১ বংশধর 15 - Chakma Bibleসাক্ষ্য-সুন্দুক্কো যিরূশালেমত্ 1 দায়ূদ-শঅরত্ নিজো ঘর-বানানার্ পরেন্দি দায়ূদে গোজেন সুন্দুক্কোত্তে এক্কান্ জাগা যুক্কোল্ গুরি সিদু এক্কান্ তাম্বুল্ টাঙেল। 2 সে পরেন্দি তে কলঅ, “গোজেন সুন্দুক্কো লেবীয়গুনে বাদে আর কনজনে ন-বুয়োন, কিত্তে লগেপ্রভুর সুন্দুক্কো বুয়োবাত্তে আর জিংকানিবর্ তার্ সেবা গুরিবাত্তে লগেপ্রভু তারারে বেঈ লোইয়্যে।” 3 লগেপ্রভুর সুন্দুক্কোত্তে দায়ূদে যে জাগায়ান্ যুক্কোল্ গোজ্যে সিয়েনত্ সুন্দুক্কো আনিবাত্তে তে বেক্ ইস্রায়েলীয়গুনোরে এক্কান্ জাগাত্ এগত্তর্ গুরিলো। 4 তে হারোণ বংশত্তুন্ যে মানুচ্চুনোরে আর যে লেবীয়গুনোরে ডাগিনে এগত্তর্ গুরিলো তারা অলাক্: 5 কহাত বংশর মানুচ্চুনো ভিদিরেত্তুন্ নেতা ঊরীয়েল আরঅ একশঅ কুড়িজন্ মানুচ্; 6 মরারি বংশর মানুচ্চুনো ভিদিরেত্তুন্ নেতা অসায় আর আরঅ দ্বিশঅ কুড়িজন মানুচ্; 7 গের্শোন বংশর মানুচ্চুনো ভিদিরেত্তুন্ নেতা যোয়েল আহ্ আরঅ একশঅ ত্রিশজন মানুচ্; 8 ইলীষাফণ বংশর মানুচ্চুনো ভিদিরেত্তুন্ নেতা শমরিয় আহ্ আরঅ দ্বিশঅ জন মানুচ্; 9 হিব্রোণ বংশর মানুচ্চুনো ভিদিরেত্তুন্ নেতা ইলীয়েল আহ্ আরঅ আশিজন মানুচ্; 10 উষীয়েল বংশর মানুচ্চুনো ভিদিরেত্তুন্ নেতা অম্মীনাদব আহ্ আরঅ একশঅ বারজন মানুচ্। 11 সে পরেন্দি দায়ূদ ধর্মগুরু সাদোক আর অবিয়াথররে আহ্ লেবীয় ঊরীয়েল, অসায়, যোয়েল, শমরিয়, ইলীয়েল আর অম্মীনাদবরে ডাগিনে পাদেল। 12 তে তারারে কলঅ, “তুমি অলাদে লেবি-গুট্টির নানান্ বংশর নেতা; তুমি আর তমা সমাজ্যে লেবীয়গুনে গোজেন নাঙে নিজোরে ফারক্ গুরি নেযেবা, যেনে যে জাগায়ান্ মুই যুক্কোল্ গুরি রাগেয়োং সে জাগানত্ তুমি ইস্রায়েল গোজেন লগেপ্রভুর সুন্দুক্কো আনিনে রাগেই পারিবা। 13 পত্তমবার্ তুমি সিবে আনি নপারর্ বিলিনে আমা উগুরে আমা গোজেন্ লগেপ্রভু রাগে ফুলি উঠ্যে। তা উগুম্ মজিম কিঙিরিনে সিবে আনা পড়িবো আমি তাইদু সিয়েন্ জানিবাত্তে ন-চেই।” 14 সেক্কে ধর্মগুরুগুনে আর লেবীয়গুনে গোজেন নাঙে নিজোরে ফারক্ গুরি নিলাক্ যেনে তারা ইস্রায়েল গোজেন লগেপ্রভুর সুন্দুক্কো আনি পারন্। 15 লগেপ্রভু আর মোশি উগুম্ মজিম লেবীয়গুনে গোজেনর সুন্দুক্কো বুয়োই নেযেবার্ লুদিক্কো কানা উগুরে তুলিনে সিবে আনিলাক্। 16 দায়ূদে লেবীয়গুনোর নেতাগুনোরে কলঅ, তারা যেনে বাদ্যযন্ত্র, অত্তাৎ বীণা, সুরবাহার আর করতাল বাজেইনে হুজির্ গান গেবাত্তে তারা গানগেইয়্যে ভেইয়ুনোরে ঠিগ্ গরন। 17 সেনত্তে লেবীয়গুনে যোয়েল পুয়ো হেমনরে আর তা বংশর মানুচ্চুনো ভিদিরেত্তুন্ বেরিখিয় পুয়ো আসফরে আর তারা গুট্টির-ভেই মরারীয়গুনো ভিদিরেত্তুন্ কূশায়া পুয়ো এথনরে ঠিগ্ গুরিলো। 18 তারা সমারে নেযা অলঅ তারা বংশর দ্বিলম্বরর ধর্মগুরুগুনোরে। তারা অলাক্ সখরিয়, বেন, যাসীয়েল, শমীরামোৎ, যিহীয়েল, উন্নি, ইলীয়াব, বনায়, মাসেয়, মত্তিথিয়, ইলীফলেহূ, মিক্নেয় আর ওবেদ-ইদোম আর যিয়ীয়েল নাঙে দোরোর্ দ্বিজন চুগিদার্। 19 পিদোল করতাল বাজেবার্ ভারান্ পড়িলোদে গানগেইয়্যে হেমন, আসফ আর এথনর্ উগুরে। 20 দাঙর্ রঅ গুরিনে বীণা বাজেবার্ ভারান্ পড়িলোদে সখরিয়, অসীয়েল, শমীরামোৎ, যিহীয়েল, উন্নি, ইলীয়াব, মাসেয় আর বনায় উগুরে। 21 চিগোন্ রঅ গুরিনে সুরবাহার বাজেবার্ ভারান্ পড়িলোদে মত্তিথিয়, ইলীফলেহূ, মিক্নয়, ওবেদ-ইদোম, যিয়ীয়েল আর অসসিয়র উগুরে। 22 গান পরিচালনার ভারান্ পড়িলোদে লেবীয় নেতা কননিয় উগুরে। তে গানত্ কাবিল্ এলঅ বিলিনে তা উগুরে সে ভারান্ পড়িলো। 23-24 সুন্দুক্কো চুগি দিবার্ ভারান্ পড়িলোদে বেরিখিয়, ইল্কানা, ওবেদ-ইদোম আর যিহিয়োর উগুরে। গোজেন সুন্দুক্কো মুজুঙোত্ তূরী বাজেবার্ ভারান্ ধর্মগুরু শবনিয়, যিহোশাফট, নথনেল, অমাসয়, সখরিয়, বনায় আর ইলীয়েষর উগুরে। 25 ইয়েন পরেন্দি দায়ূদে, ইস্রায়েল বুড়ো নেতাগুনে আর সৈন্যদলর আজার্ সৈন্যর সেনাপতিগুনে ফুত্তি গত্তে গত্তে ওবেদ-ইদোম ঘরত্তুন্ লগেপ্রভুর সেই বেবস্থা-সুন্দুক্কো আনিবাত্তে গেলাক্। 26 যে লেবীয়গুনে লগেপ্রভুর বেবস্থা-সুন্দুক্কো বুয়োই আন্যন্ গোজেনে তারারে পরিচালনা গোজ্যে বিলিনে সাত্তো বলদ্ আর সাত্তো ভেড়া ছাগল্ উৎসর্ব গরা অলঅ। 27 সুন্দুক্ বোইয়্যে লেবীয়গুনে, গানগেইয়্যেগুনে আর গান দলর্ পরিচালক কননিয় মসীনার পাদল্ কাবড় পোজাগকান উজ্যে। দায়ূদেয়ো মসীনার পাদল্ কাবড় পোজাগকান আর মসীনার লাম্বা সুলুম্মো উজ্যে। 28 এধোক্ক্যেন গুরিনে বেক্ ইস্রায়েলীয়গুনে রঅ সারদে সারদে আর শিংগা, তূরী, করতাল, বীণা আর সুরবাহার বাজাদে বাজাদে লগেপ্রভুর বেবস্থা-সুন্দুক্কো যিরূশালেমত্ আনিলাক্। 29 লগেপ্রভুর বেবস্থা-সুন্দুক্কো দায়ূদ-শঅরত্ সোমেবার্ সময়োত্ শৌল ঝি মীখলে জান্দালান্দি সিবে দেগিলো। রাজা দায়ূদোরে নাজদে আর ফুত্তি গত্তে দেগিনে তে মনে মনে দায়ূদোরে ঈচ্ গুরিলো। |
Copyright © 2021 Bangladesh Bible Society
Bangladesh Bible Society