১ বংশধর 16 - Chakma Bible1 গোজেন সুন্দুক্কোত্তে দায়ূদে যে তাম্বুলান্ বানেয়্যে মানুচ্চুনে সুন্দুক্কো আনিনে সিয়েন ভিদিরে রাগেলাক্। সে পরেন্দি গোজেন মুজুঙোত্ পুজ্যে-উৎসর্ব আর উদোলোলি-উৎসর্বর পরব্ গরা অলঅ। 2 সে বেক্ উৎসর্ব পরব্পুন্ গরানা শেজ্ অলে যেরেন্দি দায়ূদে লগেপ্রভুর নাঙে মানুচ্চুনোরে বর্ দিলো। 3 সে পরেন্দি তে ইস্রায়েলীয় পত্তি মিলেরে আর মরদরে এক্কানত্ ধরে রুটি, এক্ দমা য়েরা আর কিজু কিশমিশ দিলো। 4 লগেপ্রভুর সুন্দুক্কো মুজুঙোত্ সেবা-কামত্তে দায়ূদে কয়েক্কো লেবীয়রে নেযেল যেনে তবনা গরানা, ভালেদি জানানা আর ইস্রায়েল গোজেন লগেপ্রভুরে বাঈনী গুরি পারন্। 5 এ মানুচ্চুনো নেতা অলদে আসফ, দ্বিলম্বরত্ অলদে সখরিয়, সে পরেন্দি অলদে যিয়ীয়েল, শমীরামোৎ, যিহীয়েল, মত্তিথিয়, ইলীয়াব, বনায়, ওবেদ-ইদোম আর যিয়ীয়েল। ইগুনে বাজেদাক্ বাশি আর হার্মোনি আর আসফে বাজেদ ঝুরি; 6 ধর্মগুরু বনায় আর যহসীয়েল গোজেন সে সুদোমর-সুন্দুক্কো মুজুঙোত্ অক্ত মজিম্ তূরী বাজেদাক্। দায়ূদো ভালেদি জানেবার গান 7 সেদিন্যে দায়ূদে পত্তমে লগেপ্রভুর নাঙে ভালেদি জানেবার এ গান্নো গেবার্ ভারান্ আসফ আর তা মানুচ্চুনো উগুরে দিলো: 8 লগেপ্রভুরে ভালেদি জানঅ, তা গুণোর্ কধানি ফগদাং গরঅ; তা কামর্ কধানি অন্য জাত্তুনোরে জানঅ। 9 তা নাঙে গান গঅ, তারে নাঙ্ গিনেদে গান্ গঅ; তার্ বেক্ আমক্ অবার্ কামানি কধা কঅ। 10 তার্ পবিত্র গানত্তে বাঈনী গরঅ; যিগুনে লগেপ্রভুরে মন ভিদিরেন্দি জানিবাত্তে আওজ্ গত্তন্ তারা মনানি হুজি ওক্। 11 লগেপ্রভু আর তা বলানরে বুঝিবাত্তে চেট্ট্যা গরঅ; আমিঝে তা লগে উদোলোলি রাগেবাত্তে আওজ্ গরঅ। 12-13 ও তার্ চাগর্ ইস্রায়েল বংশধরুন্, তার্ বেঈ লোইয়্যে যাকোব পুয়োগুন্, তুমি তার্ দাঙর্ দাঙর্ কাম কধানি মনত্ রাগেয়ো; তার্ আমক্ অবার্ কাম কধানি আর বিচেরত্ সাজার্ কধানি তে কোইয়্যে সিয়েনি ইদোত্ রাগেয়ো। 14 তেয়ই আমা গোজেন লগেপ্রভু; পুরো দুনিয়েগান্ তা শাজনে চলের্। 15 যে কধানি তে উগুম্ দিয়্যে আজার্ আজার্ বংশত্তে, তার্ সে সুদোম কধানি জিংকানিবর্ ইদোত্ রাগেয়ো। 16 সে সুদোমানি তে অব্রাহামত্তে থিদেবর্ গুরি দিয়্যে আর ইস্হাক ইদু শমক্ গোজ্যে। 17 তে তার্ সুদোমানি যাকোব ইদু সুদোম ইজেবে আর ইস্রায়েল ইদু উমরর্ সুদোম ইজেবে ফগদাঙ্ গোজ্যে। 18 তে কোইয়্যেদে, “মুই তরে কনান্ দেজ্ছান্ দিম্, সিয়েনই অবঅ তর্ পাওনা সোম্বোত্তি।” 19 তারা জনেন্দি যেক্কেনে কম্ এলাক্, অমকদ কম্ এলাক্, আর তারা সিদু বিদেশী এলাক্, 20 তারা যেক্কেনে সিদু নানান্ জাদ ভিদিরে আর নানান্ রেজ্য ভিদিরে ঘুরি বেড়েদাক্, 21 সেক্কে তে কনজনরে তারারে অত্যেচার্ গুরিবাত্তে ন-দিদো। তারাত্তেই তে রাজাগুনোরে ধমক্ দিদো, 22 কদঅ, “মর্ বর্ দিয়্যে মানুচ্চুনোরে ন-ধুরিবা; মর্ ভাববাদীগুনোরে কনঅ খেতি ন-গুরিবা।” 23 পিত্থিমীর বেক্ মানুচ্চুন্, তুমি লগেপ্রভুর নাঙে গীত্ গঅ; তার্ দিয়্যে উদ্ধোর কধানি দিনকে দিন ফগদাঙ্ গরঅ। 24 নানান্ জাদ ভিদিরে তার্ মহিমাগান্ ফগদাঙ্ গরঅ; বেক্ মানুচ্চুনো ইদু তার্ বেক্ আমক্ অইদে কামর্ কধানি ফগদাঙ্ গরঅ। 25 লগেপ্রভু দাঙর্ আর বেক্কুনো উগুরে নাঙ্গিনেদে ধোক্ক্যেন; বেক্ দেব-দেবেদাগুনোত্তুন্ তে বেশ্ দর্বুগ্ জাগেই দে। 26 নানান্ জাদর্ দেব-দেবেদাগুনে বানা বানেয়্যে মূত্তি, মাত্তর্ লগেপ্রভু আগাজ্ আর পিত্থিমীর্ গিরোজ্। 27 তারে ঘিরিনে রোইয়্যেদে বাঈনী গরানা আর মহিমা; তার্ থেবার্ জাগানত্ রোইয়্যেদে বল্ আর হুজি। 28 ও নানান্ জাদর্ বেক্ গুট্টিগুন্, ইদোত্ তুলো বেক্ বাঈনী গরানা আর খেমতা লগেপ্রভুর্। 29 তুমি স্বীগের্ গরঅ বেক্ বাঈনী পানাগান্ লগেপ্রভুর; উৎসর্বর পযাপিরানি লোইনে তা মুজুঙোত্ এজঅ। লগেপ্রভুর মহিমাবলা পবিত্রতাগান কধানি ভাবিনে তারে ভোক্তি গরঅ। 30 পিত্থিমীর বেক্ মানুচ্চুন্, তুমি তা মুজুঙোত্ গির্গিরে উদো। পিত্থিমীগান গমেডালে থিদেবর্ অলঅ, সিয়েন্ কনদিনঅ ন-লুরিবো। 31 আগাজ্ছানে হুজি ওক্, পিত্থিমীগানে হুজি ওক্; নানান্ জাদ ইদু তারা ফগদাঙ্ গোত্তোক্, “লগেপ্রভু রাজাগিরি গরে।” 32 সাগর্ আর তা ভিদিরে বেক্কানিয়ে গুজুরি উদোক্; মাত্তুনে আর তা বুগঅ উগুরে বেক্কানিয়ে হুজি ওক্। 33 সালে ঝার গাজ্ বাজ্ছুনেয়ো লগেপ্রভুর মুজুঙোত্ হুজিয়ে গান্ গুরিবাক্, কিয়া তে পিত্থিমীগানরে বিচের্ গুরিবাত্তে এজের্। 34 তুমি লগেপ্রভুরে ভালেদি জানঅ, কিত্তে তে ভালেদিগান চায়; তার্ জদবদে কোচ্পানাগান উমরত্যে থিদেবর্। 35 তুমি কঅ, “ও আমার্ উদ্ধোর্ গুরিয়্যে গোজেন্, আমারে উদ্ধোর্ গর্; অন্য জাত্তুনো ভিদিরেত্তুন্ তুই আমারে এক জাগাত্ আন আমারে রোক্ষ্যে গর্, যেনে আমি তর্ পবিত্রতাগান নাঙে ভালেদি জানেই পারি আর তর্ গুণগান গেই পারিই বিলিনে বার্ গুরি পারির্। 36 সিরিস্টির্ আগেত্তুন্ ধুরি থুম্ ন-ওইয়্যে জিংকানি সং ইস্রায়েলর গোজেন লগেপ্রভুর বাঈনী ওক্।” ইয়েন পরেন্দি বেক্ মানুচ্চুনে কলাক্, “আমেন, লগেপ্রভুর বাঈনী ওক্।” 37 পত্তিদিনো দরকার্ মজিম্ নিত্য সেবা-কামত্তে দায়ূদ লগেপ্রভুর সুদোম-সুন্দুক্কো ইদু আসফরে আর তা মানুচ্চুনোরে ফেলেই গেলঅ। 38 তারারে বল্ দিবাত্তে তে ওবেদ-ইদোম আর তার্ আটষট্টিজন মান্জ্যরেয়ো থোই গেলঅ। যিদূথূন পুয়ো ওবেদ-ইদোম আর হোষা এলদে রক্ষী। 39 দায়ূদ গিবিয়োন তবনা গরেদে অজল জাগানত্ লগেপ্রভু থেবার্-তাম্বুলো মুজুঙোত্ ধর্মগুরু সাদোক্ আর তা লগে ধর্মগুরুগুনোরে থোই গেলঅ। 40 ইয়েন আজায় এলদে লগেপ্রভু ইস্রায়েলীয়গুনোরে যে রীদি-সুুদোম দিয়্যে সিয়েনত্ যিয়েনি লেগা এলঅ সে মজিম যেনে তারা লগেপ্রভুর নাঙে পূজ্যে-উৎসর্বর ডালিঘর উগুরে পত্তিদিন বেন্যে আর বেল্যে আমিঝে পূজ্যে- উৎসর্বর পরব্ গুরি পারন্। 41 তারা সমারে এলাক্ হেমন, যিদূথূন আর বাদবাগি মানুচ্চুনে, যিগুনো নাঙানি গিনিনে বেঈ নেযা ওইয়্যে যেনে তারা লগেপ্রভুর জিংকানিবর্ থুম্ ন-ওইয়্যে কোচ্পানাত্তে তারে ভালেদি জানে পারন্। 42 গোজেন নাঙে গান গেবার্ অক্তত্ তূরী, ঝন্ঝনি আর অন্য বাজানা বাজেবাত্তে হেমন আর যিদূথূন উগুরে ভারান্ দিয়্যে অলঅ। যিদূথূনো গুট্টির মানুচ্চুনোরে রক্ষী ইজেবে নেযা অলঅ। 43 ইয়েন পরেন্দি বেক্ মানুচ্চুনে যে যার্ ঘরন্দি আঢা মারিলাক্ আর দায়ূদে তা পরিবারর্ মানুচ্চুনোরে বর্ দিবাত্তে ঘরত্ ফিরি গেলঅ। |
Copyright © 2021 Bangladesh Bible Society
Bangladesh Bible Society