১ বংশধর 14 - Chakma Bibleদায়ূদো ঘর আর তা গিরি 1 পরেন্দি সোরর রাজা হীরম দায়ূদো ইদু কয়েক্কো মানুচ্ পাধেই দিলো। তারা সমারে পাদেল দায়ূদোত্তে রাজঘর বানেবার্ আজাই এরস তক্তা, রাজমিস্ত্রি আর গাজ মিস্ত্রি। 2 সেক্কে দায়ূদে বুঝি পারিলো, লগেপ্রভু ইস্রায়েল উগুরে তা রাজপদতান্ ঠিগ্ গোজ্যে আর তা মানুচ্চুনোর্, অত্তাৎ ইস্রায়েলীয়গুনোত্তে তা রেজ্যগান্ বোউত্ ভালেদি গোজ্যে। 3 দায়ূদে যিরূশালেমত্ আরঅ মোক্ ললঅ আর তার্ ভালোক্কুন ঝি-পুয়ো অলাক্। 4 যিরূশালেমত্ তার্ যিদুক্কুন্ ঝি-পুয়ো জর্ম ওইয়োন্ তারার্ নাঙানি অলঅ শম্মূয়, শোবব, নাথন, শলোমন, 5 যিভর, ইলীশূয়, ইল্পেলট, 6 নোগহ, নেফগ, যাফিয়, 7 ইলীশামা, বীলিয়াদা আর ইলীফেলট। পলেষ্টীয়গুনোর্ ঊদি যানা 8 পলেষ্টীয়গুনে যেক্কে শুনিলাক্, পুরো ইস্রায়েল উগুরে দায়ূদোরে রাজপদথ্ অভিষেগ গরা ওইয়্যে সেক্কে তারা বেক্ সৈন্যগুন্ লোইনে তারে আক্রমণ গুরিবাত্তে গেলাক্। সিয়েন্ শুনিনে দায়ূদে তারা বিরুদ্ধে নিগিলিলো। 9 পলেষ্টীয়গুনে এইনে রফায়ীম কিজিঙোত্ হানা দিলাক্। 10 সেক্কে দায়ূদে গোজেনরে পুযোর্ গুরিলো, “মুই কি পলেষ্টীয়গুনোরে আক্রমণ গুরিম? তুই কি মঅ আঢত্ তারারে তুলি দিবে?” জোবত্ লগেপ্রভু কলঅ, “যাহ্, তারারে মুই তমা আঢত্ তুলি দিম।” 11 সেক্কে দায়ূদে আর তা মানুচ্চুনে বাল্-পরাসীমোত্ যেইনে তারারে ওদেই দিলো। দায়ূদে কলঅ, “গোজেনে গোদা পানি ভাঙেদে ধোক্ক্যেন গুরি মঅ আত্তান্দোই মঅ শত্রুগুনোরে ভাঙি ফেলেল।” ইয়েনত্তে সে জাগান নাঙান্ অলঅ বাল্-পরাসীম। 12 পলেষ্টীয়গুনে তারার্ দেবেদামূত্তিগুন্ সিদু ফেলেই যেয়োন্। দায়ূদো উগুমে মানুচ্চুনে সিগুন্ আগুনোত্ পুড়ি দিলাক্। 13 পলেষ্টীয়গুনে আরঅ সে কলগত্ হানা দিলাক্। 14 সেক্কে দায়ূদে আরঅ গোজেন ইদু পুযোর্ গুরিলো, জোবত্ গোজেনে তারে কলঅ, “তুমি উজুগুরি তারা ইন্দি ন-যেয়ো, মাত্তর্ তারা পিজেন্দিত্তুন্ বাখা গাজ্ছুনো মুজুঙোত্ তারারে আক্রমণ গরঅ। 15 বাখা গাজ্ছুনো উগুরে যেক্কে তুই সৈন্যদলুনোর্ আদন্দে ধোক্ক্যেন রঅ শুনিবে সেক্কে তুই যুদ্ধোত্তে নিগিলিবে। ইয়েনর্ ভেদ্তান্ অলঅ, পলেষ্টীয় সৈন্যগুনোরে আঘাত্ গুরিবাত্তে গোজেনে তমা আগে আগে যেইয়্যে।” 16 গোজেন উগুম্ মজিম দায়ূদে কাম্ গুরিলো। তারা গিবিয়োনত্তুন্ গেষর সং গোদা পথতান্ পলেষ্টীয় সৈন্যগুনোরে মাত্তে মাত্তে গেলাক্। 17 এধোক্ক্যেন গুরিনে দায়ূদো সুনাঙান্ বেক্ দেজ্ছানিত্ ছিদি পড়িলো, আর লগেপ্রভু বেক্ জাত্তুনো ইদু তা পৌইদ্যেনে এক্কান্ দর্ দর্ মনভাব জাগেই দিলো। |
Copyright © 2021 Bangladesh Bible Society
Bangladesh Bible Society