘরত্ বজত্তি গরঙর্ মাত্তর্ লগেপ্রভুর সুদোম-সুন্দুক্কো রোইয়্যেদে এক্কান তাম্বুলো ভিদিরে।” 2 জোবত্ নাথনে দায়ূদোরে কলঅ, “তঅ মনানে যিয়েন্ চায় তুই সিয়েন গর্; গোজেনে তঅ সমারে আঘে।” 3 সে রেদোত্ গোজেন কধানি নাথন ইদু লুমিলো; তে কলদে, 4 তুই যেইনে মঅ চাগর্ দায়ূদোরে কঅ, লগেপ্রভু কোইয়্যেদে, মঅ থেবার্ ঘরান্ তুই ন-বানেবে। 5 মিসর দেজত্তুন্ ইস্রায়েলীয়গুনোরে নিগিলে আনিবার দিন্নোত্তুন্ ধুরি এচ্ছ্যে সং মুই কনঅ ঘরত্ বজত্তি ন-গরঙ্। এক তাম্বুলোত্তুন্ অন্য তাম্বুলোত্, এক বজত্তি জাগাত্তুন্ আরেক্ বজত্তি জাগাত্ যেয়োং। 6 যিদুক্কুন্ মান্জ্য উগুরে মুই মঅ মানুচ্চুনোরে পালেবার্ ভারান্ দুয়োং, নানান্ জাগাত্ ইস্রায়েলীয়গুনো সমারে ঘুরি বেড়েবার্ অক্তত্ মুই সে নেতাগুনোরে কি কনঅ সময় কোইয়োং, তারা কিত্তেই মত্তে এরস গাজ ঘর্ ন-বানান্? 7 ইক্কিনে তুই মঅ চাগর্ দায়ূদোরে কঅ, বেক খেমতার গিরোজ্ লগেপ্রভু এ কধাগান কোইয়্যেদে, মঅ মানুচ্চুনে ইস্রায়েলীয়গুনোর শাজন্গুরিয়্যে অবাত্তে মুই তরে য়েমান চোড়েবার্ বামত্তুন্, ভেড়া ছাগল পাল পিজেন্দিত্তুন্ আন্যং। 8 তুই যেদক্কানি চাগালাত্ যেয়োচ্ মুয়ো সিদু তঅ সমারে যেয়োং আর তঅ মুজুঙোত্তুন্ তর্ বেক্ শত্রুগুনোরে শেজ্ গুরি দুয়োং। মুই তঅ নাঙান্ পিত্থিমীর নাঙ্গোজ্যে মানুচ্চুনো নাঙানি ধোক্ক্যেন ইদোত্ থাই পারা গুরি দিম্। 9-10 মঅ মানুচ্ ইস্রায়েলীয়গুনোত্তে মুই এক্কান্ জাগা ঠিগ্ গুরি সিয়েনত্ গাজঅ ধোক্ক্যেন তারারে বোজেই দিম্ যেনে তারা নিজো জাগা-জোমিত্ সুগে-শান্দিয়্যে বজত্তি গুরি পারন্ আর মঅ মানুচ্ ইস্রায়েলীয়গুনো উগুরে শাজন্গুরিয়্যে নেযেবার পরেত্তুন্ ধুরি বজং মানুচ্চুনে তারা উগুরে যে অত্যেচার্ গুরি এত্তন্ তারা যেনে আর সিয়েনি গুরি ন-পারন্। মুই তর্ বেক্ শত্রুগুনোরেয়ো দোঙেম্। “‘মুই আরঅ কঙর্, মুই লগেপ্রভু তঅ বংশবো উগুরে তুলি দিম্। 11 তঅ আয়ূগান্ শেজ্ অনার্ পরেন্দি যেক্কে তুই তর্ পূরোণি বুড়োবুড়িগুনো ইদু যেবেগোই সেক্কে মুই তঅ জাগানত্ তঅ বংশর একজনরে, তঅ নিজো পুয়োবোরে বোজেম্ আর তা রেজ্যগান্ ঠিগ্ রাগেম্। 12 তর্ সে পুয়োবো মত্তেই এক্কান্ ঘর্ বানেব, আর তা সিংহাসনান্ মুই উমরত্তে থিদেবর্ গুরি দিম্। 13 মুই ওম্ তা বাপ্ আর তে অবঅ মর্ পুয়ো। মর্ কোচ্পানাগান মুই কনদিনঅ তা উগুরেত্তুন্ তুলি ন-নেযেম্, যেধোক্ক্যেন গুরি মুই তুলি নেযেয়োং তঅ আগেন্দি যে এলঅ তা উগুরেত্তুন্। 14 মঅ ঘরত্ আর মর্ রেজ্যত্ মুই তারে জিংকানিবর্ ঠিগ্ রাগেম্ আর তা সিংহাসনান্ উমরত্যে অবঅ।’ ” 15 এ দেগা অনার বেক্ কধানি নাথন দায়ূদোরে কলঅ। 16 এ কধানি শুনিনে রাজা দায়ূদে তাম্বুলান ভিদিরে গেলঅ আর লগেপ্রভু মুজুঙোত্ বোইনে কলঅ, ও গোজেন্ লগেপ্রভু, মুই বা কন্না, আর মঅ বংশবো বা কন্না, তুই মরে ইদ্দুর্ সং আন্যচ্? 17 ও গোজেন, ইয়েন তঅ চোগেন্দি যদবদে ন-অয়; ইয়েন লগে তঅ চাগরুনো বংশর আগাম কধায়ো তুই কোইয়োচ্। ও গোজেন লগেপ্রভু, মুই যেনে এক্কো দাঙর্ মানুচ্ সে চোগেন্দি তুই মরে দেখ্যচ্। 18 তঅ চাগর্ মরে যে সর্মানান দেগেলে সেক্কে মুই তইদু আর বেশ্ কি কোই পারিম্? তুই দঅ তঅ চাগর্বোরে হবর্ পাজ্। 19 ও লগেপ্রভু, তঅ চাগর্বোত্তে তর্ আওজ্ মজিম এ মহৎ কামান্ তুই গোজ্যস্ আর তঅ চাগর্বোরে সিয়েন্ জানেয়োচ্। 20 ও লগেপ্রভু, তঅ ধোক্ক্যেন আর কনজন্ নেই আর তুই বাদে কনঅ গোজেন নেই; আমি নিজো কানেন্দি এ কধাগান্ শুন্যেই। 21 তঅ ইস্রায়েল জাদ্তুনো ধোক্ক্যেন পিত্থিমীত্ আর কনঅ জাত্ নেই, যিবেরে তুই তর্ নিজো মানুচ্ বানেবাত্তে উদ্ধোর্ গোজ্যস্। তুই তারারে মিসর দেজত্তুন্ উদ্ধোর্ গুরিনে তারা মুজুঙোত্তুন্ অন্য জাদ্তুনোরে ধাবেই দুয়োচ্। তর্ নিজো যচ্ছান ফগদাঙ্ গুরিবাত্তে মহৎ আর দর্গরেপারা কাম ভিদিরেন্দি তুই সিয়েন্ গোজ্যস্। 22 তঅ মানুচ্ ইস্রায়েলীয়গুনোরে তুই নিজো নাঙে জিংকানিবর্ তর্ নিজো মানুচ্ বানেয়োচ্, আর তুই, ও লগেপ্রভু, তুই তারার্ গোজেন ওইয়োচ্। 23 “ইক্কিনে ও লগেপ্রভু, মর্ আর মর্ বংশবো পৌইদ্যেনে তুই যে এগেমান্ গোজ্যস্ সিয়েন উমরত্তেই রোক্ষ্যে গর্। তর্ এগেম্ মজিম সিয়েন্ রোক্ষ্যে গর্। 24 সেক্কে মর্ বংশবো থিদেবর্ অবঅ আর উমরত্তে তর্ যচ্ অবঅ। সেক্কে মানুচ্চুনে কবাক্, ‘বেগত্তুন্ খেমতাবলা গিরোজ্ লগেপ্রভু ইস্রায়েলীয়গুনোর গোজেন, যদবদে ইস্রায়েলীয়গুনোর গোজেন’! আর তঅ চাগর্ দায়ূদোর্ বংশ তঅ মুজুঙোত্ অদেঅদে থেবঅ। 25 ও মর্ গোজেন, তুয়ই মইদু এ পৌইদ্যেনে ফগদাঙ্ গুরি কোইয়োচ্, তুই মঅ মাধ্যমে এক্কো বংশ তুলিবে। সেনত্তে তইদু এ তবনাগান গুরিবাত্তে মঅ মনত্ সাহস ওইয়্যে। 26 ও লগেপ্রভু, তুয়ই গোজেন। এ ভালেদির্ এগেমান তুয়ই মইদু গোজ্যস্। 27 মর্ বংশবোরে তুই হুজি ওইনে বর্ দুয়োচ্ যেনে এ বংশবো সারা জনমত্তেই তঅ মুজুঙোত্ থান্। 28 লগেপ্রভু, তুয়ই যেক্কে এ বংশবোরে বর্ দুয়োচ্ সেক্কে সিয়েন উমরত্তে বরান্ থেবঅ।” |
Copyright © 2021 Bangladesh Bible Society
Bangladesh Bible Society