১ বংশধর 13 - Chakma Bibleসাক্ষ্য-সুন্দুক্কো আনা অলঅ 1 দায়ূদে তার পত্তি নেতারে, অত্তাৎ আজার্ সৈন্যর্ সেনাপতি আর শত উগুরে সৈন্যর সেনাপতিগুনো সমারে সল্লা গুরিলো। 2 সে পরেন্দি তে ইস্রায়েলীয়গুনো পুরো দল্লোরে কলঅ, “তুমি যুনি গম্ মনে গরঅ আর ইয়েনই যুনি আমা গোজেন্ লগেপ্রভুর্ আওজ্ অয় সালে এজঅ, আমি ইস্রায়েল বেক্ চাগালাত্ আমা বাদবাগি ভেইয়ূনো ইদু আর তারা লগে যিদুক্কুন্ ধর্মগুরু আর লেবীয়গুনে তারা আদামত্ আর য়েমান চোড়েবার্ মাদত্ আগন্ তারা ইদু হবর্ পাধেই দিই যেনে তারা এইনে আমা লগে মিজেন। 3 এজঅ, আমা গোজেনর সাক্ষ্য-সুন্দুক্কো আমা ইদু ফিরেই আনি; শৌল রাজাগিরির্ সময় আমি দঅ সুন্দুক্কো ইন্দি কনঅ মন ন-দিই।” 4 সেক্কে পুরো দল্লো সিয়েন্ গুরিবাত্তে রাজী অলঅ, কিত্তে বেক্ মানুচ্চুনো ইদু সিয়েনই গম্ বিলি মনে অলঅ। 5 সেনত্তে কিরিয়ৎ-যিয়ারীমত্তুন্ গোজেন সুন্দুক্কো আনিবাত্তে দায়ূদ মিসর সীহোর গাঙত্তুন্ হমাত ধুজি সং বেক্ ইস্রায়েলীয়গুনোরে এগত্তর্ গুরিলো। 6 যিহূদা দেজর্ বালা, অত্তাৎ কিরিয়ৎ-যিয়ারীমত্তুন্ গোজেন্ লগেপ্রভুর সুন্দুক্কো আনিবাত্তে দায়ূদ আর তা সমারে বেক্ ইস্রায়েলীয়গুনে সিদু গেলাক্। এ সুন্দুক্কো লগেপ্রভুর নাঙে পরিচিত, কিত্তে তে সিদু করূবপুনোর্ সংমোধ্যে থেদঅ। 7 মানুচ্চুনে অবীনাদব ঘরত্তুন্ গোজেন সুন্দুক্কো নিগিলেনে এক্কান্ নূয়া গাড়ি উগুরে বোজেইনে নেযেলাক্। উষঃ আর অহিয়ো সে গাড়িগান চালাদন, 8 দায়ূদ আর বেক্ ইস্রায়েলীয়গুনে লগেপ্রভুর মুজুঙোত্ তারার্ বেক্ বলান্ দিইনে নাজি নাজি গান গেইয়োন্ আর সুরবাহার, বীণা, খঞ্জনী, করতাল আর তূরী বাজেয়োন। 9 তারা কীদোন খামার ইদু এজানার পরেন্দি বলদ দ্বিবে উজোত্ হেলাক্ আর উষঃ সুন্দুক্কো ধুরিবাত্তে আত্ বাবেল। 10 ইয়েন্দোই উষ উগুরে লগেপ্রভু রাগে জুলি উদিলো। সুন্দুক্কোত্ আত্ দেনার্ কারনে তে তারে আঘাত্ গুরিলো। সেক্কে তে গোজেন মুজুঙোত্ সিদু মুরি গেলঅ। 11 উষ উগুরে লগেপ্রভুর এ রাগকান্ দেগিনে দায়ূদে বেজার্ অলঅ। এজঅ সং সে জাগায়ানরে কূয়া অদঅ পেরষ-উষঃ। 12 দায়ূদ সেদিন্যে গোজেনরে অমকদ দোরেল। তে কলঅ, “গোজেন সুন্দুক্কো সালে কেধোক্ক্যেন গুরিনে মইদু আনা যেবঅ?” 13 সুন্দুক্কো তে দায়ূদ-শঅরত্ নিজো ইদু ন-নেযেল। তে সিবে নেযেইনে গাতীয় ওবেদ-ইদোমর ঘরত্ রাগেল। 14 গোজেন সুন্দুক্কো তিন মাস ওবেদ-ইদোম ঘরত্ তা পরিবার ইদু রলঅ। সেক্কে লগেপ্রভু তা পরিবাররে আর তার্ বেক্কানিরে বর্ দিলো। |
Copyright © 2021 Bangladesh Bible Society
Bangladesh Bible Society