১ বংশধর 12 - Chakma Bibleদায়ূদো পক্ষে যুদ্ধোগুরিয়্যেগুন 1 কীশের পুয়ো শৌল মুজুঙোত্তুন্ দায়ূদরে দূর্ গরানার্ পরেন্দি ভালোক্কুন্ মানুচ্ সিক্লগত্ দায়ূদো ইদু এচ্চোন্। যুদ্ধোর্ সময়োত্ যে যোদ্ধাগুনে দায়ূদোরে বল্ দুয়োন্ ইগুনে তারা ভিদিরে এলাক্। 2 ইগুনে ধনুবলা এলাক্ আর বাঙ্ আঢে আর ডেন্ আঢে সেল্ মারদে আর কান্টালোই পাত্তর গুলি মারি পারিদাক্। ইগুনে এলাক্ বিন্যামীন-গুট্টির শৌল বংশর মানুচ্। ইগুনো ভিদিরে এলাক্: 3 গিবিয়াতীয় শমায় পুয়ো অহীয়েষর আর যোয়াশ-ইগুনে নেতা এলাক্; অস্মাবত পুয়ো যিষীয়েল আর পেলট, বরাখা, অনাথোতীয় যেহূ; 4 গিবিয়োনীয় যিশ্ময়িয়- ইবে সেই “ত্রিশ” নাঙে বীরুনোর্ দল ভিদিরে এক্কো নেতা; যিরমিয়, যহসীয়েল, যোহানন, গদেরাথীয় যোষাবদ; 5 ইলিয়ূষয়, যিরীমোৎ, বালিয়, শমরিয়, হরূফীয় শফটিয়; 6 কোরহীয়গুনো ভিদিরে ইল্কানা, যিশিয়, অসরেল, যোয়েষর, যাশবিয়াম; 7 গদোরীয় যিরোহম পুয়ো যোয়েলা আর সবদিয়। 8 গাদীয়গুনোর্ কিজু মানুচ্ নিজো দল্ ছাড়িনে ধূল্যেচর-চাগালাত্ তাম্বুলো ধোক্ক্যেন জাগানত্ দায়ূদো ইদু এচ্ছ্যন্। তারা এলাক্ যুদ্ধোর্ শিক্ষ্যে-পেইয়্যে বোলী যোদ্ধা। তারা ঢাল আর সেল্ মারানা জানিদাক্। তারা মুয়োনি সিংহ ধোক্ক্যেন দর্গরেপারা এলঅ আর মুড়ো উরিঙো ধোক্ক্যেন তারা জদবদে দাবা দি পারিদাক্। 9 পোজিশন ইজেবে তারা অলাক্-পত্তমে এষর, দ্বিলম্বরত্ ওবদিয়, তিন লম্বরত্ ইলীয়াব, 10 চের্ লম্বরত্ মিশ্মন্না, পাচ্ লম্বরত্ যিরমিয়, 11-13 ছয় লম্বরত্ অত্তয়, সাত লম্বরত্ ইলীয়েল, আস্তো লম্বরত্ যোহানন, নয় লম্বরত্ ইল্সাবাদ, দশ লম্বরত্ যিরমিয় আর এগার লম্বরত্ মগ্বন্নয়। 14 এ গাদীয়গুনে এলাক্ সৈন্যদল সেনাপতি। তারা ভিদিরে যিবে বেগত্তুন্ চিগোন্ তে অলদে গায় একশঅ জন সং আর যিবে বেগত্তুন্ দাঙর্ তে অলদে গায় আজার্ জন সং। 15 সে বজর পত্তথম্ মাজত্ যেক্কে যর্দন গাঙ পানিগান পার উগুরে উদি যেইয়্যে সেক্কে ইগুনে পার্ ওইনে গাঙ পূগেন্দি আর পোজিমেন্দি কিজিঙোত্ বজত্তি গোজ্যে বেক্কুনোরে ধাবেই দুয়োন্। 16 ইগুন্ বাদেয়ো বিন্যামীন-গুট্টির অন্য মানুচ্চুনে আর যিহূদার কিজু মানুচ্ দায়ূদো সে তাম্বুলান ধোক্ক্যেন জাগানত্ তাইদু এচ্চ্যন্। 17 দায়ূদে তারা সমারে দেগা গুরিবাত্তে নিগিলি এইনে কলঅ, “তুমি যুনি শান্তির্ মনভাব লোইনে মরে বল্ দিবাত্তে এই থাগঅ সালে মুই তমা লগে এগত্তর্ অবাত্তে যুক্কোল্ আগং, মাত্তর্ মুই কনঅ অন্যেয় ন-গুরিলেয়ো যুনি কুজুরোমি গুরিনে শত্রু আঢত্ মরে তুলি দিবাত্তে এই থাগঅ সালে আমা পূরোণি মানুচ্চুনোর্ গোজেনে যেনে সিয়েনি দেগে আর তমা বিচেরানি গরে।” 18 যিবে পরেন্দি “ত্রিশ” নাঙে দলর্ নেতা ওইয়্যে সে অমাসয় উগুরে লগেপ্রভুর আত্মাগান্ এলঅ। সেক্কে তে কলঅ, “ও দায়ূদ, আমি তরই। ও যিশয় পুয়ো, আমি তর্ পক্ষেন্দি। মংগল ওক্, তর্ মংগল্ ওক্, মংগল্ ওক্ তারার্, যিগুনে তরে বল্ দুয়োন্, কিত্তে তঅ গোজেনে তরে বল্ দিয়্যে।” সেক্কে দায়ূদে তারারে গুজি লোইনে তার্ আক্রমণগুরিয়্যে দলর্ নেতা বানেল। 19 দায়ূদে যেক্কে পলেষ্টীয়গুনো লগে শৌল বিরুদ্ধে যুদ্ধো গুরিবাত্তে যার্ সেক্কে মনঃশি-গুট্টির কিজু মানুচ্ নিজো দল্ ছাড়িনে দায়ূদো ইদু যেইয়োন্। খালিক্ দায়ূদ আর তা মানুচ্চুনে পলেষ্টীয়গুনোরে বল্ ন-দুয়োন্, কিত্তে পলেষ্টীয় শাজন্গুরিয়্যেগুনে নিজো ভিদিরে কধা কনার্ পরেন্দি দায়ূদোরে বিদেয় গুরি দুয়োন্। তারা কোইয়োন্দে, “তে যুনি আমারে ছাড়ি তা গিরোজ্ শৌল সমারে যেইনে মিজেই সালে আমা মাদাগুন্ আরেবং।” 20 দায়ূদে সিক্লগত্ ফিরি যেবার্ সময়োত্ মনঃশি-গুট্টির যে মানুচ্চুন দল্ ছাড়িনে তাইদু যেয়োন্ তারা অলাক্ অদ্ন, যোষাবদ, যিদীয়েল, মীখায়েল, যোষাবদ, ইলীহূ আর সিল্লথয়। ইগুন অলাক্ মনঃশি-গুট্টির্ এক আজার্ সৈন্য উগুরে সেনাপতি। 21 অন্য আক্রমণগুরিয়্যে দলুনো বিরুদ্ধে ইগুনে দায়ূদোরে বল্ দুয়োন্। ইগুনে বেক্কুনে বোলী যোদ্ধা আর দায়ূদ সৈন্যদল সেনাপতি। 22 এধোক্ক্যেন গুরিনে দিনকে দিন্ মানুচ্চুনে দায়ূদরে বল্ দিবাত্তে এজা ধুরিলাক্। যেরেন্দি গোজেন সৈন্যদল ধোক্ক্যেন তার্ এক্কো দাঙর্ সৈন্যদল্ উদিলো। হিব্রোণত্ আরঅ ভালুক্কুনে মিজেলাক্ 23 লগেপ্রভু কধা মজিম যুদ্ধো গুরিনে শৌল রেজ্যগান্ দায়ূদ আঢত্ তুলি দিবাত্তে যিগুনে আত্যের্ লোইনে হিব্রোণত্ দায়ূদ ইদু এচ্ছ্যন্ তারা জনেদি ইগুন্: 24 যুদ্ধোর্ পোজাগে সাজেয়্যে ঢাল আর সেল্বলা যিহূদা-গুট্টির্ ছয় আজার্ আসতোশত্ জন। 25 শিমিয়োন-গুট্টির সাত আজার্ একশ বোলী যোদ্ধা। 26 লেবি-গুট্টির চের্ আজার্ ছয়শ জন। 27 তারা ভিদিরে এলাক্ হারোণ বংশর নেতা যিহোয়াদা, যিবে লগে এলাক্ তিন আজার্ সাতশ জন মানুচ্। 28 ইগুন্ বাদেয়ো এলঅ সাদোক্ নাঙে এক্কো বোলী গাবুজ্যে যোদ্ধা আর তা বংশর্ বেইশজন সেনাপতি। 29 শৌল নিজো গুট্টির্, অত্তাৎ বিন্যামীন-গুট্টির তিন আজার্ জন। মাত্তর্ এ গুট্টির্ বেগ্ভাগর্ মানুচ্ সেক্কেয়ো শৌল গিরির্ পক্ষেন্দি এলাক্। 30 ইফ্রয়িম-গুট্টির কুড়ি আজার্ আস্তোশ বোলী যোদ্ধা। ইগুনে নিজো নিজো বংশগুনো ইদু নাঙ্গোজ্যে এলাক্। 31 মনঃশি-গুট্টির অদ্দেক্ বংশ আদার আজার্ মানুচ্। এ মানুচ্চুনোরে নাঙ্ দিইনে কুয়া ওইয়্যেদে যেনে তারা এইনে দায়ূদোরে রাজা বানান্। 32 ইষাখর-গুট্টির দ্বিশত্ জন নেতা। তারা অলাক্ বুদ্ধিবলা আর বুঝি পারিদাক্ ইস্রায়েলীয়গুনোর্ কক্ক্যে কি গরা পুরিবো। তারা সমারে এলাক্ তারা তলেদি নিজো গুট্টির্ মানুচ্চুনে। 33 সবূলূন-গুট্টির পঞ্চাশ আজার্ কাবিদ্যং সৈন্য। তারা নানান্ বাবোত্যে আত্যের্ লোইনে যুদ্ধো গুরি পারিদাক্। তারা গমেডালে বিশ্বেজ্ গুরিনে দায়ূদোরে বল্ দুয়োন্। 34 নপ্তালি-গুট্টির এক আজার্ সেনাপতি। তারা সমারে এলদে ঢাল আর সেল্বলা সাত্রিশ আজার্ মানুচ্। 35 দান-গুট্টির আটেশ আজার্ ছয়শ কাবিল সৈন্য এলাক্। 36 আশের-গুট্টির চোল্লিশ আজার্ কাবিল সৈন্য এলাক্। 37 নানান্ বাবোত্যে আত্যের্ লোইনে যর্দন পূগেন্দিত্তুন্ এলাক্ এক লাখ্ কুড়ি আজার্ মানুচ্। ইগুনে এচ্ছ্যন্ রূবেণ, গাদ আর মনশিঃ-গুট্টির অদ্দেক্ মান্জ্যর ভিদিরেত্তুন্। 38 ইগুনে বেক্কুনে এলাক্ কাবিল্ যোদ্ধা। পুরো ইস্রায়েল উগুরে দায়ূদোরে রাজা বানেবাত্তে তারা পুরোপুরি মনান্ ঠিগ্ গুরিনে হিব্রোণত্ এচ্ছ্যন্। দায়ূদোরে রাজা গরানা পৌইদ্যেনে বাদবাগি ইস্রায়েলীয়গুনেয়ো একমনা ওইয়োন্। 39 এ মানুচ্চুনে তিন দিন সং দায়ূদ সমারে থেইনে হানা-দানা গুরিলাক্। সিদুগোর্ মানুচ্চুনে তারার্ হানা-দানা বেবস্থা গোজ্যন্। 40 ইগুন্ বাদেয়ো ইষাখর, সবূলূন আর নপ্তালি চাগালাত্তুন্অ মানুচ্চুনে গাধা, উট, খচ্চর আর বলদ পিদিঠ্ গুরিনে তারাত্তে হানা আনিলাক্। ইস্রায়েল দেজর্ মানুচ্চুনোর্ মনত্ রঙ্গ-ফুত্তি এলঅ বিলিনে তারা বোউত্ মোয়দে, ডুমুর আর কিশ্মিশোর তাল, আংগুর-রস, তেল আর গোরু, ছাগল আর ভেড়া লোই আন্যন্। |
Copyright © 2021 Bangladesh Bible Society
Bangladesh Bible Society